BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

مۇمكىندىگى شەكتەۋلى جاندار ٴۇشىن تەگىن سپورت قولجەتىمدى بولا تۇسپەك 

فوتو: astana.gov.kz

استانا، baq.kz. مۇگەدەكتىگى بار استانالىقتار ٴۇشىن تەگىن سپورت قولجەتىمدى بولا تۇسپەك. بۇل تۋرالى مەموراندۋمدى ەلوردا اكىمدىگى مەن استانانىڭ پاراليمپيادالىق جاتتىقتىرۋ ورتالىعىنىڭ «كاسپيي» سپورتتى دامىتۋ قورى بەكىتتى، دەپ حابارلايدى قالالىق اكىمدىكتىڭ رەسمي سايتى.

پاراليمپيادالىق جاتتىقتىرۋ ورتالىعى ەلوردادا ٴوز جۇمىسىن وسى جىلى باستادى. ال 2019 جىلدىڭ 1 قاڭتارىنان باستاپ ول تەك پاراليمپيادا سپورتشىلارى ٴۇشىن عانا ەمەس، دەنە شىنىقتىرۋمەن، سپورتپەن اينالىسقىسى كەلەتىن بارلىق مۇمكىندىگى شەكتەۋلى ادامدار ٴۇشىن دە اشىق بولادى. ٴتيىستى مەموراندۋمعا مەملەكەت-جەكەمەنشىك ارىپتەستىك اياسىندا «كاسپيي» سپورتتى دامىتۋ قورى» قوعامدىق قورىنىڭ پرەزيدەنتى قازبەك قاپانوۆ پەن استانانىڭ قالالىق ورتانى رەگەنەراسيالاۋ باسقارماسىنىڭ باسشىسى عالي يسقاليەۆ قول قويدى.

«استانا اكىمدىگىنىڭ قولداۋىنىڭ ارقاسىندا بۇل ورتالىقتىڭ 2019 جىلدىڭ 1 قاڭتارىندا «مۇمكىندىگى شەكتەۋلى ازاماتتار ٴۇشىن پاراليمپيادالىق جاتتىقتىرۋ ورتالىعى مەن «تارلان» مۇز ارەناسىنىڭ قىزمەتىن ۇيىمداستىرۋ» جوباسىنىڭ شەڭبەرىندە قالانىڭ بارلىق مۇگەدەك جاندارىن قارسى الۋعا بۇگىن تولىقتاي دايىن ەكەنىن اۋىز تولتىرىپ ايتا الامىز»، - دەدى قر ۇلتتىق پاراليمپيادا كوميتەتىنىڭ اتقارۋشى ديرەكتورى ەرلان سۇلەيمەنوۆ.

«انىقتاما ٴۇشىن: استانادا 24 مىڭعا جۋىق مۇگەدەك ادام بار. ولاردىڭ جارتىسىنا جۋىعى – 1، 2 توپتاعى مۇگەدەكتەر. سونىڭ ىشىندە تەك 300-گە جۋىق مۇگەدەكتىگى بار سپورتشى «جىگەر» ورتالىعىندا جاتتىعادى. بۇل، ارينە وتە از. دەگەنمەن بۇدان بىلاي اتالمىش كورسەتكىش ارتا تۇسپەك. 2019 جىلدان باستاپ قالاداعى بارلىق مۇگەدەكتەر تاجىريبەلى جانە وقىتىلعان جاتتىقتىرۋشىلاردىڭ جەتەكشىلىگىمەن سپورتتىڭ وننان استام تۇرىمەن اينالىسا الاتىن بولادى»، - دەدى ول.

جۇرگىزىلگەن زەرتتەۋلەرگە سايكەس، جوبا ۇيىمداستىرۋشىلارى سپورتتىق جاتتىعۋلاردىڭ استانالىق مۇمكىندىگى شەكتەۋلى تۇرعىنداردىڭ جارتىسىنان كوبىنىڭ اراسىندا سۇرانىسقا يە بولادى دەپ كۇتەدى. پاراليمپيادالىق جاتتىقتىرۋ ورتالىعىنىڭ كۇنىنە 780 ادامدى قابىلدايتىن قاۋقارى بار. «تارلان» مۇز ارەناسى مۇمكىندىگى شەكتەۋلى ادامدار ٴۇشىن كەلەسى جىلدىڭ شىلدەسىنە قاراي بەيىمدەندىرىلەدى دەپ جوسپارلانىپ وتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي