BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

كانەلو مەن گاتتيدىڭ جولىن تاڭداعان سادريددين احمەدوۆ

استانا، baq.kz ٴتىلشىسى. قازاق بوكسشىلارى ادەتتە كاسىپقوي بوكسقا بىر-ەكى وليمپيادا ويىندارىنا قاتىسىپ، جۇلدەگە ٴىلىنىپ جاتسا عانا اۋىساتىن ەدى. وسى سترەوتيپتى بۇزعان وتانداستارىمىزدىڭ ٴبىرى – سادريددين احمەدوۆ.

سادريددين احمەدوۆ دەگەن كىم؟

قازاقستاننىڭ بوكس جانكۇيەرلەرىنىڭ ٴبارى بىردەي بۇل جىگىت تۋرالى بىلە بەرمەيدى. ول ۆاسيليي جيروۆ، گەنناديي گولوۆكين، بەيبىت شۇمەنوۆ سەكىلدى اۋەسقوي بوكستان وليمپيادا ويىندارىنا قاتىسقان جوق. بىلايشا ايتقاندا، ەرەسەكتەر اراسىندا ايتارلىقتاي جەتىستىگى جوق. وسى ولقىلىقتىڭ ورنىن تولتىرۋ ٴۇشىن، بۇل جايلى كەڭىرەك تارقاتۋدى ٴجون سانادىق.

الدىمەن، قىسقاشا تانىستىرىپ وتسەك. سادريددين 1998 جىلى 31 قاڭتاردا قازىرگى تۇركىستان وبلىسىنىڭ جەتىساي قالاسىندا دۇنيەگە كەلگەن. كوپ بالالى وتباسىندا وسكەن. 7 جاسىندا ەلوردامىز استاناعا كوشىپ، 57-مەكتەپتە وقىعان. كوپشىلىك جاس بوكسشىنىڭ ەسىمىنە قاتىستى ٴار ٴتۇرلى پىكىرلەر ايتىپ جاتادى. بوكسشىنىڭ ايتۋىنشا، سادريددين دەگەن ٴسوزدىڭ ماعىناسىن ارابشادان اۋدارعاندا «يسلام ماقتانىشى» دەگەندى بىلدىرەدى ەكەن.

بوكسپەن استاناعا كەلگەن سوڭ اينالىسقان. مەكتەپ جۇرگەندە-اق وزگەلەردەن ەرەكشە دارىنى بار ەكەنىن اڭعارتىپ، ٴار ٴتۇرلى جارىستاردان جۇلدەلى ورالىپ كوزگە تۇسەدى. سونىڭ ارقاسىندا قازاقستان جاستار قۇراماسىنىڭ ساپىنا قابىلداندى.

ٴسادريدديننىڭ تالانتىن اشقان قازاقستاننىڭ ەڭبەك سىڭىرگەن جاتتىقتىرۋشىسى ماۋلەت مۇستافين بولاتىن.

«احمەدوۆ ماعان بوكسپەن اينالىسۋعا 10 جاسىندا كەلدى. مەن وعان، ول ماعان سەندى. ٴسويتىپ، ەكەۋىمىزدىڭ تاندەمىمىز ٴوز جەمىسىن بەردى. توعىز جىلدىڭ ىشىندە ٴبىراز دودالارعا قاتىستىق. 2014 جىلى بولگارياداعى الەم چەمپيوناتىندا سادريددين ٴۇش كەزدەسۋ وتكىزدى. ول جولى جۇلدەگە ىلىگە المادى. ٴبىراق بۇل چەمپيونات وعان ساباق بولدى. سول كەزدە-اق شاكىرتىمنىڭ پوتەنسيالىن بايقادىم. كەلەسى جولى چەمپيوناتتا جەڭىسكە جەتەتىنىمىزگە سەنىمدى بولدىم. سادريددين مەنىڭ ٴۇمىتىمدى اقتادى»، – دەيدى ماۋلەت مۇستافين قازاقستان بوكس فەدەراسياسىنىڭ ٴباسپاسوز قىزمەتىنە بەرگەن سۇحباتىندا.

2016 جىلى رەسەيدىڭ سانكت-پەتەربۋرگ قالاسىندا وتكەن الەم چەمپيوناتىندا وعان تەڭ كەلەتىن ەشكىم بولعان جوق. احمەدوۆ «قازاقتىڭ سالماعى» اتانىپ كەتكەن 69 كەلىدە ونەر كورسەتتى. الەم چەمپيوناتىندا تەحنيكالىق ارسەنالىنىڭ مۇمكىندىگى قانشالىقتى جوعارى ەكەنىن كورسەتىپ، كورەرمەندەردىڭ قوشەمەتىنە بولەندى. مىسالى، ليتۆادان كەلگەن قارسىلاسىن مەرزىمىنەن بۇرىن ۇتتى، ونى ەكى رەت نوكداۋنعا ٴتۇسىردى. شيرەك فينالدا ٴسادريدديننىڭ جويقىن سوققىسىنا قىرعىز بوكسشىسى تاپ بولدى.

سانكت-پەتەربۋرگتە سادريددين ٴۇشىن وزبەك ۇلىقبەك سوبيروۆپەن كەزدەسۋ ەڭ ماڭىزدى بولاتىن. سەبەبى، بۇعان دەيىن ٴبىر مارتە ەسە جىبەرىپ العان.

«باپكەرلەرىم ۇلىقبەك سوبيروۆپەن جاقىن قاشىقتىقتا جۇدىرىقتاسۋ كەرەكتىگىن ايتتى. وزىمە ول سالماق قۋىپ، شارشاعان سياقتى بولىپ كورىندى. قارسىلاسىمنىڭ وسال تۇسىن پايدالانىپ، ٴبىرىنشى نومىرمەن جۇدىرىقتاستىم. العاشقى راۋندتا ونى بارىنشا شارشاتىپ الۋ كەرەك بولدى. چەمپيونات باستالماي تۇرىپ ىشكى تۇيسىگىمدە وسى بوكسشىمەن شىعىپ قالام-اۋ دەگەن وي بولدى. ويتكەنى، ۇلىقبەكتە كەتكەن ەسەم بار ەدى. 2015 جىلى كەزدەسىپ، جەڭىلىپ قالعان ەدىم. ول كەزدە ەندى 69 كەلىگە اۋىسىپ، جاڭا سالماققا بوي ۇيرەتىپ جۇرگەن كەزىم. باستى ماقسات قارىمتا قايتارۋ بولدى. ودان بولەك، ەستەرىڭىزدە بولار، ريو وليمپياداسىنان كەيىن قازاقستاندىق بوكسشىلار، وزبەك بوكسشىلارىنان تومەن ناتيجە كورسەتتى دەپ، جانكۇيەرلەر تاراپىنان ۇلكەن سىنعا ۇشىراعان ەدى. ويىمدا سول ٴبىر وكىنىشتى جانكۇيەرلەرگە ٴبىر ساتكە بولسىن ۇمىتتىرىپ، قالاي دا جەڭىسكە جەتۋىم كەرەك ەدى»، – دەيدى «ەگەمەن قازاقستان» گازەتىنىڭ تىلشىسىنە بەرگەن سۇحباتىندا.

اۋەسقوي بوكستا قالمادى

جاستار اراسىنداعى الەم چەمپيوناتىن ۇتقاننان كەيىن سادريددين احمەدوۆ تە ابىلايحان ٴجۇسىپوۆ سەكىلدى اۋەسقوي بوكستاعى كارەراسىن جالعاستىراتىن شىعار دەپ ويلاعانبىز. ٴبىراق ول كوپ جۇرگەن جوق.

قازاقستاندا اۋەسقوي بوكستا 69 كەلىدە باسەكەلەستىك وتە جوعارى. باقتيار ارتايەۆ، باقىت سارسەكبايەۆ، سەرىك ساپيەۆ، دانيار ەلەۋسىنوۆ سەكىلدى بوكسشىلارىمىز وسى سالماقتا وليمپيادا چەمپيونى اتانعان. اتالعان بوكسشىلاردىڭ ٴىزباسارلارى دا جەتەرلىك بولاتىن. اسلانبەك شىمبەرگەنوۆ، ابىلايحان ٴجۇسىپوۆ بار. سولارمەن باسەكەلەس بولۋعا، ٴتىپتى، بولاشاقتا ۇلتتىق قۇرامانىڭ ٴبىرىنشى ٴنومىرلى بوكسشىسى رەتىندە سادريددين توكيوداعى وليمپياداعا بارۋى مۇمكىن دەگەن بولجامدار ٴجيى ايتىلدى. الايدا، 2017 جىلى احمەدوۆ كاسىپقوي بوكسقا اۋىسىپ كەتتى.

«قازاقستاندىق ارتۋرو گاتتي»

جوعارى دا جازعانىمىزداي، بىزدە بوكسشىلاردىڭ كوبىسى 25-تەن اسىپ، 30 جاسقا جاقىنداعان تۇستا كاسىپقوي بوكسقا اۋىسىپ جاتادى. ال سادريددين باسقا جولدى تاڭدادى. مەكسيكالىق ساۋل الۆارەس العاشقى جەكپە-جەگىن 15 جاسىندا وتكىزگەن. قازىرگى كەزدە جەرلەسىمىزدى اتاقتى ارتۋرو گاتتيمەن سالىستىرىپ جۇرگەندەر كوپ. ول دا كەزىندە كاسىپقوي بوكستى 18 جاسىندا باستاعان.

«بالكىم، كوپشىلىك سىرتقى كەسكىن كەلبەتىمىز ۇقساعان سوڭ سالىستىراتىن شىعار. ٴبىراق مەن ارتۋرو گاتتيدىڭ دەڭگەيىندەگى بوكسشىمىن دەپ ايتا المايمىن. ويتكەنى، ماعان ٴالى كوپ جۇمىس ىستەۋ كەرەك. قازىرگى كەزدە جوعارى جەتىستىككە جەتۋ ٴۇشىن ەرىنبەي جاتتىعۋ كەرەك دەگەن ماقسات قويىپ وتىرمىن»، – دەيدى بوكسشى prosports.kz سايتىنا بەرگەن سۇحباتىندا.

كاسىپقوي بوكستا كىمدەردى جەڭدى؟

سادريددين دەبيۋتتىك كەزدەسۋىن وسى جىلدىڭ 8 ساۋىرىندە وتكىزدى. كانادانىڭ كۆەبەك قالاسىندا وتكەن بوكس كەشىندە ول 26 جاستاعى مەكسيكالىق توني باررەراسپەن (1-1، 1 كو) جولىقتى. قازاقستاندىق بوكسشىعا قارسىلاسىن جەڭۋ ٴۇشىن 31 سەكۋندتىڭ ٴوزى جەتكىلىكتى بولدى.

ودان كەيىن مامىر ايىندا داۆيد لەمە – كاريم اشۋر جەكپە-جەگى اياسىندا ارگەنتينالىق اريەليا الەحانرو زامپەدريمەن جۇدىرىقتاستى. ٴبىرىنشى ورتا سالماق دارەجەسى بويىنشا ٴتورت راۋندقا جوسپارلانعان كەزدەسۋ ٴبىرىنشى راۋندتا اياقتالدى.

ماۋسىم ايىندا 28 جاستاعى مەكسيكالىق بوكسشى گۋستاۆو گاريبايدى بەسىنشى راۋندتا نوكاۋتقا جىبەردى. بۇل گاريبايدىڭ سپورتتىق كارەراسىنداعى ٴ11-شى جەڭىلىسى بولاتىن.

جاقىندا سادريددين كاسىپقوي رينگتەگى ٴتورتىنشى جەڭىسىنە قولىنا جەتكىزدى. ول بۇل جولى كەزدەسۋىن كانادانىڭ مونرەال قالاسىندا وتكىزدى. 20 جاستاعى جەرلەسىمىز مەكسيكالىق حاۆەر حەسۋس مەندوسپەن جولىققان (7-5-1، 6 كو). جەكپە-جەك 6 راۋندقا جوسپارلانعان ەدى. ٴبىراق احمەدوۆ قارسىلاسىن ٴبىرىنشى راۋندتا-اق سۇلاتىپ تاستادى. قازاق بوكسشىسىنىڭ جەڭىسكە جەتۋىنە 57 سەكۋند جەتكىلىكتى بولدى. وسىلايشا، ول كاسىپقوي رينگتەگى ٴتورت جەڭىسىندە نوكاۋتپەن اياقتاپ وتىر. ال مەندەس كارەراسىندا التىنشى رەت قارسىلاسىنا ەسە جىبەرىپ الدى.

جەكپە-جەكتەن كەيىن 20 جاستاعى بوكسشىنىڭ تالانتىنا كانادالىق ساراپشىلار دا وڭ باعاسىن بەردى.

«مەن بۇل بوكس كەشىندە بولدىم. احمەدوۆ – وسى كەشتەگى ەڭ جاس تالانتتى بوكسشى بولدى. ونىڭ قارسىلاسىن نوكاۋتقا ٴتۇسىرۋى ەرەكشە ەستە قالدى. مەندوزا قازاقستاندىق بوكسشىعا قارسىلىق كورسەتە المادى. ٴتىپتى، ەشقانداي مۇمكىندىگى بولعان جوق. مەنىڭشە، احمەدوۆكە ەندى قارىمدى قارسىلاستارمەن شىعۋ قاجەت. مۇنداي ٴالسىز بوكسشىلاردى جىلدام نوكاۋتپەن جەڭۋ وعان سونشالىقتى ابىروي اكەلمەيدى. ٴسادريدديننىڭ پوتەنسييالى مول. مەنىمەن مامانداردىڭ كوبىسى كەلىسەدى دەپ ويلايمىن. ول ٴوزىنىڭ جوسپارىن جىلدام جۇزەگە اسىرۋىنا تولىق مۇمكىندىگى بار»، – دەيدى كانادالىق ساراپشى لورەنت پوۋلين «vesti.kz» سايتىنا بەرگەن سۇحباتىندا.

سونداي-اق تىلشىلەر قاۋىمى دا قازاقستاندىق بوكسشىعا جوعارى باعا بەرۋدە. مىسالى، سولاردىڭ بىرەۋىنىڭ پىكىرىن ۇسىنساق:

«مەن شىنىمەن بۇل بالانىڭ تالانتىن جوعارى باعالايمىن. ونىڭ بويىندا بوكسشىعا ٴتان قاسيەتتىڭ بارلىعى بار. جاقسى اسەر قالدىردى دەپ جازادى»، – boxrec سايتىنىڭ رەداكتورى فيليپپ سەنت-مارتين.

كانادادا جاتتىعادى

كاسىپقوي بوكستا تابىسقا جەتۋ تەك تالانتقا عانا بايلانىستى ەمەس. كوبىنەسە، نەگىزگى پروموۋتەرلىك كومپانيا مەن ونىڭ مەنەدجەرىنە كەلىپ تىرەلەدى. بۇل رەتتە احمەدوۆ كانادانىڭ eye of the tiger managament پروموۋتەرلىك كومپانياسىن تاڭداعان. بۇل قازاقستاندىق جانكۇيەرلەرگە جاقسى تانىس پروموۋتەرلىك ورتالىق. سەبەبى، بۇعان دەيىن باتىر جۇكەمبايەۆ، ابىلايحان حۇساينوۆ جانە نۇرزات سابىروۆ سىندى بوكسشىلار وسى كومپانيامەن كەلىسىمشارتقا وتىرعان. جەتەكشىسى – كاميل ەستەفان. جەرلەسىمىزدىڭ مەنەدجەرىنىڭ ەسىمى – اننا رەۆا. ٴسادريدديندى ميحايل رومانچۋك جاتتىقتىرادى. ال جەكپە-جەكتەرگە تانىمال مامان مايكل موففتىڭ جەتەكشىلىگىمەن دايىندالادى.

ٴسادريدديننىڭ سالماعىنداعى چەمپيوندار

قازاقستاندىق بوكسشى ٴبىرىنشى ورتا سالماقتا ونەر كورسەتەدى. 69،9 كەلىگە دەيىن سالماقتا (154 فۋنت) قانات يسلامدا ونەر كورسەتەتىنىن ايتا كەتۋگە بولادى. ال چەمپيوندارعا توقتالىپ وتسەك.

كاسىپقوي بوكستاعى ەڭ بەدەلدى تۇجىرىم wbc سانالادى. بۇكىلالەمدىك بوكس كەڭەسىنىڭ وسى سالماقتاعى بەلبەۋى 28 جاستاعى دجەرمەلل چارلوعا تيەسىلى. ول بۇل بەلبەۋ 2016 جىلدىڭ مامىر ايىنان بەرى يەلىك ەتىپ كەلەدى. وسى ۋاقىتقا دەيىن ٴۇش رەت ٴساتتى قورعاعان.

wba تۇجىرىمىنىڭ ەكى چەمپيونى بار. «سۋپەر» بەلبەۋدى وسى جىلدىڭ 7 ساۋىرىندە كۋبالىق ەريسلاندي لارادان 28 جاستاعى اقش بوكسشىسى دجاررەتت حيورد تارتىپ العان. ول سونداي-اق ibf بەلبەۋىنە دە يە. ال وسى تۇجىرىمنىڭ ەكىنشى بەلدىگى ارگەنتينالىق برايان كارلوستا.

wbo تۇجىرىمىندا مەكسيكالىق حايمە مۋنگيانىڭ داۋرەنى ٴجۇرىپ تۇر. 22 جاستاعى بوكسشى وسى جىلدىڭ 12 مامىرىندا سادام ٴاليدى ۇتىپ، العاشقى بەلدىگىنە قول جەتكىزگەن. ودان كەيىن بەلبەۋىن ەكى رەت ٴساتتى قورعادى.

wbo تۇجىرىمىنىڭ قۇرلىقتىق بەلدىگى (nabo) 34 جاستاعى قازاقستاندىق قانات يسلامعا (25-0، 20 كو) تيەسىلى.

«الداعى ەكى-ۇش جىلدا الەم چەمپيونى اتاعىن تالاسقىم كەلەدى. ول ٴۇشىن ايتۋلى ٴىرى جەكپە-جەكتەر وتكىزۋ كەرەك. الدىمەن، جاستار اراسىنداعى الەم چەمپيونى بەلبەۋىنە يە بولسام دەپ ويلايمىن. سوسىن ۋاقىت كورسەتەدى. قازىرگى كەزدە شارشى الاڭعا شىعىپ، رەيتينگىمدى جاقسارتۋ. سول كەزدە چەمپيوندىققا تالاسۋعا مۇمكىندىك تۋادى. مەنىڭ ارمانىم – كاسىپقوي بوكستا الەم چەمپيونى اتانۋ. وسى ماقساتىما جەتۋ ٴۇشىن ايانىپ قالمايمىن»، – دەيدى بوكسشى prosports.kz سايتىنا بەرگەن سۇحباتىندا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي