BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بوكستان قازاقستان چەمپيوناتى: سەنساسيالار، جاڭا كوشباسشىلار ساراپتاما

استانا، baq.kz ٴتىلشىسى. ەلىمىزدىڭ باتىس وڭىرىندەگى اقتاۋ قالاسىندا بوكستان 2018 جىلعى قازاقستان چەمپيوناتى مارەسىنە جەتتى. بيىلعى بىرىنشىلىككە ەلىمىزدەگى مىقتى بوكسشىلاردىڭ بارلىعى قاتىستى. ەشقايسىنا ەركىندىك بەرىلگەن جوق. چەمپيونات قورىتىندىسىنا سايكەس 2019 جىلعى قۇراما قايتا جاساقتالدى.

چەمپيوناتتىڭ الدىنداعى جاڭالىق

وسى چەمپيوناتتىڭ الدىندا 2012 جىلى لوندون جانە 2016 جىلى ريو-دە-جانەيرودا وتكەن وليمپيادا ويىندارىنىڭ كۇمىس جۇلدەگەرى ادىلبەك نيازىمبەتوۆ سپورتتىق مانسابىن اياقتاعانىن مالىمدەدى.

«2018 جىلمەن مەنىڭ بوكستاعى كاسىبي جولىم ٴتامام دەۋگە بولادى. سوڭىمىزدان ٴوسىپ كەلە جاتقان جاستار بار. سولار مەن الماعان اسۋدى باعىندىرسىن. الداعى ۋاقىتتا وڭىردە شاعىن فۋتبولدى دامىتۋ بويىنشا جۇمىستار اتقارعىم كەلەدى. ەكىنشى جاعىنان 15 جىل بويى ۇنەمى وقۋ-جاتتىعۋ جيىندارى دەپ ٴۇي بەتىن كورمەدىك. ۇنەمى تۇزدە ٴجۇردىم. سپورتتا جەتىستىككە جەتۋمەن بىرگە دەنساۋلىق تا سىر بەردى. ۇزدىكسىز جاتتىعۋلار سالدارىنان بەلىمدە «گرىجا» پايدا بولعان. بۇل ريو وليمپياداسىنىڭ كەزىندە قاتتى قينادى. سوعان قاراماستان جاتتىعۋ جاساي بەردىك. ٴۇي ٴىشى 2012 جىلى بوكستى قويساڭشى دەگەن. ٴبىراق مەن جاتتىعۋدىڭ ادامىمىن. بىردەن توقتاعىم كەلمەدى. بيىل كوكتەمدە بوكس فەدەراسياسى تاراپىنان بولىنگەن قارجىمەن وڭتۇستىك كورەياعا ەم-دوم الۋعا بارىپ كەلدىم. ول جاقتاعى ماماندار بەلىمنىڭ قازىرگى احۋالىمەن سپورتتا جۇرە بەرۋگە بولمايتىنىڭ قاتاڭ ەسكەرتتى. باپكەرىممەن اقىلداسا كەلە، بىلعارى قولعاپتى شەگەگە ىلۋگە تۋرا كەلدى»، – دەيدى بوكسشى «ەگەمەن قازاقستان» گازەتىنە بەرگەن سۇحباتىندا.

81 كەلىدە 2011 جىلدان بەرى ٴىرى جارىستاردىڭ بارلىعىنا ادىلبەك نيازىمبەتوۆتىڭ بارىپ جۇرگەنى بەلگىلى. ول ەكى وليمپيادا ويىندارىنا قاتىستى. ەندى بۇل سالماقتا جاستارعا ورىن اشىلىپ وتىر.

ۇلتتىق قۇرامانىڭ باس باپكەرى مىرزاعالي ايتجانوۆ بوكسشىنىڭ بۇل مالىمدەمەسىنە قاتىستى پىكىر بىلدىرگەن.

«مەن جانە بارلىق جانكۇيەر ادىلبەككە رەنجىمەۋىمىز قاجەت. ونىڭ قازاقستان بوكسىن دامىتۋعا قوسقان ۇلەسى ٴۇشىن العىسىمىزدى بىلدىرەمىز. ول الەمنىڭ ٴار بۇرىشىندا ەل نامىسىن قورعادى. الەم چەمپيوناتى مەن وليمپيادا فينالىنا ساناۋلى ادامدار عانا جەتەدى. سونىمەن قاتار، ادىلبەك ازيا ويىندارىنىڭ چەمپيونى دا بولدى. مۇنداي جەتىستىك اركىمنىڭ قولىنان كەلە بەرمەيدى»، – دەيدى ايتجانوۆ قازاقستان بوكس فەدەراسياسىنىڭ ٴباسپاسوز قىزمەتىنە بەرگەن سۇحباتىندا.

اقتاۋدا العاش رەت

جارىسقا ەلىمىزدىڭ 14 وبلىسى مەن 3 قالاسىنان جينالعان 198 بوكسشى قاتىستى. ٴاىۆا بوكستان وليمپيادا جۇلدەسى ساراپقا سالىناتىن سالماق دارەجەلەرىن ازايتقانى بەلگىلى. بۇدان بىلاي 4 جىلدا ٴبىر وتەتىن وليمپيادا ويىندارىندا ەرلەر تەك 8 سالماقتا باق سىنايدى. الايدا، اقتاۋداعى قازاقستان بىرىنشىلىگىندەگى كەزدەسۋلەر ون سالماق بويىنشا وتكىزىلدى.

چەمپيوناتتى ماڭعىستاۋ وبلىسىنىڭ اكىمى ەرالى توعجانوۆ كەلىپ اشتى.

«ەردىڭ قارىمى مەن رۋحىن قوسا سىنعا سالار شەشۋشى ساتتە بارلىق سپورتشىعا تەك ساتتىك سەرىك بولىپ، جەڭىستىڭ جالاۋىن جەلبىرەتۋدى عانا تىلەيمىن! اتاۋلى جارىستىڭ ماڭعىستاۋ وبلىسىندا وتۋىنە ىقپال ەتكەن قازاقستان بوكس فەدەراسياسىنا العىسىم شەكسىز! بۇل ٴبىزدىڭ ٴوڭىردىڭ ابىرويىن اسقاقتاتا بەرمەك»، – دەدى وبلىس اكىمى اشىلۋ سالتاناتىندا.

ماڭعىستاۋ وبلىسى بوكس فەدەراسياسىنىڭ پرەزيدەنتى مارات ورمانوۆتىڭ ايتۋىنشا، بۇل وڭىردە بوكستان ەل چەمپيوناتى العاش رەت وتكىزىلىپ وتىر ەكەن.

فينالعا دەيىنگى سەنساسيالار

فينالعا دەيىنگى سەنساسيالاردىڭ ٴبىرى رەتىندە 2014 جىلعى ازيا ويىندارىنىڭ چەمپيونى ٴىلياس سۇلەيمەنوۆتىڭ ۇتىلىپ قالعانىن ايتۋعا بولادى.

28 جاستاعى ەكى دۇركىن قازاقستان چەمپيونى شيرەك فينالدا وزىنەن 8 جاس كىشى ورازبەك اسىلقۇلوۆقا ەسە جىبەردى. ٴسويتىپ، جۇلدەگە ىلىگە الماي قالدى.

«ٴتۋرنيردى ۇتىپ، قازاقستان قۇراماسىنا قابىلدانعىم كەلەدى. سول ٴۇشىن شيرەك فينالدا ٴىلياسقا قارسى جاقسى دايىندالدىم. ىشتەي ٴوز-وزىمدى قايرادىم. ونىڭ قالاي جۇدىرىقتاساتىنىن جاقسى بىلەمىن. جەكپە-جەكتەرىن كورىپ شىقتىم. باپكەرىم، شارشى الاڭدا ٴوزىمدى قالاي ۇستاۋىم كەرەكتىگىن ايتتى. تاپسىرمانى ورىنداپ، جەڭىسكە جەتتىم»، – دەيدى ورازبەك اسىلقۇلوۆ جەكپە-جەكتەن كەيىن vesti.kz تىلشىسىنە بەرگەن سۇحباتىندا.

ايتپاقشى، اقمولا وبلىسىنىڭ جاس بوكسشىسى فينالعا دەيىن جەتتى. سونداي-اق بىلتىر فينالعا شىققان 49 كەلىدەگى شىمكەنتتىڭ بوكسشىسى شالقار ايقىنباي دا شيرەك فينالدا ٴسۇرىندى. ول جامبىلدان كەلگەن ەرمەك ماديەۆتىڭ مىقتىلىعىن مويىندادى. وتكەن جىلى شىمكەنتتە 52 كەلىدە ەل چەمپيونى اتانعان ولجاس باينيازوۆ استانالىق بوكسشى ازات ماحمەتوۆتەن ۇتىلىپ، ٴوز اتاعىن قورعاي المادى.

تەمىرتاس ٴجۇسىپوۆ – بەس دۇركىن چەمپيون

اقتاۋداعى قازاقستان چەمپيوناتىندا بۇعان دەيىن توپ جارىپ جۇرگەندەردىڭ اراسىندا بىرنەشەۋى تاعى دا وزدەرىنىڭ مىقتىلىقتارىن مويىنداتتى. ەڭ جەڭىل سالماقتا 30 جاستاعى تەمىرتاس ٴجۇسىپوۆ وسىمەن التىنشى رەت ەل چەمپيوناتىندا فينالعا شىقتى. سپورتتىق كارەراسىندا ەل بىرىنشىلىگىندە تەك ٴبىر رەت ٴبىرجان جاقىپوۆقا ەسە جىبەرگەن. بۇل جولى ول فينالدا جامبىل وبلىسىنىڭ بوكسشىسى ەرمەك ماديەۆ سەنىمدى تۇردە ۇتتى.

ٴسويتىپ، تەمىرتاس قازاقستان چەمپيوناتىندا ەڭ كوپ جەڭىسكە جەتكەن بوكسشى رەتىندە جاڭا رەكورد ورناتتى. بۇل جولى 52 كەلىدە جاڭا چەمپيون شىقتى. اقتاۋدا 26 جاستاعى ٴانۋار مۇزاپاروۆتىڭ باعى جاندى. ول فينالدا ساكەن بيبوسىنوۆتىڭ (تۇركىستان وبلىسى) وسال تۇسىن تاپتى.

«52 كەلىدەگى ساكەن بيبوسىنوۆ ماعان قاتتى ۇنادى. تورەشى وبەكتيۆتى كوزقاراس تانىتپادى. جەڭىستى ٴانۋار مۇزاپاروۆقا ۇستاتىپ جىبەردى. مەن قازىنىڭ شەشىمىمەن كەلىسپەيمىن. بۇل جاعدايدى فەدەراسيانىڭ اتقارۋ كوميتەتىندەگى وتىرىستا دا ايتاتىن بولامىن. قازاقستان قۇراماسىندا بيبوسىنوۆ ٴبىرىنشى ٴنومىرلى بوكسشى بولۋ كەرەك»، – دەيدى وليمپيادا چەمپيونى ەرماحان ىبىرايىموۆ vesti.kz تىلشىسىنە بەرگەن سۇحباتىندا.

56 كەلىدە قايرات ەراليەۆ ۇزدىك شىقتى. وڭتۇستىكتىڭ وعلانى، 2017 جىلعى الەم چەمپيونى وسىمەن ٴۇشىنشى رەت قازاقستان بىرىنشىلىگىنىڭ جەڭىمپازى اتانىپ وتىر. الماتى وبلىسىندا دۇنيەگە كەلگەن اعايىندى تولتايەۆتار بۇگىنگى تاڭدا ماڭعىستاۋ وبلىسىنىڭ نامىسىن قورعاپ ٴجۇر. ەكەۋى دە قازاقستان چەمپيوناتىنىڭ فينالىنا شىققان. 60 كەلىدەگى ٴساماتالى تاجىريبەلى زاكىر سافيۋللينگە ەسە جىبەردى. دەگەنمەن، ەكىنشىسى، ياعني، ٴساناتالى سەنساسيا جاسادى. ول 64 كەلىدە العاش رەت ەل بىرىنشىلىگىندە توپ جاردى. فينالدا ول ەكى دۇركىن قازاقستان چەمپيونى بەكداۋلەت يبراگيموۆتى جەڭدى.

شىمبەرگەنوۆ پەن ٴجۇسىپوۆ كەزدەستى

ەلىمىزدە 69 كەلىدەگى بوكسشىلاردىڭ بەدەلى جوعارى. ٴتورت بىردەي وليمپيادا ويىندارىندا قازاق جىگىتتەرىنىڭ مىقتىلىعىن الەم مويىندادى. سوندىقتان بۇل سالماقتىڭ جۇگى دە اۋىر. ٴقازىر ەلىمىزدە وسى سالماقتا ەكى تالانتتى بوكسشى بار. بىرەۋى، جاستايىنان تالاي جارىستاردا توپ جارىپ، كوزگە تۇسە باستاعان قاراعاندىلىق ابىلايحان ٴجۇسىپوۆ بولسا، ەكىنشىسى «استانا ارلاندارى» ارقىلى كوپشىلىكتىڭ كوزايىمىنا اينالىپ ۇلگەرگەن جامبىلدىق اسلانبەك شىمبەرگەنوۆ.

ەكەۋىنىڭ ٴوزارا جەكپە-جەگىن كوپشىلىك بۇرىننان كۇتىپ ٴجۇر. بيىل پرەزيدەنت كۋبوگىنىڭ فينالىندا دا جولدارى ٴتۇيىسۋ كەرەك ەدى. ٴبىراق ول كەزدە ابىلايحان جاراقات الىپ، فينالدان باس تارتقان ەدى.

اقتاۋدا العاش رەت ەكەۋى شارشى الاڭدا كەزدەستى. ٴبىرىنشى راۋندا ٴجۇسىپوۆ ٴبىر سوققىسى قارسىلاسىن ٴدوپ ٴتيىپ، رەفەري نوكداۋن رەتىندە ەسەپتى اشتى. جالپى، تارتىستى وتكەن جەكپە-جەكتە تورەشىلەر ابىلايحاننىڭ قولىن كوتەردى. ٴسويتىپ، 21 جاستاعى بوكسشى ەكى دۇركىن قازاقستان چەمپيونى اتاندى. بۇعان دەيىن ول 2016 جىلى پاۆلوداردا ۇزدىك شىققان.

جەكپە-جەكتىڭ قورىتىندىسىنا شىمبەرگەنوۆتىڭ كوڭىلى تولعان جوق. جامبىل وبلىسى پروتەست بەرگەنىمەن، ناتيجە سول كۇيىندە قالدى.

«ەكەۋى دە جاقسى بوكسشىلار. الەۋەتتەرى وتە جوعارى. جەكپە-جەكتى تەڭ دارەجەدە ٴوتتى دەپ ايتۋعا بولادى. ٴبىراق ٴار راۋندتىڭ ٴوز ەرەكشەلىگى بار. سول ەرەكشەلىككە كەلەتىن بولساق، ابىلايحاننىڭ ٴسال-پال باسىمدىعى بولدى. سوندىقتان لايىقتى تۇردە جەڭىسكە جەتتى دەپ سانايمىن»، – دەيدى بوكستان قازاقستان قۇراماسىنىڭ باس باپكەرى مىرزاعالي ايتجانوۆ.

بۇل كەزدەسۋ وسى فينالداعى كورەرمەندەر مەن ماماندارعا ۇناعان جەكپە-جەكتەردىڭ ٴبىرى بولعانى ٴسوزسىز. ونى وليمپيادا چەمپيونى ەرماحان ىبىرايىموۆ تا vesti.kz تىلشىسىنە بەرگەن سۇحباتىندا ايتىپ ٴوتتى.

«69 كەلىدەگى فينال قاتتى ۇنادى. «قازاقتىڭ سالماعى» دەپ ٴجۇرمىز. فينالدا اسلانبەك شىمبەرگەنوۆ پەن ابىلايحان ٴجۇسىپوۆ كەزدەستى. وتە تارتىستى كەزدەسۋ. مەنىڭشە، جەكپە-جەكتە ٴجۇسىپوۆ جەڭىسكە جەتتى»، – دەيدى ەرماحان ىبىرايىموۆ.

وزگە سالماقتاردا ٴابىلحان امانقۇل (75 كەلى)، بەك نۇرماعانبەت (81 كەلى)، ۆاسيليي لەۆيت (91 كەلى)، قامشىبەك قوڭقابايەۆ (+91 كەدى) جەڭىسكە جەتتى. وسىلاردىڭ اراسىندا بەك نۇرماعانبەت عانا العاش رەت ەل چەمپيونى اتانىپ وتىر. قالعانى بۇعان دەيىن دە بىرنەشە رەت توپ جارعان.

ٴبىر اپتاعا سوزىلعان جارىستا تۇركىستان وبلىسى جالپى كوماندالىق ەسەپتە توپ جاردى. وڭتۇستىكتەن كەلگەن قۇراما 2 التىن، 3 كۇمىس، 2 قولا مەدال جەڭىپ الدى. ەكىنشى ورىن جەرگىلىكتى ماڭعىستاۋ وبلىسىنا بۇيىردى (1 التىن، 3 كۇمىس، 4 قولا). ۇشتىكتە جامبىل وبلىسى بار (1 التىن، 2 كۇمىس، 3 قولا).

قازاقستان چەمپيوناتىنىڭ قورىتىندىسى:

49 كەلى
1. تەمىرتاس ٴجۇسىپوۆ (اقمولا وبلىسى)
2. ەرمەك ماديەۆ (جامبىل وبلىسى)
3.جومارت ەرجان (تۇركىستان وبلىسى)، جاندوس نەسىپجان (الماتى وبلىسى).

52 كەلى
1. ٴانۋار مۇزاپاروۆ (الماتى وبلىسى)
2. ساكەن بيبوسىنوۆ (تۇركىستان وبلىسى)
3. ازات ماحمەتوۆ (استانا)، اباي قۋاندىقوۆ (اقتوبە وبلىسى).

56 كەلى
1. قايرات ەراليەۆ (تۇركىستان وبلىسى)
2. ورازبەك اسىلقۇلوۆ (اقمولا وبلىسى)
3. جانبولات قىدىربايەۆ (جامبىل وبلىسى)، نۋربول كالجانوۆ (ماڭعىستاۋ وبلىسى).

60 كەلى
1.زاكىر سافيۋللين (شىمكەنت)
2. ٴساماتالى تولتايەۆ (ماڭعىستاۋ وبلىسى)
3. سەرىك تەمىرجانوۆ (پاۆلودارسكايا وبلىسى)، باگدات ۋايدايەۆ (قىزىلوردا وبلىسى).

64 كەلى
1.ساناتالىتولتايەۆ (ماڭعىستاۋ وبلىسى)
2. بەكداۋلەت يبراگيموۆ (تۇركىستان وبلىسى)
3. سابىرجان بەكبەرگەنوۆ (اقمولا وبلىسى)، ٴميراسالى سارسەنوۆ (جامبىل وبلىسى).

69 كەلى
1.ابىلايحان ٴجۇسىپوۆ (قاراعاندى وبلىسى)
2. اسلانبەك شىمبەرگەنوۆ (جامبىل وبلىسى)
3.ماۋلەن وسكەنبەك (ماڭعىستاۋ وبلىسى)، قاناعات مارالوۆ (استانا).

75 كەلى
1.ٴابىلحان امانقۇل (جامبىل وبلىسى)
2.ەرىك ٴالجانوۆ (ماڭعىستاۋ وبلىسى)
3. تۇرسىنباي قۇلاحمەت (قىزىلوردا وبلىسى)، امان قازانعاپوۆ (جامبىل وبلىسى).

81 كەلى
1.بەك نۇرماعانبەت (تۇركىستان وبلىسى)
2. ميحايل كوحانچيك (قوستاناي وبلىسى)
3.تيمۋر ەرجانوۆ (شقو)، نۇرلان سابىروۆ (ماڭعىستاۋ وبلىسى)

91 كەلى
1. ۆاسيليي لەۆيت (استانا)
2. بەكزاد نۇرداۋلەتوۆ (ماڭعىستاۋ وبلىسى)
3.الەكسەي سەۆوستيانوۆ (قاراعاندى وبلىسى)، ابزال كۇتتىبەكوۆ (تۇركىستان وبلىسى)

+91 كەلى
1. قامشىبەك قوڭقابايەۆ (قىزىلوردا وبلىسى)
2. نۇرلان ساپارباي (تۇركىستان وبلىسى)
3.ەرجان سەيتىمبەتوۆ (اقتوبە وبلىسى)، ايبولدى داۋرەن ۇلى (ماڭعىستاۋ وبلىسى).

2019 جىلعى قۇراما جاساقتالدى

اقتاۋدىڭ چەمپيوناتتىڭ قورىتىندىسىنا سايكەس، بوكستان 2019 جىلعى شتاتتىق كوماندا انىقتالدى. كەلەسى جىلى ازيا چەمپيوناتى، ليسەنزيالىق الەم چەمپيوناتى بار. قۇراماعا جارتىلاي فينالعا شىققان بوكسشىلاردىڭ بارلىعى ەندى. سونداي-اق بولاشاعىنان ٴۇمىت كۇتتىرەتىن جاستار دا بار.

«جاڭا بوكسشىلاردان قۇرامعا – ساكەن بيبوسىنوۆ، ورازبەك اسىلقۇلوۆ قوسىلدى.ارينە، بىرنەشە سالماقتا كوشباسشىلار اۋىستى. وزدەرىڭىز بىلەتىندەي، 81 كەلىدەگى قۇراما كاپيتانى ادىلبەك نيازىمبەتوۆ كارەراسىن اياقتادى. ال بىرنەشە سالماقتا بۇرىنعى ۇزدىكتەر وزدەرىنىڭ مىقتى ەكەندەرىن دالەدەدى. ولار:49، 56، 75، 91 كەلىدەگى بوكسشىلار مەن اسا اۋىر سالماقتاعى قامشىبەك قوڭقابايەۆ. بۇل چەمپيوناتتا بىرنەشە جاس بوكسشىلار تاجىريبەلى قارسىلاستارىنان قايمىقپاي جۇدىرىقتاستى. نيازىمبەتوۆتىڭ ورنىن لايىقتى تۇردە بەك نۇرماعانبەت باسادى دەپ ويلايمىن. ول وتەڭ ەڭبەكقور بوكسشى. حالىقارالىق ارەنادا ٴوزىڭ جاقسى قىرىنان كورسەتىپ ٴجۇر. شەبەرلىگى ٴوسىپ كەلەدى. لەۆيت پەن ەراليەۆكە قاتىستى كوپ اڭگىمە ايتىلۋى مۇمكىن. ۋاقىتتارى كەلگەندە ەكەۋى دە كەتەدى. جاستار سولارعا قاراپ بوي تۇزەيدى. كەزىندە نيازىمبەتوۆتەرگە قاراپ، بەك نۇرماعانبەت، بەكزات نۇرداۋلەتوۆ تە ٴوسىپ جەتىلدى»، – دەيدى مىرزاعالي ايتجانوۆ فەدەراسيانىڭ ٴباسپاسوز قىزمەتىنە بەرگەن سۇحباتىندا.

ەندى، العاشقى وقۋ-جاتتىعۋ جيىنى 6-13 جەلتوقساندا وتەدى. سول جيىندا جاڭا كاپيتان سايلانادى. ال قاڭتار ايىنان 2019 جىلدىڭ ەڭ باستى ەكى جارىسىنا دايىندىق باستالادى. الدىمەن ازيا چەمپيوناتى وتەدى، سوسىن الەم چەمپيوناتى بار. بۇل دودالاردىڭ بارلىعى بۇرىنعىداي 10 سالماق بويىنشا وتكىزىلەدى. تەك وليمپيادا ويىندارىندا عانا سالماق سانى قىسقارعان.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي