BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

سالىق تولەۋدەن جالتارعان انشىلەر جازاسىز قالمايدى

2017 جىلدان باستاپ تابىسىن جاسىرىپ، سالىق تولەۋدەن جالتارعان شوۋ-بيزنەس وكىلدەرىنە زاڭ كۇشەيتىلەدى. الماتى قالالىق مەملەكەتتىك كىرىستەر دەپارتامەنتىنىڭ ماماندارى ەسترادا انشىلەرىن سالىق تۋرالى زاڭ ەرەجەلەرىن ساقتاۋعا شاقىرىپ وتىر.

جالپى، ەلىمىزدە 656 ٴانشى زاڭدى تۇردە تىركەلگەن. ونىڭ ٴ443-ى جەكە كاسىپكەر، ٴ213-ى زاڭدى تۇلعا. بيىل جەكە كاسىپكەرلەردەن 35 ملن، زاڭدى تۇلعالاردان 550 ملن، ياعني 585 ملن تەڭگە قارجى مەملەكەت قازىناسىنا قۇيىلعان. دەسەك تە، تابىسىن جاسىرىپ جۇرگەندەر از ەمەس.

ونەرپازداردىڭ اراسىندا ىلۋدە بىرەۋ بولسا دا، تابىسىن اشىق كورسەتىپ، تۇراقتى سالىق تولەپ جۇرگەندەرى بار. ماسەلەن، ەسترادا انشىلەرىنىڭ ىشىندە قازاقستاننىڭ حالىق ٴارتىسى روزا رىمبايەۆا كوش باستاپ تۇر. ول 2015 جىلى كولىك جانە جەر سالىعىن ەسەپكە الماعاندا، ونەرىنەن تۇسكەن قارجىسىنىڭ ٴۇش پايىزىن، ياعني 1 ملن. 127 275 تەڭگە سالىق تولەگەن.

«مەن ٴبىزدىڭ ونەردەگى تابىستى جاقسى تاۋىپ جۇرگەن قىز-جىگىتتەرىمىزگە باۋىرلارىما ايتايىن دەگەنىم ارينە حالىقتىڭ جاعدايىن كوتەرۋ ٴۇشىن، جالپى حالىق الدىندا ٴوزىمىزدى شىنىندا دا ناعىز ازامات ساناۋ ٴۇشىن ٴاربىر تابىسىمىزدان سالىقتى مىندەتتى تۇردە تولەپ تۇرۋىمىز كەرەك. ول ٴبىزدىڭ ازاماتتىق پارىزىمىز. سوندىقتان، ٴبىزدىڭ بۇگىنگى جۇلدىزدارىمىزعا ايتايىن دەگەنىم شىنىندا دا حالقىمىزدى، مەملەكەتىمىزدى كوتەرۋ ٴۇشىن ٴاربىر ازامات وسىنداي ۇلكەن جاۋاپكەرشىلىكپەن ٴجۇرۋ كەرەك دەپ ويلايمىن»،- دەيدى قازاقستاننىڭ حالىق ٴارتىسى روزا رىمبايەۆا.

سوڭعى ۋاقىتتا قازاقستاندىق «فوربس» جۋرنالىنا تابىستارى جاريالانعان تانىمال انشىلەردىڭ بەرەكەسى قاشتى. ولاردىڭ قاتارىندا اسحات تارعىن، جانار دۇعالوۆا، ساندۋعاش ٴسادۋاقاسوۆا جانە كامشات جولدىباي سياقتى انشىلەر بار. سوندىقتان، ٴبىز سالىق دەپارتامەنتى كورسەتكەن مالىمەتتى انىق-قانىعىن ٴبىلۋ ٴۇشىن ولارعا حابارلاستىق. الايدا، تانىمال «جۇلدىزدار» سىنىققا سىلتاۋ ايتىپ، اشىق سۇحبات بەرۋدەن باس تارتتى.

«ول نەگىزى يپ ەشنارسە اشىلماعان عوي بىزدە. ەندى مەن جەكە ٴانشى رەتىندە ورىنداپ ٴجۇرمىن عوي. سول سەبەپتى ەشقانداي جەرگە تىركەلگەن جوقپىن ٴالى. ەكى كومپوزيتورمەن جۇمىس ىستەپ جاتىرمىز. سولار ٴبىر جاقسى-جاقسى ٴان بەرسە.، تاعى ٴبىر انمەن جۇمىس ىستەپ جاتىرمىز، سول شىقسا سودان كەيىن تىركەيمىن دەگەن وي بار»، - دەيدى ٴانشى اسحات تارعىن.

سالىق قىزمەتكەرلەرىنىڭ سوزىنشە، حالىق الدىندا ٴان ايتىپ اقشا تاباتىن شوۋ-بيزنەس وكىلدەرى تاپقان تابىسىنان 3 پايىز مەملەكەتكە سالىق تولەۋگە مىندەتتى ەكەن. ٴبىراق، مۇنى ەسكەرگەن انشىلەر از. سوندىقتان، سالىق مەكەمەلەرى باسقا دا قۇزىرلى ورگاندارمەن بىرلەسىپ، زاڭ جۇزىندە ٴتيىستى شارالاردى قولعا الماقشى.

«ٴبىز دە ۋاقىت بەرىپ جاتىرمىز. ٴقازىر مىسالعا ايىپپۇل سالماي جاتىرمىز ارتىستەرگە. مىسالى ٴوز ەركىمەن كەلىپ تىركەلگەن دەرگە قۋانامىز ولارعا ايىپپۇل جوق. تىركەلەدى بولدى باسقا سۇراق جوق. تەك تالاپ ەتەتىنىمىز جەكە كاسىپكەر رەتىندە تىركەلسىن»، - دەيدى قالالىق مەملەكەتتىك كىرىستەر دەپارتامەنتى ٴتۇسىندىرۋ باسقارماسىنىڭ باسشىسى زاڭعار شىندالي.

ەلىمىزدەگى مۇلىكتى جاريالاۋ ناۋقانى جىل سوڭىنا دەيىن جالعاسادى. ال، بۇل انشىلەرگە دە كولەڭكەلى بيزنەستەن شىعۋ ٴۇشىن زور مۇمكىندىك. ەگەر، ەسكەرسە، ارينە. ايتپەسە، كەلەر جىلدان باستاپ، سالىقتان جالتارعان جۇلدىزدار ايىپپۇلمەن قۇتىلمايدى. ٴتىپتى، ولار قىلمىستىق جاۋاپكەرشىلىككە دە تارتىلادى.

kaznews.kaztrk.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي