اقمولا وبلىسىندا «the nomads» ەكسترەمالدى رەاليتي-شوۋى تۇسىرىلەدى

اقمولا وبلىسىندا ەكسترەمالدى رەاليتي-شوۋ ٴتۇسىرىلىمى باستالادى، دەپ حابارلايدى baq.kz اقپارات اگەنتتىگى.

«visit aqmola» تۋريستىك اقپاراتتىق ورتالىعىنىڭ دەرەگى بويىنشا ٴتۇسىرىلىم ساندىقتاۋ اۋدانىنىڭ ورتالىعى بالكاشينو اۋلىنىڭ ماڭىندا جۇزەگە اسىرىلماق. وندا كيىز ۇيلەر اۋىلىن سالۋ جوسپارلانعان. قازىرگى تاڭدا، بۇل جەردە تۇڭعىش حالىقارالىق، ەكسترەمالدى «the nomads» رەاليتي-شوۋىن ٴتۇسىرۋ ٴۇشىن ارنايى قالاشىقتىڭ قۇرىلىسى جۇرگىزىلۋدە.

جوبانى قر اقپارات جانە كوممۋنيكاسيالار مينيسترلىگىنىڭ قولداۋىمەن «kazakh tv» جانە «حابار اگەنتتىگى» اق تاپسىرماسىمەن «تەنگري پليۋس is» جشس جۇزەگە اسىرادى. سونىمەن قاتار، جوباعا اقمولا وبلىسى مەن ساندىقتاۋ اۋدانىنىڭ اكىمدىگى قولداۋ كورسەتىپ وتىر.

«ەلىمىزدە مۇنداي اۋقىمدى جوبا وسىعان دەيىن بولعان ەمەس.بۇل تەلەۆيزيالىق جوباعا ٴار ەلدەن جينالعان ەكى كوماندا 5 ميلليون تەڭگە اقشالاي سىياقىعا تالاستىن بولادى»، - دەدى جوبانىڭ اۆتورى جانە باس پروديۋسسەرى ەلەنا گومەر.

جوبانىڭ رەجيسسەرى ماسكەۋلىك كيريلل كۋزين. ول «ۆوينا پولوۆ»، «لوندونگراد. زناي ناشيح» (2015 گود)، «زالەتچيكي» (2014 گود)، «سامىي لۋچشيي فيلم 3-دە» (2011گود)، «كلۋب» (2006 - 2009 گگ.)، «سامىي لۋچشيي فيلم» (2007 گود)، «لەدنيكوۆىي پەريود. دەتي»، «comedy woman»، «بۋلدوگ شوۋ»، «نەرەالنىە يستوريي»، «چەتاپينوچەتوۆ» جانە «پەرەحۆات» ٴتارىزدى تەلەۆيزيالىق جوبالاردىڭ رەجيسسەرى رەتىندە تانىمال.

جوباعا شەتەلدىك كەز كەلگەن ماماندىق يەسى قاتىسا الادى. جوبا جۇرگىزۋشىلەرى قازاقستاندىق بىلعارى قولعاپ شەبەرى، وليمپيادا چەمپيونى، «astana arlans» كاسىپقوي بوكس كلۋبىنىڭ باس مەنەدجەرى باقتيار ارتايەۆ جانە «kazakh tv» تەلەارناسىنىڭ حالىقارالىق اقپاراتتار جانە اعىلشىن تىلىندەگى جاڭالىقتارى ٴبولىمىنىڭ باسشىسى ٴلاززات شاتايەۆا.

«جوبانى «kazakh tv» تەلەارناسىندا قازاق، ورىس جانە اعىلشىن تىلدەرىندە 4 قۇرلىق، 118 ەل، 600 قوناقۇيدە 300 ميلليون كورەرمەن كورەدى دەپ جوسپارلانعان»، - دەدى ەلەنا گومەر.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!