BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«91» توبىنىڭ كونسەرتى كوكشەتاۋدا دا وتپەيتىن بولدى

فوتو: Yvision

كوكشەتاۋدا «91» توبى كونسەرت قويۋعا كەلەدى جانە بيلەتتەر ونلاين نەگىزىندە ساتىلىپ جاتىر دەگەن اقپاردى ەستىگەن بەلسەندى ازاماتتار بىردەن قارسىلىق ٴبىلدىردى. تەك ولاردىڭ توپتىڭ رەپەرتۋارىنداعى اندەرگە قارسىلىعى جوق ەكەن. تاۋەلسىزدىكپەن بايلانىستىرىپ قويىلعان «91» اتاۋى مەن كيىمدەرىن جوندەسە دەگەن تالاپتارىن ايتتى، دەپ حابارلايدى baq.kz ٴتiلشiسى.

اقمولا وبلىستىق مادەنيەت باسقارماسىنىڭ جەتەكشىسى ساۋلە بورىبايەۆا بيلەتتەردىڭ دۇرىس وتپەۋىنە بايلانىستى كونسەرت توقتاتىلعاندىعىن ايتتى.

«اتالعان توپ 11 قاراشادا «كوكشەتاۋ» مادەنيەت سارايىندا كونسەرت وتكىزبەك بولعان. الايدا بيلەتتەر از ساتىلعاندىقتان، كونسەرت وتپەيتىن بولدى»،–دەدى ول.

قاراشا ايى باستالعالى كوكشەتاۋ جۇرتى دا «91» توبى كەلەدى دەپ دۇرلىكتى. جاستار جاعى ولاردى ساحناعا شىعارتپايمىز دەسە، ۇلكەندەر باسۋ ايتىپ، ٴبىر شۋ شىعىپ كەتپەسە ەكەن دەپ تىلەدى.

«ٴوز باسىم بۇل توپتىڭ ٴانىن تىڭداپ، انشىلەرىن كوزىممەن كورگەن جان ەمەسپىن. ٴبىراق، ولاردىڭ قىزشا كيىنگەن كەلبەتتەرىن كۇن سايىن عالامتور ارقىلى جاريالاپ جاتتى عوي. سوسىن دا ٴوز باسىم ولاردىڭ اندەرىن تىڭداپ كورمەگەسىن شىعارماشىلىقتارى جايلى باعا بەرە المايمىن. مەنى دە قىنجىلتقانى ولاردىڭ كيىم كيىسى مەن ٴسان قويۋ ۇلگىسى. بۇگىندە ازعىندىقتىڭ قۇردىمىنا قۇلاعان باتىس ەلدەرىندە ٴبارى وسىنداي ەر ادامداردىڭ ايەلدەرشە كيىنۋىنەن باستالعان. ونىڭ اقىرى مۇندايلاردىڭ قاتارىن كوبەيتىپ، بۇنى جاستار اراسىندا «موداعا» اينالدىردى. سودان ەلىكتەگىش جاستار گەي دەگەن تاماشا نارسە ەكەن دەپ، جاپپاي سوعان بەت بۇرعان. مىنە، سول باتىستىق سسەناريي بىزدە دە كورىنىس بەرۋدە. الدىمەن، ايەلشە كيىنگەن ەركەكتەر جۇرتتىڭ كوزىن ۇيرەتەدى. سودان كەيىن اشىقتان اشىق كوشەگە شىعىپ، تاپتالعان قۇقىقتارىن قالپىنا كەلتىرۋدى، ەركەك پەن ەركەكتىڭ ۇيلەنۋىن، وتباسى قۇرۋىن زاڭداستىرۋدى سۇراپ، شەرۋلەتەدى. اقىرىندا جوعارىدا وتىرعان جانە شەتەلدىك قالتالى قولداۋشىلارىنىڭ كۇشىمەن سونداي زاڭداردى قابىلداتتىرادى. مىنە، ٴسويتىپ، ٴبىراز جىلدان كەيىن ٴبىر جىنىستى وتباسىلار ٴبىزدىڭ ەلىمىزدە دە كوبەيىپ، ازعىندىق بەلەڭ الماسىنا كىم كەپىل؟»،–دەيدى جۋرناليست قالكوز ٴجۇسىپ.

شاشتارىن بوياپ، قۇلاقتارىنا سىرعا تاققان، الەم-جالەم كيىنگەن «91» دەپ اتالاتىن انشىلەر توبىنىڭ كونسەرتىن قويعىزۋعا الدىمەن شىمكەنت، سودان كەيىن اقتوبە قالاسىنىڭ قازاقتارى قارسى شىقتى. سونىمەن 11 قاراشاعا بەلگىلەنگەن اتىشۋلى توپتىڭ كونسەرتى كوكشەتاۋدا دا وتپەيتىن بولدى. مۇنىڭ ٴوزى الەۋمەتتىك جەلىلەردە داۋ تۋعىزىپ، ايەلشە كيىنگەن جىگىتتەردى جاقتاعاندار دا، داتتاعاندار دا بولدى.

«ساحنا دەگەن كيەلى نارسە. ٴبىرجان مەن اقانداي، ۇكىلى ىبىراي مەن بالۋان شولاقتاي ۇلىلار ونەر كورسەتكەن كوكشەتاۋدىڭ كيەلى ساحناسىنا الگى قىزشا كيىنگەن «91» توبىنىڭ شىعۋىنا ەش قاقىسى جوق. باتىستىڭ بەيادەپ مادەنيەتىن تىقپالاپ، جاستارىمىزدى ۇلتتىق بولمىسىنان الىستاتۋ جاقسىلىققا اپارمايدى. اتالعان توپقا قارسى بولۋىمنىڭ استارىندا دا ساحنا ارقىلى ولار ٴوز ونەرلەرىن ەمەس، ۇلتتىق داستۇرىمىزگە جات كيىم مەن ٴسان ۇلگىسىن ناسيحاتتاۋى جاتىر. ال، مەنىڭ بىلۋىمشە، «91» اتاۋى تاۋەلسىزدىك العان جىلدىڭ قۇرمەتىنە قويىلعان سياقتى. سوندا عاسىرلار بويى بابالارىمىز قاسىق قاندارى قالعانشا بوداندىقپەن كۇرەسكەندە كەلەر ۇرپاعى باتىستىڭ جانىمىزعا جات ٴداستۇرىن ناسيحاتتاسىن دەمەگەن بولار. ازاتتىق العان قازاقتىڭ قاستەرلى مەزگىلىن اتاۋ ەتكەندە ۇلتىمىزدىڭ بولمىس-بىتىمىنە تۇكىرىپ تە قاراماعان سىڭاي تانىتقانى عوي؟ ٴقازىر باتىستا ٴبىر جىنىستىلار نەكەلەسىپ، اردان ازىپ جاتقاندا قىزشا كيىنىپ، باتىستىڭ ٴبىزدىڭ ۇلتتىق مەنتاليتەتىمىزبەن سىيىسپايتىن ٴداستۇرىن تىقپالاپ، جاستاردىڭ ساناسىن ۋلاۋىنا جول بەرمەيمىز!» – دەيدى «ەل بىرلىگى» قوعامىنىڭ جاۋاپتى حاتشىسى باقىت سماعۇل.

اقمارال ايعارا


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي