BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قازاقستان با، سۇيەدى قازاقستاندى...

اقىن ۇلاربەك نۇرعالىم ۇلىنىڭ «توركىن» دەپ اتالار وسىناۋ ٴبىر شاعىن ولەڭى – اتاجۇرتىن اڭساپ جەتكەن قارىنداستىڭ ەلىنە، توركىنىنە ساعىنىشى ٴھام قازاق ەلىنە دەگەن ىستىق ماحابباتى بۇرقىراپ-اق تۇرعان ادەمى جىر. سالماعى ٴبىر داستانعا نەمەسە ٴبىر كىتاپقا بەرگىسىز. وزگەسىن سانالى وقىرمان ٴوزى ساراپتاي جاتار.

اۋداندىق ونەر ۇيىندە جىر وقىپ زەرلى،
سىپىرىپ تاستاپ وتىرعام ماڭدايدان تەردى.
«قارىنداسىڭ ەم، اعا» دەپ جىرىلىپ توپتان،
جارقىلداپ جاپ-جاس كەلىنشەك جانىما كەلدى.

جاقىنىن تاۋىپ العانداي جايراڭ كۇي كەشىپ،
«ٴجۇرىڭىز ۇيگە!»، - دەپ قويماي الدىمدى توسىپ.
اعالاپ تۇرعان كەلىنشەك، الدىڭعى جىلى،
ارقاعا كەلىپ قونىپتى التايدان كوشىپ.

«اتا-انام سوناۋ التايدىڭ قىرىندا قالدى،
بيەباۋ قالدى، جەلىدە ق ۇلىن دا قالدى...».
ساعىنىپتى ابدەن توركىنىن،
كوزىنىڭ جاسىن
كورپەسىن سالا ٴجۇرىپ-اق سىعىمداپ الدى.

كۇيەۋى تويعان قوزىداي موماقان جىگىت،
ٴىسى كوپ، ٴسوزى از ەر سىندى، مىنەزى سىنىق.
اۋىلىمىز جايلى ايتىلعان اڭگىمەلەردى،
بىرەسە تىنىپ تىڭدايدى، بىرەسە كۇلىپ.

ساعىنىش شىركىن بولماسا جۇبىنە جەتكەن،
قويادى ماقتاپ «شۇكىر» دەپ بۇگىنىن ەپپەن.
اعاسى كەلمەي قويىپتى قىزمەتىن قيماي،
اتا-انا – اۋرۋ، ٴىنى – جوق، ٴسىڭىلى – كەتكەن.

«ەم-دومعا تيىن ەپتەگەن تابىلىپ مۇمكىن»،
ارمانداپ قوياد كورەيىپ بارسام دەپ ٴبىر كۇن.
«شيدەن ارى» دەپ شىعارىپ سالعانىمىزبەن،
توركىننىڭ قامىن جەپ وتەر قىز دەگەن شىركىن!..

قولىنان پىسكەن تابا نان، قۇرت پەنەن مايىن،
الدىعا جايىپ، باپپەنەن قايىردى شايىن.
ساقتالعان ٴسۇرى، قاتىعى، كادەلى جىلىك،
انامداي ۇستايدى ەكەن-اۋ داستارحان جايىن.

بىلمەيمىن، نەگە؟
جانىمنىڭ سۇراۋى ما ەكەن،
ساعىنىپ مەن دە جۇرگەن سوڭ ۇنادى ما ەكەن؟
قولى دا – ٴدامدى، ٴىسى – ەپتى، ۋايىمى – ادال،
بىلىكتى بولسا ٴبىر قىز دا ٴبىر اۋىل ەكەن.

اڭساسا اۋىلىن،
(تۇسىنەم زاڭدىلىق جايدى)
ٴماجنۇن دە ەمەس كەشەتىن ماڭگىرىپ قايعى.
قازاقستان با؟
سۇيەدى قازاقستاندى،
ورىسشاسىنان باسقاعا شاڭ جۋىتپايدى.

كوكشەتاۋ دەگەن قالانىڭ ماڭىنداعى اۋىل،
الىستا قالعان اۋىلىن ساعىنعان اۋىل.
جايلانىپ تىرلىك كەشىرەر جەر ەكەن شىركىن،
جانىڭدا اعاڭ بولسا ەگەر، جانىڭدا باۋىر.

تولقىنداي نازىك سەزىمگە اعىستار كومگەن،
بوي ۇرىپ كەيدە باسىلار ارىستان كەۋدەڭ.
ساعىنىپ جۇرگەن توركىنىن قارىنداس كورسەم،
اعاسى بولعىم كەپ تۇراد الىستان كەلگەن.

ۇلاربەك نۇرعالىم ۇلى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي