BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا ەركەعالي راحماديەۆتى ەسكە الۋ كەشى وتەدى

25 قازان كۇنى «استانا وپەرا» تەاترىندا قازاق كومپوزيتورى ەركەعالي راحماديەۆتىڭ 85 جىلدىعىنا ارنالعان «تۋعان جەر تۋرالى جىر» اتتى كونسەرت وتەدى. ەسكە الۋ كەشىندە تەاتردىڭ جەتەكشى وپەرا سوليستەرى، وركەستر جانە كامەرالىق حور ارتىستەرى كلاسسيكتىڭ شىعارماشىلىق مۇراسىنان اسقاق تۋىندىلاردى ورىندايدى، دەپ حابارلايدى baq.kz اقپارات اگەنتتىگى.

ەركەعالي راحماديەۆ – كسرو حالىق ٴارتىسى، قازاقستاننىڭ ەڭبەك ەرى، پروفەسسور، قازاق كسر مەملەكەتتىك سىيلىعىنىڭ لاۋرەاتى، ۇلاعاتتى ۇستاز، كورنەكتى قوعام جانە مەملەكەت قايراتكەرى. تانىمال سازگەر ٴتۇرلى باعىتتاعى ماڭىزدى تۋىندىلاردىڭ باسىم كوپشىلىگىنىڭ اۆتورى. ول ۇلتتىق وپەرا ونەرىنىڭ دامۋىنا ەلەۋلى ۇلەس قوسىپ، جاڭا جانر – سيمفونيالىق كۇيدىڭ نەگىزىن قالادى. وسى جانردا الەمگە ايگىلى بولعان اتاقتى «دايراباي»، «قۇداشا-دۋمان» شىعارمالارى، «قامار-سۇلۋ»، «الپامىس»، «ابىلايحان» وپەرالارى قازاق مۋزىكا مادەنيەتىنىڭ مۇراسىنا اينالدى.

كەشتە سازگەردىڭ كوپشىلىككە تانىس «تاڭ سامالى»، «بالا عاشىق»، «جەتىسۋدىڭ قىزدارى-اي» تۋىندىلارى، «قامار-سۇلۋ» وپەراسىنان دۋەت، «الپامىس» وپەراسىنان گۇلبارشىن ارياسى، حور كومپوزيسيالارى شىرقالادى.

«كونسەرتىمىزدى اتاقتى سازگەر ەركەعالي راحماديەۆكە ارناعالى وتىرمىز. ونىڭ شىعارماشىلىق قۋاتى كوپتەگەن قازاقستاندىق مۋزىكانتتاردى شابىتتاندىرۋدا. ول جىلدار بويى جيناعان بىلىم-تاجىريبەسىن ارىپتەستەرى، شاكىرتتەرىمەن ايانباي ٴبولىستى. ەركەعالي راحمادي ۇلى شىعارمالاردى تۇسىندىرۋدە جاس ورىنداۋشىلارمەن جەكە-جەكە جۇمىس جاسايتىن. ماعان جانە ارىپتەستەرىم مەدەت شوتابايەۆ، ازامات جىلتىركوزوۆكە تۋىندىنى بايان ەتۋدە كوپ اقىل-كەڭەس بەرگەن. وسى جولى ساحنا تورىنە شىعاتىن ونەرپازداردىڭ باسىم كوپشىلىگى «قامار-سۇلۋ» وپەراسىنىڭ قويىلىمىنا تىكەلەي قاتىسقاندار. ونىڭ ەرەن ەڭبەگىنىڭ ارقاسىندا وتاندىق مۋزىكا ونەرىنىڭ ۇلگىلەرى الەمدىك كلاسسيكا جاۋھارلارىنا اينالدى. ونىڭ مۋزىكاسى، سازدى اۋەنى ماڭگى جادىمىزدا، جۇرەگىمىزدە شىرقالاتىن بولادى»، - دەدى «استانا وپەرانىڭ» جەتەكشى ٴسوليستى، سوپرانو جۇپار عابدۋللينا.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي