اشىمبايەۆ: قازاقستان ەلباسى ساياساتىنىڭ ارقاسىندا دامۋدىڭ جاڭا كەزەڭىنە قادام باستى - ساياسات|10 جەلتوقسان 2018، 18:34
كۋرسى ۆاليۋت وبنوۆليايۋتسيا
استانا:

اشىمبايەۆ: قازاقستان ەلباسى ساياساتىنىڭ ارقاسىندا دامۋدىڭ جاڭا كەزەڭىنە قادام باستى

پاۆلودار، baq.kz. «نۇر وتان» پارتياسى ٴتوراعاسىنىڭ ٴبىرىنشى ورىنباسارى ماۋلەن اشىمبايەۆ ارنايى ساپارمەن پاۆلودار وبلىسىنا باردى. ساپار بارىسىندا ول پارتيا مەن قازاقستان رەسپۋبليكاسى كاسىپوداقتار فەدەراسياسىنىڭ بىرلەسىپ ۇيىمداستىرۋىمەن وتكەن «لايىقتى ەڭبەك – مەملەكەتتىڭ تۇراقتىلىق نەگىزى» اتتى جۇمىسشىلار فورۋمىنا قاتىستى.

سونداي-اق ماۋلەن اشىمبايەۆ وبلىس اكىمى بولات باقاۋوۆپەن بىرگە س.تورايعىروۆ اتىنداعى وبلىستىق كىتاپحاناعا بارىپ، وسى باعىتتاعى پارتيالىق جوبانىڭ جۇزەگە اسىرىلۋ بارىسىمەن تانىستى. ودان بولەك، پارتيانىڭ وبلىستىق اكتيۆىمەن كەزدەسىپ، ەلباسىنىڭ جولداۋى مەن « ۇلى دالانىڭ جەتى قىرى» ماقالاسىندا ايتىلعان باسىمدىقتارعا نازار اۋداردى.

وسى جىلدىڭ ٴساۋىر ايىندا «نۇر وتان» پارتياسى مەن قازاقستان رەسپۋبليكاسى كاسىپوداقتار فەدەراسياسى ٴوزارا ىنتىماقتاستىق تۋرالى مەموراندۋمعا قول قويىپ، قازاقستاندىقتاردىڭ ەڭبەك قۇقىعىن قورعاۋ جانە ەلىمىزدىڭ الەۋمەتتىك جاڭعىرۋىن ودان ٴارى نىعايتۋ جولىندا كۇش بىرىكتىرۋگە ۋاعدالاسقان بولاتىن. سونىڭ اياسىندا وتكەن «لايىقتى ەڭبەك – مەملەكەتتىڭ تۇراقتىلىق نەگىزى» اتتى جۇمىسشىلار فورۋمى ەڭبەك قاۋىپسىزدىگىن ساقتاۋعا جانە ونى قورعاۋعا، سونداي-اق ەلباسىنىڭ جاڭا جولداۋىندا ايتىلعان باسىمدىقتارعا سايكەس ەڭبەككە لايىقتى جاعداي جاساۋعا باعىتتالدى.

«نۇر وتان» پارتياسى ٴتوراعاسىنىڭ ٴبىرىنشى ورىنباسارى وسىنداي اۋقىمدى فورۋمنىڭ پاۆلودار وبلىسىندا ٴوتۋى تەگىن ەمەستىگىنە جانە بۇل ٴوڭىردىڭ ەلىمىزدەگى ەڭ ٴىرى ٴوندىرىس وشاقتارىنىڭ ٴبىرى ەكەنىنە نازار اۋداردى. سونداي-اق ول جيىندا قازىرگى تاڭنىڭ ەڭ وزەكتى ماسەلەسى كوتەرىلىپ وتىرعانىن ايتىپ، ٴار قازاقستاندىقتىڭ ەڭبەگى ەلدىڭ الەۋمەتتىك، ساياسي جانە ەكونوميكالىق تۇراقتىلىعىنىڭ نەگىزىن قالايتىنىن تىلگە تيەك ەتتى.

– قازىرگى تاڭدا قازاقستان ەلباسى ساياساتىنىڭ ارقاسىندا دامۋدىڭ جاڭا كەزەڭىنە قادام باستى. ەلىمىزدە جان-جاقتى جاڭعىرۋ ۇدەرىستەرى قولعا الىنىپ، قارقىندى جۇرگىزىلىپ كەلەدى. مۇنىڭ بارلىعى باستى ماقساتىمىز – الەمنىڭ ەڭ دامىعان 30 مەملەكەتىنىڭ قاتارىنا قوسىلۋ جولىنداعى ناقتى قادامدار. وسىنداي اۋقىمدى ىستە الپاۋىت ٴوندىرىس ورىندارىنىڭ دا ٴرولى ەرەكشە. ويتكەنى اتالعان كاسىپورىنداردىڭ الەۋمەتتىك جاۋاپكەرشىلىگى مەن وسىپ-وركەندەۋى مىڭداعان قازاقستاندىق وتباسىنىڭ ٴال-اۋقاتىنىڭ ارتۋىنا سەپتىگىن تيگىزەدى، – دەدى ماۋلەن اشىمبايەۆ.

ٴوز سوزىندە پارتيا ٴتوراعاسىنىڭ ٴبىرىنشى ورىنباسارى فورۋم وتكەن اقسۋ فەرروقورىتپا زاۋىتىنىڭ وسىنداي ٴىرى ٴوندىرىس ورىندارىنىڭ ٴبىرى سانالاتىنىن ايتتى. بيىل قۇرىلعانىنا 50 جىل تولعان زاۋىت وسى ۋاقىت ىشىندە 35 ميلليوننان استام فەرروقورىتپا ٴوندىرىپ، ەلدىڭ دامۋىنا سۇبەلى ۇلەس قوسىپ كەلەدى. بۇگىندە قازاقستاننىڭ فەرروقورىتپا ٴوندىرىسىنىڭ 60 پايىزىن قامتيتىن كاسىپورىننىڭ ونىمدەرى جاپونيا، كورەيا، قىتاي، اقش، رەسەي مەن ەۋروپانىڭ ٴبىرقاتار ەلدەرىنە ەكسپورتتالادى.

بۇل جۇمىستار قازاقستاننىڭ ٴۇشىنشى جاڭعىرۋى مەن ەلباسىنىڭ جاڭا جولداۋىنداعى تالاپتارعا ساي باستامالار ەكەنىن ايتقان «نۇر وتان» پارتياسى ٴتوراعاسىنىڭ ٴبىرىنشى ورىنباسارى ەلباسى ايقىنداپ بەرگەن ماقساتتارعا قول جەتكىزۋ ٴۇشىن ەڭبەك ادامىنا لايىقتى جاعداي جاساۋدىڭ ماڭىزى زور ەكەنىنە توقتالدى.

– ەلىمىزدە ەلباسىنىڭ تىكەلەي باستاماسىمەن ەڭبەك قاۋىپسىزدىگىن ساقتاۋ، ەڭبەكتى قورعاۋ جانە ونى لايىقتى باعالاۋ جونىندە اۋقىمدى جۇمىستار اتقارىلىپ كەلەدى. وسى ماقساتتاعى بۇگىنگى فورۋم ەلباسىمىزدىڭ قازاقستاننىڭ ٴۇشىنشى جاڭعىرۋى باستاماسىن جۇزەگە اسىرۋدا ۇلكەن ماڭىزعا يە. سەبەبى، كەز كەلگەن ٴىستىڭ ادام كۇشىمەن، ادام ەڭبەگىمەن ىسكە اساتىنى بەلگىلى. سوندىقتان ەڭبەكتىڭ قورعالۋى قولعا العان ٴىستىڭ ناتيجەلى بولۋىن قامتاماسىز ەتەتىن ٴتيىمدى تەتىك، – دەدى ماۋلەن اشىمبايەۆ.

سونداي-اق ول بارشا قاتىسۋشىلاردى كەلە جاتقان تاۋەلسىزدىك كۇنىمەن قۇتتىقتاپ، بۇگىنگى جەتىستىكتەرىمىز بەن جەڭىستەرىمىزدىڭ بارلىعى ەگەمەندىگىمىزدىڭ ارقاسى ەكەنىن ايتتى.

ٴوز كەزەگىندە، كاسىپوداقتار فەدەراسياسىنىڭ ٴتوراعاسى باقىتجان ٴابدىرايىم فەدەراسيانىڭ 2018 جىلدى ەڭبەك قاۋىپسىزدىگى جانە قورعاۋ جىلى دەپ جاريالاعانىنا نازار اۋدارىپ، سول باعىتتا اتقارىلعان جۇمىستارعا توقتالدى.

– مەملەكەتتىك ورگانداردىڭ، كاسىپوداقتاردىڭ جانە جۇمىس بەرۋشىلەردىڭ جۇيەلى تەكسەرىستەرى مەن باقىلاۋلارىنا قاراماستان وندىرىستىك جاراقاتتار مەن قايعىلى وقيعالارعا ٴبىرجولا توسقاۋىل قويۋ مۇمكىن بولماي وتىر. سوندىقتان ٴبىز «ەڭبەكتى قورعاۋ سالاسىندا الدىن الۋ مادەنيەتىن بىرگە ارتتىرامىز» دەگەن ارنايى اكسيانى قولعا الدىق. بۇل باستاما ەكى جىل بويى جۇزەگە اسىرىلادى. سونداي-اق ەلىمىزدىڭ بارلىق وڭىرىندە «ٴقاۋىپسىز ەڭبەك» باعدارلاماسى دا ناتيجەلى ىسكە اسىرىلىپ كەلەدى، – دەدى باقىتجان ٴابدىرايىم.

ايتا كەتەيىك، 2017 جىلدىڭ قورىتىندىسى بويىنشا ەلىمىزدە 1678 جۇمىسشىنىڭ ەڭبەك جاراقاتىن العانى انىقتالعان. وكىنىشكە قاراي، ولاردىڭ ٴ244-ى قايعىلى اياقتالدى. سوندىقتان وسىنداي ولقىلىقتاردىڭ الدىن الۋ ٴۇشىن بۇل ماسەلەنى كۇن تارتىبىنەن تۇسىرمەي، ۇدايى باستى نازاردا ۇستاپ وتىرۋ اسا ماڭىزدى.

فورۋم سوڭىندا كاسىپوداقتار فەدەراسياسىنىڭ ۇيىمداستىرۋىمەن وتكىزىلگەن «ەڭبەكتى قورعاۋ جونىندەگى ۇزدىك تەحنيكالىق ينسپەكتور» بايقاۋىنىڭ جەڭىمپازدارى ماراپاتتالدى. بۇگىندە ەلىمىزدە 12855 وندىرىستىك كەڭەس جۇمىس ىستەسە، ولاردىڭ قۇرامىندا 17751 تەحنيكالىق ينسپەكتور جۇمىسشىلارعا قىزمەت كورسەتەدى.

سونىمەن قاتار ساپار بارىسىندا «نۇر وتان» پارتياسى ٴتوراعاسىنىڭ ٴبىرىنشى ورىنباسارى پارتيانىڭ وبلىستىق اكتيۆىمەن كەزدەسىپ، ەلباسىنىڭ «قازاقستاندىقتاردىڭ ٴال-اۋقاتىنىڭ ٴوسۋى: تابىس پەن تۇرمىس ساپاسىن ارتتىرۋ» اتتى جولداۋى مەن جاقىندا جاريالانعان « ۇلى دالانىڭ جەتى قىرى» ماقالاسىندا ايتىلعان باسىمدىقتاردى جۇزەگە اسىرۋ بارىسىن تالقىلادى. ماۋلەن اشىمبايەۆ ٴوز سوزىندە مەملەكەت باسشىسىنىڭ اتالعان قۇجاتتاردا ايقىنداپ بەرگەن باسىمدىقتارى جۇيەلى سيپاتقا يە ەكەنىن ايتىپ، ولاردى ناتيجەلى ورىنداۋ ٴۇشىن پارتيانىڭ الدىندا تۇرعان باستى مىندەتتەرگە توقتالدى.

– قازىرگى تاڭدا پارتيامىزدىڭ الدىندا تۇرعان باستى مىندەتتەردىڭ ٴبىرى – ەلباسى جولداۋىنا اقپاراتتىق قولداۋ كورسەتۋ. سوندىقتان اتالعان قۇجاتتىڭ ٴمانى مەن ماڭىزىن ٴار قازاقستاندىققا جەتكىزۋدە ەسەلى ەڭبەك ەتۋىمىز كەرەك. سونداي-اق جولداۋدىڭ جۇزەگە اسىرىلۋ بارىسىنا قوعامدىق باقىلاۋ جۇرگىزۋ دە نۇروتاندىقتارعا جۇكتەلگەن ماڭىزدى ٴىس. ٴبىز بۇل ىستە تۇراقتى مونيتورينگ جۇرگىزىپ، قاجەت جاعدايدا ولقىلىقتاردى اكىمدىكتەر مەن ۇكىمەتتىڭ الدىندا اشىق ايتۋعا ٴتيىسپىز، – دەدى ماۋلەن اشىمبايەۆ.

ودان بولەك، «نۇر وتان» پارتياسى ٴتوراعاسىنىڭ ٴبىرىنشى ورىنباسارى پارتيالىق جاڭعىرۋ اياسىندا قولعا الىنعان جوبالاردى جۇزەگە اسىرۋعا، كەلەسى جىلى «نۇر وتاننىڭ» 20 جىلدىعىنا وراي وتكىزىلەتىن ٴىس-شارالارعا بەلسەنە قاتىسۋعا جانە ەلباسىنىڭ « ۇلى دالانىڭ جەتى قىرى» اتتى ماقالاسىنداعى باسىم باعىتتاردىڭ ورىندالۋىن قامتاماسىز ەتۋگە بارشا نۇروتاندىق ٴوز ۇلەسىن قوسۋى كەرەكتىگىن اتاپ ٴوتتى. سونداي-اق وسى باعىتتا پاۆلودارلىق نۇروتاندىقتارعا ٴبىرقاتار ناقتى تاپسىرما بەردى.

جالپى قازىرگى تاڭدا «نۇر وتان» پارتياسى ەلباسى، پارتيا ٴتوراعاسىنىڭ تاپسىرماسىمەن ٴوز قىزمەتىن جاڭعىرتۋ جۇمىستارىن قارقىندى جۇرگىزىپ جاتقانى بەلگىلى. سونىڭ اياسىندا 20-دان استام جاڭا جوبا قولعا الىنىپ، «سيفرلى قازاقستان»، شاعىن جانە ورتا بيزنەستى قولداۋ جانە «رۋحاني جاڭعىرۋ» سياقتى باعدارلامالاردى ورىنداۋعا باعىتتالعان يگى ىستەر جۇزەگە اسىرىلۋدا.

اتالعان جوبالاردىڭ ٴبىرى ەلىمىزدەگى كىتاپحانالاردىڭ قىزمەتىن بۇگىنگى تالاپتارعا ساي قايتا جاڭعىرتىپ، ولاردى زاماناۋي ٴبىلىم ورتالىعىنا اينالدىرۋ. ٴقازىردىڭ وزىندە بۇل جۇمىستار ٴوز جەمىسىن بەرىپ، ەلىمىز بويىنشا 100-دەن استام كىتاپحانانىڭ قىزمەتى جاڭعىردى. ولاردىڭ ىشىندە اۋىل-ايماقتاعى كىتاپحانالاردىڭ دا بار ەكەنىن ەرەكشە اتاپ وتكەن ٴجون.

سوندىقتان ماۋلەن اشىمبايەۆ ەرتىس-بايان وڭىرىنە ساپارى كەزىندە س.تورايعىروۆ اتىنداعى وبلىستىق كىتاپحاناعا ارنايى باردى. اتالعان نىساننىڭ بۇگىندە 550 مىڭ دانادان استام كىتاپ قورى بار. قازىرگى كەزەڭدە اتالعان كىتاپتار «قازاقستاننىڭ اشىق كىتاپحاناسى» پارتيالىق جوباسى اياسىندا سيفرلى فورماتقا كوشىرىلىپ جاتىر. بۇل جۇمىستار book drive، laren سياقتى سكانەر قۇرىلعىلاردىڭ كومەگىمەن جۇرگىزىلۋدە. وسىلايشا كىتاپتاردىڭ شالعايداعى وقىرماندار ٴۇشىن دە قولجەتىمدىلىگى قامتاماسىز ەتىلمەك.

جالپى قازىرگى تاڭدا وتاندىق كىتاپحانالاردىڭ كىتاپ قورلارىن ەلەكتروندى نۇسقاعا اينالدىرۋ جۇمىستارى جۇيەلى تۇردە جۇرگىزىلىپ جاتقانى بەلگىلى. نەگىزگى اۋقىمدى جۇمىستار استانا مەن الماتى قالالارىندا جۇرگىزىلسە، وڭىرلەردە جەرگىلىكتى جەردىڭ تاريحى مەن ولكەتانۋ باعىتىنداعى كىتاپتار سيفرلانۋدا. سونىڭ ناتيجەسىندە پارتيانىڭ باستاماسىمەن ەلىمىزدە ٴبىرىڭعاي ونلاين كىتاپحانا جۇيەسى ىسكە قوسىلماق. بۇل جۇيەگە بارلىق ۋنيۆەرسيتەتتەردىڭ كىتاپحانالارى دا ەنگىزىلەدى دەپ جوسپارلانىپ وتىر. مۇنداي قادام ەلىمىزدەگى كەز كەلگەن كىتاپتى ەلەكتروندى تۇردە وقۋعا مۇمكىندىك بەرەدى.

«نۇر وتان» پارتياسىنىڭ كىتاپحانا قىزمەتىن جاڭعىرتۋداعى كەزەكتى باستاماسى – زاماناۋي ٴبىلىم ورتالىقتارىن قۇرۋ ٴىسى بويىنشا پاۆلودار وبلىسىندا ايتارلىقتاي جۇمىستار اتقارىلعان. بۇگىندە وڭىردە 25 كوۆوركينگ ورتالىعى اشىلىپ، وندا كىتاپ وقۋمەن قاتار، ٴتۇرلى تاقىرىپتاردا پىكىرتالاستار مەن ترەنينگتەر جانە بەلگىلى تۇلعالاردىڭ دارىستەرىن وتكىزۋ ٴىسى جۇيەلى جولعا قويىلعان.

كىتاپحانا وقىرماندارىمەن جانە ٴوڭىردىڭ ٴبىر توپ جاس اقىن-جازۋشىلارىمەن كەزدەسكەن «نۇر وتان» پارتياسى ٴتوراعاسىنىڭ ٴبىرىنشى ورىنباسارى مۇنداي باستامالاردىڭ ماڭىزى زور ەكەنىن ايتتى.

– ەلباسىنىڭ «رۋحاني جاڭعىرۋ» باعدارلاماسىنىڭ نەگىزگى ٴمانى جاستاردىڭ بىلىمگە دەگەن قۇشتارلىقتارىن ارتتىرۋ. ال بار ٴبىلىمنىڭ نەگىزى كىتاپتا ەكەنى بەلگىلى. سوندىقتان پارتيا ٴتوراعاسىنىڭ تاپسىرماسى بويىنشا ٴبىز وسىنداي يگى ٴىستى قولعا الدىق. بۇل – باسەكەگە قابىلەتتى، ينتەللەكتۋالدى ۇلت قالىپتاستىرۋعا جانە ەلىمىزدىڭ ەكونوميكالىق دامۋىنا ۇلەس قوسۋعا باعىتتالعان ناقتى جۇمىستار، – دەدى ماۋلەن اشىمبايەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي