BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جىل تاڭداۋى – سۇلتانماحمۇت تورايعىروۆ

بۇگىن قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا «ٴبىر ەل – ٴبىر كىتاپ» رەسپۋبليكالىق اكسياسى اياسىندا جالپىحالىقتىق وقۋعا جىل كىتابىن تاڭداۋ وتىرىسى ٴوتتى. اتالمىش اكسياعا بيىل 10 جىل بولادى. بيىلعى اكسياعا بەس مىڭ وقىرمان قاتىسقان، ونىڭ ەكى جارىم مىڭى الەۋمەتتىك جەلى ارقىلى داۋىس بەرگەن.

كوميسسيا مۇشەلەرى: م.جولداسبەكوۆ، ن.ايت ۇلى، م.كەمەل، ت.جۇرتباي، ج.ٴالماش ۇلى، ر.مۇقانوۆا، د.قامزابەك ۇلى، د.ٴقىدىرالى، ا.ىسىم ۇلى، س.دوسجانوۆا، ش.قۇرمانباي، ل.قاپىشەۆا، م.ەرشۋ، س.تاۋەكەلوۆ، ٴۇ.مۇڭالبايەۆا.

ال اكسياعا ۇسىنىلعان كىتاپتاردىڭ ٴتىزىمى تومەندەگىدەي بولدى:

1.ابايدىڭ قاراسوزدەرى.

2.م.اۋەزوۆ «اباي جولى».

3.م.ماقاتايەۆتىڭ شىعارمالارى.

4.ٴى.ەسەنبەرليننىڭ شىعارمالارى.

5.ٴا.كەكىلبايەۆ «ۇركەر».

6.ٴا.نۇرپەيىسوۆ «قان مەن تەر».

7.ش.مۇرتازا «قىزىل جەبە».

ەندى كوميسسيا مۇشەلەرىنىڭ سويلەگەن سوزدەرىنەن قىسقاشا ٴۇزىندى كەلتىرەيىك.

جىل كىتابىن تاڭداۋ وتىرىسىندا الاشتانۋشى، عالىم ت.جۇرتباي: «ٴا.نۇرپەيسوۆتىڭ كىتابىن مىڭ جەردەن ۇسىنعانمەن دە، بۇگىنگى كۇنى ونى وقۋدىڭ قاجەتى جوق. ودان دا ٴسابيتتىڭ «بوتاگوزىن» وقىتايىق. «قىزىل جەبە» دە بۇگىنگى كۇننىڭ تالابىنان شىعىپ تۇرعان جوق. وقىرمانداردىڭ تالعامىن رەتتەيتىن كەز بولدى عوي. اباي، مۇحتار، ٴىلياستار وقىلدى. ٴابىش كەكىلبايەۆتىڭ «ۇركەر» رومانى باقانداي 67 باسپاتاباق. ونى كىم وقىپ وتىرادى؟ ودان دا ٴابىشتىڭ ىشىنە ٴتورت پوۆەستى ەنگەن «دالا باللادالارىن» ۇسىنار ەدىم. بۇل تاڭداۋ وقىرماندارعا دا جەڭىلىرەك بولار ەدى»، - دەپ ٴوز ويىن ٴبىلدىردى.

اقىن ن.ايت ۇلى: «مەن تۇرسىننىڭ سوزىنە تولىعىمەن قوسىلامىن. جانە تاعى ٴبىر ايتا كەتەرلىگى - وسى ۋاقىتقا دەيىن قالىس قالىپ كەلە جاتقان ەكى اۆتور بار. ولار - شورتانباي مەن قاسىم امانجولوۆ. وسى ەكەۋىن تىزىمگە كىرگىزۋ كەرەك ەدى...» - دەدى.

جازۋشى-دراماتۋرگ ر.مۇقانوۆا: «وقىرمانىمىزعا بەلگىلى ٴبىراق وسى كۇنى ۇمىتىلىپ بارا جاتقان ب.سوقپاقبايەۆ، ت.ٴالىمقۇلوۆ، ت.ايبەرگەنوۆتەردى قوسۋدى قالار ەدىم»، - دەپ ۇسىنىس تاستادى.

«ەگەمەن قازاقستان» رەسپۋبليكالىق گازەتى» اكسيونەرلىك قوعامىنىڭ باسقارما ٴتوراعاسى، مۇستافاتانۋشى عالىم د.ٴقىدىرالى: «بيىل الاشتىڭ 100 جىلدىعى. الاش تاقىرىبى قامتىلۋى كەرەك. ماسەلەن، سۇلتانماحمۇتتاي اقىنىمىز ۇمىت بولىپ بارا جاتىر»، - دەپ تىزىمگە الاش اقىنى سۇلتانماحمۇت تورايعىروۆتى ەنگىزۋ كەرەكتىگىن ايتتى. سونداي-اق، دارحان ٴقىدىرالى مىرزا: «ٴمىرجاقىپ، احمەتتەردى ايتۋعا بولادى. ٴبىراق وسىلاردىڭ ىشىندە سۇلتانماحمۇتتىڭ ورىنى ەرەكشە دەپ ويلايمىن»، - دەپ ٴسوزىن قورىتىندىلادى.

بەلگىلى الاشتانۋشى عالىم ديحان قامزابەك ۇلى: «الاشتى ناسيحاتتايىق، الاش ادەبيەتىنەن باستايىق. سوندىقتان دا بەرنياز، ٴمىرجاقىپتاردى ۇسىنامىن»، - دەسە، اۋەلگىدە شورتانباي مەن قاسىمدى قوسۋ كەرەكتىگىن ايتقان نەسىپبەك ايت ۇلى: «جول – سۇلتانماحمۇتتىكى! الدىڭعى سوزدەرىمدى قايتىپ الدىم...»، - دەپ قايتا تاڭداۋ جاسادى.

اقىن، جازۋشى ساۋلە دوسجانوۆا: «مەن داۋىسىمدى سۇلتانماحمۇتقا بەرەمىن!» - دەي كەلە، كوميسسيا مۇشەلەرى دە الاشتىقتاردى تاڭداماسا سىن بولاتىندىعىن جەتكىزدى.

ٴتىل ٴبىلىمىنىڭ بىلگىرى شەرۋباي قۇرمانباي ۇلى: «بيىل – الاش جىلى. وسىناۋ تىزىمگە ٴمىرجاقىپتى قوسۋعا بولاتىن ەدى»، - دەسە، قالامگەر مىرزاگەلدى كەمەل: «مەنىڭ تاڭداۋىم – سۇتانماحمۇت، بەرنياز، ٴمىرجاقىپ!» - دەپ ٴسوزدىڭ توقەتەرىن ٴبىر-اق ايتتى.

«قازاق راديوسى» ادەبي-سازدى رەداكسياسىنىڭ جەتەكشىسى ل.قاپىشەۆا: «تىزىمگە ٴمىرجاقىپتىڭ قوسىلعانىن قالار ەدىم»، - دەدى الاشتىقتاردىڭ ىشىندە جاقاڭنىڭ ورىنى ەرەكشە ەكەنىندىگىن مەڭزەپ.

اقىن مارجان ەرشۋ بولسا: «بيىل – شىنىمەن دە، الاش جىلى عوي. سۇلتانماحمۇت – ۇلت اقىنى. ەندەشە، سۇلتانماحمۇت وقىرمانداردىڭ ويىنان شىعادى دەپ ويلايمىن»، - ٴوز پىكىرىن ٴبىلدىردى.

كوميسسيا مۇشەلەرىنىڭ سوزىنەن كەيىن ۇلتتىق اكادەميالىق كىتاپحانا باسشىسى ٴۇمىتحان داۋرەنبەكقىزى: «وبلىستىق كىتاپحانا باسشىلارىنىڭ دا پىكىرىن بىلە وتىرايىق»، - دەپ ۇسىنىس تاستادى.

كىتاپحانا باسشىلارىنىڭ تاڭداۋى – سۇلتانماحمۇت، ش.مۇرتازا، قادىر، مۇقاعالي، س.ەلۋباي، ب.مۇقاي، ٴمىرجاقىپ، بەيىمبەت، بەرنياز سياقتى قالامگەرلەر بولدى. قىزۋ تالقىدان سوڭ كوميسسيا مۇشەلەرىنە قايتا ساۋالناما جۇرگىزىلدى. بارلىعى دا ٴبىراۋىزدان سۇلتانماحمۇت تورايعىروۆقا توقتالدى.

ٴسوز سوڭىندا مودەراتور عاريفوللا ەسىم: «ٴبىز قازاق مۇددەسى ٴۇشىن جۇمىس ىستەۋىمىز كەرەك! ەشقانداي دا بۇراتارتۋشىلىققا جول بەرمەۋىمىز كەرەك. تىزىمدە سۇلتانماحمۇتتىڭ ٴاتى-جونى جوق بولعانىمەن دە، كورىپ وتىرسىزدار، ونىڭ ٴارۋاعى باسىم ٴتۇسىپ وتىر»، - دەپ ٴباتۋا بايلادى.

سونىمەن 2017 جىلدىڭ كىتابىن تاڭداۋدا قىزۋ پىكىرتالاس بولدى. كوميسسيا وتىرىسىنىڭ قورىتىندىسىن مادەنيەت جانە سپورت مينيسترلىگى مۇراجايلار مەن كىتاپحانالار باسقارماسىنىڭ باس ساراپشىسى سەرعازى تاۋەكەلوۆ: «بۇگىنگى اشىق وتكەن كىتاپ تاڭداۋىندا دۇرىس شەشىم قابىلدادىق دەپ ويلايمىن. بيىل – الاشتىڭ 100 جىلدىعى. سوندىقتان دا سۇلتانماحمۇتتىڭ شىعارمالارىن دارىپتەيىك!» - دەپ تۇيىندەدى.

باۋىرجان بەرىك ۇلى

قر ۇاك قىزمەتكەرى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي