وقۋشىلار ەلباسى ماقالاسىن تالقىلادى

استانا، baq.kz ٴتىلشىسى. ەلورداداعى nurorda مەكتەبىندە « ۇلى دالانىڭ جاسامپاز جاستارى» اتتى رەسپۋبليكالىق اشىق ساباق ٴوتتى.

شارانى «ٴبىلىم-يننوۆاسيا» جانە «ٴبىلىم وردا» حالىقارالىق قوعامدىق قورى ۇيىمداستىردى. وعان اتالعان قورعا قاراستى 30-دان استام ٴبىلىم بەرۋ مەكەمەلەرىنىڭ ۇستازدارى، اتا-انالار جانە وقۋشىلار ونلاين تەلەكوپىر ارقىلى قاتىستى.

اشىق ساباق بارىسىندا وقۋشىلار ەلباسى نۇرسۇلتان نازاربايەۆتىڭ «رۋحاني جاڭعىرۋ» باعدارلاماسىن ىسكە اسىرۋ جانە « ۇلى دالانىڭ جەتى قىرى» اتتى ماقالاسىنداعى ماسەلەلەردى تالقىعا سالدى. ولار ەلىمىزدىڭ مادەني جانە رۋحاني دامۋى ٴۇشىن ماڭىزدى بولىپ سانالاتىن التى ٴىرى جوباعا قاتىستى ٴوز پىكىرلەرىن ٴبىلدىردى.

«بۇگىنگى رەسپۋبليكالىق اشىق ساباق بارىسىندا وقۋشىلار اقپاراتتىق، يننوۆاسيالىق تەحنولوگيالاردى جانە ۆيرتۋالدى قوسىمشالارعا نەگىزدەلگەن ٴار ٴتۇرلى باعدارلامالار مەن ٴبىرقاتار ادىستەردى قولدانۋ ارقىلى ماقالانى جوعارى دەڭگەيدە تالقىلاپ شىقتى. ارينە 1 ساعات كولەمىندە ەلباسىنىڭ كوتەرگەن ماسەلەلەرىن شەشۋ مۇمكىن ەمەس، ونى الداعى ۋاقىتتا وسىنداي اشىق ساباق شەڭبەرىندە تالقىلاپ قانا قويماي، پراكتيكا جۇزىندە ىسكە اسىرۋ قاجەت دەپ سانايمىن»، - دەيدى «ٴبىلىم-يننوۆاسيا» ليسەيلەرىنىڭ ادىسكەرى ارىستان ساتانوۆ.

ال اتالعان ليسەيدىڭ 10-سىنىپ وقۋشىسى ايمار ٴابساتاروۆ اشىق ساباقتىڭ وزىنە ۇناعانىن ايتادى.

«ساباق قىزىقتى ٴوتتى. ەلباسىنىڭ جاڭا ماقالاسىن تالداۋ ارقىلى قۇجاتتا بولاشاققا باعدار بەرەتىن ناقتى تاپسىرمالار ايقىن كورسەتىلگەنىنە كوز جەتكىزدىم»، - دەيدى ول.

تەگي
• استانا
• ەلباسى
• پرەزيدەنت
• مەكتەپ وقۋشىلارى
• رۋحاني جاڭعىرۋ

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!