BAQ.kz - Қазақстан жаңалықтары USD 379.01 BAQ.kz - Қазақстан жаңалықтары EUR 423.24 BAQ.kz - Қазақстан жаңалықтары RUB 5.9
استانا:

قازاقتىڭ فوررەست گامپى. «سۋرەتتى جاقسى سالادى. ينتەرناتتان قاشىپ كەتۋگە بەيىم» ەكسكليۋزيۆ

فوتو: Ⓒ Марат Жыланбаевтың жеке мұрағатынан

استانا، baq.kz ٴتىلشىسى. ول – قاراقۇمدى، ساحارانى، ۇلكەن ۆيكتوريا مەن اجال القابى شولدەرىن جۇگىرىپ وتكەن جالعىز مارافونشى. ونىڭ ٴشول دالادا جاساعان رەكوردىن ٴالى كۇنگە دەيىن ەشكىم جاڭارتا العان جوق. ول – قازاقتان شىققان جەلاياق، سۋپەرمارافونشى مارات جىلانبايەۆ.
مارات نەگە سۋرەت سالۋدان سپورتقا اۋىستى؟ مارافون كەزىندە قانداي وقيعالاردى باستان كەشتى؟ ونىڭ جاتتىعۋ تەحنيكاسى نەسىمەن ەرەكشە؟ ول ٴۇشىن جۇگىرۋ دەگەن نە؟

«سۋرەت سالۋدى ٴوز بەتىمشە مەڭگەردىم»

baq.kz: - حارۋكي مۋراكاميدىڭ «مەن جۇگىرۋ تۋرالى ٴسوز ەتكەندە نە ويلايمىن» اتتى كىتابىندا: «كەيبىرەۋلەر جۇگىرۋدى جاقسى كورەتىن ادامدار ٴومىرىن ۇزارتۋ ٴۇشىن بارىنە دايىن ادامدار ەكەنىن ايتىپ كۇلەدى. شىن مانىندە جۇگىرۋدەگى ماقسات – ٴومىر جاسىڭدى ۇزارتۋ ەمەس، ٴومىر ساپاسىن جاقسارتۋ» دەيدى. ٴسىز ٴۇشىن جۇگىرۋ دەگەن نە؟
مارات:- مەن ٴۇشىن جۇگىرۋ – ٴدارى: ورىندى قولدانساڭ – ەمدەلەسىڭ، ورىنسىز قولدانساڭ – ولەسىڭ. اعزاڭىز ىشكەن-جەگەندى، ۇيىقتاعاندى جانە ەشتەڭە ىستەمەگەندى جاقسى كورەدى، ول «جالقاۋلىق» دەپ اتالادى. كوبى جۇگىرۋ دەگەندى اۋىزدان كوبىك اققانشا شارشاۋ، دەنە مۇشەلەرىڭنىڭ اۋىرسىنۋى دەپ تۇسىنەدى. بۇل تۇبەگەيلى قاتە تۇسىنىك. جۇگىرۋدەگى ماقساتىم – ادام اعزاسى كەز كەلگەن جاعدايعا توزە الاتىنىن دالەلدەۋ.

Марат Жыланбаев. 02.12.2018 - Астана қаласы. Ⓒ Нұржас Жақсыбай,. BAQ.KZ
مارات جىلانبايەۆ. 02.12.2018 - استانا قالاسى. Ⓒ نۇرجاس جاقسىباي،. baq.kz

baq.kz: - سپورتشى بولۋ - بالا ارمانىڭىز با؟
مارات: - مەنىڭ ارمانىم – سۋرەتشى بولۋ ەدى. ول ارمانىم ورىندالدى. الدىمەن انام، كەيىن اكەم باقيلىق بولىپ، جەتى جاسىمدا جەتىمدىكتىڭ ٴدامىن تاتتىم. بەس اعايىندى ەدىك: ۇيدەگى ۇلكەن ۇشەۋىمىزدى قاراعاندى وبلىسى، ساران قالاسىنداعى №1 جەتىمدەر ۇيىنە وتكىزىپ، كىشى ەكەۋىن تۋىستارىمىز اسىراپ الدى. كۇيزەلىسكە تۇسكەنىم سونداي، ساباق وقي المادىم. بار بىلەتىنىم – ەڭ سوڭعى پارتاعا وتىرىپ الىپ، سۋرەت سالۋ. انام كوزى ٴتىرى كەزىندە بىزگە سۋرەت سالدىراتىن. ماعان، «بالام، سەن سۋرەتتى جاقسى سالاسىڭ. سەن سۋرەتشى بولاسىڭ» دەيتىن. ونىڭ سول ٴسوزى جادىمدا جاتتالىپ قالىپ، ٴمۇعالىم ۇرىسسا دا، بۇرىشقا تۇرعىزسا دا، قاعازىمدى تارتىپ السا دا سۋرەت سالۋدى جالعاستىرا بەردىم. ٴبىرىنشى سىنىپتى كىلەڭ ەكىمەن ٴبىتىردىم، تەك سۋرەت ساباعىنان بەس الدىم.

«ٴبىرىنشى سىنىپتى «2» دەگەن باعامەن ٴبىتىردىم»

baq.kz: - دەمەك، كۇيزەلىستەن شىعۋعا سۋرەت سالۋ كومەكتەستى عوي؟
مارات: - ٴبىز وقىعان مەكتەپ-ينتەرناتتا «ا» جانە «ب» سىنىبى عانا بولاتىن. «ا» سىنىبىندا جەتىمدەر ٴۇيىنىڭ، كوپبالالى وتباسىدان شىققان جانە الەۋمەتتىك از قامتىلعان وتباسىلاردىڭ بالالارى وقىسا، «ب» سىنىبىندا اقىل-ەسى كەم، اۋتيزم، داۋن سيندرومى، شيزوفرەنيا دياگنوزى قويىلعان بالالار وقيتىن. وقۋ جىلى اياقتالار كەزدە ٴبىزدىڭ دەنساۋلىق جاعدايىمىزدى تەكسەرگەن دارىگەرلەر ماعان ەكىنشى سىنىپقا كوشپەيتىنىمدى نەمەسە «ب» سىنىبىنا اۋىستىرىلاتىنىمدى ايتتى. قانداي شەشىم قابىلداسا دا ماعان ٴبارىبىر بولدى. سول كەزدە تاربيەشىم مەكتەپ باسشىلىعىنا مەنىڭ اقىل-ەسىم دۇرىس ەكەنىن ايتىپ، ەكىنشى سىنىپقا كوشىرۋگە كوندىردى. كەلەسى جىلدان باستاپ ۇشپەن وقي باستادىم. ٴتورتىنشى سىنىپتان باستاپ كىتاپحاناعا بارىپ، سۋرەت سالۋعا، تانىمال تۇلعالاردىڭ ٴومىر جولىنا قاتىستى بارلىق كىتاپتى وقىدىم. كىتاپحاناشى ماعان كىتاپ وقۋدى ەرتەگى وقۋدان باستاۋ كەرەك ەكەنىن ايتاتىن. كىتاپ وقۋ ارقىلى كەز كەلگەن تانىمال تۇلعا ٴدال ٴوزىم سياقتى ەت پەن سۇيەكتەن جارالعان، بويىندا دارىنى بار، ٴبىراق كوپ ەڭبەكتەنەتىن ادام ەكەنىن ٴتۇسىندىم. ٴسويتىپ سۋرەت سالۋدى ٴوز بەتىممەن مەڭگەرىپ الدىم. كەيىن وقۋشىلار سارايىنا سۋرەت ۇيىرمەسىنە بارعان كەزدە ٴمۇعالىم مەنىڭ سالعان سۋرەتىمە قاراپ: «ساعان ۇيرەتەتىن ەشتەڭە جوق. ٴبارىن ٴوزىڭ ٴبىلىپ تۇرسىڭ» دەدى. مەكتەپ-ينتەرناتتا مەنىڭ مىنەزدەمەمدە «سۋرەتتى جاقسى سالادى. ينتەرناتتان قاشىپ كەتۋگە بەيىم» دەپ جازىلعان. شىنىمەن، كۇن جىلىنا قالسا ينتەرناتتان قاشىپ كەتەتىنمىن. جەتىمدەر ۇيىندە قونعاننان گورى، دالاعا قونا سالۋدى ارتىق كورەتىنمىن.

Марат Жыланбаев

Марат Жыланбаев

مارافونداعى ەڭ العاشقى جەڭىس

baq.kz: - سۋرەت سالۋدان سپورتقا اۋىسۋىڭىزعا نە تۇرتكى بولدى؟
مارات: - سۋرەت سالۋدى مەڭگەرىپ العان سوڭ دەنە شىنىقتىرۋ فاكۋلتەتىنە وقۋعا ٴتۇستىم. سول كەزدە دە بولاشاقتا سۋرەتشى بولاتىنىما سەنىمدى بولدىم. سۋرەتتى سالىپ قانا قويماي، شەتەلگە قوماقتى قاراجاتقا ساتاتىنمىن. اقشام كوپ بولعانى سونداي، وڭدى-سولدى شاشتىم. پاتەر ەمەس، كوتتەدج جالداپ تۇردىم. كەيىن سۋرەت شەبەرحاناسىن اشتىم. ول كەزدە ناتيجە ٴۇشىن ەمەس، دەنساۋلىق ٴۇشىن جۇگىرەتىنمىن. سپورتتىق باعدارلاۋ بويىنشا كسرو-نىڭ جاسوسپىرىمدەر اراسىنداعى جەڭىمپازى بولدىم. جاتتىقتىرۋشىم ماعان جۇگىرۋ دايىندىعى جەتىسپەيتىنىن ايتتى. سودان مارافون توبىنا اۋىستىم. جۇگىرە بەرۋدەن دە جالىعادى ەكەنسىڭ. مارافوننان شىقپاق بولىپ جۇرگەندە جاتتىقتىرۋشىم «مارات، سەن ٴالسىز ادامسىڭ. وسى توپتان ٴبىرىنشى بولىپ شىعىپ قالاتىنىڭدى سەزىپ ٴجۇرمىن» دەدى. ونىڭ مەنى قايراۋ ماقساتىندا ايتقان سوزدەرى نامىسىما ٴتيىپ، ناتيجە ٴۇشىن جۇگىرە باستادىم.

baq.kz: - ەڭ العاش قاتىسقان مارافون ەسىڭىزدە مە؟
مارات: - العاش رەت 1982 جىلى قاراعاندىدا بولعان مارافونعا قاتىستىم. بۇرىنعى ەرەجە بويىنشا، مارافونعا تىركەلگەن سوڭ 21 شاقىرىمعا دەيىن جۇگىرىپ، توقتاۋىڭا بولاتىن ەدى. 21 شاقىرىمعا تاياعاندا جاتتىقتىرۋشىم توقتاۋىم كەرەك ەكەنىن ايتتى، ال ارى قاراي جۇگىرگەندەر مارەگە جەتپەي قالدى. ٴسويتىپ ٴبىرىنشى ورىن الدىم.

Марат Жыланбаев Ажал алқабында

مارات جىلانبايەۆ اجال القابىندا

«توقتاماي كۇلىپ، توقتاماي جىلادىم»

baq.kz: - ٴسىز ٴۇشىن قيىنى قاي مارافون بولدى؟
مارات: - 1993 جىلى الەمدەگى ەڭ ۇلكەن ٴشول – ساحارانى 24 كۇندە جۇگىرىپ ٴوتتىم. قۇرمادان اللەرگيا بولىپ، ٴۇستى-باسىم ٴبورتىپ كەتتى. كۇندىز جۇگىرسەم، تۇندە ۇيىقتاي المايمىن. ٴۇستى-باسىم قىشىپ، مازام قاشتى. ٴبىر كۇنى تاڭەرتەڭ سەبەپسىزدەن كۇلە باستادىم. توقتاۋسىز كۇلدىم. ودان كەيىن توقتاۋسىز جىلادىم. جىلاپ بولعان سوڭ قايتادان توقتاۋسىز كۇلە بەردىم. وسىلاي بىرنەشە رەت قايتالاندى. نە سەبەپتى ولاي بولعانىن بىلمەيمىن، ٴبىراق سول جاعدايدان كەيىن جانىم تىنىشتالىپ، اللەرگيام جوعالىپ كەتتى. بۇل مارافون وسى وقيعامەن ەسىمدە قالدى.

Марат Жыланбаев Сахарадаمارات جىلانبايەۆ. ساحارا ٴشولى

baq.kz: - جەڭىسكە دەگەن قۇمارلىق، بىربەتكەيلىگىڭىز كىمنەن دارىعان قاسيەت؟
مارات: - بۇل اتامنان دارىعان قاسيەت. ٴبىزدىڭ تەگىمىز جىلانباي دەپ جازىلادى، ٴبىراق بابامىزدىڭ ازان شاقىرىپ قويعان اتى ولاي ەمەس. تۋىستارىمنىڭ ايتۋىنشا، كۇندەردىڭ ٴبىر كۇنىندە اتامنىڭ شاشتارى ٴتۇسىپ، قولدارى اقتاڭعالاق بولا باستاپتى. الاپەس دەرتىنە شالدىققان دەپ قورىققان اۋىلداستارى اتامدى اۋىلدان الاستاتقان ەكەن. سودان اتام كەنت تاۋلارىنداعى ۇڭگىردە تۇرىپ، جىلان اۋلاپ كۇنەلتكەن. ٴبىر جىلدان كەيىن شاشى ٴوسىپ، اقتاڭعالاعى كەتە باستاعانىن كورگەن اۋىلداستارى ونى قايتادان شاقىرىپ العان. سودان ونى جىلانباي دەپ اتاپ كەتكەن جانە ٴبىزدىڭ تەگىمىز دە جىلانباي دەپ جازىلعان.

«ماقسات – مۇمكىندىك شەگىنەن شىعا جاتتىعۋ»

baq.kz: - مارافونشىلار كلۋبىن قۇرىپ، جاتتىقتىرۋشى بولۋ تۋرالى وي قايدان كەلدى؟
مارات: - 1986 جىلى ەكىباستۇز قالاسىنداعى ساياباقتا قاسىمنان قىز بەن جىگىت جۇگىرىپ ٴوتتى. ولاردى توقتاتىپ، جۇگىرۋ تەحنيكالارى دۇرىس ەمەس ەكەندەرىن ايتتىم. «بۇلاي جۇگىرە بەرسەڭدەر كوپ ۇزاماي تىزەلەرىڭدى شىعارىپ الاسىڭدار» دەپ ەدىم، ولار ماعان سىپايى ايتقاندا «شارۋاڭ قانشا!» دەدى دە، كەتىپ قالدى. سول كەزدە مارافونشىلار كلۋبىن اشۋ تۋرالى وي كەلدى. بار بىلگەنىمدى تەگىن ۇيرەتتىم. دەمەۋشىم «adidas» فيرماسى بولدى. 42 شاقىرىمدىق مارافون ۇيىمداستىرا باستادىم. وعان كەڭەس وداعى بويىنشا مارافونشىلار كەلەتىن. «جيگۋلي» كولىگىن، «ۋرال» موتوسيكلىن باسكە تىكتىم. ەكىباستۇز قالاسىندا وتەتىن مارافونعا ماسكەۋدەن سپورت تىلشىلەرى كەلەتىن. سپورت رەيتينگى بويىنشا ٴبىزدىڭ مارافون كلۋبى كسرو-داعى ەڭ مىقتى ون كلۋبتىڭ قاتارىندا بولدى.

baq.kz: - ٴوزىڭىز ويلاپ تاپقان جۇگىرۋ تەحنيكاسى نەگە نەگىزدەلگەن؟
مارات: - مۇمكىندىكتىڭ شەگىنەن شىعا جاتتىعۋدى ماقسات تۇتتىم. جۇگىرۋ تەحنيكامدى جاقسارتۋ ٴۇشىن ٴبىر جىل بويى قىستا دا، جازدا دا، اسفالت جولدا دا، تاس جولدا دا جالاڭ اياق جۇگىردىم. قاراعاندى، ماسكەۋ، سەلينوگراد، الماتى جانە باسقا قالالاردا وتكەن التى مارافوندى جالاڭ اياق جۇگىرىپ شىقتىم. ٴبىزدىڭ مارافونشىلار اپتاسىنا 50-70 كم جۇگىرەدى، ال ايتارلىقتاي ناتيجە بولۋ ٴۇشىن كۇنىنە 70-80 كم جۇگىرۋ كەرەك. ٴوزىم ويلاپ تاپقان جاتتىعۋ جۇيەسىن «سوۆەتسكيي سپورت» گازەتى مەن «بەگ ي مى» جۋرنالىنا جاريالادىم. ونى بۇكىلوداقتىق جاتتىقتىرۋشى فەدور سكلوكين مەن الەمنىڭ بەس دۇركىن چەمپيونى ۆيتاليي كوۆەلگە جىبەردىم. ولار «بۇلاي بولۋى مۇمكىن ەمەس» دەگەندە، مەن «كۇتىڭدەر! كەلەسى جىلى مەن مىقتىراق بولام» دەدىم.

«دەنەڭدى بوس ۇستا، ٴلاززات ال»

baq.kz: - جۇگىرگەن كەزدە ەڭ باستى ەسكەرەتىن جايت نە؟
مارات: - ەڭ باستىسى – جۇگىرەر كەزدە قانشا قاشىقتىقتى جۇگىرىپ وتەتىنىڭدى ٴبىلۋىڭ كەرەك جانە اۋا رايى جاعدايىنا بايلانىستى كۇشىڭدى، دەمىڭدى دۇرىس ەسەپتەۋىڭ قاجەت. سودان كەيىن بويىڭدى بوس ۇستاپ، جۇگىرۋدەن ٴلاززات الۋ كەرەك.

baq.kz: - سىرت كوزگە قاراعاندا جۇگىرۋ – ارنايى جاتتىقتىرۋشىنى قاجەت ەتەتىن سپورت تۇرىنە ۇقسامايدى. شىن مانىندە قالاي؟
مارات: - جاتتىقتىرۋشىسىز الىس قاشىقتىققا جۇگىرگەندەردىڭ 70 پروسەنتى تىزە، ومىرتقا جاراقاتىن الىپ، ٴتىپتى جۇرەكتەرىنە زاقىم كەلتىرىپ الادى. سوندىقتان جاتتىقتىرۋشىمەن بىرگە دايىندالۋ – وتە ماڭىزدى. الەۋمەتتىك جەلىلەردە ماعان جۇگىرۋگە قاتىستى كوپ سۇراق قويىلادى. نەگە google-دان قاراي سالمايدى دەپ ويلادىم دا، ٴوزىم دە قاراپ كوردىم. تۇسىنگەنىم: عالامتوردا جۇگىرۋگە قاتىستى اقپاراتتىڭ كوپتىگى سونداي، قايسىسى جالعان اقپارات، قايسىسى دۇرىس اقپارات ەكەنىن ايىرۋ وڭاي ەمەس.

«تۇندە ۇيىقتاي المايتىن ادام – جالقاۋ ادام»

baq.kz: - قانداي جاتتىقتىرۋشىسىز؟
مارات: - اۋا رايى جاعدايىنا بايلانىستى جاتتىعۋدى باسقا كۇنگە اۋىستىرمايمىن. اۋا رايى جاعدايىنا قاراماي، جاڭبىرلى، جەلدى، ايازدى، بوراندى، قارلى اۋا رايىندا دا جۇگىرە بەرەمىز. تۇندە ۇيىقتاي المايتىن ادام – جالقاۋ ادام. بۇرىن مەن دە تۇندە ۇيىقتامايتىنمىن. سۋرەتتەرىمدى تۇندە سالىپ، ەرتەڭىندە جايىراق تۇراتىنمىن. تۇنگى ۇيقى دۇرىس بولماسا، تۇسكى ۋاقىتتا تۇرساڭ دا، ۇيقىڭ قانباي، كۇنى بويى دەل-سال كۇيدە جۇرەسىڭ. مەن بۇل كۇيدى جاقسى بىلەم. قازىرگى ۋاقىتتا تاڭعى 03:55-تە تۇرىپ، تۇنگى 22:00-دە ۇيىقتايمىن. شاكىرتتەرىم دە وسى ۋاقىتتا تۇرۋدى ۇيرەنىپ الدى.

baq.kz: - جاتتىعۋ ٴتارتىبى قانداي؟
مارات: - ٴار توپقا ارى كەتسە 15 ادامنان الامىن. اپتاسىنا ٴۇش رەت جاتتىعادى. كۇن سايىن تاڭعى 05:00، 06:00، 07:00، 08:00-دە جاتتىعاتىن توپتار كەزەك-كەزەك كەلىپ تۇرادى. جاقىن قاشىقتىقتا قالاي جۇگىرۋ كەرەك ەكەنىن دۇرىستاپ ۇيرەنۋ كەرەك، ال الىس قاشىقتىقتا قالاي جۇگىرۋ كەرەك ەكەنىن ەكىنىڭ ٴبىرى بىلە بەرمەيدى. جاتتىعۋدان قالمايتىن ادام عانا جاقسى ناتيجەگە جەتەدى. جالپى، ارەكەت ەتپەي، ٴدارى ٴىشۋ ارقىلى دەنساۋلىعىن جاقسارتىپ، ٴدارى سالعىسى كەلەتىن ادامدارعا ٴوزىم ويلاپ تاپقان ەكى ٴدارى ۇسىنام، ولار: «نەجراتين»، «بەگاتين» دەپ اتالادى.

«جۇگىرەتىندەر قاتارى كوبەيىپ كەلەدى»

baq.kz: - شاكىرتتەرىڭىزدىڭ ەڭ كىشىسى مەن ۇلكەنى نەشە جاستا؟
مارات: - استاناداعى بىرنەشە مەكتەپتە وقۋشىلارعا دۇرىس جۇگىرۋ جۇيەسىن ۇيرەتىپ ٴجۇرمىن. شاكىرتتەرىمنىڭ ەڭ ۇلكەنى – 67 جاستا. شاكىرتتەرىمىن ىشىندە قۇرىلىسشىلاردان باستاپ، ٴمۇعالىم، دارىگەر، پسيحولوگ ماماندار، دەپۋتات، مينيسترلەر بار. ولار ٴبىر اي جاتتىعۋدان كەيىن ٴوز بەتتەرىمەن 10 شاقىرىم قاشىقتىقتا جۇگىرە الادى. الدىما كەلگەن ادامنىڭ قاي جەرى اۋىراتىنى، تەمەكى شەگەتىن-شەكپەيتىنىن بىردەن ٴبىلىنىپ تۇرادى. تەمەكى شەكپەي، ديۆاندا اياق كوتەرىپ قويىپ جاتاتىن ادامنان گورى، تەمەكى شەكسە دە، جۇگىرەتىن ادام ارتىعىراق. سەبەبى جۇگىرگەن كەزدە ادامنىڭ وكپەسى تازارادى. ۆاريكوز، مايتابان، بۇيرەك اۋرۋى جانە باسقا دا دەرتتەرى بارلار كەلىپ، ساۋىعىپ كەتكەندەرى بولدى.

baq.kz: - «وسىنىڭ ٴبارى نە كەرەك؟ ٴبىر ٴسات دامىلدايىنشى!» دەگەن كەزىڭىز بولدى ما؟
مارات: - ونداي كەزدەر بارىندە بولادى جانە بۇل دا جالقاۋلىق دەپ اتالادى.

baq.kz: - ٴسىزدىڭ بالالىق شاعىڭىزدا سپورتپەن اينالىسۋعا جاعداي جاسالمادى، ٴبىراق قاتارلاستارىڭىز سپورتقا قۇمار بولدى. ال ٴقازىر بارلىق جاعداي جاسالعان، ٴبىراق ەسىرتكى ەگەتىندەر، تەمەكى شەگەتىندەر بارشىلىق. مۇنىڭ سەبەبى نەدە؟
مارات: - مۇنىڭ دا سەبەبى – جالقاۋلىق. ٴبىزدىڭ كەزدەگى بالالار قازىرگى بالالارداي ٴبىلىمدى بولعان جوق، ٴبىراق سپورتقا جانى قۇمار بولدى. قازىرگى بالالار ٴبىلىمدى، ٴبىراق نەنىڭ پايدالى، نەنىڭ زياندى ەكەنىن جاقسى بىلسە دە، ٴىس جۇزىندە ەشتەڭە ىستەمەيدى. باسىڭدا بار ٴبىلىمدى قولدانا بىلمەۋدەن اسقان زياندى نارسە جوق. ارتريت، ارتروز سياقتى تەك ەرەسەكتەر اۋىراتىن اۋرۋمەن اۋىرادى. بۇل نەدەن؟ سالاماتتى ٴومىر سالتىن ۇستانباۋدان. دەگەنمەن، بىلتىر وسى ۋاقىتتا جۇگىرۋمەن اينالىساتىن 1 توپ قانا بولسا، بيىل 4 توپ بار. بۇل جاقسىلىقتىڭ بەلگىسى.

«مارات، ٴبارى جاقسى بولادى!..»

baq.kz: - بالا كەدەگى ماراتقا حات جازساڭىز، نە جازار ەدىڭىز؟
مارات: - ادامداردىڭ كوبى وتكەنگە ورالىپ، بىردەڭە وزگەرتكىسى كەلەدى. ٴبىراق، بۇل – مەنىڭ جاعدايىمدا ەمەس. سىناق – ٴاردايىم قيىن، ٴبىراق سىناقسىز ٴومىر – ٴومىر ەمەس. سوندىقتان بالالىق شاعىمداعى ماراتقا «ٴبارى جاقسى بولادى!» دەپ ايتار ەم...

baq.kz: - وتباسىڭىز تۋرالى ايتا كەتسەڭىز.
مارات: - جۇبايىم، ٴتورت قىزىم، ٴبىر ۇلىم، نەمەرەم جانە 36 كروسسوۆكام بار. بالالارىم سالاماتتى ٴومىر سالتىن ۇستانادى، ٴبىراق سپورتپەن مەن سياقتى كاسىبي تۇردە اينالىسپايدى.

baq.kz: - قانداي جوسپارلارىڭىز بار؟
مارات: - بارلىق قازاقستاندىقتى دۇرىس جۇگىرۋگە ۇيرەتكىم كەلەدى. 23 جەلتوقساندا قىسقى مارافون بولادى. وندا 5، 10، 21، 42 شاقىرىم قاشىقتىقتا جۇگىرىپ وتەمىز. قالا قوناقتارى مەن تۇرعىندارىن وسى مارافونعا شاقىرامىن.


قازاقتىڭ فوررەست گامپى

الەۋمەتتىك جەلىلەردە مارات جىلانبايەۆتىڭ شاكىرتتەرى - ۇستازدارىنىڭ ٴجيى ايتاتىن، جىگەرلەندىرەتىن سوزدەرىن جازىپ وتىرادى. وقىرمان نازارىنا سولاردىڭ بىرەرىن ۇسىنامىز:

- كەز كەلگەن اۋا رايى جاعدايىندا جۇگىرەمىز.
- 40 گرادۋس ايازدى كۇنى كوز الدىڭىزعا ىستىق كۇندەگى جاعالاۋدى ەلەستەتىپ، جۇگىرە بەرىڭىز.
- جاڭا جاۋعان قار ۇستىندە جۇگىرىپ، ىزدەرىڭىزگە قاراساڭىز – اياعىڭىزدى دۇرىس-بۇرىس باسقانىڭىزدى كورەسىز.
- جاتتىعۋعا ٴولىپ قالعان جاعدايدا عانا كەلمەۋگە بولادى.
- مەن وسى كۇنگە دەيىن جاتتىعۋعا تاڭەرتەڭ كەلگەنى ٴۇشىن وكىنگەن ادامدى كەزدەستىرگەن ەمەسپىن. ەڭ جاقسى جاتتىعۋ – تاڭعى جاتتىعۋ.
- 1994 جىلى اقش-تاعى دوستارىم مەنى «فوررەست گامپ» ٴفيلمىنىڭ پرەمەراسىنا شاقىردى. ولار مەنى «فوررەست گامپ» دەپ اتاپ كەتتى. فيلم كەيىپكەرى «شارشادىم، ۇيگە قايتام. مەن 3 جىل، 2 اي، 14 كۇن، 16 ساعات جۇگىردىم» دەيدى. ال سەن فوررەست گامپتەن دە مىقتى بول، شاكىرتىم!


مارات جىلانبايەۆتىڭ الەمدىك رەكوردتارى
مارات جىلانبايەۆ 1990 جىلدارى «گيننەستىڭ رەكوردتار كىتابىنا» جەتى رەت تىركەلگەن.

  • 1990-1991 جىلدار ارالىعىندا 226 كلاسسيكالىق مارافوندى جۇگىردى.
  • 1991 جىلى ناۋرىز ايىندا 23 كۇن ىشىندە 23 كلاسسيكالىق مارافوون جۇگىردى.
  • 1991 جىلى شىلدە ايىندا 15 كۇن ىشىندە كۇنىنە ەكى مارافوننان 30 كلاسسيكالىق مارافوندى جۇگىردى.
  • 1992 جىلى 20 كۇن ىشىندە قاراقۇم شولىندە جالعىز ٴوزى جۇگىرىپ وتكەن (1200 كم).
  • 1993 جىلى الەمدەگى ەڭ ۇلكەن ٴشول – ساحارانى 24 كۇندە جۇگىرىپ وتكەن (1700 كم).
  • ٴدال سول جىلى اۆسترالياداعى ەڭ ۇلكەن ٴشول – ۆيكتوريانى 22 كۇندە ٴجۇرىپ وتكەن (1600 كم).
  • 1994 جىلى 17 كۇن ىشىندە اقش-تاعى نەۆادا ٴشولىن جۇگىرىپ ٴوتتى (1218 كم).

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي