BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بۋرابايدا جاڭا مەشىت پايدالانۋعا بەرىلدى

بۇگىن اقمولا وبلىسى بۋراباي اۋىلىنداعى الەۋمەتتىك وبەكت – مەشىت قۇرىلىسىنىڭ اشىلۋ سالتاناتى ٴوتتى، دەپ حابارلايدى baq.kz اقپارات اگەنتتىگى.

اعاشتان سالىنعان مەشىتتىڭ ەسكى عيماراتى ورتتەن قيراپ قالعاندىقتان، بۋراباي اۋىلىنىڭ تۇرعىندارى مەن قوناقتارى شامامەن ٴبىر جىلداي مەشىتكە بارا المادى. جاڭا مەشىتتىڭ عيماراتى قازاقستان رەسپۋبليكاسى پرەزيدەنتىنىڭ ٴىس باسقارماسىنىڭ باستاماسىمەن جىلعا جۋىق ۋاقىتتا سالىنىپ ٴبىتتى. قۇرىلىسى 2018 جىلعى قاڭتاردا باستالعان ٴدىني عيمارات بۇگىن پايدالانۋعا بەرىلدى. ول جاڭارتىلعان بۋراباي اۋىلىنىڭ ساۋلەت اجارىن كىرگىزىپ تۇر.

مەشىتتىڭ اشىلۋ سالتاناتىنا قازاقستاننىڭ باس ٴمۇفتيى سەرىكباي قاجى ساتىبالدى ۇلى وراز جانە اقمولا وبلىسىنىڭ اكىمى مالىك مىرزالين مەن قازاقستان رەسپۋبليكاسى پرەزيدەنتى ٴىس باسقارماسىنىڭ اپپارات باسشىسى ازامات امىرعاليەۆ قاتىستى.

«ەلدىگىمىزدىڭ، بىرلىگىمىزدىڭ ناقتى ايعاعى رەتىندە ٴبىز مۇسىلمان ٴدىنىن ۇستانعان جانە سول بابالاردىڭ ٴىزىن جالعاستىرۋشى رەتىندە قانداي اسەم مەشىتتەر سالىپ جاتىرمىز. بۇگىن بۋرابايدىڭ مەرەيتويىمەن بىرگە، ەلىمىزدەگى كورىكتى جەرى ارحيتەكتۋراسى مەن ۇرپاقتان ۇرپاققا تاريحي مۇرا بولىپ قالاتىن رۋحاني ىزگىلىكتىڭ كۋاسى بولىپ وتىرمىز. جاڭا ەسىگىن اشقان اللانىڭ ٴۇيى ٴبىزدىڭ ۇرپاقتارىمىزعا، ەلىن، جەرىن، وتانىن سۇيۋگە جانە ۇلى قۇندىلىقتارعا تاربيەلەۋگە سەبەپكەر بولسىن»، - دەدى قازاقستان مۇسىلماندارى ٴدىني باسقارماسىنىڭ ٴتوراعاسى، باس ٴمۇفتي، سەرىكباي قاجى وراز.

جالپى الاڭى 1659 م2، جەر ۋچاسكەسىنىڭ كولەمى 7771 م2 قۇرايدى. 150 ورىندىق مەشىت ٴۇش قاباتتان تۇرادى، سونىڭ ىشىندە ەرلەر مەن ايەلدەرگە ارنالعان ەكى عيبادات بولمەسى، كىتاپحانا، يمامنىڭ كابينەتى، 140 ورىندىق قاتىمحانا (اس بەرەتىن زال) بار. كەلۋشىلەرگە قولايلى بولۋ ٴۇشىن عيماراتتىڭ اينالاسىنداعى اۋماقتا اۆتوموبيل تۇراعى، گۇلزارلار جانە جاياۋ جۇرگىنشى جولدارى جاسالعان. وبەكتىنىڭ ىشىندە پرومەناد، كونگرەسس-حولل بار بولعاندىقتان، ونى ۇلكەن ساۋلەت كەشەنىنىڭ ٴبىر بولىگى دەۋگە بولادى.

«بيىلعى جىل ٴبىزدىڭ وبلىس ٴۇشىن، ايتۋلى وقيعالارعا تولى بولدى. استانانىڭ 20 جىلدىعىمەن قاتار، ەرەيمەنتاۋ، ساندىقتاۋ، ەسىل اۋداندارىنىڭ مەرەيتويلارى اتالىپ وتۋدە. سونىمەن قاتار وڭىرلەردە الەۋمەتتىك نىساندار پايدالۋعا بەرىلدى اتاپ ايتساق، سەلينوگراد اۋدانى، اقمول اۋىلىندا تۇڭعىش پرەزيدەنت ساياباعى مەن مادەني ساۋىقتىرۋ ورتالىعى اشىلدى. ودان بولەك، ساندىقتاۋ اۋدانى، ماكسيموۆكا اۋىلىندا جاڭا مۇراجاي، ٴبىرجان سال اۋدانىندا جاڭا مەكتەپ اشىلدى. وسىنداي ايتۋلى شارالاردىڭ قاتارىن بۋراباي اۋدانىنىڭ 90 جىلدىعى تولىقتىردى. بۇگىن مىنە اۋداننىڭ مەرەيتويى قارساڭىندا جاڭا مەشىت پايدالانۋعا بەرىلىپ وتىر. قازاقستان كوپكونفەسسيالى مەملەكەت جانە ٴدىن ماسەلەسىنە كوپ كوڭىل بولەدى. ٴبىز ٴۇشىن بارلىق ۇلتتار اراسىنداعى تۇسىنىستىك، بەيبىتشىلىك پەن كەلىسىم مەملەكەت ساياساتىنىڭ باستى ستراتەگياسى. مەشىتتىڭ اسەم بەزەندىرىلۋى مەن ەرەكشە ساۋلەتى كوز قۋانتادى. بۇل بۋراباي كەنتىنىڭ حالقىنا تاماشا تارتۋ. جاڭا مەشىت ەل يگىلىگى ٴۇشىن ەتىپ، جاس ۇرپاقتى ىزگى قاسيەتتەرگە تاربيەلەيدى دەپ سەنەمىن»، - دەدى اقمولا وبلىسىنىڭ اكىمى مالىك مىرزالين.

مەشىت قازاقستان مۇسىلماندارى ٴدىني باسقارماسىنىڭ قاداعالاۋىمەن سالىندى. قارجىلاندىرۋ مىندەتىن قر پرەزيدەنتى ٴىس باسقارماسىنىڭ «كاسىپكەرلىك باستامالاردى دامىتۋ قورى» وزىنە الدى.

قۇرىلىسى اياقتالعان سوڭ مەشىت قمدب قاراۋىنا تاپسىرىلدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي