جانداربەك بۇلعاقوۆ ەكىنشى رەت «التىن دومبىرا» يەگەرى اتاندى - رۋحاني جاڭعىرۋ|14 جەلتوقسان 2017، 22:53
كۋرسى ۆاليۋت وبنوۆليايۋتسيا
استانا:

جانداربەك بۇلعاقوۆ ەكىنشى رەت «التىن دومبىرا» يەگەرى اتاندى

فوتو: Автор

«التىن دومبىرا» - اقتوبەدە. التىنشى رەت وتكىزىلىپ وتىرعان جىر دوداسى تاۋەلسىزدىك كۇنىنە وراي ۇيىمداستىرىلعان. اقىندار ايتىسىندا 10 جۇيرىك سىنعا ٴتۇسىپ، جانداربەك بۇلعاقوۆ جۇلدەگەر اتاندى، دەپ حابارلايدى baq.kz ٴتىلشىسى.

ونەردى باعالايتىن اقتوبەلىكتەر ونەر ورتالىعىنىڭ كونسەرت زالىن تولتىردى. «جىر ارقاۋى – جاڭعىرۋ» رەسپۋبليكالىق اقىندار ايتىسىنا 10 اقىن قاتىستى. اسەت دۇيسەبايەۆ، جارقىنبەك ناۋشابەك، سىرىم اۋەسحان، ساادات نۇرمانوۆ، ٴمۇرادىل ميرمانوۆ، قۋانىش شارمانوۆ، اقتوبەلىك دانيار الدابەرگەنوۆپەن قاتار اينۇر تۇرسىنبايەۆا، سارا توقتامىسوۆا، جانداربەك بۇلعاقوۆ ونەر دوداسىنا ٴتۇستى. باس بايگە - التىن دومبىرا. "التىن دومبىرا" اقىندار ايتىسى وسىمەن التىنشى رەت ٴوتتى. بۇعان دەيىن استانا مەن الماتى قالالارىندا بولاتىن دودا تۇڭعىش رەت ايماقتا ۇيىمداستىرىلدى. العاش رەت - اقتوبەدە.

«تاۋەلسىزدىكتىڭ 26 جىلدىعى قارساڭىندا «التىن دومبىرا» ەلىمىزدىڭ وڭىرلەرىن ارالاۋعا شىقتى. العاش ايماق رەتىندە قاسيەتتى اقتوبەگە كەلىپ وتىرمىز. اقتوبە - قازاق رۋحانياتىنا تالاي دارىنداردى تارتۋ ەتكەن كيەلى ٴوڭىر. ەلباسى نۇرسۇلتان نازاربايەۆ «بولاشاققا باعدار – رۋحاني جاڭعىرۋ» اتتى باعدارلامالىق ماقساتىن حالىققا ۇسىندى. وسىعان وراي، رەسپۋبليكالىق اقىندار ايتىسىنىڭ تاقىرىبىن «جىر ارقاۋى - جاڭعىرۋ» دەپ الدىق. اقىندار بۇگىنگى ايتىستا ەلدىكتى، ەركىندىكتى ٴوز جىرلارىنا ارقاۋ ەتەدى دەپ ويلايمىن»،-دەدى قر مادەنيەت جانە سپورت مينيسترلىگىنىڭ كوميتەت ٴتوراعاسى قۋات بوراشەۆ.

ايتىس باستالماس بۇرىن قۋات بوراشەۆ اقىندارعا "مادەنيەت سالاسىنىڭ ۇزدىگى" توسبەلگىسىن تابىستادى. اينۇر تۇرسىنبايەۆا، سارا توقتامىسوۆا، جانداربەك بۇلعاقوۆ پەن بالعىنبەك يماشوۆ ماراپاتقا يە بولدى.

ايتىستىڭ جۇرگىزۋشىسى - اقىن، ساتيريك كوپەن امىربەك. كوپەن امىربەك ساحناعا شىققاندا قالىڭ كورەرمەن ٴجۇرسىن ەرماندى ىزدەدى.

«ايتىستىڭ بولاتىنىن حابارلاندىرۋدان ەستىدىك. «التىن دومبىرانىڭ» ٴبىزدىڭ قالادا وتەتىنى قاتتى قۋانتتى. ٴبىراق، جۇرگىزۋشىسى ٴجۇرسىن ەرماندى سوڭىنا دەيىن كۇتكەن ەدىك. كەلمەدى. سەبەبىن دە بىلمەي وتىرمىز. بۇگىنگى ايتىستىڭ دەڭگەيى جامان ەمەس. اقىن جاستارىمىز كوپ. سولاردى كوبىرەك شىعارۋ كەرەك دەپ ويلايمىن»،-دەدى قالا تۇرعىنى اسقاربەك.

ال، قۇرامىندا اقىن-جازۋشىلار، بەلگىلى ايتىسكەرلەر مەن پروفەسسورلار بار قازىلار القاسى قاتىسۋشىلاردىڭ ونەرىن باعالادى. ٴتوراعاسى - قازاقستاننىڭ حالىق اقىنى قونىسباي ٴابىل. اقىننىڭ سوزىنشە، التىن دومبىرا يەگەرى بولۋ وڭاي ەمەس. قويىلاتىن تالاپتار دا جوعارى.

«التىن دومبىرانىڭ جەڭىمپازى بولۋ ٴۇشىن قازاق ايتىسىنا قاجەتتى قانداي ۇلكەن تالاپتار بار سونىڭ بارلىعىن ورىنداۋ كەرەك. باستىسى تالانت بولۋى ٴتيىس. ودان كەيىن، داۋىسى دا، دومبىراسى دا بولۋ شارت. ساحنادا ٴوزىن ۇستاي ٴبىلۋى دە ماڭىزدى. وسى دۇنيەنىڭ ٴبارى بويىنان تابىلعان ادامدى مەن سەنىمدى تۇردە «التىن دومبىرا» يەگەرى دەپ بىلەمىن. تالاي اقىنداردى جاڭا قىرلارىنان كورسەتكەن «التىن دومبىرا» حالىقتىڭ ىقىلاسىنا بولەندى. جۇرت جىل بويى اسىعا كۇتەدى. ايتىسقا جاستاردى كوپ تارتۋ كەرەك»،-دەدى قازاقستاننىڭ حالىق اقىنى.

"التىن دومبىرا" جانداربەك بۇلعاقوۆقا تاعى دا بۇيىردى. العاشقىسىن ۇزدىك اقىن 2013 جىلى قانجىعاسىنا بايلاعان ەدى. التىن دومبىرامەن قاتار ول 3 ميلليون تەڭگە سىياقى الدى. 1 ورىن الماتىلىق سىرىم اۋەسحانعا 2 ميلليون تەڭگە بەرىلدى. 3 ورىن اسەت دۇيسەبايەۆتا (1 ميلليون تەڭگە). سارا توقتامىسوۆا، اينۇر تۇرسىنبايەۆالار 750 مىڭ تەڭگە سىياقى الدى.

فوتو، ۆيدەو: اۆتوردىكى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي