BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«قازاقستاننىڭ 100 جاڭا ەسىمى»: كيەلى قازاق ونەرىن الەمگە پاش ەتۋ – مەنىڭ ەڭ اسىل ارماندارىمنىڭ ٴبىرى ەكسكليۋزيۆ

وتكەن جىلى «بولاشاققا باعدار: رۋحاني جاڭعىرۋ» ماقالاسىندا جاستاردىڭ ۇلگى الۋىنا، كۇن ساناپ دامىپ كەلە جاتقان جاڭا قازاقستاننىڭ كەلبەتىن تانىتۋعا مۇمكىندىك بەرەتىن «قازاقستاننىڭ 100 جاڭا ەسىمى» جوباسى جۇزەگە اسىرىلدى. «100 جاڭا ەسىم» جوباسى حالقىمىزدىڭ جاسامپاز مادەنيەتىن دامىتۋ جولىندا تەر توگىپ جۇرگەن ازاماتتاردىڭ ەڭبەگىن ەلگە كورسەتۋگە مۇمكىندىك بەردى. مۇنداي جوبالاردىڭ قوعامعا قانداي پايداسى بار؟ حالىقتىڭ رۋحاني جاڭعىرۋىنا قالاي اسەر ەتەدى؟ ەندى وسى ساۋالداردىڭ توڭىرەگىندە «قازاقستاننىڭ 100 جاڭا ەسىمى» جوباسىنىڭ جەڭىمپازى، قر ەڭبەك سىڭىرگەن قايراتكەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەبايەۆپەن سۇحباتتاسقان ەدىك.

- 100 جاڭا ەسىم اتانۋ ومىرىڭىزگە، شىعارماشىلىعىڭىزعا قالاي اسەر ەتتى؟

- بۇل جوبا جايىندا ەلباسى «جاستار ومىرگە شىنايى كوزبەن قاراپ، ٴوز تاعدىرلارىنا وزدەرى يەلىك ەتە الاتىن ازاماتتار بولۋى ٴۇشىن ولارعا ۇلگى ۇسىنۋىمىز كەرەك» دەپ ايتقان بولاتىن. «رۋحاني جاڭعىرۋ» باعدارلاماسى ۇلت رۋحانياتىن تۇلەتۋگە تۇرتكى بولدى دەپ نىق سەنىممەن ايتۋعا بولادى. مەن ٴوزىمدى وسى جوبانىڭ جەڭىمپازى اتانعانىما باقىتتىمىن دەپ سانايمىن. حالىق اراسىندا ەسىمىڭدى قۇرمەتپەن اتاپ جاتسا شىعارماشىلىق جۇمىسىڭا ەرەكشە رۋح بەرەدى. بولاشاقتا وسى اتاقتى ودان ٴارى قازاقتىڭ قاسيەتتى كۇي ونەرىن بۇكىل الەمگە پاش ەتۋگە ودان ٴارى قادىرلەي بىلۋگە قاناتتاندىرادى. قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەستورىن باسقارا وتىرىپ، وركەستر ارقىلى، قارا دومبىرامىز ارقىلى وسى ەلگە تانىلدىق. حالىقتىڭ ىقىلاسىنا بولەندىك. وسىنداي دارەجەگە جەتۋىمىز حالىقتىڭ ارقاسى.

- ەكى اي بۇرىن عانا ەلباسى ٴسىزدى كونسەرۆاتوريانىڭ رەكتورى ەتىپ تاعايىندادى. ارينە، مۇنداي قىزمەتكە ۇزاق جول ٴجۇرىپ، زور ەڭبەكپەن جەتتىڭىز. دەسەك تە، «100 جاڭا ەسىم» جوباسى ٴسىزدىڭ كارەراڭىزدىڭ وسۋىنە سەپتىگىن تيگىزدى دەپ ايتۋعا بولا ما؟

- ارينە، مەنىڭ شىعارماشىلىق قىزمەتتە كەڭ قانات جايۋىما ۇلكەن سەپتىگىن تيگىزدى. «100 جاڭا ەسىم» جوباسى تەك مەنىڭ قىزمەت كارەرامدى عانا ەمەس، بارشا ۇلت رۋحانياتىن وركەندەتۋگە تۇرتكى بولدى. قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ دومبىراشىسى جانە ديريجەر دارەجەسىنەن مۋزىكا ونەرىنىڭ قارا شاڭىراعىندا ٴوسىپ ٴوندىم. دۇنيە ٴجۇزىنىڭ ٴىرى شەت مەملەكەتتەرىنىڭ بەدەلدى زالدارىندا، رەسپۋبليكانىڭ ٴتۇرلى قالالارىندا، وبلىستارىندا، اۋدان ورتالىقتارىندا ونداعان كونسەرتتەر وتكىزدىك. اسىرەسە، وسىدان ەكى جىل بۇرىن قر مادەنيەت جانە سپورت مينيسترلىگىنىڭ قولداۋىمەن اقش-تىڭ ەڭ بەلگiلi كونسەرت زالى نيۋ-يوركتەگi كارنەگي-حوللدا ٴوز ونەرىمىزدى كورسەتۋ ەكىنىڭ بىرىنە ماڭدايىنا بۇيىرا بەرمەيتىن باقىت. امەريكا جۇرتشىلىعى ۇلتتىق مۋزىكامىزدى سۇيسىنە، ۇلكەن قىزىعۋشىلىقپەن قابىلدادى. ٴتىپتى كلاسسيكالىق دۇنيەلەردەن گورى، قازاقتىڭ كۇيلەرىن قايتا ورىنداۋدى سۇراعان كەزدەرى بولدى. اقش-تا وتكەن سونداي كونسەرتتەردە قۇرمانعازى بابامىزدىڭ كۇيلەرىنە ٴتانتى بولعانى ەسىمدە. «قازاق دالاسىنىڭ قانداي كەڭ بايتاق ەكەنىن كوزىمە ەلەستەتتىم» دەگەن بولاتىن. دومبىرانىڭ دا وكىنىش پەن مۇڭدى، قۋانىش پەن ساعىنىشتى باياندايتىن ٴۇنى بار. اسەرلى ٴۇندى ەستىر قۇلاققا جەتكىزە ٴبىلۋ – ٴبىز ٴۇشىن ۇلكەن باقىت. ەلباسىنىڭ مەنى ٴقازىر قۇرمانعازى اتىنداعى قازاق ۇلتتىق كونسەرۆاتورياسىنا باسشى ەتىپ تاعايىنداۋى مەن ٴۇشىن ۇلكەن ابىروي ٴارى ۇلكەن جاۋاپكەرشىلىكتى جۇكتەپ وتىر. حالقىمىزدىڭ جاسامپاز مادەنيەتىن دامىتۋ جولىنا ٴوزىمنىڭ ۇلەسىمدى ٴومىر بويىنا جالعاستىرا بەرۋدى پارىزىمدى دەپ سانايمىن. سول 100 جاڭا ەسىم قاتارىنان ۇلتتىق مۋزىكاعا، مادەنيەتكە قوسقان ۇلەسىم ٴۇشىن ەنۋىمنىڭ ٴوزى ۇلكەن باقىت. بۇل – مەن ٴۇشىن ۇلكەن جاۋاپكەرشىلىك. «ارمانسىز ادام قاناتسىز قۇسپەن تەڭ» دەگەن ٴسوز بار. ارمانىم مەنى جەتەلەپ، وسىنداي بيىكتەرگە جەتكىزدى. بۇگىندە 83 جىلدىق تاريحى بار ونەر ۇجىمىنىڭ قورجىنىندا 4000-نان استام شىعارما بار. 83 ونەرپازدىڭ ٴارقايسىسى مۋزىكانى مىقتى مەڭگەرگەن حاس تالانت. سول سەبەپتى، ولاردىڭ بارلىعىن ۇلتتىق مۋزىكانىڭ ۇرانشىلارى دەپ اتاۋعا بولادى. سونىمەن قاتار، ونەردە، عىلىمدا بولماسىن باسەكەلەستىكتىڭ ارقاسىندا ٴوز جۇمىسىڭنىڭ ناتيجەسىن كورۋگە بولادى.

- بيىل بۇل جوبا قايتا باستالادى. جوبا قوعامعا نە بەرەدى؟ نەگە قازاقستاندىقتار جاڭا ەسىمدەردى ٴبىلۋى ٴتيىس؟

- بۇل باستاما – جاستاردى، كەلەشەك ۇرپاقتى جاڭا جوبا مەن تىڭ يدەياعا باستايتىنى، جانىنا جىگەر دارىتىپ، جاقسى ىسكە ىنتالاندىراتىنى ٴسوزسىز. ەلى ٴۇشىن، جەرى ٴۇشىن قانداي دا ٴبىر ساۋاپتى ٴىس ٴسىڭىرىپ كەتۋگە ۇمتىلادى. ٴاربىر ادامنىڭ ماقساتى بۇل تۋعان ەلى مەن كىندىك قانى تامعان اتامەكەنىنە ەڭبەك ٴسىڭىرۋ، بۇل ومىرگە كەلۋىنىڭ دە باستى ميسسياسى ەكەندىگىن سەزىنە الۋى قاجەت.

- بىلتىر العاش رەت وتكەن سوڭ كوپ ادام بۇل جوبانىڭ ٴمانىن تۇسىنبەدى. بيىل باتىلى جەتىپ، باق سىناعالى وتىرعان ۇمىتكەرلەرگە نە ايتاسىز؟

- ەلباسى ۇسىنعان «رۋحاني جاڭعىرۋ» باعدارلاماسى ۇلت رۋحانياتىن تۇلەتۋگە تۇرتكى بولسا، «100 جاڭا ەسىم» جوباسى حالقىمىزدىڭ جاسامپاز مادەنيەتىن دامىتۋ جولىندا تەر توگىپ جۇرگەن ازاماتتاردىڭ ەڭبەگىن ەلگە كورسەتۋگە مۇمكىندىك بەرەدى. مۇنداي جەتىستىككە جەتۋدىڭ كىلتى – ەڭبەكتە. شىعارماشىلىق ادامى ۇنەمى ىزدەنىس ۇستىندە جۇرەتىنى ايتپاسا دا تۇسىنىكتى. سوندىقتان تابيعي تالانتتان بولەك، تالماي ەڭبەك ەتۋ كەرەك. بۇگىنگى جاھاندانۋ داۋىرىندە ۇلتتىق قۇندىلىقتارىمىزدى جاڭعىرتىپ، وسكەلەڭ ۇرپاققا جەتكىزۋدىڭ ماڭىزى زور. بۇل جوبانىڭ حالقىمىزعا بەرەرى كوپ.

قازىرگى قازاقستان قوعامىندا ۇلتتىق كود، ٴتىل، تۋعان جەردى قاستەرلەۋ، ٴبىلىمدى جاستاردى قالىپتاستىرۋ جانە ت.ب. ەل ٴۇشىن اسا ماڭىزدى دۇنيەلەردى ەلگە تانىستىرۋدا ماڭىزى زور. بۇل جوبا جاستارعا دەگەن ۇلەسى باسىم جاستاردى العا جەتەلەيدى. ياعني، اتالمىش جوبا جۇزدەن جۇيرىك شىققان جۇيرىكتەردى باسەكەلەستىككە قابىلەتتى بولۋعا يتەرمەلەيدى. وسىلايشا، مەملەكەتىمىز تالانتتى، ٴبىلىمدى، بولاشاعى زور جاستاردى قولداي الامىز.

- ارمان ٴادىلحان ۇلى، قىزىقتى سۇحباتىڭىزعا ريزاشىلىعىمىزدى بىلدىرەمىز! سىزگە اماندىق-ساۋلىق تىلەي وتىرىپ، ۇجىمىڭىزعا تولاعاي تابىستار تىلەيمىز!


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي