BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ٴبىز تاۋەلسىزدىك جىلدارىندا الىستاعى اعايىندى قولداۋدى ەشقاشان ەستەن شىعارعان ەمەسپىز – ابىقايەۆ

تۇركىستان، baq.kz. تۇركىستاندا شەتەلدىك وتانداستارىمىزدىڭ قاتىسۋىمەن «قاسيەتتى قازاقستان: تۋعان جەرگە تاعزىم» اتتى ەلىمىزدەگى كيەلى جەرلەرىنە تاريحي-تانىمدىق ەكسكۋرسيالار سەرياسى باستالدى. شارا «وتانداستار» قورى» كەاق، قر قوعامدىق دامۋ مينيسترلىگى مەن دۇنيەجۇزى قازاقتار قاۋىمداستىعىنىڭ بىرلەسىپ ۇيىمداستىرۋىمەن، شىمكەنت قالاسى مەن تۇركىستان وبلىسى اكىمشىلىكتەرىنىڭ قولداۋىمەن ىسكە استى.

جوبا اياسىنداعى العاشقى تاريحي-تانىمدىق ەكسكۋرسيا تۇركى الەمىنىڭ استاناسى تۇركىستان قالاسىندا ٴوتى. شاراعا 15 شاقتى الىس-جاقىن شەتەلدەردەن كەلگەن (اۆستريا، انگليا، فرانسيا، شۆەسيا، يران، قىتاي، تۇركيا، مونعوليا، تاجىكستان، رەسەي، بەلورۋس، ۋكراينا، وزبەكستان، قىرعىزستان) 30-عا جۋىق وتانداسىمىز قاتىستى. ولارعا قوجا احمەت ياسساۋي، ارىستان باب كەسەنەلەرى مەن ٴوڭىردىڭ باسقا دا كورىكتى جەرلەرى تانىستىرىلدى.

«قاسيەتتى قازاقستان: تۋعان جەرگە تاعزىم» جوباسى اياسىندا ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە «قازاقستاننىڭ كيەلى جەرلەرى» تاقىرىبىندا دوڭگەلەك ۇستەل ٴوتتى.

«وتانداستار قورى» كەاق پرەزيدەنتى نۇرتاي ابىقايەۆ اتاجۇرتقا جينالعان قانداس باۋىرلارعا سالەم بەرىپ، ولارمەن وتكەن كەزدەسۋى ٴۇشىن العىسىن ٴبىلدىردى. قور باسشىسى باس قوسۋ ورنى رەتىندە تۇركىستان قالاسىن تاڭداۋدا ەرەك ٴمان بارىنا دا توقتالىپ ٴوتتى.

«تۋعان جەرگە تاعزىم» ٴىس-شاراسى قازاقستان رەسپۋبليكاسىنىڭ ۇكىمەتىمەن بەكىتىلگەن شەتەلدەگى قازاقتاردى قولداۋ جونىندەگى 2018 – 2022 جىلدارعا ارنالعان ٴىس-شارالار جوسپارىنا سايكەس جۇزەگە اسىرىلۋدا. ياعني، ٴبىز تاۋەلسىزدىك جىلدارىندا الىستاعى اعايىندى قولداۋدى ەشقاشان ەستەن شىعارعان ەمەسپىز. وسىعان دالەل رەتىندە وزدەرىڭىز بۇگىن حالقىمىزدىڭ رۋحاني مۇراسىنىڭ سارقىلماس قازىناسى – تۇركىستاندى ارالادىڭىزدار، ارىستانباب جانە قوجا احمەت ياسساۋي كەسەنەلەرىنە زيارات جاسادىڭىزدار. وسىنىڭ بارلىعى مەملەكەت باسشىلىعىنىڭ، وبلىس اكىمشىلىگىنىڭ تىكەلەي قولداۋىمەن جۇزەگە اسىرىلۋدا. قازىرگى كەزدە، شەتەلدەن 1 ميلليونعا جۋىق قازاقتى ەلگە كوشىرىپ الىپ، قولدان كەلەر بارلىق كومەگىمىزدى جاسادىق. بۇگىندە سول باۋىرلارىمىز قازاقستاننىڭ ازاماتى اتانىپ، ەل دامۋىنا ٴوز ۇلەستەرىن قوسۋدا. سونىمەن قاتار، بۇگىنگى تاڭدا 5 ميلليوننان استام قانداسىمىز شەت مەملەكەتتەردە تۇرىپ جاتىر» - دەدى «وتانداستار» قورى» كەاق پرەزيدەنتى نۇرتاي ابىقايەۆ.

نۇرتاي ابىقايەۆ شەتەلدىك قانداستاردى قولداۋعا باعىتتالعان «وتانداستار قورىنىڭ» ماقسات-مىندەتتەرىمەن، الداعى ۋاقىتقا جوسپارىمەن تانىستىردى. سونداي-اق، تاريحى تەرەڭدە جاتقان كيەلى مەكەندە ۇيىمداستىرىلعان «قاسيەتتى قازاقستان: تۋعان جەرگە تاعزىم» شاراسىنا قولداۋ كورسەتكەنى ٴۇشىن تۇركىستان وبلىسى اكىمى جانسەيىت تۇيمەبايەۆقا العىسىن ٴبىلدىردى. ٴوز كەزەگىندە، وبلىس اكىمى وتانداستاردى وڭىرگە شاقىرىپ، تۇركىستاندا ورىن الىپ جاتقان ەلەۋلى وزگەرىستەر تۋراسىندا ٴسوز قوزعادى.

«ەلباسىمىز بيىلعى جىلدىڭ 19-شى ماۋسىمىندا تۇركىستان وبلىسى جايىندا جارلىعىن جاريالادى. رەسمي ساپارمەن كەلىپ كەتىپ، بىزدەگى ياسساۋي كەسەنەسىن، تۇركىستان قالاسى عيماراتتارىن ٴارى قاراي دامىتۋ جايلى ۇلكەن مىندەتتەر جۇكتەدى: كەسەنەنىڭ اينالاسىندا امفيتەاتر، سۋ بۇرقاقتارى، مادەني دەمالىس ورىندارى، «ۆيزيت» ورتالىعى، كۇلتوبە قالاشىعى، اشىق اسپان استىنداعى مۇراجاي سالىنادى. سونداي-اق، قورىقتىڭ اينالاسىندا «قازاق حاندارى مەن بيلەرى» ورتالىعى، شىعىس مونشاسى، « ۇلى دالا ەلى» ورتالىعى، تۇركى الەمىنىڭ ورتالىعى، «قوجا احمەت ياسساۋي» ورتالىعى، «استانا» ساياباعى، بەينەلەۋ ونەرى مۇراجايلارى سالىناتىن بولادى. سوندىقتان دا، قۇرمەتتى باۋىرلار ەلباسىمىزدىڭ تۇركىستاندى تۇركى الەمىنىڭ رۋحاني-مادەني ورتالىعىنا اينالدىرۋ جونىندەگى تاپسىرماسىن ورىنداۋدا ناقتى جۇمىستار اتقارىپ كەلەمىز» - دەدى تۇركىستان وبلىسى اكىمى جانسەيىت تۇيمەبايەۆ.

دقق ٴتوراعاسىنىڭ ٴبىرىنشى ورىنباسارى زاۋىتبەك تۇرىسبەكوۆ 2017 جىلعى دۇنيەجۇزى قازاقتار قاۋىمداستىعى v قۇرىلتايىندا ەلباسى تاپسىرعان 7 تاپسىرمانىڭ ورىندالۋى تۇرعىسىندا ەسەپ بەردى. تىكەلەي پرەزيدەنت تاپسىرماسىمەن «وتانداستار قورى» قۇرىلىپ، بۇگىندە ٴوز جۇمىسىن جۇرگىزىپ جاتقاندىعى جانە شەتەلدىك قانداستارىمىزعا باسپانا مەن جۇمىس ماسەلەسىن قامتاماسىز ەتەتىن ارنايى باعدارلاما دايارلانىپ جاتقاندىعى تۋرالى ايتىپ ٴوتتى.

«ٴبىزدىڭ مىندەتىمىز – بالالار انا ٴتىلىن، قازاقتىڭ ٴداستۇرىن ۇمىتپاۋى. سونىڭ توڭىرەگىندە ٴبىراز شارا قولدانىپ جاتىرمىز. جىل سايىن «بالداۋرەن» دەمالىس ورنىنا شەتەدىك وتانداستارىمىزدىڭ بالالارىن شاقىرتىپ، ەلدەگى بالالارمەن ارالاستىرامىز. ولاردىڭ ەكى اپتادان كەيىن قوشتاسقانىن كورسەڭىزدەر: بىر-بىرىنە باۋىر باسىپ، ەندى قاشان كورىسەمىز دەگەن شەرمەن، كوزدىڭ جاسىن تامىزىپ تارقاسادى. وسى باعدارلامانى ٴبىز ٴارى قاراي جالعاستىرامىز. ودان بولەك وسى «وتانداستار قورىنىڭ» ەسەبىمەنەن تاعى ٴبىر ۇلكەن تىرلىك جاسايمىز. قازاقستاندا نازاربايەۆ زياتكەرلىك مەكتەپتەرى بار. سولاردىڭ نەگىزىندە الداعى جازدا ٴار ەلدەگى جاقسى وقيتىن دارىندى قازاق بالالارىن شاقىرساق پا دەيمىز. ٴسويتىپ، ولاردى ەل ازاماتتارىنىڭ قاتارىنا قوسساق» - دەدى دۇنيەجۇزى قازاقتار قاۋىمداستىعى ٴتوراعاسىنىڭ ٴبىرىنشى ورىنباسارى زاۋىتبەك تۇرىسبەكوۆ.

سونىمەن قاتار، دوڭگەلەك ۇستەلگە ق.ا.ياسساۋي اتىنداعى حقتۋ پرەزيدەنتى بولاتبەك ابدراسيلوۆ، قر ۇلتتىق مۇراجايىنىڭ «قاسيەتتى قازاقستان» عىلىمي-زەرتتەۋ ورتالىعى ديرەكتورىنىڭ ورىنباسارى باتىرحان جۇمابايەۆ جانە مەملەكەتتىك ٴتىلدى دامىتۋ قورىنىڭ ديرەكتورى ازات شاۋەەۆ سىندى بەلگىلى ساراپشىلار قاتىسىپ، «قاسيەتتى قازاقستان»، «مەملەكەتتى ٴتىلدى دامىتۋ»، «قازاقتىڭ سالت-داستۇرلەرى» تاقىرىپتارىندا باياندامالار وقىدى.

شارا بارىسىندا شەتەلدىك وتانداستارىمىز «قاسيەتتى قازاقستان: تۋعان جەرگە تاعزىم» ارنايى جوباسىنا قاتىسۋ مۇمكىندىگى ٴۇشىن العىسىن ٴبىلدىرىپ، وزدەرىن تولعاندىراتىن ٴبىرقاتار ماسەلەلەرى مەن ۇسىنىستارىن دا ايتىپ ٴوتتى. ماسەلەن، فرانسياداعى مۇستافا شوقاي فرانسۋز-قازاق دوستىق قوعامىنىڭ باسشىسى ياشار دينچ مىرزا ناۋرىز مەيرامىن ٴار جىلى ٴار ەلدە وتكىزۋگە ۇسىنىس ٴبىلدىردى. ونىڭ ايتۋىنشا، بىرلەسىپ وتكىزگەن ۇلتتىق مەيرامنىڭ شەتەلدەگى قازاقتار ٴۇشىن ٴسالت-داستۇرى مەن مادەنيەتىن ساقتاۋىندا ماڭىزى زور بولماق. سونىمەن قاتار، فرانسيالىق وتانداسىمىز ٴتىل ماسەلەسىنىڭ دە وتە وزەكتى ەكەنىن جەتكىزىپ، شەتەلدەگى ۇستازدار قاتارىن كوبەيتۋ كەرەكتىگىن ايتتى.

ٴتىل ماسەلەسىنە قاتىستى الاڭداۋشىلىقتى تاجىكستان ەلىندەگى قازاق دياسپوراسىنىڭ وكىلى زاۋرە سامينوۆا دا ٴبىلدىردى. سونىمەن بىرگە، تاجىكستاندىق وتانداسىمىز قازاق تىلىندە شىعاتىن وقۋلىق-كىتاپتاردىڭ باسىلىمدىق نۇسقالارىنا قول جەتكىزسەك دەگەن نيەتىن ايتتى. بۇعان باستى سەبەپ – تاجىكستاننىڭ اۋىلدىق جەرلەرىندە جارىقتىڭ تاۋلىگىنە 2 ساعات بەرىلەتىندىگىنەن ەلەكتروندى وقۋلىقتاردى تۇتىنۋدىڭ مۇمكىن ەمەستىگى ەكەن.

موڭعوليا-قازاقستان دوستىق جانە ىنتىماقتاستىق وداعىنىڭ ٴتوراعاسى اعىپار ۇلى باكەي مىرزا شەتەلدىك قازاقتاردىڭ باستى ماسەلەسى ۇلتتىق-رۋحاني قۇندىلىقتاردى ساقتاۋعا ساياتىنىن ايتتى. وسى رەتتە دۇنيە جۇزىندە تارىداي شاشىلعان قازاقتاردىڭ ماسەلەلەرى مەن مۇقتاجدارىن عىلىمي تۇرعىدا زەرتتەۋدى ۇسىندى.

«وتانداستار قورى» كەاق پرەزيدەنتى نۇرتاي ابىقايەۆ ۇسىنىستاردىڭ تولىق تىڭدالعانىن، ولاردىڭ ماسەلەلەردى شەشۋ بارىسىندا ەسكەرىلەتىندىگىن جەتكىزدى.

«وتانداستار» قورى»، قوعامدىق دامۋ مينيسترلىگى جانە دۇنيەجۇزى قازاقتار قاۋىمداستىعى «قاسيەتتى قازاقستان: تۋعان جەرگە تاعزىم» تاريحي-تانىمدىق ەكسكۋرسيالارىن الداعى بەس جىل ىشىندە ەلىمىزدىڭ وزگە دە وڭىرلەرىندە جۇيەلى تۇردە وتكىزۋدى جوسپارلاپ وتىر. كەلەسى رەتتە جوبا اقتاۋ، پاۆلودار، الماتى جانە ت.ب. قالالاردى قامتيتىن بولادى. ۇيىمداستىرۋشىلاردىڭ ايتۋىنشا، كيەلى جەرلەردى جاقىننان تانىپ، ٴجىتى زەرتتەۋ ارقىلى شەتەلدىك قانداستار تاريحي وتانىنىڭ وتكەنىنە ٴۇڭىلىپ، ەلىمىزدىڭ مادەنيەتىنە، ونەرىنە جانە حالىقتىق داستۇرلەرىنە جاقىنداي تۇسەدى.

«تۋعان جەرگە تاعزىم» تاريحي-تانىمدىق ەكسكۋرسيالار جوباسى «رۋحاني جاڭعىرۋ» مەملەكەتتىك باعدارلاماسى اياسىندا وتكىزىلىپ وتىر. جوبا باعدارلاماسىنا «قازاقستاننىڭ كيەلى جەرلەر گەوگرافياسى» كوپفۋنكسيونالدى ۆيرتۋالدى كارتاسى نىساندارىمەن تانىسۋ كىرەدى. اتالمىش يدەيا مەملەكەت باسشىسى نۇرسۇلتان نازاربايەۆقا تيەسىلى. ەلباسى ٴوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا بۇل باستامانى باسىمدىق مىندەتتەردىڭ ٴبىرى رەتىندە بەلگىلەگەن بولاتىن. ٴقازىر قازاقستاننىڭ تاريحي جەرلەرى تىزىمىنە 185 جالپىۇلتتىق جانە 500 وڭىرلىك دەڭگەيدەگى نىساندار ەنگىزىلگەن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي