ٴابدىقالىقوۆا وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسىنا قاتىستى - رۋحاني جاڭعىرۋ|24 قاراشا 2017، 17:52
كۋرسى ۆاليۋت وبنوۆليايۋتسيا
استانا:

ٴابدىقالىقوۆا وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسىنا قاتىستى

فوتو: Ержан Жаубай

قازاقستان رەسپۋبليكاسىنىڭ مەملەكەتتىك حاتشىسى گۇلشارا ٴابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ وتىرىسى ٴوتتى، دەپ حابارلايدى baq.kz اقپارات اگەنتتىگى اقورداعا سىلتەمە جاساپ.

گۇلشارا ٴابدىقالىقوۆا مەملەكەت باسشىسىنىڭ «قازاقستاننىڭ ٴۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋى ۇلتتىق كوميسسيا جۇمىسىنا تىڭ سەرپىن بەرگەنىن ايتتى.

مەملەكەتتىك حاتشى قازاقستان پرەزيدەنتىنىڭ «زامان سىنىنان سۇرىنبەي وتكەن وزىق داستۇرلەردى تابىستى جاڭعىرتۋدىڭ ماڭىزدى العىشارتتارىنا اينالدىرا ٴبىلۋ قاجەت. ەگەر جاڭعىرۋ ەلدىڭ ۇلتتىق-رۋحاني تامىرىنان ٴنار الا الماسا، ول اداسۋعا باستايدى» دەگەن ٴسوزىن اتاپ ٴوتتى.

وسكەلەڭ ۇرپاق بويىندا جات ۇعىمدارعا قارسى تۇرا الاتىن يممۋنيتەت قالىپتاستىرۋ، وتباسى قۇندىلىقتارىن، قازاقستان حالقىنىڭ وزىق داستۇرلەرىن دارىپتەۋ ماڭىزدى باعىت بولىپ سانالادى. بۇل ٴىستىڭ ناتيجەلى بولۋى مەملەكەتتىك ورگاندار مەن قوعامدىق ينستيتۋتتاردىڭ ٴوزارا ٴتيىمدى ٴىس-قيمىلىنا بايلانىستى.

جيىندا قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن ىسكە اسىرۋ جونىندەگى 2017-2019 جىلدارعا ارنالعان ٴىس-شارالار جوسپارىنىڭ پاۆلودار جانە قىزىلوردا وبلىستارىندا ورىندالۋ بارىسى جونىندە مالىمەت تىڭدالدى.

پاۆلودار وبلىسىندا ٴونىمدى ەڭبەكپەن اينالىسۋ جانە جاپپاي كاسىپكەرلىكتى دامىتۋ جۇمىستارى بەلسەندى تۇردە جۇرگىزىلۋدە. جىل باسىنان بەرى مەيلىنشە سۇرانىسقا يە 52 جۇمىسشى ماماندىعى بويىنشا 329 ايەل (32%) وقىتىلدى. وبلىستىڭ اۋىلدىق جەرلەرىندە ايەلدەر كوشباسشىلىعى مەكتەپتەرىن دامىتۋ جونىندەگى جۇمىستار جالعاسۋدا. ماۋسىم ايىندا باياناۋىل اۋدانىندا وسىنداي تاعى ٴبىر مەكتەپ اشىلدى. پاۆلودار وبلىسى – جەرگىلىكتى وكىلەتتى ورگاندارىنداعى ايەلدەر سانى 30 پايىزعا تاياعان ەلىمىزدەگى 3 ٴوڭىردىڭ ٴبىرى. بۇگىندە ولاردىڭ سانى اۋداندىق ٴماسليحات دەپۋتاتتارى اراسىندا – 29،4%، قالالىق ٴماسليحاتتاردا – 27،3%، وبلىستىق ٴماسليحاتتا 21،9% بولىپ وتىر.

قىزىلوردا وبلىسىندا «رۋحاني جاڭعىرۋ» باعدارلاماسى اياسىندا 135 ٴىس-شارا ۇيىمداستىرىلىپ، ونىڭ اياسىندا ٴوڭىردىڭ 7 مىڭنان استامى جاستارى قامتىلدى. ەسەپتى كەزەڭدە جۇمىسسىز جانە ٴوزىن-وزى جۇمىسپەن قامتىعان 2136 ادام ەڭبەك نارىعىندا سۇرانىسقا يە ماماندىقتار بويىنشا قىسقا مەرزىمدى كاسىبي دايىنداۋ كۋرستارىنا جولداندى. ولاردىڭ ٴ1500-ى، ياعني 70،2 پايىزى – ايەلدەر. وقۋ كۋرستارىن اياقتاعان ايەلدەردى جۇمىسپەن قامتۋ ماسەلەسى تۇراقتى باقىلاۋدا. سونىمەن قاتار، «باستاۋ-بيزنەس» جوباسى اياسىندا 320 ايەل وقىتىلدى. ولاردىڭ 124-نە نەسيە بەرىلدى، ٴ54-ى ٴوز كاسىبىن باستادى.

سونداي-اق، وتىرىستا 2018 جىلعى اقپاندا بۇۇ-نىڭ سالالىق كوميتەتىنە ۇسىنىلاتىن ايەلدەرگە قاتىستى كەمسىتۋشىلىكتىڭ بارلىق ٴتۇرىن جويۋ تۋرالى كونۆەنسيانىڭ ورىندالۋ بارىسى تۋرالى قازاقستان رەسپۋبليكاسىنىڭ كەزەكتى بەسىنشى بايانداماسىنىڭ جوباسى تانىستىرىلدى.

جيىن سوڭىندا مەملەكەتتىك حاتشى گ.ٴابدىقالىقوۆا مەملەكەتتىك ورگاندارعا ٴبىرقاتار ناقتى تاپسىرما بەردى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي