BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

10-نان استام مەملەكەتتەن كەلگەن دارىگەرلەر تۇركىستاندا تەگىن ەمدەپ جاتىر

تۇركىستان وبلىسىندا دۇنيەجۇزىنىڭ تۇكپىر-تۇكپىرىنەن دارىگەرلەر كەلىپ، جەرگىلىكتى ناۋقاستاردى قابىلداپ جاتىر. سەگىز توپتان تۇراتىن 30 شاقتى مەديسينا مامانى سايرام اۋدانىندا بولىپ، تەگىن مەديسينالىق كومەك كورسەتتى. ەلباسىنىڭ “رۋحاني جاڭعىرۋ" باعدارلاماسىنىڭ اياسىندا جۇزەگە اسىپ جاتقان تاريحي وقيعا وبلىس اكىمى جانسەيىت تۇيمەبايەۆ پەن وبلىستىق دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ قولداۋىمەن جۇزەگە اسىپ وتىر، دەپ حابارلايدى baq.kz اقپارات اگەنتتىگى.

رەسپۋبليكالىق «مير چەرەز دۋحوۆنوست» قوعامدىق بىرلەستىگىنىڭ مۇشەلەرى، الدىمەن، وبلىستىق كلينيكالىق اۋرۋحانادا «حالىقارالىق مەديسينالىق كونفەرەنسيا» وتكىزىپ، جەرگىلىكتى مەديسينا سالاسىنىڭ جەتەكشىلەرى جانە ماماندارىمەن تاجىريبە ٴبولىستى.

"ٴبىز بۇرىن-سوڭدى بولماعان تاريحي ٴساتتىڭ كۋاسى بولىپ وتىرمىز. تۇركىستان وبلىسى اكىمىنىڭ مۇرىندىق بولۋىمەن جۇزەگە اسقان ماڭىزدى شاراعا كەلگەن رەسپۋبليكالىق “مير چەرەز دۋحوۆنوست” قوعامدىق بىرلەستىگىنىڭ دارىگەرلەرى مەن ەرىكتىلەردىڭ يگى ٴىسى كوپكە ۇلگى بولارى ٴسوزسىز"، - دەدى وبلىستىق دەنساۋلىق ساقتاۋ باسقارماسىنىڭ باسشىسى م.ەگىزبايەۆ.

بۇل شاراعا رەسپۋبليكالىق «مير چەرەز دۋحوۆنوست» قوعامدىق بىرلەستىگىنىڭ باس-اياعى 70-كە جۋىق مۇشەسى جۇمىلدىرىلعان. اتاپ ايتساق، 42 مەديسينا مامانىنىڭ 29-ى شەتەلدىك (اقش، انگليا، گەرمانيا جانە مالايزيا)، 9-ى تمد ەلدەرىنىڭ (رەسەي، ازەربايجان، ۋكراينا، مولدوۆا) جانە 4-ەۋى قازاقستاندىق دارىگەرلەر. توپپەن بىرگە ەرىكتىلەر مەن اۋدارماشىلار دا كەلگەن.

الىستان ات ارىتىپ كەلگەن دارىگەرلەر 8 توپقا ٴبولىنىپ قىزمەت كورسەتىپ جاتىر. اتاپ ايتساق، ماماندار سايرام اۋداندىق اۋرۋحاناسى مەن «قارابۇلاق»، «مانكەنت»، «قاراسۋ»، «قارامۇرت»، قايناربۇلاق» باستاپقى مەديسينالىق – سانيتارلىق كومەك ورتالىعى مەن №12 شىمكەنت قالالىق ەمحاناسىنا بەكىتىلگەن حالىق اراسىندا قابىلداۋ وتكىزىپ جاتىر.

شەتەلدىك مامانداردىڭ سايرام اۋدانىن ارنايى وزدەرى تاڭداۋى بەكەر ەمەس. ويتكەنى، مۇندا حالىق كوپ، تىعىز ورنالاسقان. ونىڭ ۇستىنە، ٴبىرقاتار ەلدى مەكەندەر قالادان شالعاي ورنالاسقان.

"سايرام اۋدانىندا كيەلى جەرلەر وتە كوپ. ارامىزداعى ازاماتتاردىڭ كوبى دىنگە بەرىلگەن دەسەم بولادى، باسىم بولىگى – مۇسىلماندار. ەڭبەگىمىزگە اقى سۇرامايمىز. ۇيىمداستىرۋشىلار بارلىق جاعدايىمىزدى جاساپ بەردى. ول ٴۇشىن العىسىمىز شەكسىز. ناۋقاستارعا جەرگىلىكتى دارىگەرلەر قويعان دياگنوزدى راستاپ، مۇنداعى مامانداردىڭ ساۋاتى مەن بىلىكتىلىگى جوعارى ەكەنىنە كوز جەتكىزىپ جاتىرمىز. الەمدىك دارەجەدەگى دارىگەرلەر، مەنىڭ پايىمىمشا، ٴتۇرلى مەديسينالىق تەحنيكاسىز تۇك ىستەي المايتىنداي، ٴبىر سوزبەن ايتقاندا، روبوت-دارىگەر بولىپ بارا جاتىر. ال بۇل جەردىڭ ماماندارى ەشبىر تەحنيكاسىز دا اۋرۋدى ٴدوپ باسىپ تابا الاتىنىنا تاڭعالدىق"، - دەيدى اتالعان قوعامدىق بىرلەستىكتىڭ مۇشەسى گالينا كورچاگينا.

مۇحيت اسىپ كەلگەن ونكولوگيا، پەدياتريا، رەۆماتولوگيا، ستوماتولوگيا، تەراپيا، گينەتيكا جانە گاستروەنتەرولوگيا سالاسىنىڭ ماماندارى شىلدە ايىنىڭ 6-نا دەيىن حالىقتى تەگىن قابىلداۋعا دايىن. بۇگىننىڭ وزىندە جۇمىسشى توپ كۇنىنە 1،5 مىڭعا دەيىن ناۋقاس قابىلداپ، ەم-دومىن جازىپ بەرىپ جاتىر. كەيبىر دارى-دارمەكتەر مەن قاجەتتى كوزىلدىرىكتەردى مامانداردىڭ ٴوزى سايرامدىقتارعا تەگىن تاراتىپ بەرمەك.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي