BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

100 جاڭا وقۋلىق: حاراري مەن كوۆي قازاقشا سويلەدى

فوتو: Автор

الماتى، baq.kz ٴتىلشىسى. بۇگىن «ۇلتتىق اۋدارما بيۋروسى» اۋدارعان الەمدىك سۇرانىستاعى ەكى وقۋلىقتىڭ تۇساۋى كەسىلدى. ناقتى اتاپ ايتار بولساق ستيۆەن ر. كوۆيدىڭ «جاسامپاز جانداردىڭ 7 داعدىسى» جانە يۋۆال ٴحاراريدىڭ «ادامزاتتىڭ قىسقاشا تاريحى» اتتى كىتاپتار قالىڭ وقىرمانعا جول تارتتى.

«ۇلتتىق اۋدارما بيۋروسى» قق-نىڭ اتقارۋشى ديرەكتورى راۋان كەجنەحاننىڭ ايتۋىنشا، بۇل كىتاپتار 100 جاڭا وقۋلىقتان تىس، «رۋحاني جاڭعىرۋ» باعدارلاماسى اياسىندا الماتى قالاسى اكىمدىگىنىڭ باستاماسىمەن اۋدارىلعان.

«بۇل كىتاپ الەمنىڭ ەڭ ۇلكەن كىتاپ دۇكەندەرىندە كوپ تيراجبەن ساتىلىپ، ىشىندەگى ويلار مەن ۇسىنىستار كەڭ تالقىعا ٴتۇسىپ جاتقان بۇگىنگى كۇننىڭ بەستسەللەرى. ٴبىز تۇڭعىش رەت وسىنداي كىتاپتاردى اۋدارىپ قازاقستانداعى وقىرماندارعا، وقۋ ورىندارىنا، جالپى بىلىمگە، قازىرگى ايتىلىپ جاتقان يدەيالارعا قىزىعاتىن ادامدارعا تاراتۋعا مۇمكىندىك الىپ وتىرمىز»، -دەيدى ر. كەنجەحان.

يۋۆال ٴحاراريدىڭ «ادامزاتتىڭ قىسقاشا تاريحى» كىتابىنىڭ مۇقاباسىنا وسى كىتاپ جايلى ايتىلعان مىنانداي پىكىرلەر جازىلىپتى. سونىڭ ٴبىرى «ەلسىز ارالعا وزىڭمەن بىرگە الا كەتەتىن ون كىتاپتىڭ ٴبىرى وسى شىعار» دەگەن بيلل گەيتستىڭ پىكىرى، سونداي-اق باراكا وباما سياقتى الەمگە تانىمال ادامداردىڭ دا پىكىرى بار.

جالپى وسى كىتاپتاردى اۋدارۋ جونىندەگى ۇسىنىس الماتى قالاسىنداعى 38 جوو-نىڭ باسىن بىرىكتىرەتىن يۋ-38 دەپ اتالاتىن الاڭدا ايتىلعان ەكەن. سوندىقتان 10 مىڭ دانامەن باسىلىپ شىققان بۇل كىتاپتار 110 جوو-عا جانە بارلىق كىتاپحانالارعا تارالادى. سونداي-اق وقىرماندار بۇل كىتاپتاردىڭ ەلەكتروندى نۇسقاسىن دا وقي الادى.

«بۇل كىتاپتى قازاقى ورتاداعى بەدەلى بار ادامدار مەن عالىمدار وقىپ، ٴوز پىكىرلەرىن بىلدىرسە دەگەن ويىمىز بار. ويتكەنى كىتاپتا ٴتۇرلى ويعا جەتەلەيتىن توسىن يدەيالار، ۇسىنىستار بار. ياعني ادامزات تاريحى بۇگىنگى كۇنگە دەيىن قالاي دامىدى؟ جالپى ادامزات 100 جىلدىق تاريحىنا كەرى بۇرىلىپ قارايتىن بولسا وزىنە-وزى ريزا بولا الا ما؟ وسى كۇنگە جەتىپ ادام بالاسى ٴوزىن باقىتتى سەزىندى مە؟، دەگەن سياقتى سۇراقتارعا جاۋاپ ىزدەيدى»، -دەيدى ر. كەنجەحان.

بۇل كىتاپ 2011 جىلى باسىلىپ شىعىپ، سودان بەرى 40 شاقتى تىلگە اۋدارىلىپ، 7 ملن دانامەن باسىلىپ شىعىپتى.

ال، ستيۆەن كوۆيدىڭ كىتابى «جاسامپاز جانداردىڭ 7 داعدىسى» دەپ اۋدارىلىپتى. سونداي-اق ول ەلىمىزدەگى «مەلومان» كىتاپ دۇكەنىندە 10 جىل بويى ەڭ كوپ ساتىلعان كىتاپتار قاتارىندا بولىپتى.

«ويتكەنى جاقسى ٴومىردىڭ كىلتىن ىزدەگەن ٴجاسوسپىرىم بالادان باستاپ، ٴوزىنىڭ قارىم-قابىلەتىن دامىتقىسى كەلەتىن مەملەكەت باسشىلارىنا دەيىن وسى كىتاپتى قولدان تۇسىرمەي وقىعان، جانە ول ٴالى كۇنگە دەيىن تالقىلانىپ كەلە جاتىر. سوندىقتان بۇل دا قازاق وقىرماندار ٴۇشىن قىزىقتى بولادى دەپ ويلايمىن»، -دەيدى اۋدارما بيۋروسىنىڭ ديرەكتورى.

ەستەرىڭىزدە بولسا، 100 جاڭا وقۋلىق بويىنشا بۇعان دەيىن 18 كىتاپ قازاق تىلىنە اۋدارىلعان بولاتىن، ٴقازىر تاعى 30 كىتاپتى اۋدارۋ جۇمىستارى جۇرگىزىلىپ جاتىر.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي