«100 ەسىمنىڭ» جەڭىمپازى مۇگەدەكتەرگە ارناپ شەبەرحانا اشقىسى كەلەدى - رۋحاني جاڭعىرۋ|13 جەلتوقسان 2017، 17:11
كۋرسى ۆاليۋت وبنوۆليايۋتسيا
استانا:

«100 ەسىمنىڭ» جەڭىمپازى مۇگەدەكتەرگە ارناپ شەبەرحانا اشقىسى كەلەدى

فوتو: Гүлжан Раманқұлова

ابىلايحان اسىلبايدىڭ ٴومىرى 1996 جىلى قايعىلى وقيعادان كەيىن كۇرت وزگەردى. قۇرىلىستا جۇمىس ىستەپ جۇرگەن ول كراننان قۇلادى. وسىلايشا 34 جاسىندا i توپتاعى مۇگەدەك بولىپ، جۇرمەك تۇگىلى وتىرا المايتىن حالگە ٴتۇستى. ٴبىراق ول مويىمادى. جاڭا كاسىپتى يگەرىپ، ساۋ ادامنىڭ قولىنان كەلە بەرمەيتىن جەتىستىككە جەتتى. ال جاقىندا «100 جاڭا ەسىم» جوباسىندا جەڭىمپاز اتانىپ، ەلباسىمەن كەزدەستى. ابىلايحان اسىلباي baq.kz تىلشىسىنە ٴوزىنىڭ ٴومىرى، كاسىبى جايىندا اڭگىمەلەگەن ەدى.

ابىلايحان اعانىڭ جەكە ومىردەگى قيىندىعى كراننان قۇلاۋدان باستالعان جوق. سونىڭ الدىندا ول سەمياسىنان ايىرىلدى. ول كەزدە الماتىدا تۇراتىن. كوپ ۋاقىتتان بەرگى تۇسىنىسپەۋشىلىكتەن سوڭ ايەلى ەكەۋى اجىراستى. ەكى بالاسى ايەلىمەن الماتىدا قالىپ، ابىلايحان اسىلباي سەمەيگە قايتىپ كەلدى. مۇندا ول اپكەسىنىڭ ۇيىندە تۇردى.

«جەكەمەنشىك قۇرىلىس كومپانياسىندا ىستەپ ٴجۇرىپ وسىنداي جاعدايعا ۇشىرادىم. ول ٴۇشىن بىرەۋدى كىنالاعىم كەلمەدى. ٴوزىمدى-وزىم قايرادىم، اياعىمنان تۇرۋعا ارەكەت جاسادىم. ٴقازىر تۇرىپ جاتقان وسى كىشكەنتاي ٴۇيىمىزدىڭ ٴبىر بولمەسى جاتتىعۋ زالى، ال ەكىنشى بولمە شەبەرحانا بولاتىن. كورشى بالالاردى جيناپ الىپ، جاتتىعۋ جاسايتىنبىز. قارناق، تەمىر، بەلتەمىر ٴبارى بولدى»، - دەيدى ابىلايحان اسىلباي.

ٴقازىر ابىلايحان اسىلباي 53 جاستا. ول مۇگەدەكتەر ارباسىندا وتىرمايدى، ٴوزىنىڭ سۇيىكتى ٴىسى – قولونەرمەن اينالىسادى.

«اكەم، اتام، ارعى اتام – ٴبارى قولونەرشى بولعان. بۇل ٴبىزدىڭ قانىمىزدا بار. بۇرىن مەندە ونەرگە بوس ۋاقىت بولمادى. جۇمىس ىستەدىم، سپورتپەن شۇعىلداندىم».

بىردە ابىلايحان اعا الماتى جاقتا تۇراتىن شەبەر داركەمباي شوقپاروۆ تۋرالى ەستىدى. ول كىسىنىڭ وزىنەن قولدانبالى ونەردى ۇيرەنۋگە بەل بۋدى. ٴسويتىپ التى جىل قاتارىنان الماتىعا بارىپ ٴجۇردى.

«داركەمباي اعا ٴوزى بىلەتىن نارسەنىڭ ٴبارىن – ەر-توقىم جاساۋدى، تەرى، اعاش، تەمىرمەن جۇمىس ىستەۋدى تەگىن ۇيرەتتى. ول كىسىگە العىسىم شەكسىز. 2006 جىلى ۇستازىم ومىردەن ٴوتتى. ۇلدى بولسام اتىن داركەمباي دەپ قويعىم كەلدى. ايەلىم قىز تۋدى. وعان «بالجان» دەپ ۇستازىمنىڭ جۇبايىنىڭ ەسىمىن بەردىك».

شاعىن شەبەرحاناسىندا سەمەيلىك ۇستا دۋلىعا، ساۋىت-سايمان، قارۋ-جاراق، ساداق، كىرەۋكە، التىن ادام، ۇلتتىق اشەكەيلەر جانە تۇرمىستىق زاتتار جاسايدى.

بۇيىمدار قولداعى قاراپايىم ماتەريالداردان جاسالادى. ولاردىڭ قاتارىندا كونسەرۆىنىڭ بوس بانكىلەرى، سۇيەكتەر دە بار. ٴقازىر ابىلايحان اعا تاعى ٴبىر كورمەگە دايىندالىپ جاتىر.

«باسىما يدەيا ٴوزى كەلە قالادى. كەيدە باسقا كورمەلەردەن جاقسى دۇنيەلەردى كورگەننەن كەيىن دە جاڭا يدەيالار تۋىپ جاتادى».

«ٴبىر باتىردىڭ ساۋىتىنا شامامەن 55 مىڭعا جۋىق ساقينا كەتەدى، سالماعى 24 كگ بولادى. ساۋىتتى تىگىنەن، كولدەنەڭىنەن توقۋعا بولادى. العاشقى ساۋىتتى جاساۋعا 3 جىلداي، كەيىن 2 جىل ۋاقىت كەتتى. ٴقازىر 3-6 ايدىڭ ىشىندە جاسايمىن. قول ۇيرەندى. ونى جاساۋدىڭ جولى دا جازىپ الىندى».

ابىلايحان اسىلبايدىڭ جۇمىس كۇنى تاڭەرتەڭنەن كەشكە دەيىن جالعاسادى. باسىندا 12 ساعاتقا دەيىن تاپجىلماستان شەبەرحانادان شىقپاي جۇمىس ىستەيتىن. الايدا، جاسى كەلگەن سايىن مۇنشا كوپ جۇمىس ىستەۋ قيىنداي باستادى.

«ٴقازىر كۇنىنە 8-10 ساعات بويى جۇمىس ىستەيمىن. جۇبايىم جانە قىزىممەن تۇراتىن ٴۇيدىڭ ٴبىر بولمەسى مەنىڭ شەبەرحانام. ۇيدەگى بارلىق قيىن جۇمىستى جۇبايىم ابايگۇل اتقارادى. وت جاعادى، قار كۇرەيدى جانە مەكتەپتە قوسىمشا جۇمىس ىستەيدى».

ابىلايحاننىڭ شەبەرلىگى جايىندا بۇل ايماقتا بىلەتىندەر كوپ. ول قازاقستانداعى شەبەرلەر اراسىنداعى ٴتۇرلى كورمەلەر مەن بايقاۋلاردىڭ جەڭىمپازى.

«كوپ كورمەلەرگە، بايقاۋلارعا قاتىسىپ تۇرامىن. ادال ەڭبەگىمنىڭ باعالانعانى بولار، باس جۇلدەنى ٴجيى مەن الامىن. وسى جىلى ەكسپو كورمەسىنە شىعىس قازاقستان كۇندەرىن وتكىزۋگە سەمەيدەن قولونەرشى رەتىندە تىزىمگە مەنى دە قوسىپتى. استانادا ەتنواۋىل ماڭىندا كورمە قويىپ، بۇيىمدار جاساۋعا شەبەرلىك-ساباقتارىن وتكىزدىك».

ابىلايحان اسىلبايدىڭ 50-گە جۋىق شاكىرتى بار. ولارعا شەبەر ٴوزىنىڭ بار بىلگەنىن ۇيرەتۋگە تىرىسادى. وزىنەن شاكىرتتەرى وزعانىن جەتىستىك سانايدى. سەمەيدىڭ وزىندە عانا ٴقازىر 13 مىڭعا جۋىق مۇمكىندىگى شەكتەۋلى جان بار. ولاردىڭ كوبى ەشكىمگە، ٴتىپتى تۋىستارىنا كەرەكسىز بولىپ قالعان جاندار. ابىلايحان اعا ولار بىرگە وتىرىپ، جۇمىس ىستەيتىن ۇلكەن شەبەرحانا اشۋدى ارماندايدى.

«ولار كەمتار بولعاندىعى ەمەس، اينالىساتىن ٴىس تاپپاعانى سەبەپتى قينالادى. وسىنداي كىسىلەردى ٴبىر ورتالىققا جيناپ، قالاعان ىستەرىمەن اينالىسۋعا مۇمكىندىك جاساعىم كەلەدى. سەبەبى، ولار بىر-بىرىمەن ەركىن ٴتىل تابىسادى، تەز تۇسىنىسەدى. ولار بىرەۋگە قاجەت ەكەنىن سەزىنۋى كەرەك» دەيدى ابىلايحان اسىلباي.

فوتو گۇلجان رامانقۇلوۆا


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي