BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلىمىزدە وڭتۇستىككورەيالىق كاپيتالدىڭ ۇلەسى بار 465 بىرلەسكەن كاسىپورىن جۇمىس ىستەيدى

فوتو: akorda.kz

مەملەكەت باسشىسى كورەيا رەسپۋبليكاسىنىڭ ىسكەر توپتار وكىلدەرىمەن كەزدەستى. كەزدەسۋگە ٴىرى كورەي كومپانيالارىنىڭ وكىلدەرى قاتىستى، دەپ حابارلايدى اقوردانىڭ ٴباسپاسوز قىزمەتى.

مەملەكەت باسشىسى كورەيا رەسپۋبليكاسى قازاقستاننىڭ شىعىس ازياداعى نەگىزگى ارىپتەستەرىنىڭ ٴبىر ەكەنىن، تاۋەلسىزدىك جىلدارى وسى ەلدەن كەلگەن ينۆەستيسيانىڭ جالپى كولەمى 9 ملرد دوللارعا جەتكەنىن اتاپ ٴوتتى.

قازاقستان پرەزيدەنتى 2015 جىلى ٴبىرقاتار سىرتقى فاكتورلار مەن وبەكتيۆتى سەبەپتەرگە بايلانىستى ٴوزارا ساۋدا-ساتتىق كولەمى ٴبىرشاما ازايعانىن ايتتى.

«وسى ورايدا ٴبىزدىڭ ەكونوميكالىق ىنتىماقتاستىعىمىزعا تىڭ سەرپىن بەرۋ ماڭىزدى. ەنەرگەتيكا، اۋىل شارۋاشىلىعى، ماشينا جاساۋ، قۇرىلىس، قارجى جانە ينۆەستيسيالار، كولىك-لوگيستيكا جۇيەسى ٴوزارا ٴىس-قيمىلدىڭ پەرسپەكتيۆالى باعىتتارى بولىپ سانالادى»، – دەدى نۇرسۇلتان نازاربايەۆ.

قازاقستان پرەزيدەنتى اتاپ وتكەندەي، ٴبىزدىڭ ەلدە وڭتۇستىككورەيالىق كاپيتالدىڭ ۇلەسى بار 465 بىرلەسكەن كاسىپورىن جۇمىس ىستەۋدە، سوڭعى ٴۇش جىلدىڭ وزىندە جالپى قۇنى 160 ملن دوللار بولاتىن 14 ينۆەستيسيالىق جوبا ىسكە استى.

مەملەكەت باسشىسى ٴوزارا ٴتيىمدى ىنتىماقتاستىقتىڭ الەۋەتىن ارتتىرۋ ٴۇشىن قازاقستاندا جۇرگىزىلىپ جاتقان ەكونوميكانى ٴارتاراپتاندىرۋ جونىندەگى قۇرىلىمدىق رەفورمالار مەن شارالارعا توقتالدى.

«اتاپ ايتقاندا، ينۆەستيسيالىق احۋال مەن بيزنەس جۇرگىزۋ ٴۇشىن قاجەت جاعداي بىرتىندەپ جاقسارىپ كەلەدى، مەملەكەتتىك يندۋستريالىق-يننوۆاسيالىق دامۋ باعدارلاماسى ىسكە اسىرىلۋدا. باسىمدىعى بار سالالاردا ينۆەستورلارعا سالىق جەڭىلدىكتەرى جاسالۋدا، شاعىن جانە ورتا بيزنەسكە قولداۋ كورسەتەتىن ارناۋلى شارالار قابىلدانۋدا»، – دەدى نۇرسۇلتان نازاربايەۆ.

سونداي-اق، قازاقستان پرەزيدەنتى رەسپۋبليكادا سالىق مولشەرلەمەلەرىنە قاتىستى زاڭنامانىڭ جانە جۇمىسپەن قامتۋ سالاسىنداعى زاڭنامانىڭ تۇراقتىلىعىنا كەپىلدىك بەرىلگەنىنە نازار اۋداردى.

«ٴبىزدىڭ ەلدەرىمىزدىڭ ازاماتتارى ٴۇشىن ۆيزاسىز رەجىم ەنگىزىلىپ، تىكەلەي اۋە رەيستەرى اشىلدى»، – دەدى نۇرسۇلتان نازاربايەۆ.

مەملەكەت باسشىسى قازاقستان اۋماعىنداعى ارنايى ەكونوميكالىق جانە يندۋستريالىق ايماقتاردا كورەي كومپانيالارىنا ٴوز جوبالارىن ىسكە اسىرۋ ٴۇشىن ورىن بولۋگە ٴازىر ەكەنىن ايتىپ، سول ايماقتاردى باسقارۋ مۇكىندىگىن ۇسىندى.

بۇدان بولەك، مەملەكەت باسشىسى كورەي كومپانيالارىن قازاقستانداعى مەملەكەتتىك كاسىپورىنداردى جاپپاي جەكەشەلەندىرۋ ۇردىسىنە، الداعى «ەكسپو-2017»: بولاشاقتىڭ ەنەرگياسى» حالىقارالىق مامانداندىرىلعان كورمەسىنىڭ جۇمىسىنا، «استانا» حالىقارالىق قارجى ورتالىعىنىڭ قىزمەتىنە بەلسەنە اتسالىسۋعا شاقىردى.

«ٴبىز كورەي كومپانيالارىمەن ەكونوميكانىڭ بارلىق سەكتورىندا ىنتىماقتاستىق ورناتۋ ٴازىرمىز. بۇگىنگى ٴبىزدىڭ كەزدەسۋىمىز ەلدەرىمىزدىڭ ىسكەر توپتارىنىڭ ٴوزارا ٴتيىمدى ىنتىماقتاستىعىنىڭ جاڭا مۇمكىندىكتەرى مەن پەرسپەكتيۆالارىن انىقتاپ بەرەدى دەپ ۇمىتتەنەمىن»، – دەدى نۇرسۇلتان نازاربايەۆ.

مەملەكەت باسشىسى ساپار اياسىندا وڭتۇستىك كورەيانىڭ پرەزيدەنتىمەن جۇرگىزىلگەن كەلىسسوزدىڭ جەمىستى بولعانىن ايتىپ، وندا ىسكەرلىك ىنتىماقتاستىق اياسىن كەڭەيتۋدىڭ جاڭا مۇمكىندىكتەرى، سونىڭ ىشىندە قازاقستاننىڭ كولىك ينفراقۇرىلىمىن دامىتۋ، ەاەو نارىعىنا شىعۋ پەرسپەكتيۆالارى تالقىلانعانىن اتاپ ٴوتتى.

«ٴبىز ەۋرازيالىق ەكونوميكالىق وداقپەن ارادا ەركىن ساۋدا ايماعىن قۇرۋ جونىندە اڭگىمەلەستىك. بيىل بۇل ۇيىمعا ٴتوراعالىق ەتىپ وتىرعان قازاقستان كورەيانىڭ وسى كەڭىستىككە ەنۋ جونىندەگى نيەتىن قۇپتايدى. بۇل بارىمىزگە جاقسى جانە ٴبىز وسى يدەيانى ىلگەرىلەتەتىن بولامىز»، – دەدى قازاقستان پرەزيدەنتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي