BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلباسى اقش-تىڭ ساۋدا مينيسترىمەن كەزدەستى

استانا، baq.kz. كەزدەسۋ بارىسىندا تاراپتار ەكى ەلدىڭ ساۋدا-ەكونوميكا جانە ينۆەستيسيا سالالارىنداعى قارىم-قاتىناستارىنىڭ قازىرگى جاعدايى مەن دامۋ پەرسپەكتيۆالارىن تالقىلادى. بۇل تۋرالى اقوردانىڭ ٴباسپاسوز قىزمەتى جازدى.

مەملەكەت باسشىسى ساۋدا ٴمينيسترىنىڭ بۇل ساپارى اقش-تىڭ ورتالىق ازيا وڭىرىمەن ىنتىماقتاستىقتى دامىتۋعا مۇددەلى ەكەنىن ايقىن اڭعارتاتىنىن، سونداي-اق ٴوزارا ەكونوميكالىق بايلانىستاردى نىعايتۋعا سەپتىگىن تيگىزەتىنىن ايتتى.

نۇرسۇلتان نازاربايەۆ بيىلعى قاڭتار ايىنداعى اقش-قا رەسمي ساپارى بارىسىندا جوعارى دەڭگەيدە وتكەن كەزدەسۋلەردىڭ ناتيجەلەرىنە توقتالدى.

«كەزدەسۋدە پرەزيدەنت دونالد ترامپپەن ٴوزارا تۇسىنىستىككە قول جەتكىزدىك. قازاقستان مەن امەريكا اراسىنداعى قارىم-قاتىناستار كەڭەيتىلگەن سەرىكتەستىك دەڭگەيىنە كوتەرىلدى. بۇل تۋرالى ٴتيىستى مالىمدەمەگە قول قويىلدى. مەن رەسمي ساپار بارىسىندا اقش-تىڭ «بيزنەس كاپيتاندارىنىڭ» ۇلكەن توبىمەن كەزدەستىم. بىرلەسكەن بيزنەس-فورۋمدا جالپى قۇنى 7 ميلليارد اقش دوللارى بولاتىن ٴتۇرلى 27 كوممەرسيالىق قۇجاتقا قول قويىلدى. بۇگىندە ەلدەرىمىز اراسىنداعى ساۋدا كولەمى 2 ميلليارد اقش دوللارىنا جەتتى. بيىل بۇل كورسەتكىش 30 پايىزعا ٴوستى»، – دەدى قازاقستان پرەزيدەنتى.

سونىمەن قاتار، مەملەكەت باسشىسى ەكى ەل اراسىنداعى ىنتىماقتاستىقتىڭ دامۋ تاريحىنا توقتالىپ، قازاقستان تاۋەلسىزدىگىنىڭ العاشقى جىلدارىندا قول قويىلعان كەلىسىمدەر جونىندە ايتتى.

«قازاقستان يادرولىق قارۋدان باس تارتىپ، الەمدەگى ٴىرى يادرولىق پوليگوندى جاپقان سوڭ، ٴبىز پرەزيدەنت ۇلكەن دجوردج بۋشپەن ىنتىماقتاستىق جونىندە ٴبىرىنشى كەلىسىمشارتقا قول قويدىق. سول كەزدە «شەۆرون» كومپانياسى ٴبىزدىڭ ەلدە جۇمىس ىستەۋگە نيەت ٴبىلدىردى. بۇل كومپانيا جۇمىسىنىڭ تاريحى قازاقستاندا بيزنەس جۇرگىزۋدىڭ قانشالىقتى تابىستى بولاتىنىن ايقىن كورسەتەدى»، – دەدى قازاقستان پرەزيدەنتى.

مەملەكەت باسشىسى بۇگىندە قازاقستاننىڭ كوپۆەكتورلى ساياسات جۇرگىزىپ وتىرعانىن جانە سەرىكتەس ەلدەردىڭ بارىمەن تاتۋ قارىم-قاتىناس ورناتقانىن اتاپ ٴوتتى.

ۋيلبۋر روسس نۇرسۇلتان نازاربايەۆقا كەزدەسۋگە مۇمكىندىك تۋعىزعانى ٴۇشىن ريزاشىلىق ٴبىلدىرىپ، استانانى كورگەن كەزدەگى اسەرى جونىندە اڭگىمەلەدى.

«مەن قازاقستانعا ٴبىرىنشى رەت كەلىپ وتىرمىن. اۋەجايدان كەلە جاتىپ، استانانىڭ ساۋلەتىنە تامسانا قارادىم. سىزدەردە قۇرىلىس جۇمىستارى قارقىندى جۇرگىزىلۋدە ٴارى ەكونوميكالارىڭىز دا قارىشتاپ دامىپ كەلەدى»، – دەدى اقش-تىڭ ساۋدا ٴمينيسترى.

سونداي-اق، ۋ.روسس استاناعا وزىمەن بىرگە قازاقستانمەن ساۋدا-ەكونوميكالىق قاتىناستاردى دامىتۋعا نيەت بىلدىرگەن 16 امەريكالىق كومپانيانىڭ دەلەگاسياسى كەلگەنىن اتاپ ٴوتتى.

اقش-تىڭ ساۋدا ٴمينيسترى قازاقستان پرەزيدەنتىنە اقش پرەزيدەنتى د.ترامپتىڭ ىزگى تىلەگىن جەتكىزىپ، ەكى مەملەكەت اراسىنداعى ىنتىماقتاستىقتى ودان ٴارى نىعايتىپ، كەڭەيتە تۇسۋگە مۇددەلى ەكەنىن ايتتى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي