توقايەۆ سەناتتىڭ بيىلعى جۇمىسىن قورىتىندىلادى

استانا، baq.kz ٴتىلشىسى. پارلامەنتتىڭ جوعارعى پالاتاسىنىڭ ٴتوراعاسى قاسىم-جومارت توقايەۆ سەناتتىڭ 2018 جىلعى جۇمىسىن قورىتىندىلادى.

«بۇگىن پالاتانىڭ وسى جىلعى قورىتىندى وتىرىسىن وتكىزدىك. جالپى، بيىل پارلامەنت 80 زاڭ قابىلدادى. قابىلدانعان زاڭداردىڭ 30-عا جۋىعى ەلباسىنىڭ ناقتى تاپسىرمالارىن ورىنداۋعا باعىتتالدى. سەناتورلار زاڭ جوبالارىنىڭ باسىم كوپشىلىگىن قىسقا مەرزىمدە جان-جاقتى مۇقيات قاراستىرىپ، كوپتەگەن ماڭىزدى تۇزەتۋلەر ەنگىزگەنىن اتاپ ٴوتۋ قاجەت. سەنات دەپۋتاتتارى قوعامىمىزداعى ەڭ وزەكتى ماسەلەلەر بويىنشا ۇكىمەتكە 100-دەن اسا دەپۋتاتتىق ساۋال جولدادى»، - دەدى توقايەۆ.

سەنات ٴتوراعاسىنىڭ ايتۋىنشا، بيىل پالاتا زاڭ شىعارۋ جۇمىسىمەن قاتار پارلامەنتتىك قىزمەتتىڭ باسقا دا باعىتتارى بويىنشا وتە بەلسەندى جۇمىس ىستەدى.

«بيىل پارلامەنتتىك باقىلاۋدىڭ ٴتيىمدى فورماسى بولىپ تابىلاتىن پارلامەنتتىڭ تىڭداۋلار ٴوتتى. وتكىزىلگەن 4 پارلامەنتتىك تىڭداۋدىڭ ناتيجەسى بويىنشا اتقارۋشى ورگاندارعا ناقتى ۇسىنىستار بەرىلدى. ولاردىڭ ورىندالۋ بارىسى كوميتەتتەردىڭ ۇدايى باقىلاۋىندا بولادى. سونداي-اق، ماڭىزدى حالىقارالىق ٴىس-شارالار شەڭبەرىندەگى كەزدەسۋلەر ەلىمىزدىڭ سىرتقى ساياسي باستامالارىن ىلگەرىلەتۋگە ىقپال ەتەتىنىنى ٴسوزسىز»، - دەدى قاسىم-جومارت توقايەۆ.

قىمبات ەلتايقىزى

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!