استانا: 
استانا، baq.kz ٴتىلشىسى. سەنات ٴتوراعاسى قاسىم-جومارت توقايەۆ «قۇقىق قورعاۋ قىزمەتىنىڭ پروسەستىك نەگىزدەرىن ودان ٴارى جاڭعىرتۋ» تاقىرىبىنا ارنالعان پارلامەنتتىك تىڭداۋلاردا قازىرگى كۇن تارتىبىندەگى وتكىر سۇراقتاردى اتادى.
«مەملەكەت باسشىسى اتاپ كورسەتكەندەي، قۇقىق قورعاۋ ورگاندارىنىڭ ساپالى قىزمەتى ازاماتتاردىڭ قۇقىق قورعاۋ جۇيەسىنە دەگەن سەنىمىن ارتتىراتىن جانە ولاردىڭ قاۋىپسىزدىگىنە تىكەلەي ىقپال ەتەتىن سالماقتى فاكتور بولىپ تابىلادى. قىلمىستىق پروسەستىڭ نەگىزدەرىن جاڭعىرتۋ جونىندەگى پارلامەنت قابىلداعان تۇزەتۋلەر سوت-قۇقىقتىق رەفورماسىنىڭ جاڭا كەزەڭگە اياق باسۋىنا تىڭ سەرپىن بەردى دەپ ايتۋعا تولىق نەگىز بار. قۇقىق قورعاۋ ورگاندارى جۇيەسىنە ەنگىزىلىپ جاتقان تەحنيكالىق يننوۆاسيالاردىڭ ناتيجەسىندە سوت تورەلىگىندەگى جاريالىلىقتى جۇزەگە اسىرۋعا ايتارلىقتاي مۇمكىندىكتەر اشىلۋدا. جىل باسىنان بەرى قىلمىستىق ىستەردى ەلەكتروندىق تۇردە جۇرگىزۋگە كەزەڭ-كەزەڭىمەن كوشۋ سوت تورەلىگىن قاشىقتىقتان جۇرگىزۋ مۇمكىندىگىن بەرىپ وتىر. ناتيجەسىندە ىستەردى قاراۋ مەرزىمى جارتىلاي قىسقاردى»، - دەدى توقايەۆ.
سەنات ٴتوراعاسىنىڭ ايتۋىنشا، سوت قىزمەتىنىڭ پروسەستىك نورمالارىن جەتىلدىرۋ جانە داۋلاردى شەشۋدىڭ بالاما تاسىلدەرىن ەنگىزۋ بويىنشا زاڭ شىعارۋ جۇمىستارى بەلسەندى تۇردە جۇرگىزىلۋدە.
«قىلمىستىق زاڭنامانى ىزگىلەندىرۋ شارالارى ەلىمىزدىڭ تۇزەتۋ مەكەمەلەرىندەگى جازاسىن وتەپ جاتقانداردىڭ سانىن ٴۇش ەسە ازايتۋعا مۇمكىندىك بەردى. 1990 جىلدارى سوتتالعان 100 مىڭ ادام 2018 جىلى 35 مىڭعا دەيىن ازايدى. اتالعان وڭ وزگەرىستەر زاڭ ۇستەمدىگى يندەكسى بويىنشا قازاقستاننىڭ كورسەتكىشىن جاقسارتۋعا ىقپال ەتتى. ماسەلەن، 2017 جىلدىڭ قورىتىندىسى بويىنشا ەلىمىز 9 ورىنعا كوتەرىلىپ، 113 ەلدىڭ ىشىندە ٴ64-شى ورىندى يەلەندى. قول جەتكىزگەن ناتيجەلەرگە قاراماستان، قۇقىق قورعاۋ ورگاندارىنىڭ ازاماتتىق قوعام ينستيتۋتتارىمەن ٴوزارا ٴىس-قيمىل جاساۋ ساپاسى ٴالى دە زامان تالاپتارىنا تولىق جاۋاپ بەرە الماي وتىر. تۇتاستاي العاندا، بۇل حالىقتىڭ قۇقىق قورعاۋ جۇيەسىنە دەگەن سەنىمىنىڭ ازايۋىنا الىپ كەلەدى. وسىنىڭ نەگىزىندە قوعام مەن قۇقىق قورعاۋ ورگاندارىنىڭ اراسىنداعى ٴوزارا بايلانىس پەن سەنىمدى قامتاماسىز ەتۋ جونىندەگى شۇعىل مىندەت تۋىندايدى»، - دەدى ول.
سەنات ٴتوراعاسىنىڭ مالىمەتىنشە، نەگىزسىز قىلمىستىق قۋدالاۋدان قورعاۋ جانە قىلمىستىق سوت ٴىسىن جۇرگىزۋدىڭ جازالاۋشىلىق (رەپرەسسيۆتىلىك) سيپاتىنىڭ دەڭگەيىن تومەندەتۋ، ازاماتتاردىڭ قۇقىقتارى مەن بوستاندىقتارىن قامتاماسىز ەتۋ ماسەلەلەرى كۇن تارتىبىندەگى وتكىر سۇراقتاردىڭ قاتارىنا جاتادى.
«سوت شەشىمدەرىنىڭ ورىندالماۋى نەمەسە ۋاقتىلى ورىندالماۋى ادىلدىكتىڭ ۇستەمدىك ەتۋىنە كەدەرگى كەلتىرۋدە. ول سوت بيلىگىمەن قاتار مەملەكەتتىڭ دە بەدەلىن تومەندەتىپ، ولارعا دەگەن سەنىمدى السىرەتىپ وتىر»، - دەدى قاسىم-جومارت توقايەۆ.
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
2451 
0
قىمبات ەلتايقىزى 
2389
0