دەپۋتاتتار مەمقىزمەتكەرلەردىڭ قوس ازاماتتىعىن تەكسەرۋدى تالاپ ەتتى - پارلامەنت|14 قاراشا 2018، 14:32
كۋرسى ۆاليۋت وبنوۆليايۋتسيا
استانا:

دەپۋتاتتار مەمقىزمەتكەرلەردىڭ قوس ازاماتتىعىن تەكسەرۋدى تالاپ ەتتى

فوتو: 365Info

استانا، baq.kz ٴتىلشىسى. ٴماجىلىستىڭ جالپى وتىرىسىندا «اقجول» فراكسياسىنىڭ دەپۋتاتتارى مەملەكەتتىك قىزمەتكەرلەردىڭ قوس ازاماتتىعىن تەكسەرۋدى تالاپ ەتىپ، ول ٴۇشىن قىلمىستىق جاۋاپكەرشىلىك ەنگىزۋدى سۇرادى.

وتىرىستا ولار ساۋالدى قر باس پروكۋرارىنا، قر ادىلەت مينيسترىنە جانە قر ىشكى ىستەر مينيسترىنە جولدادى.

«ٴبىزدىڭ ۇعىمدا قوس ەلدىڭ ازاماتى بولۋ دەگەن تۇسىنىك مۇلدە جوق جانە بۇل ەرەجە اتا زاڭىمىزدىڭ 10-بابى 3-تارماعىندا تايعا تاڭبا باسقانداي ەتىپ جازىلعان. اكىمشىلىك قۇقىق بۇزۋشىلىق كودەكستە قوس ازاماتتىق ٴۇشىن جاۋاپكەرشىلىك قاراستىرىلعان. ال مۇنداي زاڭ بۇزۋشىلىققا مەملەكەتتىك قىزمەتكەر باراتىن بولسا، جاۋاپكەرشىلىك ودان دا قاتاڭ»، - دەدى دەپۋتات بەرىك دۇيسەنبيەۆ.

دەپۋتات 2014 جىلى ازەربايجاندا قوس ازاماتتىق ٴۇشىن قىلمىستىق جازا ەنگىزىلگەنىن، ال قىرعىزستاندا مەملەكەتتىك قىزمەتتەگى ادامداردى قوس ازاماتتىق ٴۇشىن قىلمىستىق جازاعا تارتۋ ماسەلەسى قىزۋ تالقىلانىپ جاتقانىن، قىتاي زاڭى دا قوس ازاماتتىققا قاتاڭ قارايتىنىن اتاپ ٴوتتى.

سونىمەن قاتار بەرىك دۇيسەنبيەۆ اقتوبەلىك ادۆوكاتتىڭ ورەسكەل زاڭ بۇزۋشىلىققا بارعانىن حابارلادى.

«جاۋاپكەرشىلىكتى تولىعىمەن تۇسىنە وتىرىپ، سانالى تۇردە زاڭ بۇزعان مەملەكەتتىك قىزمەتكەرلەردىڭ ارەكەتتەرىن سۋ ىشكەن قۇدىعىنا تۇكىرۋ، قوس مەكەندى باقا-شاياننىڭ قىلىعى دەپ تۇسىنەمىز. اقپارات قۇرالدارىندا بەلگىلى بولعانداي اقتوبەلىك ادۆوكات ۆالەريي ياكۋبەنكو 2000 جىلى رەسەي ازاماتتىعىن العانىن وسى ۋاقىتقا دەيىن جاسىرىپ كەلگەن. ونىمەن قويماي، ول مەملەكەتپەن كەپىلدەندىرىلگەن زاڭدى كومەك كورسەتۋ اياسىندا بيۋدجەتتەن 5 ملن تەڭگەدەن استام كولەمدە قارجى العان»، - دەدى ول.

وسى ورايدا دەپۋتات اقتوبە وبلىستىق ادۆوكاتتار القاسىنىڭ ٴتورايىمى جانە ۆالەريي ياكۋبەنكونىڭ جۇبايى رايسا ياكۋبەنكو كاسىبي زاڭگەر رەتىندە زاڭ بۇزۋشىلىقتى كورە تۇرا 18 جىل بويى اتالعان ارەكەتكە كوز جۇمىپ قاراپ كەلگەنىن مالىمدەدى.

«تەك ادىلەت مينيسترلىگىنىڭ تىكەلەي ارالاسۋىنىڭ ارقاسىندا عانا ۆالەريي ياكۋبەنكو اكىمشىلىك جازاعا تارتىلىپ، ليسەنزياسىنان ايىرىلدى. ٴبىز اقتوبە وبلىستىق ادۆوكاتتار القاسىنىڭ ٴتورايىمىن لاۋازىمىنان ايىرىپ، جاۋاپكەرشىلىككە تارتۋدى سۇرايمىز»، - دەدى دۇيسەنبيەۆ.

ونىڭ ايتۋىنشا، ەلىمىزدە 2016 جىلى 400-دەن اسا، 2017 جىلى 600-دەن اسا، 2018 جىلدىڭ 10 ايىندا 527 قوس ازاماتتىق فاكتىلەرى انىقتالعان. دەپۋتاتتىڭ پىكىرىنشە، بۇل سيفرلاردىڭ ىشىندە قانشا مەملەكەتتىك قىزمەتكەر بار ەكەنىن ەشكىم بىلمەيدى.

«اشىق اقپارات كوزدەرىنەن مۇنداي مالىمەتتى تاپپادىق. اقش-تا ازاماتتىق الۋ ٴۇشىن بەرىلەتىن انتتا «مەن وسى كۇنگە دەيىن ازامات بولعان كەز كەلگەن مەملەكەتكە ادالدىقتان مۇلدە باس تارتامىن. قولىما قارۋ الىپ، قۇراما شتاتتار جاعىندا شايقاسامىن» دەگەن سوزدەر بار. وسىنداي سوزدەن كەيىن شەتەلدىك ازاماتتىعى بار ادام قالايشا ەلىمىزگە قىزمەت ەتەدى، اتا زاڭىمىزدى قالاي مىسە تۇتادى، وتانداستارىنىڭ كوزىنە قالاي قارايدى؟ مەملەكەتتىك قىزمەتتە ىستەگەن تاجىريبەلى، زاڭدى بەس ساۋساعىنداي بىلەتىن، قالتاسىندا باسقا ەلدىڭ پاسپورتى بار ادام قاي ەلدىڭ سويىلىن سوعاتىنى بەلگىسىز»، - دەدى دەپۋتات.

سونداي-اق ول مەملەكەتتىك قىزمەتكەرلەردىڭ قوس ازاماتتىعىن تەكسەرۋدى تالاپ ەتىپ، ول ٴۇشىن قىلمىستىق جاۋاپكەرشىلىك ەنگىزۋدى سۇرادى.

«جوعارىدا ايتىلعانداردى قورىتىندىلاي كەلە، «اق جول» فراكسياسى مەملەكەتتىك قىزمەتكەرلەردىڭ، ادۆوكاتتاردىڭ، نوتاريۋستاردىڭ، سوت ورىنداۋشىلارىنىڭ، سونداي بيلىك وكىلدەرىنىڭ فۋنكسيالارىن جۇزەگە اسىراتىن ازاماتتاردىڭ قوس ازاماتتىعى بار-جوقتىعىنا ٴتيىستى تەكسەرىس جۇرگىزۋدى، جوعارىدا اتالعان تۇلعالاردىڭ قوس ازاماتتىعى ٴۇشىن قىلمىستىق جاۋاپكەرشىلىككە ەنگىزۋ مۇمكىندىگىن قاراستىرۋدى سۇرايدى. سونىمەن قاتار قازاقستان پاسپورتىن العان كەزدە قازاقستان ازاماتى انتىنىڭ ٴماتىنى مەن ٴراسىمىن زاڭمەن بەكىتۋ قاجەت»، - دەپ تۇيىندەدى ٴسوزىن بەرىك دۇيسەنبيەۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي