«اقشالاردى قالاي قايتارامىز؟» نىعماتۋلين ورىنسىز قارىز العان قارجى مينيسترلىگىن سىنعا الدى - پارلامەنت|05 ماۋسىم 2018، 16:46
كۋرسى ۆاليۋت وبنوۆليايۋتسيا
استانا:

«اقشالاردى قالاي قايتارامىز؟» نىعماتۋلين ورىنسىز قارىز العان قارجى مينيسترلىگىن سىنعا الدى

فوتو: ашық дереккөзден

ٴماجىلىس ٴتوراعاسى نۇرلان نىعماتۋلين پروسەنتپەن قارىز الىپ، اقشانى ورىنسىز جۇمسايتىن مينيسترلىكتەردىڭ جۇمىسىن سىنعا الدى، دەپ حابارلايدى baq.kz ٴتىلشىسى.

بۇگىن ٴماجىلىستىڭ جالپى وتىرىسىندا قر ۇكىمەتىنىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2017 جىلعى رەسپۋبليكالىق بيۋدجەتتىڭ اتقارىلۋى تۋرالى قر قارجى ٴمينيسترى باقىت سۇلتانوۆ دەپۋتاتتارعا ەسەپ بەردى.

الايدا وتىرىس بارىسىندا نۇرلان نىعماتۋلين اتالعان سالادا نازار اۋدارۋدى قاجەت ەتەتىن ماسەلەلەر بار ەكەنىن العا تارتتى.

«جۇمسارتىپ ايتساق، ورىنسىز الىنعان قارىزدار دا بار. مىنا ەسەپتەن قاراپ وتىرمىن. مامانداردى وقىتۋعا، دوڭگەلىك ۇستەل مەن كونفەرەنسيانى ۇيىمداستىرۋعا، ٴتىپتى مينيسترلىكتەردىڭ مىندەتىنە كىرەتىن جۇمىستار شەتەلدەن الىنعان قارىز ەسەبىنەن اتقارىلعان»، - دەدى ول نۇرلان نىعماتۋلين ٴماجىلىستىڭ جالپى وتىرىسىندا.

وسى ورايدا ول شەتەلدەن الىنعان قارجىنى ورىنسىز جۇمساعان قارجى مينيسترلىگىن سىنعا الدى.

«ەسەپ كوميتەتىنىڭ ەسەبىندە كورسەتىلگەندەي، باقىت تۇرلىحان ۇلى، ٴسىزدىڭ باقىلاۋىڭىزداعى مينيسترلىككە سالىقتىق اكىمشىلەندىرۋدى رەفورمالاندىرۋعا قارجى جۇمسالدى. سونداي-اق قارجى مينيسترلىگى دەپارتامەنتتەرى مەن قىزمەتكەرلەرىنىڭ جۇمىسىن تيىمدىلىگىن كورسەتەتىن كورسەتكىشتى دايىنداۋ ٴۇشىن اتالعان قارىز پايدالانعان. قارىزدىڭ مولشەرى – 14%. سىزدەرگە وسى جۇمىستى جۇرگىزۋ ٴۇشىن نەلىكتەن اقش پەن ەۋرو وداقتان مامان شاقىرۋ قاجەت بولدى؟ باقىت تۇرلىحان ۇلى، سىزدەن ارتىق قول استىڭىزداعى قىزمەتكەرلەردىڭ جۇمىسىن كىم باعالايدى؟»، - دەدى ٴماجىلىس ٴتوراعاسى.

سونىمەن قاتار ول اتالعان ۆەدومستۆونىڭ اقشانى ورىنسىز جۇمساعانىن دالەلدەيتىن تاعى ٴبىر مىسالعا توقتالدى.

«قارجى مينيسترلىگى قىزمەتكەرلەرىنىڭ پوليلوگرافيالىق زەرتتەۋ جۇمىسىنا دا قارجى بولىنگەن. مەنىڭ تۇسىنۋىمشە، بۇل مەملەكەتتىك كىرىستەر دەپارتامەنتىنە تيەسىلى. ٴبىراق مۇنداي قىزمەت قۇقىق قورعاۋ ورگاندارىندا دا بار عوي. نەگە سونىڭ قىزمەتىن پايدالانبادىڭىزدار؟ نەگە وعان شەتەلدىك ماماندى شاقىردىڭىزدار؟ مەنىڭ ويىمشا، مينيسترلىكتەر ٴوز قۇرىلىمىنداعى بولىمدەردىڭ قىزمەتىنىڭ تيىمدىلىگىن كورسەتەتىن كورسەتكىشتى جاساۋعا قاۋقارلى. ولار وزدەرى دوڭگەلەك ۇستەلدەر مەن كونفەرەنسيالاردى ۇيىمداستىرا دا الادى. مينيسترلىكتەردە تولىق ٴبىر اپپارات وتىر. جوق، ونىڭ ورنىنا سىزدەر اقشانى پروسەنتپەن قارىزعا الىپ، وعان شەتەلدىك مامانداردى شاقىراسىزدار»، - دەدى نۇرلان نىعماتۋلين.

ٴسوز سوڭىندا ٴماجىلىس ٴتوراعاسى قارىزعا الىنعان اقشانى قايتاراتىن كۇن دە كەلەتىنىن اتاپ ٴوتتى.

«بىزدە قارىزداردى الۋعا كىم قول قويادى؟ مينيسترلەر قول قويادى. ولاردىڭ ستاتۋسى جوعارى. ۆيسە-مينيسترلەردە قويعان دەرەكتەر دە بار. ٴبىراق بۇل اقشالاردى قالاي قايتارامىز؟»، - دەپ تۇيىندەدى ٴسوزىن ول.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي