BAQ.kz - Қазақстан жаңалықтары USD 376.73 BAQ.kz - Қазақстан жаңалықтары EUR 427.36 BAQ.kz - Қазақстан жаңалықтары RUB 5.75
استانا:

5 توننا ٴولى بالىق: سەناتور جايىق بالىعىنىڭ جاپپاي قىرىلۋ ماسەلەسىن كوتەردى

استانا، baq.kz ٴتىلشىسى. بۇگىن سەناتور سارسەنباي ەڭسەگەنوۆ اتىراۋ وبلىسىنداعى بالىقتاردىڭ جاپپاي قىرىلۋ ماسەلەسىن كوتەردى.

ەڭسەگەنوۆ قر پرەمەر-مينيسترى باقىتجان ساعىنتايەۆقا جولداعان ساۋالىندا بالىقتاردىڭ جاپپاي قىرىلۋىنىڭ الدىن الۋعا كەشىندى شارالار قاجەت ەكەنىن ايتقان.

«اتىراۋ وبلىسى اۋماعىنداعى جايىق وزەنىندە بالىقتاردىڭ جاپپاي قىرىلۋىنا بايلانىستى ازاماتتار الاڭداۋشىلىق بىلدىرۋدە. قازاقستانداعى سۋ ايدىندارىندا، سونىڭ ىشىندە جايىق - كاسپيي باسسەينىنە قاراستى سۋلاردا بالىقتاردىڭ ازدى-كوپتى قىرىلۋى سوڭعى جىلدارى ٴجيى ورىن الىپ وتىر. دەگەنمەن، جەلتوقسان ايىنىڭ ىشىندەگى بالىقتاردىڭ جاپپاي قىرىلۋىنىڭ كولەمى مەن ودان كەلگەن زالال مولشەرى وراسان. جايىق وزەنىنەن ٴبىر مەزەتتە 5 توننادان استام ٴولى بالىق جينالسا، سوڭعى اقپاراتتار بويىشا «جايىق-اتىراۋ» بەكىرە ٴوسىرۋ زاۋىتىنىڭ 164 بەكىرە تۇقىمداس بالىعى ولگەن. سول سياقتى «لۋگوۆوي ات زاۋىتى» ٴجشس-نىڭ توعانىنان الىنعان 1647 بەكىرە تۇقىمداس بالىقتاردىڭ 42-نەن باسقاسى ولگەن. كاسىپورىن جالپى سانى 30 مىڭنان استام باعىمداعى بەكىرە تۇقىمداس بالىقتان ايىرىلعان»، - دەدى ەڭسەگەنوۆ.


دەپۋتاتتىڭ ايتۋىنشا، بالىقتاردىڭ جاپپاي قىرىلۋىنا وزەنگە اممياكتىڭ توگىلۋى سەبەپ بولۋى مۇمكىن دەگەن بولجام بار. ولگەن بالىقتاردىڭ ەتىنەن اممياكتىڭ تابىلۋى وسى بولجامدى بەكىتە تۇسەتىندەي. سونىمەن بىرگە، جايىق وزەنىندە زياندى زاتتاردىڭ مولشەرى شەكتەن جوعارى دەگەن دە پىكىرلەر ايتىلۋدا.

«قازىرگى كەزدە «اتىراۋ سۋ ارناسى» ممك، «اتىراۋ جەو» اق مەن اتىراۋ قالاسىنداعى ەكى بەكىرە بالىعىن وسىرەتىن زاۋىتتار تەكسەرىلۋدە. سالاارالىق كوميسسيا دا جۇمىس ىستەۋدە. دەگەنمەن، قالىپتاسقان جاعدايدا قوسىمشا شارالار الۋ قاجەت. جايىق وزەنىندەگى بالىقتاردىڭ جاپپاي قىرىلۋىنا جوعارىدا اتالعان مەكەمەلەر مەن بىرگە يەسىز اۆاريالىق مۇناي-گاز ۇڭعىمالارىنىڭ، مۇناي-گاز كەشەنىنە قاراستى كاسىپورىندار قىزمەتىنىڭ اسەرى نازاردان تىس قالماعانى دۇرىس. مۇزدىڭ تۇرۋىنا وراي بالىقتاردىڭ قانداي جاعدايدا ەكەنى جونىندە تولىق ماعلۇمات جوق. مۇز استىندا جاتقان بالىقتاردى تۇگەلدەي جيناۋ اسا ماڭىزدى. ويتپەسە ۋلانعان بالىق ەتتەرى وزەننىڭ ەكولوگيالىق جۇيەسىنە، باسقا سۋ جانۋارلارىنا زيانىن تيگىزۋى ابدەن مۇمكىن. بۇل وزەن بويىندا وتىرعان ادامداردىڭ، قارماق قۇرىپ بالىق ەتىن پايدالانۋشىلاردىڭ دەنساۋلىقتارى مەن ومىرلەرىنە ٴقاۋىپ تۋعىزاتىن جاي ەكەنىن ەسكەرۋ كەرەك»، - دەدى سارسەنباي ەڭسەگەنوۆ.

سەناتوردىڭ ايتۋىنشا، جۇمىس ىستەپ وتىرعان سالاارالىق كوميسسيا قىزمەتىن اشىق جۇرگىزۋ، عىلىمي، قوعامدىق، ونىڭ ىشىندە ەكولوگيالىق ۇيىمداردى، شەتەل ماماندارىن كەڭىنەن تارتۋ ماسەلەنىڭ جان-جاقتى تولىق زەرتتەلۋىن قامتاماسىز ەتەدى. بۇل سونىمەن بىرگە، وسى وقيعا جونىندەگى ٴار ٴتۇرلى نەگىزسىز الىپ قاشپا اڭگىمەلەردىڭ تۋىنداماۋىنا ىقپال جاسايدى.

«بالىقتاردىڭ ەتىنەن اممياكتىڭ تابىلۋى جانە سۋداعى زياندى زاتتار مولشەرىنىڭ ٴتيىستى دەڭگەيدەن كوپ بولۋى قولدانىستاعى تابيعات قورعاۋعا بايلانىستى زاڭنامالىق اكتىلەردىڭ وسال تۇستارى بار ەكەنىن كورسەتەدى. قۇرمەتتى، باقىتجان ٴابدىر ۇلى، ەلىمىزدەگى بالىق شارۋاشىلىعىنىڭ نەگىزگى سۋ ايدىنى بولىپ ەسەپتەلەتىن جايىق وزەنىندەگى بالىقتاردىڭ جاپپاي قىرىلۋىنا بايلانىستى قوزعالىپ وتىرعان ماسەلەلەردى قاراپ، ٴتيىمدى شارالار قابىلداۋدى ۇسىنامىن»، - دەدى ەڭسەگەنوۆ.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي