BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جالعىز ساياحاتتاعىسى كەلەتىندەرگە 6 پايدالى كەڭەس ەكسكليۋزيۆ

كۇندەردىڭ ٴبىر كۇنىندە تاڭەرتەڭ ويانا سالا باسقا ەلگە ۇشاق بيلەتىن الىپ، مەن سەكىلدى ساياحاتتاپ كەلۋگە قالاي قارايسىز؟ ساياحاتقا شىعاردا ۇشاق بيلەتىن العان سوڭ باسقا سۇراقتاردى ويلاماي جۇرە بەرۋگە بولا ما؟ تۋرفيرماسىز العاش رەت جالعىز ساياحاتتاعاندا نەنى ەسكەرگەن ٴجون؟ baq.kz ٴتىلشىسى بۇگىنگى جازباسىندا جوعارىداعى سۇراقتارعا جاۋاپ بەرەدى.

ول ەلگە بارۋ ٴۇشىن ۆيزا جاساتۋ كەرەك پە؟

جيھانكەز البەرت پودەلل «الەم ادامىنىڭ ٴتولقۇجاتى» اتتى كىتابىندا الەمنىڭ 196 ەلىنە قالاي ساياحاتتاعانى تۋرالى جازادى. ول ادامدار شەتەلگە شىعار كەزدە ەكى نارسەنى عانا: ٴبىرى ول ەلگە ۆيزا كەرەك پە، جوق پا، ەكىنشىسى جەرگىلىكتى بانك كارتاسىنىڭ ول ەلدە جاراي ما، جوق پا ەكەنىن ەسكەرەتىنىن ايتادى. ال قالعان سۇراقتار ادامداردى كوپ ويلاندىرمايدى. مەن دە قازاقستانمەن ۆيزاسىز رەجيمگە قول قويعان ەلدەردىڭ ٴتىزىمىن قاراپ گرۋزيا (90 كۇن) مەن ازەربايجاندى (30 كۇن) تاڭدادىم. ساياحاتقا شىعۋ پروسەسى باستالدى، باراتىن ەلىڭىزدى تاڭداعان سوڭ ۇشاق بيلەتىن الۋعا كىرىسىڭىز.

ۇشاق بيلەتىن قايدان العان ٴتيىمدى؟

بيلەتتى ۇشۋعا 5-6 اپتا نەمەسە 1 اي قالعاندا العان ٴتيىمدى دەپ جاتادى. الدىمەن tickets.kz، chocotravel.com دەگەن سايتتاردان ەكى باعىتتا بيلەت قۇنىن، قانداي اۋە كومپانياسى ەكەنىن قاراپ الىڭىز. سودان سوڭ ەڭ ارزان بيلەتتى كورسەتكەن كومپانيانىڭ رەسمي سايتىنا كىرسەڭىز tickets.kz، chocotravel.com-نان كورگەن بيلەتىڭىز ازداپ بولسا دا ارزانىراق باعادا تۇرادى. ارزان بيلەت كورسەڭىز تەزىرەك الۋعا تىرىسىڭىز.

ول ەلگە بارعان سوڭ قايدا تۇنەيمىن؟

ٴقازىر ساياحاتتاۋ ادامداردىڭ ٴومىر سالتىنا، حوببيىنە اينالدى. بۇرىن شەتەل اسىپ ەل كورۋ، جەر كورۋ قاراپايىم ادامعا قول جەتپەستەي كورىنسە، بۇگىندە كەز كەلگەن ادام ٴۇشىن قولجەتىمدى جانە ورىندالمايتىن «اسقاق ارمان» ەمەس. بيۋدجەتتى ساياحاتقا شىعامىن دەسەڭىز كومفورت، ياعني جايلىلىق ىزدەپ اۋرە بولماڭىز. الىس ساپارعا شىققاندا «تاماق بەرمەيتىن» اۋە كومپانيالاردىڭ بار ەكەنىن دە ۇمىتپاڭىز. باسقا ەلگە بارعان كەزىڭىزدە تۋىستار، وتانداستارىمىزدى ىزدەمەيتىنىڭىز تۇسىنىكتى، سوندا قايدا قوناسىز؟ booking.com سايتى ارقىلى ۇيدەن شىقپاي-اق، تۋرفيرما كومەگىنە جۇگىنبەي-اق الەمنىڭ كەز كەلگەن ەلىندە ورنالاسقان قوناق ۇيلەردەن وزىڭىزگە قاجەتتى ورىندى ونلاين-برونداي الاسىز.

1996 جىلى امستەردامدا نەگىزى قالانعان بۇل جۇيە نەسىمەن ٴتيىمدى؟ بىرىنشىدەن، قالانى تاڭداعان سوڭ ٴسىزدىڭ قالتاڭىزعا ساي كەلەتىن قوناق ۇيلەر مەن حوستەلدەر ٴتىزىمىن شىعارادى. قالا ورتالىعىنا قانشالىقتى جاقىن ورنالاسقانىن، تاڭەرتەڭگىلىك استىن، ينتەرنەتتىڭ بار-جوعىن سول جەردەن ٴبىلىپ الىڭىز. بۇرىن-سوندا بولعان ادامداردىڭ پىكىرىن وقىڭىز. تاڭداۋ جاساعان سوڭ ونلاين-برونداپ، قوناتىن جەرىڭىزدىڭ ادرەسىن تەلەفونىڭىزعا نەمەسە قاعازعا جازىپ الىڭىز، سەبەبى كەدەندىك باقىلاۋدان وتەر كەزدە سىزدەن قانداي ماقساتتا كەلگەنىڭىزدى، قايدا توقتايتىنىڭىزدى سۇرايدى. ونلاين-برونداعاندا بانك كارتاڭىزدىڭ ٴنومىرىن جازىپ الاتىن قوناق ۇيلەر بار، ٴبىراق بۇل «جاتاتىن ورىنعا بىردەن تولەۋىڭىز كەرەك» دەگەن ٴسوز ەمەس. تولەم سول جەرگە بارعاندا عانا جاسالادى.

حوستەلگە قونۋ قورقىنىشتى ما؟

حوستەلدىڭ قوناق ۇيدەن ايىرماسى – جاتاقحانا سەكىلدى ٴبىر بولمەدە بىرنەشە ادام تۇرادى جانە جاعدايدىڭ ٴبارى بولا بەرمەيدى. دەسە دە باعاسى ارزان. حوستەلدەن ۆيزا الا الماي جۇرگەن، بىرنەشە ايلاپ ٴومىر ٴسۇرىپ جاتقان نەمەسە 2-3 كۇنگە قالانى ارالاۋعا كەلگەن شەتەلدىكتەردى كوردىم. بىر-بىرىنە كەدەرگى كەلتىرمەيدى، كۇنى بويى قىدىرىپ، بولماسا شارۋاسىن ٴبىتىرىپ حوستەلگە تۇنەۋگە عانا كەلەدى. مەن توقتاعان ورىنداردا جانىمداعى ادامدار ادەپتى، سىپايى بولدى. تانىمايتىن ادامداردىڭ ورتاسىنا ٴتۇسۋ قورقىنىشتى ەمەس. كەرىسىنشە جان-جاقتان ساياحاتتاۋعا كەلگەن ادامدارمەن تانىسىپ، ولارمەن اڭگىمەلەسۋ ارقىلى قاجەتتى ٴبىلىم جيناۋعا بولادى. جاقىن ارالاسىپ كەتسەڭىز، كەلەسى ساياحاتىڭىزدا تانىسقان شەتەلدىكتىڭ ەلىنە ساياحاتتاپ بارۋىڭىز بەك مۇمكىن.

قالانى نەمەن ارالايمىن؟

بىرنەشە ۆاريانتتار بار. ولاردى ايتپاستان بۇرىن ەڭ ٴبىرىنشى اۋەجايدان قالانىڭ ورتالىعىنا قالاي جەتۋگە بولاتىنى تۋرالى كەڭەس بەرەيىن. وزدەرىڭىزگە بەلگىلى كەز كەلگەن اۋەجاي قالانىڭ سىرتىندا ورنالاسادى. قوناق ۇيگە نەمەسە حوستەلگە «ترانسفەر كەرەك» دەپ الدىن الا جازساڭىز ولار ٴسىزدى كۇتىپ الىپ، قالاعا جەتكىزەتىن كولىك دايىنداپ قويادى. العاش رەت بارعان قالادان «ۋاقىتشا ٴۇيىمدى ٴوزىم دە تابا الامىن» دەسەڭىز ەندەشە ساياحاتتى ويلاستىراتىن كەزدە سول ەلدەگى ترانسپورت جۇيەسى تۋرالى ٴبىلىپ الىڭىز. مىسالى، تبيليسي مەن باكۋدە اۋەجاي مەن قالا ورتالىعى اراسىندا 24 ساعات اۆتوبۋس قاتىنايدى. كۇندىز جيىلىگى 15-20 مينۋت بولسا، تۇندە كەمىندە 30 مينۋت بولۋى مۇمكىن. تاكسي ۇستاساڭىز الدىن الا ماكسيمۋم قانداي سوما بەرۋگە بولاتىنىن ٴبىلىپ الىڭىز، ايتپەسە ەلدەگى تاكسي جۇرگىزۋشىلەرى سەكىلدى ولار دا تۋريست ەكەنىڭىزدى ٴبىلىپ «اكەسىنىڭ قۇنىن» ايتادى.

قالانى جاياۋ ارالاۋدى ۇسىنار ەدىم. تەك الىستا ورنالاسقان تۋريستىك ورىندارعا اۆتوبۋسپەن، مەترومەن، تاكسيمەن جەتۋگە بولادى. اۆتوبۋستا جولاقىسىن تولەۋ مەحانيزمىن ٴبىلىپ الۋدى ۇمىتپاڭىز. كەيبىر ەلدە كارتا ساتىپ الىپ ونى تولتىرۋ ارقىلى، ەندى ٴبىر ەلدە تەرمينالعا تيىن سالۋ ارقىلى تولەۋگە بولادى.

بىرنەشە ەلگە بارامىن دەسەڭىز ۆيزامەن بىرگە ول ەلدىڭ ساياسي احۋالىن ٴبىلىپ الىڭىز

باراتىن ەلدەرىڭىزدىڭ ساياسي احۋالىن ٴبىلۋ ارتىق ەتپەيدى. الەمدە بەيبىتشىلىك بولسا دا بىر-بىرىنە قاباعى جازىلماعان ەلدەر بار. مىسالى، سولتۇستىك جانە وڭتۇستىك كورەيا، ٴۇندىستان مەن پاكىستان، ازەربايجان مەن ارمەنيا جانە ت.س.س. باسىمنان وتكەن قىزىق وقيعامەن بولىسەيىن. گرۋزيا مەن ازەربايجانعا ەكەۋىنە باراتىن بولعانمىن. تبيليسيدەگى ەكىنشى كۇنىمدە ارمەنيا استاناسى ەرەۆانعا بارا جاتقان ەكى فرانسۋز قىزعا ىلەسە كەتتىم. «كۇندە كەلمەيمىن عوي، ارمەنيانى دا كورە كەتەيىن» دەگەن وي بولدى. ەكى قالا اراسىندا 7 ورىندىق تاكسي قاتىنايدى ەكەن. 5-6 ساعاتتا ەكىنشى قالاعا جەتە قوياسىز. ٴبىر جاقسىسى free wifi بار. بارعان ەلىندە جەرگىلىكتى سيم-كارتانى ساتىپ الماي، تەك قوعامدىق ورىندارداعى تەگىن wifi-دى قولدانىپ جۇرگەندەر ٴۇشىن بۇل عاجاپ دۇنيە. العان حوستەلىم ورتالىقتا ەكەن، جانىمداعا ەكى فرانسۋز قىز تاۋىپ بەرە قويدى. اقشا ايىرباستاپ الۋىما دا كومەكتەستى. تانىسقانىما كوپ تە بولماعان جانداردىڭ جاقسىلىعىن كورگەندە قۋانادى ەكەنسىڭ.

ەرەۆانعا بارعانىم ۇلكەن پروبلەماعا اينالدى. ەلدەن كەتپەي جاتىپ گرۋزيا-ارمەنيا-ازەربايجان دەپ مارشرۋت سىزعانمىن جانە ەلدەردىڭ اراسىن كولىكپەن، نە بولماسا پويىزبەن وتەمىن دەپ ويلادىم. ٴبىراق ارمەنيا مەن ازەربايجان شەكاراسى ەكى ەل اراسىنداعى كونفليكتكە بايلانىستى جابىق ەكەن، ٴتىپتى تىكەلەي باراتىن اۋە رەيسى جوق. مۇنى بىلگەن سوڭ ارمەنيانى سىزىپ تاستاعان بولاتىنمىن، ٴبىراق «كۇندە كەلمەيمىن عوي» دەگەن وي مەن ەكى فرانسۋز قىز جوسپارىمدى كۇرت وزگەرتتى. ەرەۆاننان قايتا تبيليسيگە بارىپ، تبيليسيدەن باكۋگە ماشينا نە پويىزبەن بارامىن دەپ شەشتىم. ەرەۆانعا بارعان سوڭ عانا ٴتولقۇجاتتا ارمەنيا شتامپى بولسا ازەربايجانعا كىرۋ قيىن بولادى دەگەندى ٴبىلدىم.

ينتەرنەتتە كەدەندىك باقىلاۋدان وتە الماعاندار تۋرالى وقىپ قاتتى ۋايىمدادىم. ٴسويتىپ شەكارادا قالىپ قويمايىن دەگەن ويمەن تبيليسيدەن باكۋگە دەرەۋ ۇشاق بيلەتىن ساتىپ الدىم. «ساقتىقتا قورلىق جوق» دەپ قازاقستاننىڭ ازەربايجانداعى ەلشىلىگىنە «باس اۋرۋىم بولعان ارمەنيا شتامپى» تۋرالى جازىپ، كەڭەس سۇرادىم. ولار تاۋلى قاراباقتا بولماسام ەشقانداي ماسەلە تۋىندامايتىنىن ايتىپ، از دا بولسا تىنىشتالدىردى. وسى كەزدە عانا شەتەلدەگى ەلشىلىكتەرىمىزدىڭ نە ٴۇشىن كەرەگىن سەزىندىم. باكۋدە كەدەندىك باقىلاۋدان وتەردە ارمەنياعا نە ٴۇشىن بارعانىمدى سۇرادى. جاۋاپ، ارينە، تۋريزم. ٴتولقۇجاتىمدى اكەتتى دە، 5 مينۋتتان كەيىن قايتا اكەلىپ كەدەننەن وتكىزدى. سول كەزدەگى قۋانىشىمدى كورسەڭىزدەر عوي!

شەتەلگە شىققاندا ول ەل تۋرالى زەرتتەپ، كورشىلەرىمەن قارىم-قاتىناسى قالاي ەكەنىن ٴبىلىپ الىڭىز. ايتپەسە جوق جەردەن پروبلەما تۋىنداۋى مۇمكىن.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي