ۋىز جايلى دەرەكتەر

ۋىز — جاڭا تولدەگەن مالدىڭ ەڭ ماڭىزدى ٴسۇتى. بابالارىمىز العاشقى 3-5 تاۋلىكتەگى وسى ٴسۇتتى پايدالانىپ، ۋىز تاعامىن دايىنداعان. سارى ۋىزدى ەندى عانا تولدەگەن مالدى ٴبىرىنشى رەت ساۋعاندا الادى. ال ٴبىر تاۋلىك وتكەن سوڭ ٴسۇتتىڭ ماڭىزدىلىعى كەمىپ، اق ۋىز پايدا بولادى.

ەرەكشە قاسيەتتەرى

ۋىزدىڭ نارلىلىك قاسيەتى كادىمگى ٴسۇتتى ەكى وراپ الادى. ۋىز قۇرامىندا انتيوكسيدانتتار وتە كوپ. سوندىقتان ول بالاڭ اعزانىڭ قورعانىش قاسيەتتەرىن ارتتىرىپ، اس قورىتۋ جۇيەسىن رەتكە كەلتىرەدى. اناسىنىڭ ۋىزىن تويىپ ەمگەن ٴتول مىقتى بولىپ ٴوسىپ، تەز شيرايدى. سوندىقتان قازاقتا «ۋىزىنا جارىماعان» دەگەن ٴسوز قالعان. بۇل ٴالسىز جانە اۋىرشاڭ بالالارعا جانە ٴتورت تۇلىكتىڭ ٴالسىز تولدەرىنە دە قاتىستى ايتىلادى.

كونەدەن قالعان دايىنداۋ ٴتاسىلى

قازاقتا ۋىزدان ٴدامدى تاعامدار دا دايىندايدى. ۋىزدى كوبىنە سيىر، قوي، ەشكى سۇتىنەن دايىندايدى. جاڭا ساۋىلعان ٴسۇتتى تازا ەتىپ جۋىلعان قوي بۇيەنىنە قۇيىپ، قايناپ جاتقان سۋعا سالىپ پىسىرەدى. كەيدە سۇتكە كىشكەنە قانت نەمەس تۇز سەۋىپ ۋىزدىڭ ٴدامىن كەلتىرەدى. ٴبىر ۇلكەن قويدىڭ بۇيەنىنە 1،5 ليترگە دەيىن ٴسۇت سىيادى. ۋىز پىسكەن كەزدە قاتادى، سوندىقتان بۇيەنمەن بىرگە بىركەلكى كەسىلەدى.

ٴتاتتى ۋىزدى قالاي دايىندايدى؟

ٴتاتتى ۋىزدى دايىنداعاندا قازانعا نەمەسە شۇڭعىل ىدىسقا ٴسۇتتى قۇيىپ، قايناپ جاتقان سۋدىڭ ىشىنە سالادى. ٴسۇت شەمىرشەكتەنىپ قاتپاي تۇرىپ وعان قانت، مەيىز قوسادى. ودان سوڭ دايىن بولعان ۋىزدى سۋىعان سوڭ ىدىستان اۋدارىپ الادى.

ۋىزدان تاعى نە جاسايدى؟

ۋىز ٴسۇتىن سوعىمنان قالعان سۇيەكسىز ٴسۇر ەتپەن بىرگە قايناتىپ، دايىن بولعان اسقا كورشى-قولاڭدى شاقىرىپ، اتا داستۇرمەن ۋىز جەۋگە شاقىرادى. ال تىم قويۋ ۋىزعا كەيدە سۋ قوسىپ پىسىرەدى. سۇيىلتىلعان ۋىزعا كەيدە تارى نەمەسە كۇرىش تە سالىپ قايناتادى. ٴدان قوسىلعان ۋىز ٴوزىنىڭ قۇنارلىلىعىمەن، بىرەگەي دامىمەن ەرەكشەلەنەدى.

دەرەككوز: anabol.kz

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!