استانا: 
بىرەۋلەر بالاۋ دەيدى، بىرەۋلەر پالاۋ دەيدى. قالاي دەسەك تە كوپتەگەن حالىقتىڭ ۇلتتىق تاعامىنا اينالعان پالاۋدىڭ استىق، تاعامدىق قۇندىلىعى ەرەكشە. «پالاۋعا پىشاق سۋىرعانداي» دەپ، «سۋ تاتىعان كۇرىشتى دە اس دەپ» دەگەن سەكىلدى كەمسىتكەنىمەن، قازاق قاشاندا «استى قورلاما – قۇستىرار، ەردى قورلاما – ساستىرار» دەپ، ٴار تاعامنىڭ وزىندىك قۇندىلىعى بارىن ەسكەرتىپ كەلگەن.
ٴيا، پالاۋ دەسە وزبەك اعايىندارىمىز ەسىمىزگە تۇسەدى. الايدا قازىرگى كەزدە تويىمىز دا، باتا وقىرىمىز دا، اسىمىز دا وسى پالاۋسىز وتپەيتىن بولدى. پالاۋ جاساۋدىڭ دا بىرنەشە ٴتۇرى بار. ەتى مول، كۇرىشى از، ٴسابىز بەن سارىمساق (پياز) قوسىلماعان – شۇبار پالاۋ; ەتى جوق، سارىمساعى مەن ٴسابىزى مول، مەيىز قوسىلعان – ٴتاتتى پالاۋ; تەك قانا ٴسابىز بەن كۇرىشتەن جاسالعان – سارى الا; ت.ب. وسىلاي كەتە بەرەدى.
ٴبىز سىزدەرگە بۇگىن اس پەن تويدا، ۇلكەن شارالاردا، ناۋرىزدا جاسالاتىن پالاۋدىڭ قالاي دايىندالاتىنىن ٴوز شامامىزشا ٴتۇسىندىرىپ كورەيىك.
ول ٴۇشىن تويعا كەلەتىن قوناقتارىمىزعا جوبالاپ ەت، كۇرىش، سۇيىق ماي، سارىمساق، ٴسابىز جانە پالاۋعا قوساتىن ٴتۇرلى دامدەۋىشتەردى دايىنداپ الامىز.
مىسالى بىزگە كەلەتىن قوناقتاردىڭ سانى 250 ادام دەپ ەسەپتەيىك. ول ٴۇشىن قازاننىڭ سيىمدىلىعى كەمىندە 100 ليرت بولعانى دۇرىس.
10 ليرت سۇيىق ماي، 20 كگ كۇرىش، 20 كگ ٴسابىز، 3 كگ سارىمساق جانە قالاۋىڭىزشى 10 كگ-عا دەيىن ەت.
پالاۋ جاساماس بۇرىن سارىمساقتى، ٴسابىزدى تازالاپ، تۋراپ دايىنداپ الاسىز.
1. پالاۋدى دايىنداماس بۇرىن ەڭ اۋەلى مول مولشەردە جاسالاتىندىقتان ۇلكەن قازان دايىنداپ، ونى جۋىپ-شايىپ تازالاپ، وتقا اسامىز.
2. قازاندى قاتتى قىزعانشا وتقا 5-7 مينۋت قويامىز. سودان كەيىن دايىندالعان مايدى قۇيامىز.
3. قازان وتتا ماي تولىق قىزعانشا تۇرادى. بۇل شامامەن 10-15 مينۋتقا سوزىلۋى مۇمكىن.
4. قازانداعى ماي تولىق قىزعان كەزدە ەكى دانا سارىمساقتى ورتاسىن جارىپ كەسىپ، مايعا سالامىز. سارىمساق مايدا ٴوز ەركىمەن قۋىرىلۋى كەرەك. بۇل سۇيىق مايدى تۇششىتۋ دەپ اتالادى.
وسى كەزدە ەسكەرەتىن ٴبىر جاعداي، ول – سارىمساق مايدا قايناپ جاتقان كەزدە قازاننىڭ قاقپاعىن جاپپاعان ٴجون.
5. 7-8 مينۋتتان سوڭ ابدەن قارايا قۋىرىلعان سارىمساقتى مايدان الىپ تاستايمىز.
6. سارىمساق قۋىرىلىپ بولعان سوڭ قازانعا ەتتى سالامىز. مايعا سالىنعان ەت قىزارىپ پىسكەنگە دەيىن مايدا قايناتۋ كەرەك.
ەتتىڭ قۋىرىلۋ ۋاقىتى 15-20 مينۋتقا سوزىلۋى مۇمكىن. ەتتىڭ ٴىرى-ۇساقتىعىنا بايلانىستى. ەت پىسكەن سوڭ ونى بولەك ٴتۇسىرىپ الۋعا دا بولادى، قازاندا تۇرۋىنا دا بولادى.
7. ەت قۋىرىلىپ بولعان سوڭ، قازانداعى مايعا الدىن الا دايىنداپ قويعان ٴسابىزدى سالامىز. ٴسابىز شامامەن 5-10 مينۋت مايدا قايناعانى دۇرىس.
8. قازاننىڭ استىنداعى وتتى بارىنشا كوبەيتىپ، كۇرىشتى سالامىز، كاكپىرمەن كۇرىشتىڭ بەتىن تەگىستەيمىز. سودان كەيىن سۋ قۇيىپ، تۇز جانە قالاۋىڭىزعا قاراي دامدەۋىشتەر قوسامىز. سۋ مۇمكىندىگىنشە قايناعان، ىستىق سۋ بولعانى جاقسى.
9. قازاننىڭ استىنداعى وتتى الماستىرماي، سۋ كۇرىشكە ٴسىڭىپ، تارتىلعانشا ۇستاۋ كەرەك.
وسى كەزدە قازانداعى قايناپ جاتقان كۇرىشتى قوزعاماۋدى، قاقپاعىن اشپاۋدى قاداعالاڭىز.
10. مۇنان كەيىن پالاۋ دايىنداۋدىڭ ەڭ مانىزدى كەزەڭىنە كەلەمىز. ٴسىز باعاندان بەرى دايىنداعان پالاۋىڭىزدىڭ كۇرىشى جارتىلاي عانا ٴپىسۋى قاجەت، ويتكەنى بۇعان دەيىن وز-وزىمەن قايناعان كۇرىش ەندى قاقپاعى جابىق قازاندا 15-20 مينۋت بۇقتىرىلۋى كەرەك. ەگەر ٴسىز بۇعان دەيىن كۇرىشىڭىزدى قاتتى ٴپىسىرىپ جىبەرگەن بولساڭىز، وندا بۇقتىرعان كەزدە پالاۋىڭىز ەزىلىپ كەتۋى مۇمكىن.
11. مۇنان سوڭ قازاننىڭ استىنداعى وتتى مەيلىنشە ازايتىپ، قازانداعى كۇرىشتى كاكپىردىڭ كومەگىمەن قازاننىڭ ورتاسىنا جينايمىز. قازاننىڭ ورتاسىنا جينالعان كۇرىشتىڭ بىرنەشە جەرىنەن تەسىپ، قازاننىڭ قاقپاعىن جاۋىپ قويامىز.
12. 10-15 مينۋت وتكەن سوڭ قازاننىڭ قاقپاعىن اشىپ ٴسابىز بەن ەتتىڭ بەتىندەگى كۇرىشتى عانا ارالاستىرامىز. ودان كەيىن تاعى دا 10 مينۋتتاي باياۋ وتتا ۇستايمىز. سودان كەيىن عانا قازاننىڭ استىنداعى وتتى تولىقتاي وشىرەمىز.
13. دايىن بولعان پالاۋدىڭ كۇرىشىن، ٴسابىزىن ٴبارىن بىركەلكى ارالاستىرامىز. ەگەر باسىندا كەسەك ەتتەردى الىپ تاستاماعان بولساڭىز وسى كەزدە ول ەتتەردى جەكە ىدىسقا ٴتۇسىرىپ الۋىڭىزعا بولادى. سودان كەيىن تويعا جينالعان قاۋىمعا تاباقتارعا سالىپ، بەتىنە ەتىن تۋراپ قوسىپ بەرەسىز دە، تاراتاسىز.
اسىڭىز ٴدامدى بولسىن!
ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!
5949 
0
6559
0