BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

پاتەر ساتىپ الاردا نەنى ەسكەرگەن ٴجون؟

قوناق بولمەنىڭ ٴتۇسقاعازى قانداي بولاتىنىن جوسپارلاماس بۇرىن، ٴبىرىنشى جىلجىمايتىن مۇلىكتى شامامەن قانداي باعادا ساتىپ الۋعا دايىن ەكەنىڭىزدى انىقتاپ الىڭىز. ساراپشىلاردىڭ ايتۋىنشا پاتەردىڭ ورنالاسقان جەرى مەن كولەمى ەڭ الدىمەن وسى سۇراققا تاۋەلدى. سودان كەيىن عانا baq.kz ٴتىلشىسى دايىنداعان تومەندەگى كەڭەستەرگە قۇلاق ٴتۇرىپ، وزىڭىزگە جايلى پاتەر تاڭداۋعا كىرىسسەڭىز بولادى.

ٴسىز تۇراتىن ٴۇيدىڭ جانىندا نە بولۋى كەرەك؟

ٴسىز ٴجيى باراتىن ورىندار، مىسالى دۇكەندەر، قوعامدىق كولىك ايالداماسى، بالاباقشا، مەكتەپ، اۋرۋحانا جاياۋ 15 مينۋتتا جەتەتىن جەردە ورنالاسۋى كەرەك. اقشاڭىزدى ۇنەمدەيمىن دەپ قالا شەتىنەن پاتەر ىزدەسەڭىز جۇمىسىڭىز بەن وقۋ ورنى، نەمەسە باسقا دا ورىندارعا كۇندەلىكتى بارىپ كەلۋگە قانشا ۋاقىت كەتەتىنىن ەسەپتەپ كورىڭىز.

ٴقازىر ٴاربىر ۇيدە ٴبىر اۆتوكولىك، سول سەبەپتى كولىك تۇراعى ماسەلەسىن دە شەشىپ العان دۇرىس.

جاڭا تۇرعىن ٴۇي مەن قولدانىستاعى تۇرعىن ٴۇيدىڭ قايسىسىن تاڭداعان دۇرىس؟

ارينە، جاڭانىڭ ٴبارى ٴارقاشان جانعا جايلى. بۇل دەگەنىمىز تازا پودەزد، ۇزدىكسىز جۇمىس ىستەيتىن ليفت... مامانداردىڭ ٴوزى دە العان سوڭ بىردەن پاتەردىڭ جاڭاسىن ساتىپ الۋ كەرەگىن قۇپتايدى. مۇنداي جاعدايدا ٴسىز وسى زامانعا ساي سالىنعان، بارلىق كوممۋنيكاسيامەن قامتىلعان تازا پاتەرگە قول جەتكىزەسىز. بۇدان بولەك جاڭا تۇرعىن ٴۇي كەشەندەرى ماڭايىندا ينفراقۇرىلىمدى نىسانداردىڭ بارلىعى بولاتىنى انىق. ساراپاشىلاردىڭ ٴبىر بولىگى جاڭا پاتەردى ساتىپ العاندا جوندەۋ جۇمىستارىنا قوسىمشا قارجىنىڭ كوپتەپ كەتەتىنىن، سونداي-اق قابىرعانى تەسىپ، قۇرىلعىلار ورناتىپ جاتقان كورشىلەرگە دە توزىممەن قاراۋ كەرەگىن ەسكەرتەدى.

ال قولدانىستاعى ۇيلەردەن پاتەر الۋشىلار جىلجىمايتىن مۇلىك پەن قۇجاتتارعا قىسقا مەرزىمدە قول جەتكىزەدى. ال جاڭا پاتەر ىزدەگەندەر قۇرىلىستىڭ اياقتالماي، ۇزاق ۋاقىتقا سوزىلۋى، قۇرىلىستى سالۋشىنىڭ بانكروت بولۋى سەكىلدى قاۋىپ-قاتەرلەرگە تاپ بولۋى مۇمكىن.

پاتەر قارايتىن كەزدە اڭعارىمپاز بولىڭىز

پاتەردى قاراپ شىعۋ ۇزاق ۋاقىتتى الادى. ساراپشىلار بىرنەشە پاتەردى بىردەن قاراماۋ كەرەگىن ەسكەرتەدى. سونداي-اق پاتەرلەردى كۇندىزگى ۋاقىتتا ارالاپ شىعىڭىز، سەبەبى جارىقتىڭ قالاي تۇسەتىنىن بىلە الاسىز. كورگەنىڭىزدى فوتواپپارات نەمەسە سمارتفونىڭىزعا فوتوعا ٴتۇسىرىپ ٴجۇرۋدى ۇمىتپاڭىز. كەيىن اسىقپاي سۋرەتتەردى تاماشالاعاندا كەمشىلىكتەرى مەن ايىرماشىلىقتارىن بايقاي الاسىز.

پاتەردى قاي قاباتتان العان دۇرىس؟

ٴبىرىنشى قاباتتىڭ كەمشىلىكتەرى: سىز، سۋىق (اسىرەسە جىلۋدى وشىرگەندە)، ٴيىس، كوشەدەگى دىبىستار، ۇرىلاردان قورعانۋ كەرەك، ٴۇي تەرەزەسىنەن كوشەدەگى ادامدار دا، پاتەر يەلەرى دە كورىنىپ تۇرادى.

ٴبىرىنشى قاباتتىڭ ارتىقشىلىقتارى: كوشكەندە ەشقانداي قيىندىقتار جوق، ليفت كومەگىنە جۇگىنبەيسىز.

سوڭعى قاباتتىڭ كەمشىلىكتەرى: ەگەر ٴۇي ناشار سالىنسا نەمەسە كومۋنالدىق قىزمەت ناشار جۇمىس ىستەسە شاتىردان سۋ اعۋ، ال ليفت بۇزىلعاندا جاياۋ جوعارى كوتەرىلۋ، جوعارىعا كەلەتىن سۋ كۇشىنىڭ السىزدىگى نەمەسە تەك سۋىق سۋدىڭ كەلۋى.

سوڭعى قاباتتىڭ ارتىقشىلىقتارى: ايقاي-شۋى ەستىلەتىن توبەڭىزدە كورشىلەرىڭىز جوق جانە تەرەزەدەن اينالا ادەمى كورىنەدى.

جوعارى قاباتتاعى پاتەردى كورگەندە شاتىردىڭ سوڭعى رەت قاشان جوندەلگەنىن ٴبىلىپ الىڭىز. پاتەر قابىرعاسىنا زەر سالىڭىز، ەگەر شاتىردان ٴجيى سۋ اقسا وندا قابىرعا ىلعال بولادى نەمەسە سۋدىڭ ٴىزى قالىپ قويادى.

ەڭ ۇتىمدى شەشىم – 3-پەن 5-قابات ارالىعى.

بولمە سانى، جارىقتىڭ ٴتۇسۋى جانە ت.ب.

قانشا بولمەنى قالايتىنى ادامنىڭ وزىنە عانا ايان. بىرەۋگە كولەمى كىشكەنتاي بولسا دا 3 بولمە، ال بىرەۋگە كولەمى كەڭ ەكى بولمە ۇناۋى مۇمكىن. ٴار ادامنىڭ ٴجيى جالعىز قالۋدى قالايتىنىن ەسكەرىڭىز، ال كوپ ادام تۇراتىن ۇيدە ورىن بولماۋى مۇمكىن.

ەكى بولمەلى پاتەر بولسا ارالارى ٴبولىنىپ تۇرۋى ٴتيىس. ال ٴبىر بولمەلى پاتەر جارىق بولۋى كەرەك.

جارىقتىڭ ٴتۇسۋى تەرەزەنىڭ قاي تۇسقا قاراپ سالىنعانىنا بايلانىستى، مىسالى وسىمدىكتەرىڭىز بەن اكۆاريۋمىڭىز بولسا جىلى جاق، ياعني تەرەزەلەر وڭتۇستىككە قاراي ورنالاسۋى ٴتيىس. مۇندايدا جەرگىلىكتى كليمات ىستىق بولسا جازدا جەلدەتكىشسىز ٴومىر ٴسۇرۋ قيىن، بۇل دا قوسىمشا شىعىن. ال بولمەڭىزدىڭ جارتىلاي قاراڭعى بولۋىن قالاساڭىز سولتۇستىكتى تاڭداڭىز، دەگەنمەن پاتەردىڭ ۇنەمى قاراڭعى بولۋىنان ەلەكتر جارىعىنا قوسىمشا شىعىن كەتەدى.

دارەتحانا پەن جۋىناتىن بولمەنىڭ بولەك بولعانى دۇرىس. سەبەبى دارەتحانادا بىرەۋدىڭ بارىن، نە جۋىنىپ جاتقانىن كۇتىپ تۇرمايسىز.

پاتەردىڭ ينفراقۇرىلىمىن باعالاڭىز

تەحنيكالىق ينفراقۇرىلىم – جوندەۋ جۇمىستارىنىڭ ەڭ قىمبات بولىگى. مۇنى تەحپاسپورت ارقىلى زەرتتەۋگە بولادى: ٴۇي توبەسىنىڭ بيىكتىگىن، ەلەكتر سىمدار جۇيەسى، سانتەحنيكا مەن جىلىتۋ قالاي جۇرگىزىلگەنىن انىقتاپ قاراڭىز. سونداي-اق، جەلدەتۋ مەن شۋدان وقشالاۋ جۇيەسىن ٴبىر تەكسەرىپ شىعۋدى ۇمىتپاڭىز.

پاتەر بۇرىشتارى مەن تەرەزە جانىن تەكسەرىڭىز. ٴۇي ىلعال بولسا ادەتتە قابىرعا كوگەرىپ تۇرادى. پاتەردىڭ بۇرىن جالعا بەرىلگەنىن بىلسەڭىز وندا سىزگە ساتىپ العاننان كەيىن قۇلپىن اۋىستىرۋعا تۋرا كەلەدى.

سۋ مەن ەلەكتر ەسەپتەۋىشىنىڭ بار-جوعىن انىقتاڭىز، ەگەر جوق بولسا وندا ٴوزىڭىز ورناتۋىڭىز قاجەت. ەسەپتەۋىش بولعان جاعدايدا تەكسەرىلگەن كۇنىن قاراپ الىڭىز. ەسكى ۇيلەردىڭ بالكونىنا شىعۋ ٴقاۋىپتى ەكەنىن ەسكەرسەك ونى دا كوزبەن شولىپ شىعىڭىز.

بولاشاق كورشىلەرىڭىزدىڭ كىمدەر ەكەنىن انىقتاڭىز

پودەزد الدىندا بوتەلكە، شپريس سەكىلدى زاتتاردىڭ جاتۋى سول ٴۇيدىڭ تۇرعىندارى تۋرالى كوپ اقپار بەرەدى. مۇنداي زاتتاردىڭ جوقتىعى تۇرعىن ٴۇيدىڭ قاۋىپسىزدىگىنە كەپىل بولا المايدى. ەگەر كورشى پودەزدە ىشىمدىككە سالىنعان ادامدار، قاڭعىباستار ٴومىر سۇرەتىن بولسا تاعى دا ويلانۋىڭىز كەرەك. پاتەردى ساتىپ الماس بۇرىن جوعارى جانە تومەنگى قاباتتا، جانىڭىزدا كىمدەر تۇراتىنىن انىقتاپ الىڭىز. ال جاڭا پاتەر قاراستىرىپ جۇرگەندە كورشىلەردىڭ كىم ەكەنىن باعامداي المايسىز.

الاياقتارعا الدانىپ قالماس ٴۇشىن بىردەن كەلىسسوزدەر جۇرگىزۋگە تىرىسپاڭىز. پاتەرلەردى ٴارتۇرلى اگەنتتىكتەردەن قاراڭىز. ٴۇيدىڭ باعاسىن ٴتۇسىرۋ ٴۇشىن پاتەر كەمشىلىكتەرى مەن پروبلەمالىق تۇستارىن كوپتەپ تاۋىپ الىڭىز. مىسالى، ٴقاۋىپتى ٴارى ەسكى بالكون، ٴۇيدىڭ ٴقاۋىپتى اۋداندا ورنالاسۋى، قابىرعانىڭ كوگەرۋى، ٴبىرىنشى قاباتتاعى پاتەر جانە ت.ب.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي