قوقىس تاستاعاندا اباي بولىڭىز!

ەلەكتروندى جانە ەلەكترلىك جابدىقتاردىڭ قالدىقتارىنىڭ قۇرامىندا قورشاعان ورتاعا عانا ەمەس، سونىمەن قاتار ادام دەنساۋلىعىنا دا كەرى اسەر ەتەتىن كادميي، سۇرمە، قورعاسىن، سىناپ سياقتى ٴقاۋىپتى زاتتار جانە ولاردىڭ قوسىلىستارى بولادى. ادام اعزاسىنا تۇسكەننەن سوڭ، ولار وندا ۇزاق قالادى جانە اقىرىنداپ باۋىردا، بۇيرەكتە، سۇيەكتە، قالقانشا بەزدە جيناقتالادى جانە ونكولوگيالىق اۋرۋلاردىڭ تۋىنداۋىنا سەبەپ بولۋى مۇمكىن، دەپ حابارلايدى baq.kz اقپارات اگەنتتىگى.

يدم ٴباسپاسوز قىزمەتىنىڭ مالىمەتىنە قاراعاندا، لازەرلى پرينتەرلەردە تونەرلەر ورناتىلعان، ولاردىڭ حيميالىق قۇرامىنداعى: كومىرتەك پوليمەرلەرىنىڭ قوسىلىستارى، تەمىر وكسيدى، ورگانيكالىق قوسىلىستارداعى قالايى جانە ورگانيكالىق ەمەس قوسپالار، زەرتتەۋلەردە كورسەتىلگەندەي باس اۋرۋىن، جوتەلدى، تەمپەراتۋرانىڭ كوتەرىلۋىن، سىرقاتتانۋدى تۋدىرادى.

سونىمەن قاتار، بارماقتى باتارەيانىڭ ٴبىر داناسىن «دۇرىس ەمەس» كادەگە جاراتۋ كەزىندە، 20 تەكشە مەتر توپىراق نەمەسە 400 ليتردەن استام اۋىز سۋ ۋلانادى.

تەحنودوم، السەر، رامستور ساۋدا جەلىلەرىنىڭ باسشىلىعى ەكو-قوراپتاردى ورنالاستىرۋ ارقىلى ەلەكترلىك جابدىقتاردى جيناۋ ورىندارىن قامتاماسىز ەتۋدە جانە ولاردى كەيىننەن مامانداندىرىلعان كومپانيالار ارقىلى قايتا وڭدەيدى.

قالدىقتار رەتىندە: تۇرمىستىق تەحنيكا (تەلەديدارلار، ماگنيتوفوندار، ەلەكترلىك ويىنشىقتار، ۇتىكتەر، ەنەرگيانى ۇنەمدەۋشى شامدار، باتارەيالار، فەندەر، توڭازىتقىشتى قوسقانداعى اس ٴۇي قۇرالدارى جانە ت.ب.)، ۇيىمداستىرۋشىلىق تەحنيكا (كومپيۋتەرلەر مەن جابدىقتارى، ۇيالى تەلەفوندار، پلانشەتتەر، كوشىرۋ اپپاراتتارى، سكانەرلەر، تونەرلەر جانە ت.ب.)، قۇرامىندا سىناپ بار قالدىقتار (ليۋمينەسسەنتتى شامدار، ەنەرگيا ۇنەمدەۋشى شامدار، قىزۋ ولشەۋىشتەر جانە ت.ب.) قابىلدانادى.

قازاقستان رەسپۋبليكاسىنىڭ ەكولوگيالىق كودەكسىنىڭ 301-بابىنا سايكەس پوليگونداردا كومۋ ٴۇشىن كەلەسى قالدىقتاردى قابىلداۋعا تىيىم سالىنادى: سۇيىق قالدىقتار; پوليگون شارتتارىندا جارىلعىش، كورروزيالى، قىشقىلداناتىن، ٴورت قاۋىپتىلىگى جوعارى نەمەسە ٴورت قاۋىپتىلىگى بار قالدىقتار; قۇرامىندا سىناپ بار لامپالار مەن اسپاپتار; ٴليتييلى، قورعاسىندى-قىشقىلدى باتارەيالار; ەلەكتروندى جانە ەلەكترلىك جابدىقتار.

پايدالانۋشىلارعا جارامسىز بولىپ قالعان ەلەكتروندى جانە ەلەكترلىك جابدىقتاردى سۇرىپتالمايتىن قالالىق قالدىقتاردى جيناۋ ورىندارىنا، ياعني قوقىس كونتەينەرلەرىنە تاستاۋعا تىيىم سالىنادى.

ەلەكترلىك جانە ەلەكتروندى جابدىقتاردىڭ قۇرامىندا زياندى زاتتاردىڭ بولۋىنا بايلانىستى، ولاردىڭ قورشاعان ورتاعا جانە ادام دەنساۋلىعىنا تيگىزەتىن ىقتيمال تەرىس اسەرىن ازايتۋ ماقساتىندا، وسى جابدىقتاردى وندىرەتىن قالدىقتاردى كادەگە جاراتۋ جانە قايتا وڭدەۋ ٴۇشىن ەلەكتروندى جانە ەلەكترلىك جابدىقتاردىڭ قالدىقتارىن جيناقتايتىن قولجەتىمدى بەكەتتەرىن قولدانۋ قاجەت.

قر ەنەرگەتيكا مينيسترلىگى، قازاقستاندىقتاردى ەكولوگيالىق تاربيەلەۋدى ناسيحاتتاۋ ماقساتىندا، تۇرعىنداردىڭ ەلەكتروندى جانە ەلەكترلىك جابدىقتاردى دۇرىس كادەگە جاراتاتىندىعىنا جانە ولاردىڭ سانالىلىعىنا سەنىم بىلدىرەدى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!