BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جۇمباقتاستاعى جازۋلار ٴوشتى، مادەنيەتىمىز ٴوستى مە؟ (فوتو)

الاش اسپانى استىنداعى تابيعاتى تەڭدەسسىز مەكەندەردىڭ ٴبىرى - بۋراباي. اۋماعى جيىرما شارشى شاقىرىمدى قامتيتىن جەر ٴجانناتى بۇگىندە ەلىمىزدەگى تۋريستىك مەكەندەردىڭ بىرەگەيى سانالادى. ال وسىنداعى جۇمباقتاس تۋريستەردىڭ ۇلكەن قىزىعۋشىلىعىنا يە ورىنداردىڭ بىرەۋى. الايدا كەلۋشىلەردىڭ تاڭعاجايىپ جارتاسقا قاتىستى قارىم-قاتىناسى كوڭىلگە كىربىڭ كەلتىرۋدە.

بۋراباي ولكەسىندە تاماشالاۋعا تۇرارلىق ورىندار بارشىلىق. سولاردىڭ ٴبىرى - جۇمباقتاس. جۇمباقتاس تۋرالى حالىق اراسىندا كەڭ تاراعان اڭىز دا بار. الگى ٴافسانادا جاۋگەرشىلىك زاماندا كەزەكتى ٴبىر شايقاستان كەيىن قولعا تۇسكەن قالماق قىزى شىڭ باسىنان تابانداعى اۋليەكولگە سەكىرىپ كەتكەندىگى تۋرالى ايتىلادى. سول زاماتتا قىز قۇلاعان جەردەن الىپ جارتاس پايدا بولعان-مىس. جۇمباقتاستىڭ وزىندىك تىلسىم قىرلارى دا بار. ەگەر تاستىڭ ٴبىر جاعىنان كوز سالعان جانعا جاس قىزدىڭ بەينەسى اڭعارىلسا، قاراما-قارسى كەلگەن ادام كەمپىردىڭ سۇلباسىن كورە الادى.
سودان بولار، تۋريستەردىڭ قىزىعۋشىلىعى ەرەكشە. ول ٴۇشىن الىس-جاقىن شەتەلدەردەن ات سابىلتىپ، ارنايى كەلەتىندەر جەتەرلىك. قولدا بار مالىمەتتەرگە سۇيەنسەك، جىل سايىن قىرىق مىڭعا جۋىق ادام وسى جەردە دەمالىپ كەتەدى ەكەن. الايدا وسى ساياحاتشىلاردىڭ تىلسىم دا تاريحي ورىنعا ٴۇستىرت قاراۋى دەمالىس مادەنيەتىنىڭ قاجەتتى دەڭگەيدە قالىپتاسپاعانىن ايقىنداعانداي.
كەلۋشىلەر جۇمباقتاستىڭ استى-ۇستىنە شىعىپ، سۋرەتكە ٴتۇسىپ قانا قويماي، قابىرعالارىنا ەسىمدەرىن جازىپ كەتۋدى ادەتكە اينالدىرعان. بۇل - ٴبىر عانا جۇمباقتاستاعى ماسەلە ەمەس، قازاقستاننىڭ بارلىق دەرلىك ساياحات ورىندارىندا قالىپتاسقان احۋال.
كسرو تاراپ، ەل تاۋەلسىزدىك الىپ جاتقان تۇستا جاپون ەلىنە بارعان ٴبىر جورنالشى ٴوزىنىڭ كۇنشىعىس ەلىندە كورگەن-تۇيگەنىن قاعازعا ٴتۇسىرىپتى. توكيونى ارالاپ، سەرۋەنگە شىققان ارىپتەسىمىز ساياباق ىشىمەن كەلە جاتىپ، جەردە جاتقان الىپ ساعاتتى كورەدى. سول كەزدە جورنالشىنى تاڭعالدىرعانى ساعاتتىڭ ەرەكشە ۇلكەندىگى مەن كوركەم ديزاينى ەمەس، ونىڭ جەردە جاتقاندىعى مەن ٴمىنسىز ىستەپ تۇرۋى ەكەن. تاڭدانىسىن جاسىرماعان جورنالشى «بىزدە مۇنداي زاتتى ٴجۇز مەتر بيىككە ٴىلىپ قويماسا، الدەقاشان سىندىرىپ تاستار ەدى» دەپ جازعانى بار.  بۇل سول كەزدەگى جورنالشىنىڭ قوعامدىق ساناعا، مادەنيەتكە قاتىستى بىلدىرگەن وزىندىك پىكىرى ەدى. مىنە، سودان بەرى جيىرما جىلعا جۋىق وتسە دە، جۇمباقتاستاعى جاعدايعا قاراپ، ٴبىزدىڭ قوعامداعى كوزقاراستىڭ كوپ وزگەرمەگەنىن بايقاۋعا بولادى.
جاقىندا جۇمباقتاس سان ٴتۇرلى شيماي شاتپاقتان تازارتىلدى . ماڭايىن قورشاي ٴجىپ كەرىلىپ، شەڭبەردەن ٴارى وتەم دەۋشىلەرگە ايىپپۇل سالىناتىنى قاتاڭ ەسكەرتىلگەن تاقتايشا ٴىلىندى. الايدا بۇل شارالار جۇمباقتاستىڭ جاعدايىن جاقسارتۋعا اجەپتەۋىر سەپتىگىن تيگىزگەنىمەن، ۆاندالدىق ارەكەتتەردى تۇپ-تامىرىمەن جويۋعا جاردەمدەسە مە؟ ٴبىرازدان كەيىن جارتاستىڭ بەتى ٴجون جوسىقسىز جازۋلارعا قايتا تولماسىنا كىم كەپىل؟ توق ەتەرى، ازاماتتاردىڭ دەمالىس مادەنيەتى، تابيعاتقا دەگەن جاناشىرلىعى، ۇلتتىق قۇندىلىقتارعا دەگەن قۇرمەتى ارتپاي، جۇمباقتاستاعى جازۋلار دا  تۇپكىلىكتى جوعالارىنا سەنىمىمىز از.
نۇرقانات قانافين

www.baq.kz




 


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي