BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«جاس قاناتتا» قاناتتىڭ ۇلى – جەڭىمپاز

استانا قالاسىندا حالىقارالىق «ازيا داۋىسى» فەستيۆالى ورتالىعىنىڭ ۇيىمداستىرۋىمەن جاس ورىنداۋشىلاردىڭ رەسپۋبليكالىق «جاس قانات-2012» بايقاۋى ٴوتتى. جيىرما ٴبىرىنشى مارتە جاستاردىڭ باق سىناۋىنا مۇمكىندىك بەرگەن شارا استانا قالاسىنىڭ اكىمدىگى مەن «حابار» اگەنتتىگىنىڭ قولداۋىمەن كوپشىلىككە جول تارتتى.

 

ەسىلدىڭ جاعاسىن انگە بولەگەن بايقاۋعا ەلىمىزدىڭ ٴار وڭىرىنەن 16 ونەرپاز قاتىستى. ولاردىڭ اراسىنان قازىلار القاسىنىڭ شەشىمىمەن تەك 5 ۇمىتكەر اقتىق سىنعا شىعۋعا مۇمكىندىك الدى. وسى بەستىكتىڭ ىشىندە قازىلار القاسى ەكى كۇن قاتارىنان ەڭ جوعارى بال كوتەرگەن ديماش قۇدايبەرگەن باس جۇلدەنى ەش تالاسسىز قانجىعاسىنا بايلادى. ٴسويتىپ، «جاس قاناتتىڭ» التىن قاناتى ارايلى اقتوبەگە جول تارتسا، استانا ارۋى گۇلنار دامايەۆا كۇمىس قاناتتى الىسقا جىبەرمەدى. كۋرچاتوۆ قالاسىنان كەلگەن گۇلايىم قايىربايەۆا قولا قاناتقا لايىق دەپ تابىلدى.
ايتا كەتەرلىگى، ديماش ٴۇشىن كيەلى ساحنا اسا تاڭسىق ەمەس. ول كىشكەنتاي كۇنىنەن قوشەمەتتى قاتتى ۇناتادى ەكەن. بالا كەزىندە اتا-اناسى ٴان سالىپ بولعان ۋاقىتتا، ساحناعا جۇگىرىپ شىعىپ، حالىققا ٴيىلىپ بىرگە سالەم بەرەتىن كورىنەدى. سونداعى كورەرمەننىڭ ىستىق ىقىلاسى ونى جىلدار وتە كەلە ۇلكەن دوداعا تۇسپەسىنە قويماعان سەكىلدى. باۋىرىنا باسقان نەمەرەسىنىڭ «جاس قاناتقا» قاتىساتىنىن ەستىپ اجەسى: «ەندى بۇكىل قازاققا تاعزىم ەت، بالام» دەگەن كورىنەدى. ديماش اجەسىنىڭ بۇل وسيەتىن بۇلجىتپاي ورىندادى. ال ديماشتى ومىرگە اكەلگەن ابزال جاندارعا توقتالساق، ەسىمى ەلگە بەلگىلى جاراسىمدى جۇپ قانات-سۆەتا ايتبايەۆتار. «اتادان ۇل تۋسا يگى، اكە جولىن قۋسا يگى» دەگەن حالىق دانالىعى وسىندايدا ايتىلسا كەرەك.
- «جاس قانات» بايقاۋىنا قاتىسۋ كوپتەن بەرى ويىمدا جۇرگەن ەدى. ٴبىراق باس جۇلدە الامىن دەپ كۇتپەگەنمىن. مەنىڭ قارسىلاستارىمنىڭ بارلىعى مىقتى بولدى. جەڭىمپاز اتانعانىم باعىمنىڭ جانعانى شىعار. ٴارى بۇل جەڭىس ونەردەگى، ومىردەگى جولىمدى ايقىنداپ بەردى. ٴارى قاراي كليپ ٴتۇسىرىپ، شىعارماشىلىقپەن اينالىسامىن دەگەن ويدامىن، - دەيدى «جاس قاناتتىڭ» جەڭىمپازى ديماش قۇدايبەرگەن.


قانشايىم بايداۋلەت


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي