BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تاۋەلسىزدىك سارايىندا جانۇزاق ٴمۇساپىر مەن ٴادىلعالي ٴبايانديننىڭ سۋرەت كورمەسى ٴوتىپ جاتىر

استاناداعى تاۋەلسىزدىك سارايىندا ازاتتىقتىڭ شيرەك عاسىرلىق تويىنا ارنالعان قازاقستان سۋرەتشىلەر وداعىنىڭ مۇشەلەرى جانۇزاق ٴمۇساپىر مەن ٴادىلعالي ٴبايانديننىڭ «سۋرەتشى باقىتى – ەركىندىك» اتتى كورمەسى اشىلعان ەدى. بۇگىندە كوركەمدىككە تولى كورمە ٴالى دە جالعاسۋدا.

ازاتتىقتان ارتىق باقىت جوق. ونىڭ قاسيەتىن ەگەمەندىك ٴۇشىن باسىن بايگەگە تىگىپ، سول جولدا قۇربان بولۋعا بارعان ٴبىزدىڭ حالقىمىز تەرەڭ تۇسىنەدى دەپ ويلايمىن. سوندىقتان دا قوس قىلقالام شەبەرىنىڭ «سۋرەتشى باقىتى – ەركىندىك» اتتى تاقىرىپتى تاڭداپ الۋى دا بەكەر ەمەس. تاۋەلسىزدىكتىڭ ٴسينونيمى – ەركىندىك. سۋرەتشى ٴۇشىن دە ەركىندىك بارىنەن قىمبات. وسىلاي مازمۇنى مەن ٴمانى بىر-بىرىمەن ۇيلەسىپ تۇرعان ايتۋلى كورمەگە ەكى سۋرەتشىنىڭ 50 تۋىندىسى قويىلعان.
قر مادەنيەت قايراتكەرى جانۇزاق ٴمۇساپىر – ۇزاق جىلدار بويى وتاندىق تەلەارنادا ەڭبەك ەتە ٴجۇرىپ، جۇرتشىلىققا تانىمدىق جاعىنان وي سالعان سۇبەلى حابارلار جاساپ، وسى سالانىڭ جىلىگىن شاعىپ، مايىن ىشكەن ازامات. جۋرناليستىك پەن سۋرەتشىلىكتى قاتار الىپ جۇرگەن تالانتتى تۇلعانىڭ قولىنان شىققان كارتينالاردان ۇلتتىق وبرازعا باي دۇنيەلەردى كورۋگە بولادى. اسىرەسە، ونىڭ «اكەم»، «داستارقان ناتيۋرمورتى»، «حان ٴتاڭىرى»، «بالىقشى»، «كوكپار»، «قوبىز سارىنى» سەكىلدى شىعارمالارىنان قازاقىلىق قاسيەتكە مول شىنايىلىقتى جازباي تانيسىز.
ٴبىز كورمەدەن سۋرەتشىنىڭ قولىنان شىققان جاڭالىعى مول ەكى تۋىندىنى بولەكتەپ ايتقىمىز كەلىپ وتىر. ٴبىرىنشىسى – ايگىلى «بالۋان شولاق» پورترەتى. قازاقتىڭ الىپ تۇلعالارىنىڭ ٴبىرى بولعان، ەرەن كۇش بىتكەن بالۋان بابامىز جايىندا تاريحتان جاقسى بىلەمىز. ونىڭ اتتىڭ قۇلاعىندا ەركىن ويناپ، نەشە ٴتۇرلى ٴتاسىلدى مەڭگەرگەن ونەرپازدىعى مەن جاۋىرىنى جەرگە تيمەگەن بالۋاندىعىن ايرىقشا ايتا الامىز. ال كومپوزيتورلىق قىرى تۋرالى ٴتۇن اسىرىپ سويلەۋگە بولادى. قاراوتكەلدىڭ كوشەسىن شۋلاتىپ، «عاليا» انىمەن تالاي قىزدىڭ ۇيقىسىن قاشىرعان اتامىزدىڭ داڭقى كوپكە جايىلعان. بەلگىلى مۋزىكا زەرتتەۋشىسى ا.زاتايەۆيچ ەل اراسىنان بالۋان شولاقتىڭ بىرنەشە اندەرىن جازىپ الىپ، ونى «قازاق حالقىنىڭ 1000 ٴانى» جانە «قازاقتىڭ 500 ٴانى مەن كۇيى» جيناقتارىنا ەنگىزگەن. وسىنداي ۇلت تاريحىندا ٴوز ورنى بار ارداقتى ازاماتتىڭ شىنايى بەينەسى قالماعان ەدى. سول ولقىلىقتىڭ ورنىن تولتىرۋ ٴۇشىن سۋرەتشى ىزدەنىسكە بارا بىلگەن. ونىڭ بابامىزعا ارناعان پورترەتىن كورىپ، كوز الدىمىزعا بەكزات بولمىستى، ويلى، قازاقى دانالىق قونعان تاۋ تۇرپاتتى تۇلعانىڭ كەلبەتى كەلدى.
بەلگىلى سۋرەتشى ٴادىلعالي ٴبايانديننىڭ دە ەڭبەكتەرى كورنەكتى اقىن، جەرلەسى ساعي جيەنبايەۆتىڭ ٴمولدىر پوەزياسى سەكىلدى جىلىلىعىمەن تارتىپ تۇرادى. ونىڭ ٴبىراز شىعارمالارى شەت مەملەكەتتەر دە جوعارى باعالانىپ، ٴوز كورەرمەندەرىن تاپقان. ٴبايانديننىڭ كارتينالارىنان تاريحي تۇلعالار مەن ايتۋلى وقيعالاردى تەرەڭ تەبىرەنىسپەن بەينەلەيتىنىن بايقادىق. ادامنىڭ بويىنداعى شۋاقتى ساتتەردى دە كوركەم جەتكىزە بىلەدى.
كورمەدە بىزگە ونىڭ جالپاق جۇرت جاقسى بىلەتىن ٴشامشى قالداياقوۆ پەن جۇماكەن ناجىمەدەنوۆكە ارناعان پورترەتتەرى ٴوز ەرەكشەلىگىمەن قاتتى ۇنادى.
قىسقاسى، كورمەدەن كومبەدە جاسىرىنىپ جاتقان اسىل قازىنا سەكىلدى قوس سۋرەتشىنىڭ ٴار كارتيناسىنا ۇڭىلگەن سايىن كەمەل كوركەمدىك پەن كەلىستى شەبەرلىكتى كورىپ، كوڭىلىمىز مارقايىپ قايتتى.

ازامات ەسەنجول

astana-akshamy.kz


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي