BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

تاشكەندى ٴتانتى ەتكەن قازاق قىزى

الماتىداعى پ.چايكوۆسكيي اتىنداعى مۋزىكالىق كوللەدج ستۋدەنتى وزبەكستان استاناسىنان ۇلكەن جەڭىسپەن ورالدى. 405 ادام قاتىسقان ونەر دوداسىندا قورقىتتىڭ قوبىزىن سارناتقان قازاق قىزىنىڭ ەڭبەگى، ۇستازىنىڭ ٴۇمىتى اقتالدى، دەپ حابارلايدى baq.kz.

جۋىردا عانا تاشكەندە «ونا يۋرت وحانگلاري» («تۋعان ەلدىڭ اۋەنى») دەپ اتالاتىن ٴىى حالىقارالىق مۋزىكالىق بايقاۋ مارەسىنە جەتتى. ونەر دوداسى جىل سايىن وزبەكستان رەسپۋبليكاسى ٴبىلىم، مادەنيە جانە سپورت جونىندەگى مينيسترلىگى، «سوگلوم اۆلود ۋچۋن» حالىقارالىق قايىرىمدىلىق قورى جانە وزبەكستاننىڭ كومپوزيتورلار وداعى ۇيىمداستىرعان.

بيىلعى ونەر سايىسىنا 9 ەلدەن بارلىعى 405 ونەرپاز قاتىسقان. ولار 12-15 جانە 16-19 جاس ارالىعىنداعىلار بولىپ ەكى توپقا بولىنگەن. ٴار توپ بويىنشا ۇرمەلى، ىسقىشتار، ۇرمالى جانە ىشەكتى اسپاپتار نوميناسياسى بويىنشا بولىنگەن.

الماتىدان وسى بايقاۋعا ارنايى بارعان پ.چايكوۆسكيي اتىنداعى مۋزىكا كوللەدجىنىڭ 4 كۋرس ستۋدەنتى ينديرا جانداشوۆا ىسقىشتار نوميناسياسى بويىنشا ٴبىرىنشى ورىندى جەڭىپ الدى.

«بۇل جالپى ۇلكەن كونكۋرس. ٴبىزدىڭ نوميناسيا بويىنشا قازاقستان، وزبەكستان، قىرعىزستان، تاجىكستان جانە ازەربايجاننان ونەرپازدار قاتىستى. قاي قايسىسى بولماسىن وتە ونەرلى، تالانتتى مۋزىكانتتارىن الىپ كەلگەن. ٴبىز دە وسى بايقاۋعا تياناقتى دايىندالعان ەدىك. شاكىرتىم ينديرا ىسقىش اسپاپتاردىڭ ىشىندە قوبىزبەن شىعىپ، وتە تاماشا ونەر كورسەتىپ، ٴبىرىنشى ورىندى جەڭىپ الدى. ەڭبەگىمىز جاندى. مەنىڭ ۇكىلەگەن ٴۇمىتىم اقتالدى. قۋانىشىمىزدا شەك جوق»، - دەيدى جەڭىمپازدىڭ ۇستازى گۇلايىم قوجامقۇلوۆا.

«تۋعان ەلدىڭ اۋەنى» حالىقارالىق بايقاۋى 2014 جىلدان بەرى ٴداستۇرلى تۇردە ٴوتىپ كەلەدى. اتالعان بايقاۋ ٴجاي ونەرپازداردىڭ كونكۋرسى ەمەس، كادىمگى كاسىبي مۋزىكالىق ٴبىلىم بەرەتىن ارنايى جانە جوعارى وقۋ ورىندارىنىڭ تۇلەكتەرى مەن ۇستازدارى قاتىساتىن بەدەلدى دودا ەكەنىن ايتا كەتۋ كەرەك. بايقاۋعا تورەلىك ەتكەن رەسەيلىك مامانداردىڭ ايتۋىنشا، بۇل جاس مۋزىكانتتارعا ٴوزىنىڭ ونەرىن كورسەتىپ، بولاشاققا باعدار جاساۋىنا جانە بۇگىنگى مۋزىكالىق ونەردە بار دۇنيەلەردى ەلەپ-ەكشەپ، ساراپتامادان وتكىزۋگە دە ۇلكەن مۇمكىندىك بەرەدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي