BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

سۋرەتشى انار ابجانوۆانىڭ «سيقىرلى جارىق» اتتى جەكە كورمەسى اشىلدى

كەشە ەلورداداعى قر ۇلتتىق مۋزەيىندە تالانتتى سۋرەتشى انار ابجانوۆانىڭ «سيقىرلى جارىق» اتتى جەكە كورمەسىنىڭ اشىلۋى بولدى. ەكسپوزيسياعا پەيزاج جانرىندا سالىنعان 60-تان استام كوركەم تۋىندى قويىلدى، دەپ حابارلايدى baq.kz ٴتىلشىسى.

كورمەنىڭ اشىلۋ سالتاناتىندا ٴسوز سويلەگەن ۇلتتىق مۋزەي ديرەكتورى دارحان مىڭباي جاس سۋرەتشىنىڭ تالانتى مەن ەڭبەكشىلدىگىن ەرەكشە اتاپ ٴوتتى.

«ۇلتتىق مۋزەي تالانتتى جاس ونەر يەلەرىنە ۇنەمى قولداۋ ٴبىلدىرىپ كەلەدى. ەل بولاشاعى جاستاردى قولداۋ – تەك ۇلتتىق مۋزەيدىڭ عانا ەمەس تاۋەلسىز مەملەكەتىمىزدىڭ پرەزيدەنتى، ەلباسى ن.نازاربايەۆتىڭ دا نەگىزگى ۇستانعان باعىتى. تاۋەلسىزدىكتىڭ 25 جىلدىعىندا تالاي تالانتتى جاستار شىقتى. سولاردىڭ اراسىنداعى شوقتىعى بيىك ٴبىر توبىنىڭ ىشىندە بۇگىنگى كورمە يەسى انار ابجانوۆانىڭ دا ەسىمى ەرەكشە اتالادى. انار بىرىنشىدەن، تالانتىمەن، ەكىنشىدەن، ەڭبەكسۇيگىشتىگىمەن كوپتەگەن جەتىستىكتەرگە قول جەتكىزگەن»، – دەدى د.مىڭباي.

انار ابجانوۆا 2007 جىلى ت. جۇرگەنوۆ اتىنداعى قازاق ۇلتتىق ونەر اكادەمياسىن «ستانوكتىك كەسكىندەمە» ماماندىعى بويىنشا ٴبىتىرىپ شىقتى. سۋرەتشى ٴوزىنىڭ جاستىعىنا قاراماي، بىرنەشە رەت لاۋرەات اتاعىن الدى جانە the artist's magazine 30 th، (اقش)، «ەڭ ۇزدىك اكريل كەسكىندەمە» (اقش)، «factors of visual art» (نيۋ-يورك) سىندى بەدەلدى حالىقارالىق بايقاۋلاردىڭ ماراپاتتارىن يەمدەندى. انار ابجانوۆا «اسەم» ونەر سالونى (سكوتسدال، اريزونا)، new york realism fine art «factors of visual art» بەينەلەۋ ونەرى كورمەسى، «art curated classic septermber prize» (سانتياگو)، تايۆان ونەرىنىڭ «art revolution taipei» كورمەسى، ازيانىڭ «para art tokyo» كورمەسى (توكيو) جانە ت.ب. حالىقارالىق كورمەلەرگە بەلسەنە قاتىستى.

كەسكىندەمە جانە گارفيكانىڭ تەحنيكالىق ادىستەرىن شەبەر مەڭگەرگەن ول قۇرىلىسى جانە ٴتۇسى بويىنشا ادەتتەن تىس اسەم جانە ەموسياعا باي كۇتپەگەن جانە ٴبىرتۋما تۋىندىلار جاسايدى. وعان قالا تىرشىلىگى دە، مۇلگىگەن تىنىشتىق ورناعان جازيرا دالا دا، شاڭقاي تۇستەگى جارىق تا، ىمىرت جابىلعان كەزدەگى كومەسكى تۇستەر دە، جازدىڭ اپتاپ ىستىعى دا، قىستىڭ قىتىمىر ايازى دا بىردەي قىزىقتى. سۋرەتشىنىڭ پەيزاجدارىن قاراعان كەزدە سۋرەتتەر مىڭداعان كۇن شۋاقتارىنان، ۇنەمى وزگەرىپ تۇراتىن نازىك پىشىندەردىڭ، كولەڭكەلەردىڭ تىزبەگىنەن توقىلعانداي اسەر بەرەدى. انارا ابجانوۆا جۇمىستارىن وزىنە ٴتان جانە تانىمال ناقىشپەن جاسايدى. «تاۋ گۇلدەرى»، «ساكۋرا»، «جاسىل باق» كارتينالارىندا باستان وتكەرگەن سەزىمدەردىڭ سۇلۋلىعى، رومانتيكاسى جانە ساتتەرى بەينەلەنگەن. «كەشكى اسەر»، «قاراعاي ورمانىنداعى تاڭ» پەيزاجدارى عاجاپ سىرشىلدىعىمەن ەرەكشەلەنەدى.

ال «قىسقى كوڭىل-كۇي»، «شۋاقتى كۇن»، «دالا اۋەنى» سۋرەتتەرىنەن كوپ جارىق، اۋا جانە ەركىندىك سەزىلەدى. سۋرەتشى ٴوز كارتينالارىندا بارلىق وسى سەزىمدەرگە ۇندەستىك ەرەكشەلىكتەرىنىڭ الۋان تۇرلىلىگىن پايدالانا وتىرىپ شەبەر دە تاماشا رەڭدىك شەشىمدەرمەن قول جەتكىزەدى. انارا ابجانوۆانىڭ ٴاربىر جۇمىسى سۋرەتشىنىڭ ىشكى دراماتۋرگياسىن، قۇپياسىن ازداپ اشىڭقىرايدى جانە ادامنىڭ رۋحاني قۇندىلىقتارىن ٴتۇسىنۋدىڭ كىلتى ىسپەتتى.

كورمە 10 جەلتوقسانعا دەيىن جالعاسادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي