BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

مۇحتار اۋەزوۆ تەاترى تۇركيادان تابىستى ورالدى

استانا، baq.kz. م.اۋەزوۆ اتىنداعى ەلىمىزدىڭ باس قازاق تەاترى ەلباسىنىڭ «بولاشاققا باعدار:رۋحاني جاڭعىرۋ» باعدارلاماسى اياسىندا ٴتۇبىمىز ٴبىر تۇرىك ەلىنە گاسترولدىك ساپارمەن بارىپ تابىستى ورالدى.

مادەنيەت جانە سپورت مينيسترلىگىنىڭ جانە م.اۋەزوۆ تەاترى اكىمشىلىگىنىڭ قولداۋىمەن جالپى تۇركى الەمىنە ورتاق ابىز اتاسى، قوبىز اتاسى يران-عايىپتىڭ «قورقىتتىڭ كورى» قويىلىمىن قويىپ، ۇلكەن قوشەمەتكە بولەنىپ قايتتى.

بىزبەن سۇحبات بارىسىندا م.اۋەزوۆ تەاترى بۇل ساپاردا ەكى ەلدىڭ، جالپى تۇركى الەمىنىڭ اراسىنداعى رۋحاني بايلانىستى نىعايتىپ، حالىقارالىق فەستيۆالدە قازاق تەاترى الەمدىك وزىق دەڭگەيدە ونەر كورسەتە العانىن قازاقستاننىڭ ەڭبەك سىڭىرگەن قايراتكەرى، تەاترىمىزدىڭ اكتەرى بەكجان تۇرىس ايتىپ بەردى.

«ەلباسىمىز، جاھانداعى زاماناۋي قازاقستاندىق مادەنيەت جوباسىن ىسكە اسىرۋدى ٴوزىنىڭ حالىققا ۇندەۋىندە مىندەتتەگەن بولاتىن. جالپى، مادەنيەتىمىزدىڭ وزىق تۇرلەرىن الەمدىك دەڭگەيگە كوتەرىلۋى، باسەكەگە قابىلەتتى حالىقارالىق دەڭگەيدە قىزمەت ەتۋ ٴبىزدىڭ تەاتر ٴۇشىن دە، ۇلت ٴۇشىن دە وتە ماڭىزدى. مادەنيەت ۇلتتىڭ ار-نامىسى، جۇرەگى، بولمىسى بولعاندىقتان، ٴبىر جىلدىڭ ىشىندە ٴبىزدىڭ تەاتر حالىقارالىق ەكى-ۇش ساپارلارعا شىعىپ ونەر كورسەتتى.

مىنە، ٴتۇبىمىز ٴبىر تۇرىك ەلىنىڭ وڭتۇستىگىندە ورنالاسقان ادانا قالاسىندا ونەرىمىزدى كورسەتىپ ۇلكەن ٴبىر قوشەمەتكە بولەنىپ قايتتىق. جالپى ەكى ەلدىڭ، تۇركى الەمىنىڭ اراسىنداعى رۋحاني بايلانىستى نىعايتۋ بارىسىندا وسى شاراعا ٴبىزدىڭ تەاتر الەمدىك وزىق دەڭگەيدە ونەر كورسەتە الدى دەي ويلايمىن!»، -دەدى بەكجان تۇرىس.

ٴتۇبىمىز ٴبىر تۇركى ەلدەر بولعان سوڭ، ەكى ەلدىڭ ىنتىماعى تاۋەلسىزدىك جىلدارى جىلدان جىلعا ارتا تۇسۋدە. قويىلىمدا باستى رول – قورقىتتى سومداعان قازاقستاننىڭ ەڭبەك سىڭىرگەن قايراتكەرى دۋلىعا اقمولدا قويىلىم اياقتالعان سوڭ، جينالعان بارلىق تۇرىك باۋىرلاردىڭ، ادانا ساحناسىندا قويىلىمدى تاماشالاعان كورەرمەندەردىڭ الدىندا قازاق حالقى ەڭ العاش ەگەمەندىگىن العان كەزدە، ەڭ ٴبىرىنشى ەگەمەندىگىن تانىپ، العاش رەت قولداۋ كورسەتكەن تۇركى حالقى ەكەنىن، ونى ەشقاشاندا قازاق حالقى ۇمىتپايتىنىن ايتتى. قازاق پەن تۇرىك مەملەكەتىنىڭ اراسىنداعى دوستىق، مادەني بايلانىستىق سودان بەرى ٴوزىنىڭ جالعاسىن تاۋىپ كەلە جاتقانىن، اكەمتەاتر ۇجىمى تۇركيا ەلىندە وسىمەنەن ٴتورتىنشى رەت گاسترولدىك ساپارمەن كەلىپ جاتقانىن جانە وسىنداي ۇلكەن مۇمكىنشىلىك تۋعىزعان ەكى ەلدىڭ ەلشىلىكتەرىنە، مادەنيەت جانە سپورت مينيسترلىگىنە العىسىن ٴبىلدىردى.

ساپار بارىسىندا ٴتۇبى ٴبىر تۇركى حالىقتارىن جاقىنداتۋ ماقساتىندا ادانا قالاسىندا تەاتر فەستيۆالىنەن بولەك، كينو فەستيۆالدەردە ۇيىمداستىرىلاتىنىن بىلدىك. ولاردىڭ مادەني ومىرىمەن تانىسىپ، ەكى ەل اراسىنداعى بارىس-كەلىستىڭ ٴومىردىڭ بارلىق سالاسىندا دا كەڭىنەن قانات جايىپ جاتقانىن سەزدىك. تەاترىمىزدىڭ اكتەرى، قازاقستاننىڭ ەڭبەك سىڭىرگەن قايراتكەرى باۋىرجان قاپتاعاي جالپى تۇركى الەمىنە ورتاق قورقىت تۋرالى قويىلىمى مەن اكتەرلارىمىزدىڭ شەبەرلىگىنە تۇرىك اعايىنداردىڭ ىقىلاسىنان وتە جوعارى باعا بەرگەندەرىن بايقاعانىن، قازاق تەاترىندا دا وسىنداي ۇلكەن دۇنيەلەر بار ەكەنىن دالەلدەگەنىن ايتتى.

«وسىنىڭ الدىندا فرانسيا ەلىنە بارىپ كەلدىك. ٴبىراق ەلدەن سىرتقا شىققان كەزدە مىندەتتى تۇردە تەاتر ۇجىمىنىڭ الدىندا ۇلكەن جاۋاپكەرشىلىك بولادى. سەبەبى مۇنداي حالىقارالىق فەستيۆالدەرگە كەلگەننەن كەيىن، جۇرەكتە ٴبىر سەرپىلىستەر بولادى. سپەكتاكل بوتەن جەردە قالاي وتەدى ەكەن دەپ ويلايسىڭ. قۇدايعا شۇكىر قويىلىمدى ٴساتتى قويدىق.

قول شاپالاقتاعاندارىنان، جىلى لەبىزدەرىنەن، قويىلىمدى تاماشالاعان ادامداردىڭ جۇزدەرىندەگى كوتەرىڭكى كوڭىل كۇيلەرىنەن شىندىعىندا دا قازاق تەاترىندا دا وسىنداي ۇلكەن دۇنيەلەر بار ەكەن دەگەن وي تۇيگىزدىك دەپ ويلايمىن. بۇرىننان دۇنيە ٴجۇزىن تاڭ قالدىرىپ كەلە جاتقان قازاق تەاترى، سول قالپىنان ايىرىلا قويعان جوق ەكەنىن دالەلدەدىك. تەاتردىڭ ارتىستەرى بار كۇشتەرىن سالدى. سىنشىلار، تەاتر ديرەكتورلارى، لەبىز بىلدىرگەندەردىڭ بارلىعى ناعىز تەاتردى كوردىك دەپ ايتىپ جاتتى. ەلىمىزگە ۇلكەن ماقتانىشپەن قايتتىق»، - دەيدى باۋىرجان قاپتاعاي.

ساپار بارىسىندا م.اۋەزوۆ تەاترى باۋىرلاس تۇركى حالىقتارىنىڭ رۋحاني قۇندىلىقتارىن، مادەني بايلانىسىن ودان ٴارى ورىستەتىپ، مادەني-رۋحاني تاجىريبە الماسۋدى جالعاستىرۋدا تۇركى الەمىنە ورتاق ابىز، قوبىز اتاسى قورقىت تۋرالى قويىلىم ارقىلى لايىقتى ۇلەس قوسىپ قايتقانىن اتاپ وتكىمىز كەلەدى.

ٴتۇبىمىز ٴبىر تۇرىك حالقىمەن قارىم-قاتىناسىمىز تاريحى تەرەڭىنەن باستاۋ الىپ، ول بايلانىس جىل سايىن جوعارى دەڭگەيدە جالعاسىن تاۋىپ كەلەدى. تۇركياعا جاساعان ساپارىمىز دا سونىڭ ٴبىر ايعاعى. قورىتا ايتقاندا، تۋىس تۇرىك ەلىنىڭ بۇگىنگى تىنىس-تىرشىلىگىمەن جاقىنىراق تانىسىپ، مادەني ومىرىنە قانىعىپ، ەلگە كوتەرىڭكى كوڭىلمەن قايتتىق.

ٴادىلعازى باقىت ۇلى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي