مايا ۆەرونسكايا: ۇيدە اكەمنەن وزگەسى قازاقشا بىلمەيدى - ونەر|28 شىلدە 2012، 21:22
BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

مايا ۆەرونسكايا: ۇيدە اكەمنەن وزگەسى قازاقشا بىلمەيدى

 

 
  وتكەندە ەلىمىزگە بەلگىلى جۋرنالداردىڭ بىرىنەن دەكرەتتىك دەمالىسقا شىققان ارۋلاردىڭ اراسىنان ٴسىزدىڭ ٴاتى-جونىڭىزدى بايقاپ  قالدىق. كوگىلدىر ەكراننان كورىنبەي كەتكەنىڭىزگە قاراعاندا، سول ٴسوز شىندىققا جاناسادى-اۋ...
  مەن ٴوز باسىم ىرىمعا قاتتى سەنەتىندىكتەن بۇل تۋرالى ٴقازىر ەشتەڭە ايتقىم كەلمەيدى. نەگىزىنەن «جۇلدىزدار وتباسى» جۋرنالى مەنەن سۇراماي، وزدەرى جاريالاپ جىبەرىپتى. سول ٴۇشىن مەن ول كىسىلەرگە تەلەفون شالىپ، رەنىشىمدى ٴبىلدىردىم. جارايدى، جاريالادى دەلىك. سونىڭ ىشىندەگى جانار شامەل، گۇلناز الىمگەرەي جۇبايىمەن تۇر. مەنىڭ سۋرەتىم جالعىز. ەگەر سول كەزدە مەنەن سۇراسا، جولداسىم ەكەۋىمىز تۇسكەن سۋرەتىمىزدى بەرەر ەدىم. ولار بولسا «ٴبىز مايانىڭ تۇرمىستا، تۇرمىستا ەمەس ەكەنىنەن حابارسىزبىز»، – دەپ ادەيى جاريالاپ جىبەرگەندەي قىلدى. جارىلقاپ اعانى جاقسى بىلەمىن، تالاي رەت جۋرنال رەداكسياسىندا قوناقتا بولدىم. ٴبىراق نەگە ولاي جازعانىن ٴالى كۇنگە تۇسىنبەيمىن. 
  دەگەنمەن تۇرمىس قۇرعانىڭىز تۋرالى اقپاراتتى ەش جەردەن ايتىلماي قالعانداي ما، كەزىكتىرە المادىق قوي. جۇبايىڭىزدىڭ ٴاتى-جونى كىم؟
  مەن «ٴويتتىم، ٴبۇيتتىم» دەپ جارياعا جار سالعاندى ۇناتپايمىن. ەندى امان-ەسەن بوسانىپ العاننان كەيىن  بارلىعىنان ٴسۇيىنشى سۇرايمىن (كۇلىپ). جولداسىمنىڭ ونەر سالاسىنا، از دا بولسا، قاتىسى بار، شىعارماشىلىق ادامى. ٴبىراق ٴقازىر ٴوز ماماندىعى بويىنشا تۇراقتى جۇمىس تاپپاعاندىقتان باسقا سالادان ٴناپاقا تاۋىپ ٴجۇر. ٴاتى-جونى دەيسىز بە؟ ونى كەيىن ايتارمىن (كۇلىپ).
  ٴوزىڭىزدى قانشالىقتى كۇتەسىز، كۇتىنەسىز؟
  جۇمىس ىستەپ جۇرگەنىمدە فيتنەس كلۋبتارعا بارۋعا ۋاقىتىم بولمادى. نەگىزىنەن جاياۋ جۇرۋگە كوپ تىرىسامىن. سونىمەن قاتار تاماقتانۋ جاعىنا باسا ٴمان بەرەمىن. كوكونىس پەن جەمىستى كوبىرەك جەپ، شىرىن ىشۋگە تىرىسامىن. ماعان ەتتەن گورى بالىق تاعامدارى ۇنايدى. ٴشوپ-شالامنان دايىندالاتىن تاعامداردان كەتارى ەمەسپىن. جالپى، كوپ قيمىلداۋعا تىرىساتىنداردىڭ قاتارىنانمىن. كوبىنە كولىكپەن جۇرەتىندىكتەن، كەشكىسىن جاياۋ سەرۋەندەۋ، دەمالىس كۇندەرى تاۋعا شىعۋ، قىستا شاڭعى تەبۋ – سۇيىكتى ٴىسىم. نەگىزى سپورت مەن ٴۇشىن بوتەن ەمەس. بۇرىن كاسىبي تۇردە تاۋ شاڭعىسىمەن اينالىسقانمىن. 
  بۇگىن لوندون وليمپياداسىنىڭ تۇندىگى تۇرىلەدى. ەلىمىزدىڭ قاي سپورتشىسىنا جانكۇيەر بولىپ، قايسى جۇلدە الادى دەپ ٴۇمىت ارتاسىز؟ 
  ەرەكشە جانكۇيەر بولىپ، ۇيدە تاقىم قىسىپ وتىرامىن  دەيتىندەي سپورتشىلارىم جوق. بىزدە  ەڭ مىقتى دامىعان سپورت – كۇرەس تۇرلەرى عوي. مەنىڭ ويىمشا، بالۋاندارىمىز جەرگە قاراتپاي، جۇلدەدەن كەندە قىلمايدى. جالپى، سپورتشىلارىمىزدى ٴبولىپ قارايتىنداي ەشتەڭە جوق. ەلىمىزدىڭ ابىرويىن اسقاقتاتۋ جولىندا بيىكتەن كورىنەدى دەپ سەنەمىن. 
  تۋعان-تۋىس، دوس-جارانداردىڭ ورتاسىندا دا قازاقشا سويلەيسىز بە؟ 
  قازاق مەكتەبىندە وقىعاندىقتان سىنىپتاستارىمنىڭ بارلىعى دا قازاق بالالارى. وسى كۇنگە دەيىن ارالاسىپ،  كەزدەسكەن سايىن قازاقشا شۇيىركەلەسىپ، مارە-سارە بولىپ جاتامىز. كۋرستاستارىممەن دە سولاي. ال ۇيدە... اكەمنەن وزگەسى قازاقشا بىلمەيدى. سوندىقتان ولارمەن بارلىق كەزدە دە ورىس تىلىندە تۇسىنىسەمىز. 
  ٴتىل مامانىسىز. قازاق مەكتەبىنەن قوسىمشا ساعات ۇسىنىپ، ساباق بەرۋ تۋرالى ۇسىنىس تۇسسە، قالاي قابىلدايسىز؟
  فيلولوگيا فاكۋلتەتىنىڭ اۋدارما بولىمىندە وقىدىم. سول كەزدەرى بىزگە پەداگوگيكا ساعاتتارى از بولدى دا، ٴمۇعالىم بولا المايتىمىزدى كەيىندە ٴبىر-اق بىلدىك. سودان كەيىن ٴتۇرلى فيرمالاردا اۋدارماشى بولىپ جۇمىس ىستەدىم. ستۋدەنت اتانعانىمدا اقىلى بولىمدە وقىعاندىقتان، اكە-شەشەمە اۋىرتپالىق تۇسىرمەيىن دەپ وزىمشە ەرتەرەك ەڭبەك ەتتىم. 
  جاز ۋاقىتى بولعاننان كەيىن اركىم شەت ەل اسىپ، كۋرورت، ساناتورييلەردى جاعالاپ كەتەدى. ٴسىزدىڭ دەمالۋ ٴداستۇرىڭىز قالاي؟
  قازاقستانداعى شۇرايلى جەرلەردە دەمالعان ۇنايدى. بىلتىرلارى الماتىنىڭ ىرگەسىندەگى كولساي، شارىن، الاكول سەكىلدى جەرلەردى ارالاپ شىقتىم. بيىل بەلگىلى ٴبىر سەبەپتەرگە بايلانىستى ۇيدەن ۇزاي الماي وتىرعان جايىم بار. قاراپ وتىرساق، ەلىمىزدە كوپتەگەن دەمالىس ورىندارى جەتەرلىك. سول جەرلەردە-اق جانعا جايلى دەمالۋعا بولادى. الاكول جاقتاعى اۋىلدا جەكە ٴۇيىمىز بار. مۇمكىندىگىنشە سول جاققا ٴجيى بارامىز. 
  «كوبىنە كولىكپەن جۇرەمىن»، – دەدىڭىز. كولىك دەمەكشى، تالعامىڭىزداعى كولىك ماركاسى قانداي؟ 
  وسى ۋاقىتقا دەيىن بىرنەشە كولىكتى تاقىمداپ كوردىم. ٴبىراق سولاردىڭ ىشىندەگى ماعان جاققانى – «تويوتا». ٴبىراز ۋاقىت بۇرىن «بمۆ» كولىگىن تىزگىندەدىم. «بمۆ» جىلدام، ٴجۇرىسى جايلى، باعدارشامدا جىلدام قوزعالعانىمەن جىلدام بۇزىلادى. سول ٴۇشىن نەمىستىڭ بۇل اۆتوكولىگى ماعان ۇنامادى. قازىرگى شاعىن دجيپ ساناتىنا جاتاتىن «تويوتا راۆ-4» كولىگىم بار.  
  ٴسىزدىڭ تۋىس-تۋعانىڭىز كوپ پە؟ 
  جاقىن-جۇراعاتتارىمىزدىڭ كوبى رەسەيدە تۇراتىندىقتان، قازاقستاندا تۋىسىمىز سونشالىقتى كوپ ەمەس. قازاقى ۇعىممەن ويلايتىن بولساق، ٴبىر وتباسىنىڭ ورتاشا ەسەپپەن ەڭ جاقىن  50-60 تۋىسى بولادى عوي. سونىمەن سالىستىرعاندا بىزدە تۋىس وتە-ە-ە از. ٴارى كەتكەندە 15 ادامنان اسپايدى (كۇلىپ). 
  سىزگە ٴسۇيسىنىپ، ٴسۇيىنىپ، ىنتىزار بولعان جىگىتتەر جۇرەگىن ۇسىنىپ مازاڭىزدى الۋداي-اق العان شىعار؟
  بىلمەيمىن (ويلانىپ). ٴبىر كەزدەرى تەلەارناعا بىرەۋلەر كەلىپ: «بۇل ماياعا» دەپ گۇل شوقتارىن قالدىرىپ كەتىپ جاتاتىن. حات جازاتىندار بار. مەن تۇرمىستامىن عوي (كۇلىپ). سوندىقتان وسىنداي جاعدايدا بىردەن تۇسىندىرۋگە تىرىسامىن. تۇرمىسقا شىقپاي تۇرعاندا، ونداي جاعدايلار بولعان ەمەس. سەبەبى، ول كەزدە مەنى ەشكىم تانىمايتىن. 
جانكەلدى قارجان

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي