BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

قايداسىز، قاناي ۇلى؟!

بيلىكتىڭ بۇقار جىراۋى بولار دەپ ۇمىتتەنگەن بەكبولات تىلەۋحان اقىرى وسى ٴرولدى ەكراندا عانا سومداۋمەن توقتادى. وندا دا ورنىنان قالبايىپ تۇرىپ، قورباڭ ەتىپ كورىسىپ امانداستى ٴابىلقايىر حانمەن. سوڭعى كۇندەرى كوپ اڭگىمە بولىپ جۇرگەن «جاۋجۇرەك مىڭ بالا» كوركەمفيلمىندەگى ەپيزودتىق ٴرولى عوي، تالاي نارسەنى ەسكە سالىپ وتىرعان.

 

    كۇلبىلتەلەپ نەعىلامىز، حالىقتىڭ ٴبىرىنشى سۇراپ جۇرگەنى مىناۋ: «بەكبولات تىلەۋحان ٴماجىلىستىڭ جاڭا قۇرامىنا نەگە ەنبەي قالدى؟ بۇل وعان قاتىستى ايتىلىپ جۇرگەن ٴتۇرلى الىپ-قاشپا اڭگىمەلەردىڭ راس بولىپ شىققانىن بىلدىرە مە؟ الدە، بەكەڭدى قولداپ جۇرگەن ادامدار وعان «شۋ باسىلعانشا، كولەڭكەدە تۇرا تۇر» دەگەن نۇسقاۋ بەرگەن بە؟»
    شىندىعىندا دىنىمىزدەگى الاۋىزدىقتىڭ ٴبىر بەكبولاتتىڭ پارلامەنت ٴماجىلىسىنىڭ تىزىمىنە ىلىكپەي قالۋىمەن بىتكەنى «شۇكىر» دەگىزەرلىكتەي جاعدايدامىز عوي. شىناشاقتايىنان ەل تىلەۋىن تىلەپ وسكەن بەكبولاتتىڭ دا سابىر ساقتاپ ۇندەمەي كەتكەنى كىسىلىگى شىعار. قالاي دەسەك تە، باسقاسى باسقا، تاپ وسى ازاماتىمىزدىڭ ەل بىرلىگىنە نۇقسان كەلتىرەرلىكتەي ارەكەتكە ارالاسۋى ەش مۇمكىن ەمەس. باياعى جەلتوقساندا الاڭعا شىعىپ، «پوليتەحتان» قۋىلعان البىرتتىعى ٴالى دە بار. بيلىكتى جاقتاپ سويلەي ٴجۇرىپ، ۇلتتىڭ جانىنا باتاتىن جايتتاردى ٴبىر كوتەرىپ تاستايتىنى بار ەدى وقتا-تەكتە.
    «الدە سونىسى جاقپاي قالدى ما؟» – دەيدى بىرەۋلەر. استاپىراللا، ونىڭ دەڭگەيىندەگى اڭگىمەلەردى ايتىپ جۇرگەندەردى شەتتەتە بەرسە، باس كوتەرەر ازامات قالمايدى عوي. جوق، ونىڭ تۇك قاتىسى جوق، قايتا ىشتەگى «پاردى» شىعارعانعا تاپتىرمايتىن امال سول. ەندى نە؟
    «شۇكىر» دەگەندەگى اڭگىمەنىڭ استارى تۇسىنىكتى: قازاقستاننىڭ قاۋىپسىزدىك سالاسى ٴدىن سالاسىنداعى سول شيەلەنىستى دەر كەزىندە شەشكەن سەكىلدى. دەر كەزىندە ەس جيدىق، بىلايشا ايتقاندا. ٴبىراق الدەبىرەۋلەر ايتىپ جۇرگەندەي ول شيەلەنىسكە بەكبولاتتاردىڭ قاتىسى بار ما؟ ٴدىننىڭ ىقپالى كۇشەيىپ كەتپەس ٴۇشىن و باستا ادەيى تارامدالىپ، اراداعى باقاستىق ۇلعايىپ بارا جاتقان سوڭ كەيبىرەۋ نەگىزسىز، كەيبىرەۋ نەگىزدى تۇردە قايتا قۇرىقتالىپ وتىر.
    الاسى مەن قۇلاسىنا قاتار شەكتەۋ قويىلماسا نارازىلىق ٴورشىپ كەتۋى مۇمكىن ەدى سول كەزدە. بەكبولاتتار سونى دۇرىس تۇسىنگەن ٴتارىزدى. جىم-جىرت كەتكەن ازاماتتى بىرەۋلەر: «اقشاعا جاقىن ەدى»، – دەپ تە سوعادى. ينتەرنەتتە وعان قاتىستى ٴبىر ماقالا شىعا قالسا، ٴتۇرلى «كوممەنت» قاپتاپ كەتەتىنى دە وتىرىك ەمەس. وسىعان بايلانىستى ٴبىر سۇراق ەرىكسىز تۋىندايدى: ول – «بەكبولات بۇرىنعىداي حالىقتىڭ سۇيىكتىسى مە؟» دەگەن سۇراق. 
    ٴبىر ازامات: «مەشىتتىڭ الدىندا جۇما نامازعا جينالعان جاماعاتپەن بىرگە ناماز وقىپ تۇرسام، الدىمداعى بىرەۋدىڭ «لاكيروۆاننىي ٴتۋفليى» جىلتىراپ كوزىمە تۇسە بەردى»، – دەيدى. «بۇل كىم؟» دەپ باسىمدى كوتەرىپ قاراسام، بەكبولات تىلەۋحان ەكەن»، – دەپ، سول كورگەنىن كادىمگىدەي وقيعا قىلىپ ايتىپ ٴجۇر. ٴيا، بەكبولات قايدا جۇرسە دە، ەلەۋسىز قالاتىن ادام ەمەس. سودان دا بولسا كەرەك، «بەكەڭ قايدا كەتكەن؟» دەگەن سۇراق تا اندا-ساندا بوي كوتەرىپ قالادى. 
   «قايدا جۇرگەنىن بىلمەدىم، – دەيدى «ٴقازاقفيلمنىڭ» باسشىسى ەرمەك امانشايەۆ. – ««جاۋجۇرەك مىڭ بالاعا» شاقىرعاندا جەكەلەپ ەمەس، ٴبارىمىز وتىرىپ سويلەستىك. ٴبىراق قايدا كەتكەنىن سۇرامادىم... ەگەر تابا الماي جاتساڭىزدار ماعان ايتىڭىزدار»، – دەپ قويدى، تاۋىپ قولىمىزعا ۇستاتاتىنداي قۇددى. 
   ۇزىنقۇلاقتارعا جاقىن جۇرگەن بەلگىلى جۋرناليست بيگەلدى عابدۋلليننەن دە سۇراپ ەدىك: «ٴوزىم دە «بەكبولات قايدا ٴجۇر ەكەن؟ دەپ ويلاپ ٴجۇرمىن»، – دەدى، ويىمىزدى بىردەن ٴتۇسىنىپ. 
   بەكبولات تىلەۋحاننىڭ بۇرىنعى ارىپتەسى امانگەلدى ايتالى دا بىلمەيتىن بولىپ شىقتى. ال «ٴقازىر بەكبولات تىلەۋحان حالىقتىڭ سۇيىكتىسى مە؟» دەگەن سۇراققا: «حالىقتىڭ سۇيىكتىسى دەۋگە ابدەن بولادى. ويتكەنى ول ونەرلى ادام عوي. حالىقتىڭ سۇيىكتىسى بولماسا ونى ىزدەي مە؟ وسى تۇرعىدان كەلگەندە بەكبولات تىلەۋحان حالىقتىڭ قۇرمەتتى ۇلدارىنىڭ ٴبىرى دەپ ەسەپتەيمىن ٴوز باسىم. ەكىنشىدەن، بەكبولات ۇلتتىڭ، حالىقتىڭ ٴسوزىن سويلەيتىن دەپۋتاتتاردىڭ ٴبىرى بولدى. ول ٴوزىن جارنامالاۋدان، حالىقتىڭ كوزىنە ٴتۇسىپ قالايىنشى دەگەن ارزان دۇنيەلەردەن ادا، قاراپايىم جىگىت. سوندىقتان كوپ كورىنە بەرمەيدى دەپ ويلايمىن»، – دەدى. 
   ەراسىل ٴابىلقاسىموۆ بولسا: «بەكبولاتتىڭ قايدا جۇرگەنىنەن حابارىم جوق. ٴبىراق ول ساياساتكەر رەتىندە قىزمەتىن جاقسى اتقاردى. ۇلتىمىزدىڭ ٴسوزىن سويلەدى، ٴتىلىمىزدى قورعادى. ۇلتشىل ازامات. ال ٴدىن جاعىنا كەلەتىن بولساق، ول اركىمنىڭ ٴوز تاڭداۋى. بۇل مەملەكەتىمىزگە، ۇلتىمىزعا زيانى تيمەسە بولدى. تەلەفونى ٴوشىپ تۇرسا، شەت ەلگە كەتكەن شىعار، دەمالىستا شىعار... بولماسا ٴنومىرىن اۋىستىرعان شىعار. سەبەبى، ادامدار مازالاي باستايدى... بەكبولات قانشا ايەل الامىن دەسە دە ٴوزى بىلەدى. ول ونىڭ جەكە شارۋاسى. ٴقازىر دىنگە بەرىلىپ جاتقان ادامدار كوبەيىپ كەتتى. جالپى مەن وعان قارسىمىن. مەن – اتەيستپىن. ال دىنگە فانات بولعان ادام جاقسى ەمەس. بەكبولاتتى ايتىپ وتىرعان جوقپىن بۇل جەردە. جالپى ٴدىن ٴۇشىن ٴومىر سۇرگەن دۇرىس ەمەس. ساياساتكەر حالىق ٴۇشىن ٴومىر ٴسۇرۋى كەرەك. ساياساتكەر بولماساڭ جانىڭداعى ادامدارىڭ ٴۇشىن ٴومىر ٴسۇرۋىڭ كەرەك»، – دەپ بەكبولاتتى بىلاي قويعاندا، ٴدىننىڭ ماسەلەسىن ايتىپ-ايتىپ تاستادى. 
   «facebook»-كە ٴبىر كىرىپ قالعان وپپوزيسيونەر جارماحان تۇياقبايدان دا بەكبولات اعامىزدى سۇرادىق. «بەكبولاتتىڭ قايدا جۇرگەنىن بىلمەدىم. مەن الىپقاشپا وسەكتەرگە سەنبەيمىن. ەلگە بەلگىلى تۇلعا بولعان سوڭ ونداي اڭگىمە بولا بەرەدى. جۇرتتىڭ بارىنە باتىر بول دەپ ايتۋ ارتىقشىلىق. سوندا دا ايتار ٴسوزى بار بەكبولاتتاي جىگىتتەرگە جەتپەي جاتقانى – ەلشىلدىك، پاتريوتتىق سەزىم مەن سونى جەتكىزۋ!»، – دەپ قىسقا قايىردى. 
    مىنە، العان جاۋابىمىز وسىنداي. قىسقاسى، جوعارعى جاقتان قارا كورسەتكەن ٴبىرلى-جارىم تالانتتى ازاماتتارىمىز كەمەدەن ٴتۇسىپ قالعانداي قوڭىلتاقسىپ ٴجۇرمىز ٴقازىر. نۇرلان ونەربايەۆىمىز دا كاسىبي پارلامەنتىمىزگە ىلىكپەي قالدى. رۋحانياتتىڭ ۋىعىن ۇستاپ جۇرگەن ٴۋاليحان قاليجان دا قالپاقتاي ٴتۇستى. الدان سمايىلعا الدانىپ وتىرعان وتىرىسىمىز مىناۋ ەندى. عاريفوللا ەسىمنىڭ جەلديىرمەنى ۇيرەنشىكتى كەبەگىن تارتىپ جۇرە بەرەر. ال ٴبىز وقۋشى داپتەرىنىڭ سىرتىنداعى پيعىلى كەلىسپەگەن ٴبىر سۋرەتتەردى كورە قالساق، بەكبولات تىلەۋحاندى ەسكە الىپ قوياتىن بولدىق. بەكەڭ دەپۋتات كەزىندە سونداي ماسەلەنى شۋ عىپ جىبەرەتىن ەدى، شىمكەنتشە ايتقاندا.
     سونىڭ ٴوزىن ازسىنىپ ٴجۇرۋشى ەدىك، ەندى ول دا جوق. قازاقتا: «يت جوقتا شوشقا ۇرەدى»، – دەگەن ٴسوز بار. ەسەسىنە «ناشا كازاشالار» كۇشەيىپ بارا جاتىر. قازاقشا كيىممەن بۇرىن امانتاي قاجى كولبەڭدەپ مەزى ەتەتىن ەدى، ەندى «ناشا كازاشاداعى» قارا دومالاق جەرىندىرىپ بارادى. «كۇلدىر-كۇلدىر كىسىنەتىپ، كۇرەڭدى مىنەر مە ەكەنبىز؟»، – دەمەكشى، قۇر داۋىس قانا قالدى قالىقتاپ. ارمسترونگتىڭ «ازان شاقىرعان داۋىستى ايدا ەستىدىم» دەگەنىنىڭ كەرى كەلىپ، ٴانشىنى مەشىتتىڭ قاسىنان عانا كورەتىن بولدىق ٴسويتىپ.
    قارتايعانشا قازاقتى «پاي-پايلاتىپ» وتكەن عارەكەڭدەر دە شىن قايراتكەر ەكەن عوي، شىركىن. قازاقتىڭ رۋحى انمەن دە، كۇيمەن دە كوتەرىلەتىنىن بىلگەن ادامدار سولار. سول انشىلىك ٴداستۇر دە بەكبولاتتار ساحنانى شالقىتپاعاننان كەيىن شورت ٴۇزىلىپ قالعانداي كورىنەدى. «داريعا-اي، دومبىرامدى بەرشى ماعان» دەيتىن قازاققا ساياساتىڭ دا جۇرمەي قالادى كەيدە. نە ساياساتتا، نە ساحنادا جوق  ازاماتتى ساعىنعان سوڭ دا وسىلاي دەيمىز امالسىز. ٴسوزدىڭ شىنى سول، حالىق بەكبولات تىلەۋحاندى ىزدەپ ٴجۇر. قايداسىز، قاناي ۇلى؟!      

بالجان مۇراتقىزى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي