BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

ەلوردادا ٴا.ىسمايىلوۆتىڭ «ونەر زاماننىڭ ەنەرگياسى» اتتى كورمەسى اشىلدى

فوتو: Абзал Қалиев

بۇگىن استاناداعى قر ۇلتتىق مۋزەيىندە قر مادەنيەت جانە سپورت مينيسترلىگىنىڭ قولداۋىمەن حالىق سۋرەتشىسى اۋباكىر ىسمايىلوۆتىڭ «ونەر زاماننىڭ ەنەرگياسى» اتتى كورمەسى اشىلدى، دەپ حابارلايدى baq.kz ٴتىلشىسى.

كورمەدە سۋرەتشىنىڭ وسىعان دەيىن بۇۇ-دا، يۋنەسكو-دا ەكسپوزيسيالانعان تۋىندىلارى مەن تاريحي ەكسپوناتتار ۇسىنىلدى. كورەرمەگە كەلۋشىلەر قر ۇلتتىق مۋزەيىنىڭ توپتاماسىنداعى اۋباكىر ىسمايىلوۆتىڭ 30-60 جىلدارداعى اكۆارەلدەرى مەن كاريكاتۋرالارىن جانە ٴا.قاستەەۆ اتىنداعى مەملەكەتتىك ونەر مۋزەيىندەگى كوركەمسۋرەت تۋىندىلارىن تاماشالادى.

شارانىڭ اشىلۋ سالتاناتىندا ٴسوز العان ۇلتتىق مۋزەي ديرەكتورى دارحان مىڭباي: «اۋباكىر ىسمايىلوۆتىڭ جالپى قازاق ونەرىندە الار ورنى بولەك. ول كىسى ەر جەتىپ ەس بىلگەن كەزەڭنەن باستاپ ونەر جولىن تاڭداعان ادام. سونىمەن قاتار ونەردىڭ ٴبىر سالاسىن عانا ەمەس، سان سالاسىن يگەرىپ، كاسىبي دەڭگەيدە ماماندانا بىلگەن ادام. اۋباكىر اعامىزدىڭ كىتاپتى بەزەندىرۋ، پوليگرافيا سالاسىندا اتقارعان جۇمىسىن دا بۇگىندە سول سالادا ۇلگى ەتىپ الۋىمىزعا بولادى. ودان بولەك ەلىمىزدەگى سۋرەتشىلەر وداعىن قۇرىپ، ونى باسقارعان ەڭبەگىن دە ەش ۇمىتپاۋىمىز كەرەك» – دەپ، سۋرەتشىنىڭ كوزى تىرىسىندە اتقارعان ىلكىمدى ىستەرىنە توقتالىپ ٴوتتى.

سۋرەتشىنىڭ قىزى گۇلزاميرا يسمايلوۆا ٴوز كەزەگىندە كورمەنى ۇيىمداستىرۋعا ۇيىتقى بولعان ۇلتتىق مۋزەي ۇجىمىنا العىس ٴبىلدىردى. «بۇگىن مەن وسى اۋديتوريادا ونەردى باعالاي بىلەتىن ازاماتتاردىڭ جينالعانىنا قۋانىشتىمىن. سىزدەر اۋباكىر ىسمايلوۆتىڭ كاريكاتۋرالارىن، اكۆارەل جانە مايلى بوياۋمەن سالىنعان تۋىندىلارىن تاماشالاي الاسىزدار. سول تۋىندىلاردىڭ قاتارىنان 26 كارتينانى ۇلتتىق مۋزەيدىڭ قورىنا تاپسىرامىز» – دەدى، گۇلزاميرا يسمايلوۆا.

شارا بارىسىندا گۇلزاميرا يسمايلوۆاعا قر مادەنيەت جانە سپورت ٴمينيسترى ارىستانبەك مۇحامەدي ۇلىنىڭ العىس حاتى تابىس ەتىلدى.

اۋباكىر ىسمايىلوۆ 1913 جىلعى 2 قاڭتاردا تۋعان. بالا كەزىنەن سۋرەت سالۋعا، ٴمۇسىن جاساۋعا قۇمارتقان ول ونەر سۇيەر قاۋىمنىڭ نازارىنا ەرتە ىلىكتى. سۋرەتشىنىڭ بوزبالا شاعىنان-اق سۋرەت كورمەسى بىرنەشە قالادا وتكەن. كەيىن ول تالانتىن كاسىبي بىلىممەن ۇشتاۋعا مۇمكىندىك الدى.

سۋرەتتەر: ابزال قاليەۆ


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي