BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

جۇلدىز ٴۋاليحان مەن دوسجان تابىلدى قايىرىمدىلىق كەشكە شاقىرادى

2018 جىلدىڭ 14 ساۋىرىندە، ساعات 17: 00-دە astana music hall –دا «سەنىڭ باعىڭدا» اتتى مۋزىكالىق البوم مەن عاجايىپ شوۋدىڭ تۇساۋكەسەرىنە ارنالعان ٴباسپاسوز كونفەرەنسياسى وتەدى، دەپ حابارلايدى baq.kz اقپارات اگەنتتىگى.

شاراعا بەلگىلى وپەرا ٴانشىسى جۇلدىز ٴۋاليحان، تانىمال بالەت ٴارتىسى دوسجان تابىلدى، كومپوزيتور سىرىم ٴنابيقۇلوۆ جانە ت.ب. قاتىسادى.

جوبانىڭ باستى ماقساتى – ونەر ارقىلى ەلىمىزدەگى ونكولوگيالىق اۋرۋلارعا شالدىققان ناۋقاس بالالارعا قول ۇشىن بەرۋ. قوعامدى، بارشا ادامزاتتى مەيىرىمدىلىككە، يگى ىستەر مەن ارەكەتتەرگە شاقىرۋ.

العاش رەت قازاقستاندىق قانا ەمەس، سونىمەن بىرگە الەمدىك ساحنادا ونەر كورسەتەتىن بىرەگەي وپەرا ٴانشىسى مەن تانىمال بالەت ٴارتىسى ەرەكشە شوۋدى جاڭا فورماتتا ۇسىنباق.

شوۋ ايگىلى الەمدىك وپەرا، حالىق اندەرىمەن قاتار، بالەتتىڭ جاڭاشا قويىلىمدارىنان تۇرادى. مۋزىكالىق نومىرلەر دىبىس، داۋىس جانە بي ارقىلى ٴتۇرلى سەزىمنىڭ بۇكىل دراماتۋرگياسىن كورسەتەدى. جاڭا كورسەتىلىمدەگى وپەرا مەن بالەت ونەرى رۋحاني كوڭىل-كۇي عانا سىيلاپ قويماي، سونىمەن بىرگە ەلىمىزدىڭ مادەنيەتىنىڭ دامۋىنا ۇلەس قوسپاق.

جۇلدىز ٴۋاليحاننىڭ اسەم داۋىسى مەن دوسجان تابىلدىنىڭ كەرەمەت پلاستيكاسى كورەرمەنگە بارلىق تاڭعاجايىپ سەزىمدەر مەن ەموسيالاردى تارتۋ ەتەدى. ەكەۋى بىرىگىپ ونەر ارقىلى ماحاببات، سەزىم، ادامگەرشىلىك، ارمان، بەيىمدىلىك، ىنتىزارلىق جانە سۇلۋلىق تۋرالى باياندايدى.

سونداي-اق، مۋزىكالىق شوۋ اياسىندا «سەنىڭ باعىڭدا» اتتى جاڭا كليپتىڭ تۇساۋكەسەرى وتەدى. سەنىڭ باعىڭدا مۋزىكالىق البومى ٴبىر جىل كولەمىندە ازىرلەندى. ٴتۇسىرىلىم جۇمىستارى يتاليا مەن قازاقستاندا ٴوتتى.

سەنىڭ باعىڭدا - بۇل عاجايىپ اسەرگە بولەيتىن جوعارى ساپالى، رەجيسسەرلىك جۇمىس. ساحناداعى كورىنىس پەن دەكوراسيانىڭ لەزدە وزگەرۋى درايۆ سەزىمىن ارتتىرا تۇسپەك. جاڭاشا جارىق قوندىرعىلارى، كۇردەلى ارنايى ەففەكتتەر، مۋزىكا، قوزعالىس ٴبىر جەردە توعىسادى.

اتالعان شاراعا مەملەكەتتىك جانە قوعام قايراتكەرلەرى، زيالى قاۋىم، شوۋ-بيزنەس وكىلدەرى جانە ت.ب قاتىسادى. سول كەشتە ساحنادا قاتەرلى اۋرۋعا شالدىققان بالانىڭ ەسىمى اتالىپ، اناسىنا مۋزىكالىق ديسكىنىڭ ساتىلىمىنان تۇسكەن قارجى تابىستالىپ ەمىنە اۋدارىلاتىن بولادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي