BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

دانەليا تۋلەشوۆانىڭ junior eurovision بايقاۋىنا دايىندىعى قانداي؟

فوتو: dknews.kz

استانا، baq.kz ٴتىلشىسى. 25 قاراشادا مينسكىدە junior eurovision-2018 حالىقارالىق بايقاۋىنىڭ فينالى وتەدى. بايراقتى دودادا قازاقستاننىڭ نامىسىن دانەليا تۋلەشوۆا قورعايدى. قازاقستان ورتالىق كوممۋنيكاسيالار قىزمەتىندە دانەليا تولەشوۆا مەن ونىڭ حالىقارالىق بايقاۋعا قاتىسۋىنا ۇلەس قوسىپ، قولداۋ كورسەتكەن «حابار» اگەنتتىگىنىڭ وكىلدەرى بايقاۋعا دايىندىق بارىسى قالاي ٴجۇرىپ جاتقاندىعى جانە بايقاۋ شارتتارى تۋرالى ايتتى.

«بۇگىن ٴبىز junior eurovision-2018 بايقاۋىنىڭ سوڭعى دايىندىقتارى قالاي ٴجۇرىپ جاتقاندىعىن سىزدەرگە ايتۋ ٴۇشىن جينالىپ وتىرمىز. ەلىمىز اتالمىش بايقاۋعا تاۋەلسىز مەملەكەت رەتىندە العاش رەت قاتىسىپ وتىر. وسى تۇرعىدان الىپ قاراعاندا بۇل اسا ماڭىزدى شارا دەپ ايتۋعا بولادى. 2016 جىلدان باستاپ «حابار» اگەنتتىگى وسى بايقاۋدى ۇيىمداستىراتىن ەۋروپالىق حابار تاراتۋ وداعىنىڭ قاۋىمداسقان مۇشەسى بولىپ سانالادى. بۇل اگەنتتىگىمىزگە قازاقستان اتىنان ٴوز قاتىسۋشىسىن، ونەرپازىن ۇسىنۋعا جاعداي جاسادى. ۇزاق كەلىسسوزدەردەن كەيىن ۇيىمداستىرۋ كوميتەتى بىزگە junior eurovision بايقاۋىنا قاتىسۋعا مۇمكىندىك بەردى»، - دەيدى «حابار» اگەنتتىگى» اق باسقارما ٴتوراعاسىنىڭ ٴبىرىنشى ورىنباسارى رينات كەرتايەۆ.

بيىل 1-31 تامىز ارالىعىندا ەلىمىزدە حالىقارالىق بايقاۋعا ارنايى ىرىكتەۋ ٴوتتى. رەسپۋبليكانىڭ تۇكپىر-تۇكپىرىنەن 200-گە جۋىق جاس ونەرپازدىڭ جۇمىسى كەلىپ ٴتۇستى.

«ولاردى روزا رىمبايەۆا، رينات عايسين، تامارا اسار، باعىم مۇحيتدينوۆا سياقتى مۋزىكا ماماندارى باعالاپ، ۇزدىك 10 ونەرپازدىڭ فينالعا وتۋىنە مۇمكىندىك بەردى. ۇلتتىق فينال وسى جىلى 23 قىركۇيەكتە الماتى قالاسىندا ٴوتتى. كورەرمەندەردىڭ داۋىس بەرۋى مەن قازىلار القاسىنىڭ باعالاۋى ناتيجەسىندە دانەليا تۋلەشوۆا جەڭىمپاز اتانىپ، «وزىڭە سەن» اتتى شىعارماسىمەن باس جۇلدەنى يەلەندى. سودان بەرى ول دايىندىق ۇستىندە»، - دەيدى رينات دۋمان ۇلى.

قازىرگى ۋاقىتتا «حابار» اگەنتتىگى» اق باسقارما ٴتوراعاسى الان عازيز ۇلى اجىبايەۆ باستاعان دانەليا تۋلەشوۆا مەن ونىڭ شىعارماشىلىق ۇجىمى، تەحنيكالىق توپ مينسكىدە قىزۋ دايىندىق جۇمىستارىن جۇرگىزىپ جاتىر.

«بۇگىن حالىقارالىق بايقاۋدىڭ اشىلۋ سالتاناتى مەن جەرەبە تارتۋ ٴراسىمى بولادى. ونىڭ تۇنگى ساعات 23:00-دە «حابار» ارناسىنىڭ ەفيرينەن تاماشالاۋلارىڭىزعا بولادى. 25 قاراشا كۇنى بولاتىن اقتىق سىندا جانە ودان ەكى كۇن بۇرىن باستالاتىن داۋىس بەرۋ ناۋقانىندا قولداۋ كورسەتىپ، جانكۇەيەر بولۋلارىڭىزدى سۇرايمىز. جالپى دانەليا تۋلەشوۆانىڭ ەۋروپالىق حابار تاراتۋ وداعىنا تولەنەتىن جارناسى، ونەرپازدىڭ وسى شاراعا دايىندىعى، كورسەتەتىن مۋزىكالىق ٴنومىرى جانە باسقا دا بايقاۋعا قاتىسۋعا كەتەتىن بارلىق شىعىنى «حابار» اگەنتتىگى بيۋدجەتى ەسەبىنەن قارجىلاندىرىلادى»، - دەدى ول.

دانەليا ٴان بايقاۋىندا «وزىڭە سەن» ٴانىن قازاق جانە اعىلشىن تىلدەرىندە ورىندايدى. داۋىس بەرۋ ٴادىلقازى جانە ينتەرنەت داۋىس بەرۋ ارقىلى جۇزەگە اسادى.

بريفينگ بارىسىندا دانەليا تۋلەشوۆا مينسكىدەن تىكەلەي ەفيرگە شىعىپ، كورەرمەندەرگە العىس ٴبىلدىردى.

«مەنى قولداعاندارىڭىز ٴۇشىن راقمەت! ٴقازىر قوبالجۋلى كۇيدەمىن، ٴبىراق ساحناعا شىققاندا تولقۋ سەزىمى باسىلادى دەپ ويلايمىن»، - دەيدى ول.

25 قاراشا كۇنى «junior eurovision-2018» بالالار ٴان بايقاۋىنىڭ گراند-فينالى، تىكەلەي ەفير استانا ۋاقىتى بويىنشا ساعات 21.00-دە «حابار» تەلەارناسىندا باستالادى. بايقاۋدىڭ ەرەجەسى بويىنشا قاتىسۋشىلارعا داۋىس بەرۋگە 3 ەرەسەك جانە 2 بالادان تۇراتىن قازىلار القاسى جانە كورەرمەندەر قاتىسادى. ورتاق شەشىم بويىنشا ەڭ كوپ داۋىس جيناعان قاتىسۋشى جەڭىمپاز اتانادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

سسىلكي پو تەمە:
كوممەنتاريي