BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

بالا ديماش قانداي بولدى؟

اقتوبەنىڭ پەرزەنتى ديماش قۇدايبەرگەننىڭ ٴوزى دە، ول ايتقان ٴان دە ٴقازىر قىتاي ەلىندە حيتكە اينالىپ ۇلگەردى. قىتاي حالقىن ونەرىمەن ٴتانتى قىلعان ديماشتىڭ بالا كەزدە قانداي بولعانىن اناسى سۆەتلانا ايتبايەۆادان از-كەم سۇراعان ەدىك.

«ەسىمى ايان بەرىپ قويىلدى»

رەسپۋبليكالىق جانە حالىقارالىق بايقاۋلاردىڭ جەڭىمپازى قالىڭ جۇرتقا ديماش قۇدايبەرگەن ەسىمىمەن تانىمال. الايدا، ونىڭ ٴتولقۇجاتىنداعى شىن ەسىمى «دىنمۇحاممەد قۇدايبەرگەن» دەپ جازۋلى تۇر.

«ديماشتىڭ ەسىمى ايانمەن قويىلدى. ونىڭ قىسقاشا تاريحى بىلاي: اتامىزدىڭ ستۋدەنتتىك كەزىنەن بەرى سىيلاستىعى ۇزىلمەگەن باقتىعالي ساندىبايەۆ دەگەن دوسى بولدى. سونىڭ توقساننان اسقان اجەسى سول كەزدە ٴتۇس كورگەنىن، تۇسىندە دۇنيەگە كەلەتىن بالانىڭ ەسىمىن مۇحاممەد قويىڭدار دەپ ايان بەرىلگەنىن ايتتى. سودان اتا-ەنەم بار، جولداسىم قانات بار، پايعامبار ەسىمىنە ٴتىلىمىز ٴتيىپ كەتىپ جۇرەر دەگەن ويمەن، ٴارى اجەنىڭ دە كوڭىلىن قالدىرماي، ٴسال وزگەرتىپ، بالانىڭ ەسىمىن «دىنمۇحاممەد» دەپ قويدى. سودان بەرى دىنمۇحاممەد دەگەن اتى قۇجاتتا عانا جازىلادى، ال ۇيدە، ٴقازىر ٴتىپتى ساحنادا دا ديماش بوپ ايتىلىپ ٴجۇر. بۇلاي ەركەلەتۋ كورنەكتى قايراتكەر دىنمۇحاممەد قونايەۆتان باستالعان ٴۇردىس قوي. ٴبىز دە سودان اسپادىق. قازاقستانداعى بارلىق دىنمۇحاممەدتەر — ديماشتار عوي. ول — جازىلماعان زاڭ»، - دەيدى ديماشتىڭ اناسى.

اسپاپتىڭ كۇيىن بەس جاسىندا بايقاعان

اتا-اناسى ديماشتى بەس جاسىنان باستاپ اقتوبەدەگى ا.جۇبانوۆ اتىنداعى مۋزىكا كوللەدجىندەگى بالالار ستۋدياسىنىڭ فورتەپيانو كلاسىنا بەرىپتى.

«ۇيىمىزدە ٴبىر پيانينو بولدى. ديماش ۇيدە سونىمەن دايىندالىپ جۇرەتىن. نەگىزى فورتەپيانونىڭ ٴبىر جەردەن ەكىنشى جەرگە كوشىرگەندە، قوزعاعاندا، بۇراۋى، ياعني، كۇيى وزگەرىپ كەتىپ جاتادى. ٴبىر قيىنى، بۇل اسپاپتىڭ قۇلاق كۇيىن تەك ارنايى ماماندار عانا كەلتىرەدى. ٴبىر كۇنى جاڭاعى اسپاپتى ٴبىر بولمەدەن ەكىنشى بولمەگە كوشىرگەنىمىزدە كۇيى وزگەرىپ كەتكەن عوي. ونى بىلايعى جۇرت اڭعارا بەرمەيدى، ادەمى دىبىس شىعارىپ تۇرعانعا، سىرت كوزگە ٴبارى دۇرىس كورىنەدى. ٴبىراق، ەستۋ قابىلەتى جوعارى مۋزىكانتتار اسپاپتىڭ كۇيى كەتىپ تۇرعانىن بىردەن بايقاپ قالادى. كانىگى ماماندار ادەتتە قانداي دا ٴبىر اسپاپتىڭ قۇلاق كۇيى ٴسال وزگەرسە، بىردەن كەرى اسەر ەتىپ، باس اۋىرتاتىنىن ايتىپ جاتادى. سودان ديماش سول اسپاپپەن ساباعىنا دايىندالىپ ٴجۇردى. ٴبىر كۇنى ستۋديادا ساباق بەرەتىن مۇعالىمىنە بارىپ، شاعىمدانىپتى: «ۇيدەگى اسپاپتىڭ دىبىسى ماعان تۇك ۇناماي ٴجۇر، باسىمدى اۋىرتادى» دەپ. نەبارى بەس-اق جاستا ەكەن. سوندا دا بولسا، دىبىستىڭ ادەتتەگىدەن ٴسال وزگەرگەنىن سەزىپ تۇرعانى عوي. مۇعالىمىنەن سول اڭگىمەنى ەستىپ، دەرەۋ اسپاپتىڭ كۇيىن كەلتىرۋشى ماماندى شاقىرتىپ، دۇرىستاپ بەرگەنىمىز بار»، - دەيدى سۆەتلانا ايتبايەۆا.

سونداي-اق، بالا ديماش اناسى سۆەتا ساحناعا شىعىپ ٴان سالىپ تۇرعاندا، قاسىنا جۇگىرىپ بارىپ، انشىلەردىڭ ورتاسىندا تۇراتىن بولعان. كىشكەنتاي كەزىندە وزگە بالالار ٴۇيدىڭ، ٴتۇرلى كولىكتىڭ، گۇلدىڭ سۋرەتىن نەمەسە كوميكستەر سالىپ وتىرعاندا، ديماش ۇنەمى اق قاعازعا سىمى شۇباتىلعان ميكروفون، كاسسەتالار، داۋىس ۇلعايتقىش كولونكالاردىڭ، سونداي-اق، مىندەتتى تۇردە ٴوزىنىڭ ۇلكەن ساحنادا ٴان ايتىپ تۇرعانىن بەينەلەيتىن سۋرەتتەر سالاتىن بولىپتى.

اينۇر ٴىلياسقىزى

«اقتوبە» گازەتى


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي