BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

استانادا «كوڭىل كوكتەمى» اتتى كورمە اشىلدى

استانا، baq.kz. 25 قازاندا تالانتتى سۋرەتشى، قازاقستان رەسپۋبليكاسىنىڭ ەڭبەك سىڭىرگەن قايراتكەرى الپىسباي قازىعۇلوۆتىڭ قازاقستان رەسپۋبليكاسى مادەنيەت جانە سپورت مينيسترلىگى مەن قازاقستان رەسپۋبليكاسى ۇلتتىق مۋزەيى بىرلەسىپ ۇيىمداستىرعان «كوڭىل كوكتەمى» اتتى كورمەسى سالتاناتتى تۇردە اشىلدى.

اۆتوردىڭ بالالىق شاعىنان قالىپتاسقان تانىم-تۇسىنىگى مەن قورشاعان ورتا تۋرالى قيال كوكجيەگى سۋرەتشىنىڭ «مەنىڭ بالالىق شاعىمنىڭ اۋىلى»، «بەلدەسۋ»، «كەرۋەن»، «ويىن» سىندى تۋىندىلارىنان كورىنىس تاپقان.

كورمەنىڭ اشىلۋ سالتاناتىندا ٴسوز العان قر مادەنيەت جانە سپورت مينيسترلىگىنىڭ مۋزەيلەر مەن كىتاپحانالار باسقارماسىنىڭ باسشىسى گۇلزەينەپ پازىلوۆا جىلى لەبىزىن ٴبىلدىردى.

«الپىسباي قازىعۇلوۆ – قازاق كوركەمونەرىنىڭ حاس شەبەرى. سۋرەتشىنىڭ شىعارمالارى كەڭىنەن تانىمال. جەكە كورمەلەرى رەسەي، ۇلىبريتانيا، جاپونيا، تۇركيا ت.ب. ەلدەردە وتكىزىلگەن. بۇگىنگى كورمەنىڭ اۆتورى الەمدىك ونەرگە قوسقان سۇبەلى ۇلەسى ٴۇشىن ەۋروپا ونەر وداعىنىڭ ماساريك اتىنداعى سىيلىعىمەن ماراپاتتالعان. ول تەك الپىسباي اعانىڭ شىعارماشىلىعىنا عانا ەمەس، بۇكىل قازاق حالقىنىڭ مادەنيەتىنە بەرىلگەن ۇلكەن ماراپات دەپ تانيمىز»، - دەدى ول.

ا. قازىعۇلوۆتىڭ تۋىندىلارىندا بەرىلگەن شىنايى ٴومىر كورىنىستەرى جاي عانا كوشىرمە ەمەس، ول شەبەردىڭ قىلقالامىنا عانا ٴتان وزىندىك جەڭىل مانەرمەن بەرىلگەن شىعارمالار بولماق. اۆتور تۋىندىلارىنان سۋرەتشىنىڭ جان تەبىرەنىستەرىن، كوركەم الەمىن تاماشالاۋعا بولادى.

«بۇگىنگى كورمەدە ادەمىلىكپەن، اسەمدىكپەن قاۋىشىپ وتىرمىز. الپىسباي ارال تەڭىزىنىڭ جاعاسىندا تۋىپ وسكەن. بۇگىنگە دەيىن 5000-نان استام سۋرەت سالعان. الپىسبايدى قازاقتىڭ پيكاسسوسى دەسەك، ارتىق بولمايدى. كورمە قۇتتى بولسىن! الپىسبايعا شىعارماشىلىق شابىت تىلەيمى!»، - دەدى قوعام قايراتكەرى، كومپوزيتور تولەگەن مۇمامەدجانوۆ.

الپىسباي قازىعۇلوۆ تۋىندىلارىنىڭ وزىنە ٴتان دارالىعى بار. كوپ شىعارمالار اراسىنان ونىڭ ەڭبەكتەرىن وڭاي تانۋعا بولادى. ول سۋرەتشىلىك قىرىنان بولەك، كوڭىل-كۇيدىڭ اسەم كورىنىستەرىن وزىندىك شەبەرلىكپەن ۇيلەستىرەدى. سوندىقتان دا بولار، اۆتور شىعارمالارىنىڭ باسىم بولىگى قارابايىر تىرشىلىك كورىنىستەرىنە ەمەس، تۇڭعيىق ويدىڭ كوركەم كەلبەتىنە ارنالعان.

كورمەگە قىلقالام شەبەرى ا. قازىعۇلوۆتىڭ 100-دەن استام كوركەم سۋرەتتەرى ۇسىنىلىپ وتىر.

كورمە 2018 جىلعى 12 جەلتوقسانعا دەيىن جالعاسادى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي