استانادا ەرجان جاۋبايدىڭ فوتوكورمەسى ٴوتتى

استانا، baq.kz. 21 جەلتوقساندا قر ۇلتتىق سپورت قاۋىمداستىعىنىڭ ۇيىمداستىرۋىمە «التىن تۇعىر – 2018» اتتى ۇلتتىق سپورت ۇزدىكتەرىن ماراپاتتاۋ كەشى ٴوتتى. جيىن بارىسىندا argymaq.kz سايتىنىڭ باس رەداكتورى، baq.kz اقپارات اگەنتتىگىندەگى ارىپتەسىمىز ەرجان جاۋباي «ۇزدىك فوتوگراف» اتالىمى بويىنشا ماراپاتتالىپ، argymaq.kz پورتالى تۇسىرگەن فوتولاردان كورمە ۇيىمداستىرىلدى.

argymaq.kz پورتالى ىسكە قوسىلعانىنا الداعى 2019 جىلى 5 جىل بولادى. سايتتىڭ قۇرىلۋىنا، بۇگىنگە دەيىن توقتاۋسىز جۇمىس ىستەپ تۇرۋىنا بىردەن-بىر سەبەپ – قازاق حالقىنىڭ ٴوزى كيە تۇتار جىلقىعا دەگەن سۇيىسپەنشىلىگى.

«فوتواپپارات ارقالاپ جۇرگەندە مىقتى كارتينا جاسايىن نەمەسە فوتوكورمە وتكىزەيىن دەگەن وي بولماعانى انىق. تەك سايتقا سالار ماقالا، سۇقباتتارىمىزدىڭ ادەمىرەك، شىنايىراق شىعۋى ٴۇشىن كادر ۇستاساق دەگەن ماقسات قانا بولدى. وسى ماقساتتا 4 جىلدان استام ۋاقىتتا فوتواپپارات وبەكتيۆىنە 40 مىڭعا تارتا كادر ٴىلىنىپتى»، - دەيدى ەرجان جاۋباي.

فوتوسۋرەتتەردىڭ اۆتورى ەلباسىنىڭ « ۇلى دالانىڭ جەتى قىرى» ماقالاسى جاريالانعانشا قازاق جىلقىسىنا اسا ٴمان بەرىلمەي كەلگەنى تۋرالى ايتتى.

«4 جىل ىشىندە جىلقىنىڭ اينالاسىندا اڭگىمە قوزعاپ، اتبەگىلەرمەن، جىلقىتانۋشىلارمەن، تاريحشىلارمەن، جىلقى شارۋاشىلىعى وكىلدەرىمەن سۇقباتتاسىپ، پىكىر الماستىق. تالاي كىتاپتى اقتارىپ، تالاي ماقالانى سۇزگىدەن وتكىزدىك. ونىڭ سىرتىندا قانشاما سايىستاردىڭ كورەرمەنى، جازارمانى بولدىق. وسى كەزدەردىڭ بارلىعىندا فوتواپپاراتىمىز قولىمىزدان تۇسكەن جوق دەسەك – ارتىق ايتقاندىق ەمەس. ەلباسىنىڭ ماقالاسىندا ايتىلعان «اتقا ٴمىنۋ مادەنيەتى» ەلىمىزدىڭ ٴبىراز ازاماتىنا وي سالعانى انىق. ارينە، بۇل باستامانىڭ قۇر داڭعازا، ناۋقانشىلدىققا ۇلاسىپ كەتپەگەنى جاقسى»، - دەيدى ول.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!