BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

«استانا وپەرا» رەپەرتۋارى «شوپەنيانا» جانە «شەحەرازادا» بىرەگەي بالەتتەرىمەن تولىقتى

استانا، baq.kz. «استانا وپەرا» حورەوگرافيالىق ونەردىڭ اتاقتى رەفورماتورى ميحايل فوكيننىڭ «شوپەنيانا» جانە «شەحەرازادا» ٴبىر ٴبولىمدى بالەتتەرىنىڭ پرەمەراسى ەلوردا تۇرعىندارى مەن قالا قوناقتارىنا كەرەمەت سىي جاسادى. قويۋشى بالەتمەيستەرلەر – رەسەيدىڭ حالىق ارتىستەرى التىناي اسىلمۇراتوۆا مەن اندريس ليەپا.

سپەكتاكلدەردىڭ پرەمەراسى استانانىڭ 20 جىلدىعىن مەرەكەلەۋ اياسىندا قر مادەنيەت جانە سپورت مينيسترلىگىنىڭ قولداۋىمەن ٴوتتى.

ٴبىرىنشى بولىمدە كورەرمەن نازارىنا كوركەمدىك ۇندەستىگىمەن، عالامات مۋزىكاسىمەن ٴارى بي كەسكىنىنىڭ مولدىعىمەن تاڭعالدىراتىن «شوپەنيانا» رومانتيكالىق بالەتى ۇسىنىلدى. قيمىلداعى ارەكەتتەردىڭ تازالىعى، دالدىگى تاماشالاعان جاننىڭ جانارىن ەلىكتىرىپ جىبەردى. ارتىستەر ٴتۇرلى پىشىندەردى جاسادى: بىرەۋلەرى گۇلگە ۇقساسا، ەندى ٴبىرى گەومەتريالىق ورنەكتەر كەيپىندە بولدى. ساحنا تورىندە اقىننىڭ قيال الەمى شارىقتاپ، ونىڭ اينالاسىندا اۋەدەي جەڭىل بالەرينالار قالىقتايدى. كوگىلدىر تارتقان بولماشى جارىق سپەكتاكلگە ودان سايىن رومانتيكالىق رەڭك ۇستەدى.

ايتا كەتسەك، بيىل «شوپەنيانا» بالەتىنە 110 جىل تولدى، دەگەنمەن ول ٴوزىنىڭ بىرەگەي حورەوگرافياسىنىڭ ارقاسىندا وزەكتىلىگىن جوعالتپاعان. م.فوكيننىڭ سوزىنشە، ول «شارتتى بالەت ٴبيىن ٴوزىنىڭ اسقاق دامۋ كەزەڭىنە قايتارۋعا تىرىسقان».

قويۋشى بالەتمەيستەر ا.اسىلمۇراتوۆا فوكيننىڭ بىرەگەي بالەت ٴستيلىن ٴدال جەتكىزە الدى، حاس شەبەردىڭ قولى باستىڭ بۇرىلۋىنان، جەتەكشى سوليستەردىڭ كوزقاراسىنان باستاپ قول مەن اياق پوزيسيالارىنا دەيىنگى بارلىق نارسەگە جاناسقانى بىردەن سەزىلىپ تۇردى.

نەورومانتيكالىق «شوپەنياناعا» قاراما-قارسى بولعان – كومپوزيتوردىڭ ەڭ ۇزدىك تۋىندىلارىنىڭ ٴبىرى – ن.ريمسكيي-كورساكوۆتىڭ سيمفونيالىق سيۋيتاسىنىڭ مۋزىكاسىنا جازىلىپ، سان الۋان بوياۋلارمەن قانىققان «شەحەرازادا» بالەتى.

مۋزىكا بالەتكە ارنالماعان بولاتىن، الايدا ميحايل فوكين بيگە ٴمىنسىز ۇيلەسەتىن اۋەندەردى ەستي الدى. حورەوگراف مۋزىكالىق ٴماتىندى ەركىن پايدالانعان.

ۋۆەرتيۋرا اياقتالعان سوڭ كورەرمەندەر قويۋشى ديريجەر ارمان ورازعاليەۆكە تولاسسىز قول سوعىپ، ىستىق ىقىلاستارىن ٴبىلدىردى، سپەكتاكل بويى جوعارى دەڭگەيدەگى شەبەرلىگىن پاش ەتكەن «استانا وپەرا» سيمفونيالىق وركەسترىنىڭ تاماشا مۋزىكانتتارىنىڭ ونەرىنە دە شەكسىز قوشەمەت كورسەتىلدى. سكريپكاعا ارنالعان جەكە پارتيانى قالامقاس جۇمابايەۆا جانە باعدات ٴابىلحانوۆ تاماشا ورىندادى.

«شەحەرازادا» – بۇل وقيعالار جەلىسى بار بالەت، ونىڭ باستى تاقىرىبى – سۇلتان شاحريار مەن ونىڭ سۇيىكتى جارى زوبەيدانىڭ قارىم-قاتىناسى. ليبرەتتوعا سايكەس ايەلدەردىڭ وپاسىزدىعىنا كوزى جەتكەن سۇلتاننىڭ ٴىنىسى شاحەزمان اعاسىنا اڭعا شىعۋعا كەڭەس بەرەدى.

سۇلتاندار جوق كەزدە گارەمدە بارلىعى ماحابباتقا بەرىلەدى، «ساۋىق-سايران» قىزا تۇسكەن ساتتە كۇتپەگەن جەردەن سۇلتان قايتىپ ورالادى. ول ٴوز كۇڭدەرىن، بەلسىزدەر مەن قۇلداردى جازالاۋعا بۇيرىق بەرەدى، زوبەيدا قولىنا قانجار الىپ، وز-وزىنە قول جۇمسايدى. شاحريار وپاسىز بولسا دا سۇيىكتى جارىنىڭ ٴولى دەنەسىنە قاراپ، ەگىلە جىلايدى.

رەسەيدىڭ حالىق ٴارتىسى اندريس ليەپا م.فوكيننىڭ بالەتىن العاش رەت قايتا جاڭعىرتىپ وتىرعان جوق. بالەتمەيستەر «شەحەرازادانى» كورنەكتى حورەوگرافتىڭ ەڭ ۇزدىك شىعارمالارىنىڭ ٴبىرى دەپ ەسەپتەيدى.

ەڭ الدىمەن، سپەكتاكل ۇيلەسىمدى، ادەمى ٴارى ەرەكشە بولىپ شىققان. بۇل شىعىس ەكزوتيكاسىندا ەسسىز ماحاببات قۇشتارلىعى جاسىرىنعان پلاستيكالىق دراما. بالەتتانۋشىلاردىڭ ايتۋىنشا، فوكين ەسكى بالەتكە ٴتان كلاسسيكالىق بيدەن، پۋانتالار مەن شارتتى ىم-يشارادان باس تارتىپ، شىعىس ستيلىندەگى جاڭا پلاستيكا ٴتىلىن قالىپتاستىرعان، بارلىق ارەكەت پەن سەزىمدەردى دەنە قالىپتارىمەن، قيمىلدارىمەن جەتكىزگەن.

كورەرمەندەر تولاسسىز قول شاپالاقتارىمەن، «براۆو» دەپ ٴۇن قاتىپ، كوپكە دەيىن سوليستەردى ساحنادان جىبەرگىلەرى كەلمەدى. ادەتتە، مۇنداي بالەتتەر ۇزاق ۋاقىت ادام جادىندا ساقتالىپ، كەيىن ونى قايتا-قايتا كورە بەرگىڭ كەلەدى. ەندى مۇنداي مۇمكىندىك بار، سەبەبى استانالىق تەاتر رەپەرتۋارى وسى سپەكتاكلدەرمەن تولىقتى.

سپەكتاكلدى تاماشالاۋعا قر مادەنيەت جانە سپورت ٴمينيسترى ارىستانبەك مۇحامەدي ۇلى مەن زيالى قاۋىم وكىلدەرى كەلدى.


ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي