BAQ.kz - Қазақстан жаңалықтары USD 384.53 BAQ.kz - Қазақстан жаңалықтары EUR 432.02 BAQ.kz - Қазақстан жаңалықтары RUB 5.9
استانا:

امانجول التايەۆ: ورتاعا كولىك قويىپ، جاس بالالارمەن بايگەگە تالاستىراتىن ايتىسقا قاتىسپايمىن

 
  ٴقايبىر جىلدارى باسىڭىزداعى جاعدايعا بايلانىستى ۇزاق ۋاقىت بويى ٴسىزدى جۇرت ايتىس ساحناسىنان كورە المادى. ودان ايتىستىڭ ەفيردەن كورىنبەي كەتكەنى تاعى بار. سوڭعى ەكى جىلدا وتكەن ەڭ ٴىرى ٴۇش ايتىسقا قاتىسىپسىز. سوڭعىسىندا ارىپتەستەرىڭىز ٴسىزدى «پەنسياعا شىقتى» دەپ ازىلدەپ جاتتى. شىنىمەن ايتىستان كەتۋگە بەكىندىڭىز بە، الدە ۇسىنىستار بولىپ جاتسا، قاتىساسىز با؟ 
  ايتىستا اتتىڭ جالى، تۇيەنىڭ قومىندا يمپروۆيزاسيامەن ولەڭ ارناپ وتىرىپ، حالىققا بارلىعىن تاپتىشتەپ ٴتۇسىندىرۋ مۇمكىن ەمەس. كەشەگى جامبىل، شاشۋباي، بولمان، نارتاي اقىندار 80-90 جاسقا كەلگەنشە ايتىستى عوي. ايتىس اقىنى رەتىندە بويىمدا قۋاتىم تومەندەپ، بولماسا، ولەڭ قازىنام سارقىلعان جوق. سوندىقتان ايتىستان قول ٴۇزىپ، «پەنسياعا» شىقتىم دەي المايمىن. ول ٴسوزدى ساحنادا ازىلگە جاناستىرىپ ايتقان ٴوزىم ەدىم. ٴبىراق ونىڭ سوڭى «وسىلاي بولادى» دەپ ەش ويلاماپپىن. بۇدان كەيىن ورتاعا ٴبىر كولىكتى تىگىپ، جاس بالالارمەن بايگەگە تالاساتىن ايتىسقا قاتىسپايمىن دەپ شەشتىم. ول «مۇلدەم ايتىسپايمىن» دەگەن ٴسوز ەمەس. ايتىستان ٴالى كەتكەن جوقپىن. ٴقازىر جەكە جوبا جاساپ، سول بويىنشا ايتىسام دەپ ٴجۇرمىن. ٴسۇيىنبايدىڭ قاتاعاندى، ٴبىرجاننىڭ سارانى ىزدەپ بارىپ ايتىساتىنى سەكىلدى قازاقستاننىڭ تۇكپىر-تۇكپىرىندەگى ەڭ مىقتى اقىندارمەن جەكپە-جەككە تۇسسەم دەگەن ويىم بار. اي سايىن ەمەس، جىلىنا ەكى اقىنمەن دۇركىرەتىپ ايتىسسام، ماعان سول جەتكىلىكتى. ٴبىر جىلدا ەكى وبلىستا بولسام، بۇيىرسا، بۇل جوبا 7-8 جىلعا سوزىلاتىن شىعار. 
  ٴجيى ۇيىمداستىرىلاتىن ايتىسقا نەگە بارعىڭىز كەلمەيدى سوندا؟
  سەبەبى، ايتىستان كەيىن ساحنا سىرتىندا بولاتىن اڭگىمەلەر ٴتۇرلى الىپ-قاشپا ٴسوز تۋدىرىپ، جۇيكەگە ٴتيىپ، ابدەن شارشاتتى. ٴقازىر عالامتوردا تاسادا وتىرىپ الىپ، «تاساتقىشتار» كوبەيدى. وزدەرىنىڭ قولدارىنان ەشتەڭە كەلمەگەننەن كەيىن بەلگىلى اقىندارعا ٴتىل تيگىزۋدى ومىرلىك ماقساتىنا اينالدىرىپ العانداي. «امانجول 20 جىلدان بەرى بايگە الىپ كەلەدى. وسى تويماي ما، بولماسا، قويماي ما؟ جاستارعا جولىن بەرمەي مە؟»، – دەگەن سەكىلدى اڭگىمەمەن ٴبىزدى دۇنيە ٴۇشىن ايتىستا جۇرگەندەي ەتىپ كورسەتۋگە تىرىسادى. شىندىعىندا ولاي ەمەس. مەنىڭ جەكە جوبا بويىنشا ايتىسام دەۋىم سولاردىڭ كوزىن جەتكىزۋ ٴۇشىن جاسالعان قادام.   
  تۇسىنىكتى. سوڭعى كەزدە «ٴجۇرسىننىڭ ايتىسى»، «مىرزاتايدىڭ ايتىسى» دەگەن تىركەستەر پايدا بولدى. قازاقتىڭ ٴتول ونەرىن بەلگىلى ٴبىر ادامداردىڭ اتىنا تەلۋ قانشالىقتى ورىندى؟ 
  ايتىس قاي كەزدە دە حالىقتىڭ ونەرى. سوندىقتان ونى ٴبىر ادامنىڭ قانجىعاسىنا تەلىپ قويۋدىڭ ٴجونى جوق. ايتىستى ەشكىم ارقاسىنا وڭگەرىپ، وزىنە مەنشىكتەي المايدى. ونى ٴجۇرسىن ەرماننىڭ ٴوزى دە ۇنەمى ايتىپ ٴجۇر. حالىقتىق ونەر بولعاننان كەيىن، ٴجۇرسىن يا مىرزاتايدىڭ ايتىسى دەپ ايدار تاعۋدىڭ تۇككە كەرەگى جوق. حالىق پەن ايتىس – ەگىز ۇعىم. ونىڭ اراسىنا بىرەۋدى تىقپالاپ، جاپسىرۋ كىمگە كەرەك؟! دەيتۇرعانمەن، بۇگىنگى ايتىستى ٴجۇرسىن ەرمانسىز ەلەستەتۋ مۇمكىن ەمەس. ٴتول ونەرىمىزدىڭ قايتا جاڭعىرۋى مەن دامىپ، وركەن جايۋىنا ول كىسىنىڭ قوسقان ۇلەسى ۇشان-تەڭىز. ەسىمى ەلگە بەلگىلى بولىپ، الاشقا تانىلعان اقىنداردىڭ بارلىعىن قازاق دالاسىنىڭ تۇكپىر-تۇكپىرىنەن قولىنا شىراق الىپ ىزدەگەندەي تاۋىپ، جۇلدىزىن جارقىراتتى. ايتىستى قولىنا العالى ايتىس الاڭىندا قانشا بۋىن كەلىپ جاڭاردى. كەشەگى كوپباي وماروۆ، كوكشەتاۋداعى كوكەن شاكەەۆ، سىر بويىنداعى ماناپ اتامىزدان باستاپ قونىسباي، اسەلحان، ٴاسيا سىندى اعا-اپالارىمىزدىڭ لەگى، ودان كەيىنگى مەلس، اقمارال باستاعان ٴبىزدىڭ تولقىن پايدا بولدى. بىزدەن كەيىنگى بالعىنبەك، ايبەك، سەرىكزات، بەكارىستاردىڭ لەگى – ٴبىر توبە. قازىرگى جانداربەك، ديدار سەكىلدى ىنىلەرىمىزدىڭ ورنى ٴبىر بولەك. ايتىستى اكىمشىلىك تە، كەز كەلگەن مادەنيەت باسقارماسى، ٴتىپتى باسقا دا جەكە ادامداردىڭ ۇيىمداستىرعان كەزدەرى كوپ بولدى. ٴبىراق «باس ۇيىمداستىرۋشىنىڭ» ٴبىر ەرەكشەلىگى ٴاربىر اقىننىڭ حالىققا قانشالىقتى ونەر كورسەتە الارلىق قۋاتى بارىن وتە جاقسى بىلەدى جانە اقىندارعا شىعارماشىلىق ادامى رەتىندە عانا قاراپ، بويىنداعى اقىندىق قۋاتىن حالىققا كورسەتۋگە مەيلىنشە مۇمكىندىك بەرەدى. قاي ايتىستا اقىندار قالاي ايتىستى؟ قانداي كەم-كەتىگى بار؟ سونىڭ بارلىعىن ٴبىر كىسىدەي قاداعالاپ وتىرادى. ايتپەسە كەزىندە وزىنشە ايتىس ۇيىمداستىرماق بولىپ تالاپتانعان ادامدار دا بولدى. ٴبىراق ولاردىڭ قابىلەتىن جۇكەڭنىڭ شەبەرلىگىمەن سالىستىرۋعا استە بولمايدى.   
  «ايبەك قاليەۆتى 2010 جىلعى ايتىستا «ارتىق» ايتقانى ٴۇشىن قاتىستىرمادىم»، – دەگەندى ٴجۇرسىن ەرماننىڭ ٴوزى ايتىپ ٴجۇردى ٴبىر كەزدەرى. باۋىرجان حاليوللا نە دەپ قويعانى بەلگىسىز، بۇرىندارى ول دا ايتىس ساحناسىندا قارا كورسەتپەي كەتتى. جالپى، ۇيىمداستىرۋشىلار ايتىستا اقىنداردىڭ اششى ايتقانىنان گورى ماقتاۋ ايتقانىن قۇپ كورەتىن سەكىلدى. ونى از دەسەڭىز، كەيبىر ايتىس اقىندارى قازىلار القاسىن جىرعا قوسۋدى ادەت قىلىپ الدى. بۇل  جاعىنىپ جۇلدە الۋ ما الدە ولاي ايتپاسا شىنىمەن ايتىستان شەت قالا ما؟ 
  قازىلار القاسىن جىرعا قوسىپ ايتۋ جاس اقىنداردىڭ اراسىندا كەڭىنەن ەتەك العانى راس. بۇعان اقىنداردىڭ اعاسى رەتىندە ايتارىم، قازىلاردى جىرلاۋ، ماداق ايتۋ بۇل ٴبىز ٴۇشىن كەرەكسىز مىنەز. ونسىز دا بۇگىنگى ايتىستىڭ پروبلەماسى شاش-ەتەكتەن. قازىرگى قازاق ايتىسىندا ٴحvىىى – ٴحىح عاسىرداعىداي ەركىندىك جوق. كەشەگى ٴسۇيىنباي مەن ٴبىرجان سالداردىڭ اۋزىنان ايتىلعان ٴسوز وتىز رۋلى ەلگە جايىلىپ، حالىقپەن تابىساتىن. بۇگىندە ناۋرىز ايتىسى بولماسا قونايەۆتىڭ مەرەيتويىنا ارنالعان ٴسوز دوداسى حالىققا جەتپەي جاتىر. اناۋ «جاستار جىرلايدى» جوباسىن شىن مانىندەگى تابيعي ايتىس دەپ قابىلداۋ قيىن. ول جاي عانا جاستاردى ايتىسقا تارتۋدىڭ ٴبىر جولى ٴارى ساحنالىق قويىلىمى ىسپەتتەس. شىنايى ايتىستى زالعا جينالعان بىر-ەكى مىڭ ادامنان وزگەلەر كورە الماي ٴجۇر. وركەندەسىن دەسەك، سىنشىلار مەن ادەبيەت زەرتتەۋشىلەرىنىڭ تاراپىنان ايتىس زەرتتەلۋى كەرەك ەدى. ٴاربىر ايتىستىڭ ماتىندەرى جەكە-جەكە توم-توم كىتاپ، بەينەتاسپالار بولىپ شىعۋى ٴتيىس. اقىنداردىڭ ايتىسى ٴباسپاسوز بەتتەرىندە تالدانىپ، كەمشىن تۇسكەن تۇستارى مەن جەتىستىگى ايتىلىپ جاتسا، قانەكەي؟! ايتىس ونەرىن زەرتتەي ٴجۇرىپ بايقاعانىم، وسىنداي جاقسى ٴۇردىس ۇلى وتان سوعىسى جىلدارىندا كەڭىنەن ەتەك الىپتى. جىلىنا 12-13 ايتىس وتسە، ونىڭ ٴبىرى قالماي گازەت بەتتەرىندە تالدانىپ، ايتىلعان وزەكتى ماسەلەلەردىڭ قانشالىقتى شەشىمىن تاپقانى دا نازاردان تىس قالماعان. وعان بيلىك تە مويىنسىنىپ، سودان قورىتىندى شىعاراتىن. بۇگىندە ايتىستاعى ٴسوز ايتىلعان جەرىندە قالىپ جاتىر. 
  سوندا بۇگىنگى ايتىستىڭ قوعامداعى ورنى قانداي بولۋى كەرەك؟ 
  قازىرگى ايتىس بيلىكتىڭ دە، وپپوزيسيانىڭ قولشوقپارى بولماۋى ٴتيىس. كەرىسىنشە، بيلىك پەن وپپوزيسياعا سىن ايتا الاتىن جەكە كۇش بولۋى كەرەك.  ايتىس اقىندارى بيلىكتى سىناسا، ونى وپپوزيسياعا اپارىپ جاپسىرا سالاتىن بولدىق. قازاقتا: «جاقسىنىڭ جاقسىلىعىن ايت، نۇرى تاسىسىن، كەمشىلىگىن ايت، قۇتى قاشسىن»، –  دەيدى. بيلىك پەن وپپوزيسيانىڭ جەتىستىگى مەن كەمشىلىگى قانداي؟ سول سەكىلدى وپپوزيسيانىڭ نەندەي كەمشىلىگى بار، نەسىمەن ٴالسىز؟ ولار نەگە قوعامدا ۇلكەن كۇشكە اينالا الماي كەلەدى؟ سونىڭ بارلىعىن اقىندار جەتەر جەرىنە جەتكىزىپ ايتىپ جاتسا، شىركىن. جالپى، ايتىس اقىندارى مەن قالامگەرلەردىڭ بەلگىلى ٴبىر پارتيالاردىڭ سويىلىن سوعىپ كەتىپ جاتقاندىعىن ٴوز باسىم تۇسىنە المايمىن. ولار ٴتۇرلى توپتاردىڭ سوڭىندا كەتكەننەن گورى حالىقتىڭ ٴوز وكىلى بولعانى الدەقايدا دۇرىس بولار ەدى. 
  رينات زايىتوۆ ٴبىزدىڭ گازەتكە بەرگەن سۇحباتىندا: «اقىنداردىڭ كوبى ايتىسقا الدىن الا ٴوزارا كەلىسىپ، دايىندالىپ، ايتاتىن سوزدەرىن جاتتاپ شىعادى»، – دەگەن ەدى. ونىسىن جۇكەڭ دە راستاپ جاتتى. كەيىن د.قونايەۆ ايتىسىندا اقىندار جۇبىنىڭ جەرەبەمەن انىقتالعانىن بىلەمىز. ٴبىراق سول جاتتاندى جىرلار ۇلتتىق ونەردى قۇردىمعا كەتىرىپ جاتقان جوق پا؟  
  بىزگە دەيىن اقىنداردىڭ بىر-بىرىمەن كەلىسىپ ايتىسۋى بولمايتىن ەدى. كەيىن شىققان كەسەل قازىرگى جاس اقىندارمەن بىرگە ەرە كەلدى. ٴبىزدىڭ الدىمىزداعى اسەلحان، ٴاسيا، سەرىك، قونىسباي سىندى اعا-اپالارىمىزدىڭ ايتىسىندا مۇنداي جاتتاندىلىق بولمادى. مەن دە جاس اقىن رەتىندە سول كىسىلەرمەن بىرنەشە جىل ايتىسىپ، مەلس، مەن، مۇحامەدجان باستاعان جىگىتتەر سول اعا بۋىننىڭ كەنجەسىندەي بولدىق. ەكى اقىننىڭ بىر-بىرىنە «ساحنادا مىنانى ايتايىق، مىنانى ايتپايىق» دەۋى ەشقاشان بولمايتىن. تەك قانا «جاقسى ايتىس بولسىن» دەپ جۇكەڭ اقىنداردى جۇپتاعان كۇيى ساحناعا شىعاراتىن. ٴقازىر كوبەيىپ كەتكەن اتى بەلگىسىز جاس اقىندارعا اعا رەتىندە ايتارىم، بۇدان ارىلۋ كەرەك.  «انانى، مىنانى ايتايىق» دەپ كەلىسىپ الىپ، قويىلىمدىق ايتىس جاساۋ ولارعا ۇپاي اكەلمەيدى. سيركتىڭ اتتارى سەكىلدى بەلگىلى ٴبىر شەڭبەردە عانا شاۋىپ، كەڭ تىنىستا ەپيكالىق اقىندار ٴتارىزدى ايتىسا الماي، ٴوز مۇمكىندىكتەرىن تەجەيدى. مىسالى، مەنىڭ شابىتىم كەلىپ تۇرسا، ٴۇش-تورت ساعات بويى سۋىرىپ سالىپ ايتىسا الاتىنىمدى ماقتانا ايتا الامىن. ويتكەنى، مەن سوعان ۇيرەنگەم. جاس اقىنداردىڭ كوبىسى ٴاربىر شۋماعىن، قاي جەردە نە ايتاتىنىنا دەيىن ەسەپتەپ، دايىنداپ الادى. ٴارى ولار ٴبىزدىڭ الدىمىزداعى اعا بۋىننىڭ ايتىسىن ەلەمەي، قازىرگى ايتىس دامىپ كەتتى دەپ ەسەپتەيدى. كەز كەلگەن ونەردە ٴداستۇر جانە جالعاستىق دەيتىن نارسە بار. الدىڭعى تولقىنعا قاراپ، ولاردىڭ قانداي جەتىستىگى بولدى، سونى بويلارىنا ٴسىڭىرۋ كەرەك. دەسەك تە، د.قونايەۆتىڭ ٴجۇز جىلدىعىنا ارنالعان ايتىستا ەشبىر اقىن الدىن الا جۇپتالماي، ساحنادا جەرەبە تارتىلدى. اقىندار ەل الدىنا شىققانشا كىممەن ايتىساتىنىن بىلمەسە دە، ايتىستىڭ دەڭگەيى تومەن بولعان جوق. بۇل نەنى كورسەتەدى؟ ياعني، اقىندارىمىز كەلىسىمسىز سۋىرىپ سالىپ-اق ايتىسا الادى. سودان بەرى بەلدى، مىقتى دەگەن اقىندار اقىلداسا كەلە، «كەلىسىپ ايتىسۋ دەگەن بولماسىن» دەگەن ورتاق شەشىمگە توقتادى. 
  بىلتىرعى جەلتوقسانداعى ايتىستا باس جۇلدەنى العان ٴجاميعا داۋلەتقىزى: «قازاقستانداعى ايتىس اقىندارى وي تەرەڭدەگى جاعىنان الدا بولعانىمەن، سۋىرىپ سالۋ جاعىنان قىتايداعى قازاق اقىندارىنان كەيىن قالعان» دەگەن پىكىرىن ٴبىلدىردى. وسىعان كەلىسەسىز بە؟ 
  قىتايداعى اقىنداردىڭ دەڭگەيى، سۋىرىپ سالمالىلىعى قازاقستان  اقىندارىنان مىقتى دەگەنگە سەنبەيمىن. بىزدە دەڭگەيى جوعارى، قابىلەتى جوعارى بالعىنبەك يماشەۆ، ايبەك قاليەۆ، سەرىكزات دۇيسەنعازين، ماقسات احانوۆ سەكىلدى اۋزىمەن قۇس تىستەگەن جۇيرىك اقىندارىمىز بارشىلىق. ەگەر دۇنيە جۇزىندە شوعىرلانعان قازاق اقىندارىن ٴبىر جەرگە جيىپ، ايتىستىرعان بولسا، اقىندارىمىز سۋىرىپ سالۋ، كوركەمدىك، وي تەرەڭدىگى جاعىنان الدىنا قارا سالدىرماس ەدى. ٴجاميعانى ۇلكەن قۇبىلىس، فەنومەن رەتىندە قابىلداپ جاتقاندار بولدى. وعان قاتتى تاڭعالۋعا بولمايدى. ەلدى ەلەڭ ەتكىزگەنىنىڭ ٴبىر سيپاتى – ٴجاميعانى بۇعان دەيىن قازاق حالقى كورگەن جوق. بىرنەشە جىلدىق دايىندالعان قورىن اكەلدى دە، توگىپ جىبەردى. ودان كەيىن ەل ەرەكشە قىزىعادى، ارينە. شىنىمەن دە ٴجاميعانىڭ اقىندىق قابىلەتى جاقسى ەكەن. توكپەلەتىپ ايتا بەرەدى. ٴبىراق اراسىندا ۇيقاس ٴۇشىن ايتا سالاتىن جەڭىل سوزدەر كوپتەپ كەزدەسىپ جاتتى. ٴجاميعانىڭ دا ٴبىزدىڭ اقىنداردان ۇيرەنەتىن تۇستارى وتە كوپ. ونىڭ شىن مىقتىلىعى ٴبىزدىڭ ەلگە ٴۇشىنشى يا ٴتورتىنشى رەت كەلگەنىندە عانا  بايقالادى. 
  ايتىستا «جۇلدە ٴبولىس» دەيتىن سىرت كوزگە بايقالا بەرمەيتىن زاڭ بار كورىنەدى. ياعني، اقىنداردىڭ كەزەكتەسىپ جۇلدە الۋ ٴۇردىسى. نەبىر جۇيرىك اقىندار وسىنداي ەرەجەنىڭ قۇربانى بولىپ كەتىپ جۇرگەن سەكىلدى...
  كەيدە قازىلار القاسىنىڭ دەڭگەيى بىردەي بولا بەرمەيدى. سوعان بايلانىستى «مىناۋ وتكەن جولى الدى عوي، بۇل جولى بارماسىن» دەگەن پىكىرلەر دە بولىپ جاتادى. ٴبىراق جۇيرىك اقىنعا «اناۋ نەگە 10، مىناۋ نەگە 20 ماشينە الدى؟» دەۋ جاراسپاس. جۇيرىك ات بايگەدەن ٴجۇز رەت ٴبىرىنشى كەلسە دە، ونىڭ الدىن ەشكىم بوگەي المايدى. سوندىقتان اقىن توپ جاردى ما، باس جۇلدە سوعان بەرىلۋى ٴتيىس. ۇتىلعان اقىننىڭ ەشكىمگە وكپە ايتپاعانى دۇرىس. وسىعان قاراپ قازاق اتامىز: «جۇزدەن جۇيرىك، مىڭنان تۇلپار» دەپ بەكەرگە ايتپاعان. «جۇما سايىن جۇلدە العان مەن ٴبىر جۇيرىك» دەپ قازاق اقىندارى ايتقانداي، اقىندار ٴجيى جۇلدە الىپ جاتسا، وعان جان-جاعىنان كۇبىرلەپ وسەك ايتۋدىڭ قاجەتى جوق. 
  ايتىستا قازىلار باعاسى بويىنشا جەڭىپ تۇرىپ، ٴبىراق ٴوزىڭىزدىڭ جەڭىلگەنىڭىزدى ىشتەي مويىنداعان كەزدەرىڭىز بولدى ما؟
  وسى كۇنگە دەيىنگى ايتىستاردا ونداي وقيعالار دا بولدى. ٴبىراق مەن جەڭىپ تۇرىپ، جەڭىستى قارسىلاس اقىنعا بەرىپ جىبەرىپ، ۇپايىم كەتكەن كەزەڭدەر باستان ٴوتتى. ايتسە دە وزىپ جاتسام تاسىمادىم، جەڭىلدىم دەپ جاسىمادىم. ٴوزىمنىڭ ٴبىر قالىپتى دەڭگەيىمدى ساقتاۋعا تىرىستىم. ايتىس توڭىرەگىندە وكپە-نازدىڭ شىعىپ جاتاتىنى وسىندايدان بولادى. جيىرما ٴۇش جىل ايتىسىپ ٴجۇرىپ، بىردە قاعىس ەستىپ، باسقاشا جاۋاپ بەرگەنىم ٴۇشىن ٴالى كۇنگە ۇيالامىن. ۇمىتپاسام، 1998 جىلى اسەلحان اپامىزبەن ايتىستا ول كىسىنىڭ: «جەتەلەپ قىز-كوكتەمدى كەلىپ تۇرمىن» دەگەنىن باسقاشا ۇعىپپىن. قاربالاس شاقتا مادەنيەتتىلىگىمدى قىزعا تەڭەپ وتىر دەگەن ويمەن باسقاشا جاۋاپ بەردىم. كەيىن تاسپادان كورسەم، ول كىسى مەن ويلاعانداي ايتپاعان ەكەن. سول ٴسوزدى باسقاشا ۇققانىم ٴۇشىن ٴالى كۇنگە اسەلحان اپامىزدىڭ الدىندا ىڭعايسىزدانامىن. ٴاربىر اقىننىڭ ٴوزىنىڭ ايتقان سوزىنە جاۋاپكەرشىلىگى بولۋى كەرەك. «ايتتىم، بولدى» دەپ جەڭىل قاراۋدىڭ ٴجونى جوق. سوزدەن ۇتىلدى ما، ونى دا مويىنداۋ كەرەك. وكىنىشكە قاراي، ٴقازىر اقىندار جەڭىلدىم دەپ مويىنداعىسى كەلمەيدى.
  ٴجۇرسىن ەرمان ٴبىر سوزىندە: «مەن دە ايتىستىڭ توڭىرەگىندەگى اڭگىمەدەن شارشادىم. ٴبارىن قالپىنا كەلتىرىپ، ايتىستىڭ تىزگىنىن امانجول مەن سەرىكزات سەكىلدى ىسكەر جىگىتتەردىڭ قولىنا تاپسىرام»، – دەگەنى بار-دى. ايتىستىڭ شىلبىرىن سىزگە ۇستاتىپ جاتسا، العا قاراي دوڭگەلەتىپ اكەتۋگە قالاي قارايسىز؟
  اقپاندا بولعان ايتىستان سوڭ جۇكەڭ بارلىق اقىنداردى جيناپ، جينالىس وتكىزدى. ىشتەگى ويىن ايتا كەلە، الداعى ۋاقىتتا ايتىسكەر اقىندار وداعىن قۇرىپ، قۇجات جاعى تەزىرەك شەشىمىن تاپسا، باسشىلىق قۇرامىندا سەرىكزات  ەكەۋمىزدىڭ بارىمىزدى ايتقان-تىن. «يساتاي باسشى، مەن قوسشى» دەگەن سەكىلدى سەرىكزات دۇيسەنعازين ەكەۋمىز سول ٴىستىڭ باسى-قاسىندا بولماقشىمىز. ايتىس اقىندارى وداعىن اياعىنان تۇرعىزىپ، كەيىن ەستافەتانى بىزگە بەرەمىن دەگەن جۇكەڭنىڭ ويى بار. 
اڭگىمەلەسكەن – جانكەلدى قارجان

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!

كوممەنتاريي