الماتىدا تولەگەن مەن قىز جىبەككە ەسكەرتكىش قويىلادى

استانا، baq.kz. الماتى قالالىق مادەنيەت جانە ارحيۆتەر باسقارماسى «تولەگەن مەن قىز جىبەك» ەسكەرتكىشىنىڭ ەڭ ۇزدىك جوباسىنا اشىق كونكۋرس جاريالايدى.

«تولەگەن مەن قىز جىبەك» ەسكەرتكىشىنىڭ سۇلبالىق جوباسىنا وتكىزىلەتىن اشىق شىعارماشىلىق كونكۋرستىڭ ماقساتى – قازاقستان رەسپۋبليكاسىندا ورناتىلاتىن ەسكەرتكىشتەر مەن مونۋمەنتتەر جونىندەگى مەملەكەتتىك كوميسسياعا ۇسىنىس ەنگىزۋ ماقساتىندا كوركەم ساۋلەتتىك-مۇسىندىك كومپوزيسيا جاساۋ ارقىلى «تولەگەن مەن قىز جىبەك» ەسكەرتكىشىنىڭ ۇزدىك تۇجىرىمدامالىق مۇسىندىك-كوركەمدىك شەشىمىن انىقتاۋ.

ەسكەرتكىش «قىز جىبەك» ليرو-ەپوستىق داستانىنىڭ، ە.برۋسيلوۆسكييدىڭ «قىز جىبەك» وپەراسىنىڭ يدەيالىق ماعىناسىن، كوركەمدىك وبرازدىق مازمۇنىن كەڭىنەن اشۋى، اينا­لاداعى ساۋلەتتىك جانە لاندشافتىق كورىنىسپەن ۇيلەسۋى، ماڭگىلىك قۇندىلىقتار – ەرلىك پەن ماحابباتتى ماداقتاۋى ٴتيىس. جوبادا ۇزاق مەرزىمگە ٴتوزىمدى ماتەريالدار (ٴمارمار، گرانيت، قولا جانە ت.ب.) قاراستىرىلۋى كەرەك.

تولەگەن مەن قىز جىبەكتىڭ قاراما-قارسى ورنالاسقان مۇسىندەرى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ عيماراتتىڭ قاسبەتىن جاپپاۋى ٴتيىس. مۇسىندەردىڭ ەكى اراسىنداعى اۋماقتا قۇرعاق سۋبۇرقاق جۇمىس ىستەپ تۇراتىنىن ەسكەرۋ قاجەت.

كونكۋرسقا جەكە اۆتورلار جانە اۆتورلىق ۇجىمدار قاتىسا الادى. كونكۋرستىڭ وتكىزىلۋى: 2018 جىلعى 19 قاراشا مەن 19 جەلتوقسان ارالىعى. جوبالار 2018 جىلدىڭ 19 جەلتوقسانىنان كەشىكتىرىلمەي الماتى قالالىق مادەنيەت جانە ارحيۆتەر باسقارماسىنا تاپسىرىلۋ كەرەك.

باسقا قالالارداعى اۆتورلار جوبالاردى بەلگىلەنگەن مەرزىمىنەن كەشىكتىرمەي پوشتالىق تۇبىرتەك ٴنومىرىن الدىن-الا حابارلاي وتىرىپ، الماتى قالاسى، مادەنيەت جانە ارحيۆتەر باسقارماسىنىڭ مەكەن-جايىنا جىبەرەدى.

قوسىمشا اقپاراتتار مەن انىقتامالاردى 8 (727) 272-11-09 تەلەفونى ارقىلى الۋعا بولادى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!