الەمدىك ميۋزيكل «notre dame de paris» قازاق تىلىندە قويىلادى

استانا، baq.kz. ورتالىق ازيادا تۇڭعىش رەت ەلوردا تورىندە «بەيبىتشىلىك جانە كەلىسىم» سارايىندا گيننەستىڭ رەكوردتار كىتابىنا ەنگەن الەمگە ايگىلى «notre dame de paris» ميۋزيكلىنىڭ العاشقى قويىلىمى ٴوتتى. اتاقتى فرانسۋزدىق-كانادالىق ميۋزيكلدىڭ پرەمەراسى 2018 جىلدىڭ جەلتوقساننىڭ 24-نە دەيىن جالعاسىن تابادى.

قازاقستان رەسپۋبليكاسى مادەنيەت جانە سپورت مينيسترلىگى مەن «qazaqconcert» مەملەكەتتىك كونسەرتتىك ۇيىمى ۇيىمداستىرۋىمەن قازاق تىلىندە ساحنالاناتىن «notre dame de paris» قويىلىمى وتاندىق تەاتر ونەرى ٴۇشىن جاڭا جەتىستىك، تىڭ جاڭالىق بولدى.

الەمدىك مادەنيەتتىڭ جاۋھارىنا اينالعان «notre dame de paris» ميۋزيكلى فرانسۋزدىق شانسون مەن سىعان موتيۆتەرىندەگى تانىمال اندەر، حورەوگرافيا، اكروباتتار ونەرى جانە قايتالانباس دەكوراسيالارمەن ورنەكتەلگەن. ميۋزيكل جەلىسىندە قازاق تىلىندە ورىندالاتىن «belle»، «danse mon esmeralda»، «le temps des cathedrales» سەكىلدى ەلۋگە جۋىق ٴاننىڭ اۋەنى تىڭدارماندى بىردەن باۋراپ، كورەرمەننىڭ ىستىق ىقىلاسىنا بولەندى. ۋاقىت سىنىنان ٴوتىپ، تالعامپاز كورەرمەننىڭ ىستىق ىقىلاسىنا بولەنگەن ميۋزيكل ەشكىمدى بەيجاي قالدىرماعانى انىق.

دۇنيەجۇزىن تاڭقالدىرعان «notre dame de paris» ميۋزيكلىنىڭ 20 جىلدىعى ەلوردامىز استانانىڭ 20 جىلدىق مەرەيتويىمەن تۇسپا-تۇس كەلىپ وتىر. العاش رەت 1998 جىلى پاريج قالاسىندا قويىلعان ميۋزيكل الەمنىڭ 9 تىلىنە اۋدارىلعان. ەندى، قازاقستان اتاقتى ميۋزيكلدى ٴوزىنىڭ مەملەكەتتىك تىلىنە اۋدارعان ونىنشى ەل بولىپ وتىر. ەلباسى ۇسىنعان «رۋحاني جاڭعىرۋ» باعدارلاماسى اياسىندا جۇزەگە اساتىن «notre dame de paris» قويىلىمى زاماناۋي قازاقستاننىڭ تاريحىنداعى ايتۋلى وقيعا بولارى ٴسوزسىز.

«notre dame de paris» ميۋزيكلىنىڭ تۇپنۇسقاسىمەن سايكەس كەلەتىن قازاق تىلىندەگى قويىلىم ٴوزىنىڭ تۇپكى سارىنىن ساقتاپ قالدى. قويىلىمنىڭ باستى ەرەكشىلىگى مەن جەتىستىگى – قويىلىمدا ونەر كورسەتەتىن تالانتتى ۆوكاليستەر، اكتەرلەر، اكروباتتار مەن بيشىلەر ەلىمىزدىڭ بارلىق ايماعىنان ىرىكتەلىپ، 5 اي بويى قاتاڭ كاستينگتەن وتكەن وتاندىق ونەرپازدار بولىپ تابىلادى. بۇل قويىلىمعا جەتەكشىلىك ەتەتىن ميۋزيكل اۆتورلارى ر.كوچچانتە مەن ل.پلاموندون، سونداي-اق فرانسۋزدىق پروديۋسەرلەر مەن رەجيسسەرلەر قازاقستاندىق ارتىستەردىڭ جۇمىسىنا جوعارى باعا بەرىپ وتىر. ال ليبرەتتونى قازاق تىلىنە اۋدارعان بەلگىلى اقىن سەرىكزات دۇيسەنعازى.

ٴبىزدىڭ telegram-پاراقشامىزدا قازاقستاننىڭ ماڭىزدى جاڭالىقتارى. جازىلىڭىزدار!